1. ¿Mbaʼépa ñanembovyʼaiterei?

 JEHOVÁ ningo oipota ñande javyʼa, ha jaikuaa upeichaha pórke pe vyʼa ou ijespíritu sántogui (Gál. 5:22). Avei javyʼaitereive ñameʼẽvo ñandéve oñemeʼẽ rangue, upévare igustoiterei ñandéve japredika ha ñaipytyvõ ñane ermanokuérape (Hech. 20:35).

2, 3. a) Heʼiháicha Gálatas 6:4-pe, ¿mbaʼe mbaʼépa ñanepytyvõta jasegi hag̃ua javyʼa Jehová servísiope? b) ¿Mbaʼépa jahecháta ko artíkulope?

² Heʼiháicha Gálatas 6:4-pe, apóstol Pablo heʼi vaʼekue mokõi mbaʼe ñanepytyvõtava jasegi hag̃ua javyʼa (elee). Primero, ñameʼẽ vaʼerã Jehovápe pe iporãvéva, ha katuete ningo javyʼáta jajapóramo upéva (Mat. 22:36-38). Segundo, ndovaléi ñañekompara ótrore. Ñande ningo jaagradese vaʼerã Jehovápe umi mbaʼe ikatúvare jajapo ñaneresãi rupi, jarresivi rupi umi entrenamiénto térã ñandevale haguére. Amo ipahápe umi mbaʼe jarekóva Jehovánte voi omeʼẽ vaʼekue ñandéve. Avei oiméramo ótro ivaleve ñandehegui Jehová servísiope, javyʼa vaʼerã hendivekuéra oipuru haguére upe kapasida omombaʼeguasu hag̃ua Jehovápe, ha ndahaʼéi oñemombaʼeguasu ni ojapo hag̃ua umi mbaʼe chupekuéra ogustávante. Upévare jaiko rangue ñakompeti hendivekuéra, iporãvéta ñaaprende hína chuguikuéra.

³ Ko artíkulope jahecháta mbaʼépa ñanepytyvõta jasegi hag̃ua javyʼa ñapensáramo jepe ndaikatuiha jajapo heta mbaʼe Jehová servísiope. Jahecháta avei mbaʼéichapa ikatu jajapo pe iporãvéva jaipurúvo umi avilida jarekóva, ha mbaʼépa ikatu jajapo ñaaprende hag̃ua pe ehémplo omoĩvagui umi ótro.

4. ¿Mbaʼe situasiónpa ikatu ñanedesanima? Emoĩ peteĩ ehémplo.

⁴ Heta ningo oĩ ñande apytépe umi ndaikatúiva ojapo heta mbaʼe, pórke ijedáma térã hasykatu. Por ehémplo, peteĩ ermána hérava Carol oreko vaʼekue la priviléhio oservívo peteĩ lugár oñekotevẽvehápe. Ha upe tiémpope Carol oreko vaʼekue 35 estúdio bíblico, ha oipytyvõ hetaitereípe oñemeʼẽ hag̃ua Jehovápe ha ojevautisa. ¡Jehová ningo ovendesi Carol predikasión! Péro upéi haʼe ou hasykatu, ha upévare nosẽguasuvéi hógagui. Haʼe heʼi: “Che aikuaa cherasykatu rupi ndaikatumoʼãiha ajapo heta mbaʼe umi ótro ojapoháicha. Péro haʼetévaicha chéve ndachejeroviambaretéiva haʼekuéraicha. Che ningo ndaikatúi ajapo entéro mbaʼe ajaposéva, ha upéva chedesanimaiterei”. Carol ningo ojapose voi entéro mbaʼe ikatúva Jehovápe g̃uarã, ha añetehápe jahecharamoiterei chupe upévare. Ñaimekuaa segúro Jehová ovyʼaitereiha hína heseve, pórke omeʼẽ chupe pe iporãvéva.

5. a) ¿Mbaʼépa ñanemanduʼa vaʼerã oiméramo ñanedesanima umi mbaʼe ndaikatúiva jajapo? b) Jahechaháicha umi fótope, ¿mbaʼéichapa pe ermáno oikove aja entéro osegi omeʼẽ pe iporavéva Jehovápe g̃uarã?

