1. ¿Mbaʼe métapa ikatu ñamoĩ?

 ÑANDE ningo jahayhueterei Jehovápe, ha upévare jajapose voi la ikatumíva jaservi porã hag̃ua chupe. Péro jajapo hag̃ua upéva ñamoĩmante vaʼerã umi méta iservísiope, por ehémplo jareko hag̃ua hetave kualida iporãva, jajapokuaa hag̃ua peteĩ mbaʼe ipyahúva, ha jahecha hag̃ua mbaʼe mbaʼépa jajapokuaa ñaipytyvõ porãve hag̃ua ñane ermanokuérape. b

2. ¿Mbaʼérepa ñamoĩ vaʼerã umi méta ha ñañehaʼãmbaite jahupyty umíva?

² ¿Mbaʼérepa ñañehaʼãmbaite vaʼerã ñamoĩ umi méta ha japrogresa Jehová servísiope? Primeroite voi pórke ñande jahayhueterei Jehovápe, ha jaipota haʼe ovyʼa ñandereheve. Ha Jehová ningo ovyʼaiterei jaipuru jave umi mbaʼe jajapokuaáva ha umi avilida jarekóva iservísiope. Avei ñande ñañehaʼãse japrogresa ñaipytyvõ porãve hag̃ua ñane ermanokuérape (1 Tes. 4:9, 10). Jaservíramo jepe Jehovápe heta tiémpore, lomímonte ñañehaʼã vaʼerã ñamehora ha japrogresa. Jahechamína mbaʼéichapa ikatu jajapo upéva.

3. Según 1 Timoteo 4:12-16, ¿mbaʼépa apóstol Pablo omokyreʼỹ vaʼekue Timotéope ojapo hag̃ua?

³ Apóstol Pablo oskrivírõ guare pe primera kárta Timotéope, Timoteo haʼéma vaʼekue peteĩ ansiáno ivaléva. Péro Pablo lomímonte omokyreʼỹ vaʼekue chupe osegi hag̃ua omehora ha oprogresa (elee 1 Timoteo 4:12-16). Ha ñañatende porãramo pe konsého haʼe omeʼẽ vaʼekuére chupe, jahechakuaáta Pablo oipota hague Timoteo omehora mokõi mbaʼépe. Primero, oipota kuri oreko hetave kualida iporãva, por ehémplo oporohayhu, ojerovia mbarete ha hekopotĩ. Ha segundo, oipota kuri ojapo porãve heta mbaʼe, por ehémplo olee, oñemoñeʼẽ ha omboʼe  porãve iñermanokuérape. Jahechamína koʼág̃a mbaʼéichapa Timoteo ehémplo ikatu ñanepytyvõ ñamoĩ hag̃ua umi méta si ikatúva jahupyty, ha péicha ñamehora jahávo Jehová servísiope.

4. Según Filipenses 2:19-22, ¿mbaʼérepa Timoteo ideprovechoite vaʼekue Jehová servísiope?

⁴ ¿Mbaʼérepa Jehová ohayhuete vaʼekue Timotéope ha ideprovechoite vaʼekue iservísiope? Pórke haʼe oreko vaʼekue heta kualida iporãitereíva (elee Filipenses 2:19-22). Apóstol Pablo ningo heʼi vaʼekue Timoteo iñumílde, ifiél, iguápo, ha ikonfiávle hague. Haʼe ohayhueterei vaʼekue iñermanokuérape, ha oñehaʼãmbaite vaʼekue oipytyvõ chupekuéra ikatumiháicha. Upévare Pablo ohayhueterei vaʼekue Timotéope, ha ndokyhyjéi vaʼekue omeʼẽ hag̃ua chupe heta asignasión iñimportánteva (1 Cor. 4:17). Ha upeichaite avei oikóta ñande kásope, Jehová ñanderayhuvéta ha ñaipytyvõ porãvéta pe kongregasiónpe ñañehaʼãramo jareko hetave kualida iporãva (Sal. 25:9; 138:6).