⁵ Oiméramo sapyʼánte ñañedesanima umi mbaʼe ndaikatúivare jajapo, ñañeporandukuaa: “¿Mbaʼépa Jehová ohaʼarõ chehegui?”. Jehová oipota ejapo pe iporãvéva, tahaʼe haʼéva pe situasión erekóva koʼag̃aite. Epensamína ko ehémplore: Peteĩ ermána orekómava mas de 80 áño oñedesanima, pórke haʼe ndaikatuvéima ojapo heta mbaʼe predikasiónpe, ojapo haguéicha yma orekórõ guare 40 áño. Haʼe opensa ojapóramo jepe oikóvo pe iporãvéva, Jehová ndoguerohoryiha chupe. ¿Péro siértopa upéva? Ñapensamína isituasiónre. Orekórõ guare 40 áño, ko ermána omeʼẽ vaʼekue Jehovápe pe iporãvéva, péro koʼág̃a orekópe mas de 80 áño saʼivéma anga ojapo, péro lomímonte haʼe ojapo opa ikatúva chupe g̃uarã. Upéicharõ ikatu jaʼe haʼe ymaite guive koʼag̃aite peve omeʼẽha hína Jehovápe pe iporãvéva. Oiméramo ñapensa ñande servísio ndahaʼeiha sufisiénte Jehová oguerohory hag̃ua, tekotevẽ ñanemanduʼa Jehová haʼeha la odesidítava mbaʼépa la iporãvéva chupe g̃uarã. Ha oiméramo ñande jajapo hína pe iporãvéva, Jehová katuete heʼíta ñandéve: “Oĩ porãiterei la rejapóva” (ekompara Mateo 25:20-23 heʼívare).

6. ¿Mbaʼépa ikatu ñaaprende María ehémplogui?

⁶ Ifasilvétango ñandéve javyʼa hag̃ua ñañekonsentráramo umi mbaʼe si ikatúvare jajapo, ha ndahaʼéi umi mbaʼe ndaikatúivare jajapo. Jahechamína peteĩ ermána hérava María ehémplo. Haʼe ningo hasykatu, ha upéicha rupi ndaikatúi ojapo heta mbaʼe predikasiónpe. Ñepyrũrã haʼe oñedeprimi ha oñandu ndovaleiha mbaʼeverã. Péro upéi imanduʼa ikongregasiónpe oĩha peteĩ ermána hasykatúva ha opyta vaʼekue tupápe. Upémarõ María odesidi oipytyvõ chupe. Haʼe heʼi voi: “Aha hendápe ha ropredika oñondive por teléfono ha por kárta. Ha káda ves ke ajapo upéicha avyʼa ajúvo ógape, ha añeñandu porã ikatu haguére aipytyvõ kuri che ermánape”. Ñande avei javyʼavéta ñapensa meméramo umi mbaʼe si ikatúvare jajapo, ha ndahaʼéi umi mbaʼe ndaikatúivare jajapo. Péro jahechamína koʼág̃a mbaʼéichapa ikatu jaaprovecha ñane situasión oiméramo ikatu jajapo hetave mbaʼe Jehová servísiope térã ñandevale hína peteĩ mbaʼépe.

7. ¿Mbaʼe konsého porãpa apóstol Pedro omeʼẽ vaʼekue kristianokuérape?

⁷ Pe primera kárta oskrivi vaʼekuépe apóstol Pedro, heʼi vaʼekue umi kristianokuérape oipuru hag̃ua umi avilida orekóva omokyreʼỹ hag̃ua iñermanokuérape. Haʼe heʼi vaʼekue voi: “Asegún pe rregálo perresivi vaʼekue káda uno Ñandejáragui, peipurúkena upéva peservi hag̃ua ótrope, pórke peẽ ningo siérvo ivaléva perresivi vaʼekue  Ñandejára mbaʼeporã” (1 Ped. 4:10). Ñande jajapo vaʼerã opa ikatúva jaipuru hag̃ua umi avilida jarekóva, ha ani jajepyʼapy oĩrõ g̃uarã ñaneenvidiáva térã oñedesanimáva upéva káusare. Pórke oiméramo jaikóta jajepyʼapy umívare, nañameʼẽmoʼãi hína Jehovápe la iporãvéva.

8. Heʼiháicha 1 Corintios 4:6, 7, ¿mbaʼérepa ndovaléi ñañemombaʼeguasu umi avilida jarekóva reheve?

⁸ Ñande ningo jaipurupaite vaʼerã pe avilida jarekóva, péro ñañatende vaʼerã ani hag̃ua ñañemombaʼeguasu upévare (elee 1 Corintios 4:6, 7). Por ehémplo oiméramo ñandevale ñamoñepyrũ hag̃ua estúdio bíblico, jaipurupaite vaʼerã upe avilida jarekóva jajapo hag̃ua upéva. Péro jareko haguére upe avilida, ndeʼiséi hína ñañemombaʼeguasutaha upe haguére. Ñamoĩ chupe predikasiónpe jarekoha peteĩ experiénsia iporãitereíva ha ñamoñepyrũ peteĩ estúdio, ha ñamombeʼusetereíma voi pe konduktórpe. Ha jajotopávo pe grúpondi, peteĩ ermána omombeʼu hína okoloka hague rrevísta, ¿mbaʼépa jajapóta? Pe ermána ningo okoloka peteĩ rrevísta, ha ñande katu ñamoñepyrũ voi peteĩ estúdio. Ñande jaikuaa umi ermanokuérape omokyreʼỹtaha ñane experiénsia, péro ikatu jadesidi ñahaʼarõ ha opyta porã vovénte jakasea la oiko vaʼekue. Upéicha jajapóramo nañadesanimamoʼãi pe ermána okoloka vaʼekuépe pe rrevísta, ha jahechaukáta hína ñanembaʼerechakuaaha. Péro jasegi vaʼerã ñañehaʼã ñamoñepyrũ estúdio bíblico. Jarekóramo péva pe avilida, ¡jaipurúkena!

9. ¿Mbaʼéichapa jaipuru vaʼerã umi avilida jarekóva?

⁹ Ñanemanduʼákena jarekóramo oimehaichagua avilida, umíva haʼeha rregálo oúva Jehovágui. Ha umíva umi rregálo jaipuru vaʼerã ñamokyreʼỹ hag̃ua ermanokuérape, ndahaʼéi jajechauka hag̃ua (Filip. 2:3). Ñande ningo katuete javyʼáta ñañehaʼãmbaitéramo jajapo Jehová volunta, ha jaipurúramo umi avilida jarekóva iservísiope. Ñande jajapo upéva, ndahaʼéi jajechauka hag̃uánte térã ñapenságui ñaneimportanteveha umi ótrogui, síno jaipuruségui umi avilida jarekóva ñamombaʼeguasu hag̃ua Jehovápe.

10. ¿Mbaʼérepa naiporãi ñañekompara ótrore?

¹⁰ Jajedeskuidáramo ikatu hína ñañepyrũ ñakompara umi mbaʼe ñande jajapokuaáva umi ótro ndojapokuaáivare. Por ehémplo, peteĩ ermáno ikatu ojapokuaaiterei diskúrso, ha upévape haʼe la ivaleterei. Péro ipyʼapýpe haʼe oapoʼi peteĩ ermánope ijetuʼu haguére chupe ojapo hag̃ua diskúrso. Péro upe ermáno ikatu oime horyeterei ha orresivi porã ermanokuérape hógape, omboʼe porã ifamiliakuérape, ha ikyreʼỹeterei predikasiónpe. Ñamombaʼete ningo oĩ haguére heta ermáno ha ermanakuéra oipurúva  umi avilida orekóva oservi hag̃ua Jehovápe ha oipytyvõ hag̃ua ótrope.

11. ¿Mbaʼérepa japrokurapaite vaʼerã jasegi Jesús ehémplo?

¹¹ Jaikuaa ningo ndovaleiha ñañekompara ótrore, péro ikatu hína ideprovécho ñandéve ñaaprendéramo umi ermanokuéra ifiélva ehémplogui. Ñapensamíntena Jesús ehémplore. Ñande ndahaʼéiramo jepe perfékto haʼéicha, lomímonte ikatu ñaaprende umi kualida porãite orekóvagui ha umi mbaʼe ojapo vaʼekuégui (1 Ped. 2:21). Ñande japrokurapaitéramo jasegi porã iñehémplo, jaservi porãvéta Jehovápe ha ñandevalevéta predikasiónpe.

12, 13. ¿Mbaʼépa ikatu ñaaprende rréi David ehémplogui?

¹² Ñandejára Ñeʼẽme ningo jatopa heta kuimbaʼe ha kuña ifiélva ehémplo, ha ikatúva jasegi haʼekuéra iñimperféktoramo jepe (Heb. 6:12). Ñapensamíntena rréi David ehémplore. Hese ningo Jehová heʼi vaʼekue: “Aguerohoryete ningo David, Jesé raʼýpe” (Hech. 13:22). Péro David iñimperfékto vaʼekue, upévare avése tuichaiterei ofalla. Upéicharõ jepe haʼe omoĩ vaʼekue ehémplo porã ñandéve g̃uarã. ¿Mbaʼérepa? Pórke ojekorrehírõ guare chupe, haʼe nomoĩri exkúsa ojehustifika hag̃ua. Upéva rangue, haʼe oasepta la disiplína oñemeʼẽva chupe, ha ombyasy ipyʼaite guive voi la ojapo vaʼekue. Upéicha rupi Jehová operdona vaʼekue chupe (Sal. 51:3, 4, 10-12).