5. a) ¿Mbaʼépa ñanepytyvõta jaikuaa hag̃ua mbaʼépepa ikatu ñamehora? b) Jahechaháicha pe fótope, ¿mbaʼéichapa pe ermána ohechauka oñehaʼãmbaiteha imbaʼerechakuaave hag̃ua?

⁵ ¿Mbaʼépepa ikatu ñamehora? Jaikuaa hag̃ua upéva iporãta ñañemboʼéramo Jehovápe, ha upéi jaiporavo espesífikamente peteĩ kualida tekotevẽva jareko. Por ehémplo, ikatu ñañehaʼã ñandekalidave hag̃ua ñande rapichakuérandi, ñaipytyvõ ñane ermanokuérape, jajogueraha porã enterovéndi, ha ñaperdona oĩ jave ofalláva ñanendive. Tuichaiterei avei ñanepytyvõta ñaporandúramo peteĩ ñane amígope mbaʼépepa ikatu ñamehora (Prov. 27:6).

6. ¿Mbaʼe mbaʼépa ikatu jajapo jareko hag̃ua hetave kualida iporãva?

⁶ Ñañehaʼãmbaite jahupyty upe méta. Upearã ikatu jastudia porã pe kualida jarekoséva hína. Por ehémplo, ñamoĩ chupe ijetuʼuha ñandéve ñaperdona hag̃ua ñande rapichakuérape. Upéicharõ iporãta jastudia umi puvlikasión oñeʼẽva upe témare, ha jajepyʼamongeta avei umi ehémplo oĩvare la Bíbliape, tahaʼe umi operdona vaʼekue hapichápe ha avei umi ndojapói vaʼekue upéva. Iporãta avei jastudiáramo Jesús ehémplo, pórke haʼe siémpre operdona vaʼekue hapichakuérape (Luc. 7:47, 48). Haʼe ndoikói vaʼekue omañaiterei umi ifallakuérare, síno oñekonsentra umi kualida porã orekóvare hikuái. Péro umi fariséo upe tiémpope guare ideʼotroite vaʼekue, pórke haʼekuéra ‘oapoʼi voi hapichakuérape’ (Luc. 18:9). Jahecha rire koʼã ehémplo, ikatu jajepyʼamongeta ha ñapensa mbaʼetekópa ñaime ñande. ¿Ñañekonsentrápa umi kualida porã  orekóvare ñande rapichakuéra, térãpa jahechave hína umi idefektokuéra? Térã oimérõ algúno ofalla raʼe ñanendive ha ijetuʼu ñandéve ñaperdona hag̃ua chupe, ikatu ñapensa upe persónare ha ñañehaʼã ñaanota umi kualida porã jaikuaáva orekoha upe persóna. Ha jajapopa rire upéva ñañehaʼã ñapensa mbaʼéichapa Jesús otrata vaʼerãmoʼã upe persónape. ¿Serápa haʼe operdonáne chupe? Jajapóramo koʼã mbaʼe ikatúta hína jakorrehi umi mbaʼe ñapensáva, ha péicha kon el tiémpo ifasilvétama ñandéve ñaperdona hag̃ua ñande rapichakuérape.

7. Ohechaukaháicha Proverbios 22:29, ¿mbaʼéichapa Jehová ojevale hína koʼág̃arupi isiervokuérare?

⁷ Ikatu avei ñamoĩ la méta ñaaprende hag̃ua peteĩ mbaʼe ipyahúva. Ñapensamíntena por ehémplo mbaʼeichaitépa oñembaʼapo vaʼerã oñemopuʼã hag̃ua peteĩ sukursál, peteĩ Salón de Asambléa, térã Salón del Reino. La majoría umi ermáno ombaʼapóva umichahárupi ningo oaprendénte kuri tapére umi ótro ermáno iñexperiensiavévagui. Ohechaukaháicha pe fóto oĩva ko párrafope g̃uarã, tahaʼe ermáno térã ermána, lomímonte ikatu ñaaprende heta mbaʼe ideprovéchotava jajapo hag̃ua mantenimiénto umi Salón del Réinope ha Salón de Asambléape. La Biblia ningo heʼi Jehová haʼeha pe “Rréi opa ára g̃uarã”, ha heʼi avei Jesús haʼeha pe “Rréi omandavéva entéro umi ótro rréigui”. Ha haʼekuéra ohupyty hína hetaiterei mbaʼe porã ojevale rupi koʼã ermáno ha ermána ivaletévare (1 Tim. 1:17; 6:15; elee Proverbios 22:29). Ñande ningo ñambaʼapose Jehovápe g̃uarã ha jaipuruse umi mbaʼe jajapokuaáva ñamombaʼeguasu hag̃ua chupe, ha ndahaʼéi ñane venefisiorãnte (Juan 8:54).

8. ¿Mávapa ikatu ñanepytyvõ jaikuaa hag̃ua mbaʼépepa ñambaʼapove vaʼerã?

⁸ ¿Mbaʼe ipyahúvapa ikatu ñaaprende? Jaikuaa hag̃ua upéva ikatu ñaporandu ñane ansiánope, ha ikatu voi ñane superintendénte de sirkuítope. Por ehémplo haʼekuéra heʼíramo ñandéve ikatuha jajapo porãve umi ñande partekuéra, o jajapo porãve umi estúdio bíblico, jajerure chupekuéra teʼi ñandéve espesífikamente mbaʼépa la tekotevẽva ñamehora. Ha upéi jahecha mbaʼe mbaʼépa ikatu jajapo jahupyty hag̃ua upe méta.

9. ¿Mbaʼépa ikatu jajapo ñandevaleve hag̃ua peteĩ mbaʼépe?

⁹ Ñañehaʼãmbaite jahupyty upe méta. Ñamoĩ chupe ñañehaʼãseha ñamboʼe porãve hag̃ua ñande rapichakuérape. Upearã ikatu jastudia pe folléto Jalee ha ñamboʼe porãve hag̃ua. Ha oñemeʼẽ jave ñandéve peteĩ párte pe rreunión éntre semanaguápe, ikatu jajerure peteĩ ermáno iñexperiénsiavape tohendu de antemáno la ñande párte ha tañandekorrehi la tekotevẽhápe. Ñañehaʼã vaʼerã japrepara voi reheve la ñande partekuéra, péicha umi ótro ohechakuaáta ñanerresponsavleha ha ñañehaʼãha ñakumpli porã umi asignasión oñemeʼẽva ñandéve (Prov. 21:5; 2 Cor. 8:22).

10. Emombeʼu peteĩ ehémplo ohechaukáva mbaʼépa jajapo vaʼerã jasegi hag̃ua ñamehora.

¹⁰ Ñamoĩ chupe jaikuaamaha mbaʼépepa ñamehorase, péro ni ñañehaʼãvéramo jepe nosẽi ñandéve. Upéicha jave, ¡aníkena eñentrega! Ág̃ante osẽta ndéve. Por ehémplo, peteĩ ermáno hérava Garry omombeʼu orekoha peteĩ provléma olee hag̃ua. Upéicha rupi haʼe otĩetereími vaʼerã olee hag̃ua rreunionhápe. Péro haʼe noñentregái, osegi vaʼekue oñehaʼã. Haʼe omombeʼu umi ermáno iñexperiénsiava ha umi puvlikasionkuéra tuichaiterei oipytyvõ hague chupe, ha upévare koʼág̃a haʼe ikatúma ojapo diskúrso rreunionhápe ha asambleahápe jepe.

11. ¿Mbaʼépa ñanepytyvõta jajagarra hag̃ua hetave rresponsavilida Jehová organisasiónpe?