¹³ Ñande ikatu ñaaprende David ehémplogui jajepyʼamongetávo koʼã pregúntare: “¿Mbaʼéichapa che arreaksiona ajekorrehi jave? ¿Arrekonosépa la che fálla, térãpa amoĩ exkúsa ajehustifika hag̃ua? ¿Añehaʼãntepa amboja ótrore? ¿Aprokurapaitépa anivéma hag̃ua afalla?”. Ikatu ningo jajepyʼamongeta peichagua pregúntare jalee jave la Bíbliape umi ótro Jehová siervokuéra ifiélva ehémplo. ¿Haʼekuérapa ohasa vaʼekue umi situasión ijetuʼúva ñande jahasáva hína koʼág̃a? ¿Mbaʼeichagua kualida iporãvapa haʼekuéra oreko raʼe? Káda kásope ikatu ñañeporandu: “¿Mbaʼépa ikatu ajapo ajogua hag̃ua ko Jehová siérvo ifiélvape?”.

14. ¿Mbaʼéichapa ideprovéchota ñandéve ñañatendéramo umi ermáno ifiélva ehémplore?

¹⁴ Ñandéve ningo ideprovéchota hína ñañatendéramo umi ermanokuéra imitãva ha ijedáva ehémplore. ¿Ikatúpa ñapensa peteĩ ermáno ifiélvare oĩva ñane kongregasiónpe, ha ohasáva hína peteĩ situasión ijetuʼúva? Ikatu ningo hapichakuéra ojopy hína chupe ojapo hag̃ua ivaíva. Ótro katu ihentekuéra oñemoĩ hese, térã hasykatu. ¿Jahechakuaápa ko ermánore peteĩ kualida iporãva ikatúva ñande ñañehaʼã jareko avei?  Jarekóramo enkuénta pe ehémplo porã omoĩva ñane ermáno, ikatu hína ñaaprende umi mbaʼe ideprovéchotava ñandéve jagueropuʼaka hag̃ua umi situasión ijetuʼúva jahasáva hína. ¡Ajépa javyʼaite jareko haguére peichagua ehémplo iporãitéva ikatu vaʼerã jasegi! (Heb. 13:7; Sant. 1:2, 3).

15. ¿Mbaʼe konséhopa omeʼẽ vaʼekue apóstol Pablo ikatúva ñanepytyvõ jasegi hag̃ua javyʼa Jehová servísiope?

¹⁵ Ikatu hag̃ua oĩ pyʼaguapy ha unida kongregasiónpe, káda uno tekotevẽ ñañehaʼãmbaite jajapo pe iporãvéva. Ñapensamíntena umi kristiáno ypykuére, haʼekuéra ningo oreko vaʼekue diferénte avilida ha asignasión (1 Cor. 12:4, 7-11). Péro haʼekuéra ndoikói vaʼekue okompeti ni ojedividipa upe haguére. Upéva rangue Pablo omokyreʼỹ káda únope ojapo hag̃ua la ikatúva entéro “omombarete hag̃ua Cristo rete”. Pablo oskrivi vaʼekue voi umi efésiope: “Káda párte ojapo porãvo hembiapo otokáva chupe, oipytyvõ pe hetépe okakuaa ha oñemombarete hag̃ua ohóvo mborayhúpe” (Efes. 4:1-3, 11, 12, 16). Koʼág̃arupi, umi ojapóva upéicha oñehaʼãmbaite hína oĩ hag̃ua pyʼaguapy ha unida ñane kongregasionkuérape.

16. ¿Mbaʼépa jajerresolve vaʼerã jajapotaha? (Hebreos 6:10).

¹⁶ Jajerresolvékena ndajaikomoʼãiha ñañekompara ótrore. Upéva rangue ñaaprende vaʼerã Jesúsgui, ha ñañehaʼãmbaite jasegi iñehémplo jareko hag̃ua umi kualida haʼe oreko vaʼekue. Jaaprovechákena Jehová siervokuéra ehémplo oĩva la Bíbliape, ha avei umi ermanokuéra ko tiempopegua ehémplo. Upévare jasegi aja jajapo hína pe iporãvéva Jehovápe g̃uarã, jajeroviákena hese. La Biblia heʼi voi: “Ñandejára ningo ihústo hína ha ndahesaraimoʼãi umi mbaʼe pejapo vaʼekuégui” (elee Hebreos 6:10). Jasegíkena javyʼa Jehová servísiope, jaikuaágui haʼe omombaʼetereiha umi mbaʼe jajapóva ñande pyʼaite guive jaipotágui haʼe ñandeguerohory.