¹¹ La Biblia ndeʼíri mbaʼeichaite pevépa Timoteo ivale vaʼekue ojapo hag̃ua diskúrso ha omboʼe hag̃ua la héntepe. Péro si jaikuaa haʼe  tuichaiterei oprogresa hague ha okumpli porãve hague umi rresponsavilida orekóva, osegi rupi pe konsého Pablo omeʼẽ vaʼekue chupe (2 Tim. 3:10). Upéicha avei ñande ñañehaʼãramo ñaaprende umi mbaʼe pyahu, ikatúta jajagarra hetave rresponsavilida Jehová organisasiónpe.

12. ¿Mbaʼéichapa ndéve nepytyvõma raʼe umi ermanokuéra?

¹² Enterove ningo javyʼaiterei oĩ jave peteĩ ñanepytyvõva. Por ehémplo ñaĩramo ospitálpe, javyʼaiterei ohóramo ñandevisita umi ermáno oĩva pe Komite de Enlásepe térã pe Grúpo de Visíta al Pasiéntepe. Térã jarekóramo peteĩ provléma, javyʼaiterei peteĩ ansiáno oñembojáramo ñane rendápe, ñanerendu, ha oñemoñeʼẽ ñandéve. Térã ijetuʼúramo ñandéve jajapo hag̃ua peteĩ estúdio bíblico, javyʼaiterei peteĩ ermáno iñexperiénsiava oúramo ñanepytyvõ ha omeʼẽ ñandéve umi suherénsia ikatu hag̃uáicha ñamehora. Enterove koʼã ermáno ningo ovyʼaiterei ikatu haguére ñanepytyvõ, ha ñande upéicha avei ikatu javyʼa ñaipytyvõramo ótrope. Jesús heʼi vaʼekue voi: “Javyʼaiteve ñameʼẽvo, ñandéve oñemeʼẽ rangue” (Hech. 20:35). Oiméramo ñande ñañehaʼã hína jajapo koʼã mbaʼe, ¿mbaʼépa ikatu ñanepytyvõ jahupyty hag̃ua upe méta?

13. ¿Mbaʼépa jajapo vaʼerã ñamoĩ jave peteĩ méta?

¹³ Ñamoĩta jave peteĩ méta ñañehaʼã vaʼerã ñandeespesífiko porã. Pórke por ehémplo jaʼénteramo: “Aipytyvõ porãseve ermanokuérape”, upéicha ijetuʼúta ñandéve jaikuaa hag̃ua mbaʼépa la jajapo vaʼerã, ha ijetuʼúta avei japilla hag̃ua jahupytýmapa hína upe méta. Upéva rangue iporãta ñamoĩ peteĩ méta ijespesífikova. Ha ikatu voi ñaanota upe méta, ha jahecha mbaʼépa ikatu jajapo ñakumpli hag̃ua upéva.

14. ¿Mbaʼépa jareko vaʼerã enkuénta ñamoĩ jave peteĩ méta?

¹⁴ Ñamoĩ jave peteĩ méta jareko vaʼerã avei enkuénta ñane situasión ikatuha okambia, ha tekotevẽtaha jajadapta. Ñapensamína por ehémplo apóstol Páblore. Haʼe ningo Tesalónicape oipytyvõ vaʼekue oñeforma hag̃ua peteĩ kongregasión, ha haʼe opytase kuri peteĩ tiémpore hendivekuéra ikatu hag̃uáicha omombarete la ermanokuérape. Péro upe riremínte oñepyrũma ojepersegi chupekuéra, upévare Pablo ohómante vaʼerã kuri upégui pono oapeligra iñermanokuérape (Hech. 17:1-5, 10). Péro Pablo noñedesanimái upe haguére. Haʼe ojadaptánte la isituasión pyahúre, ha tiémpo rire omondo  Timotéope ikatu hag̃uáicha ohecha mbaʼetekópa oĩ la ermanokuéra upépe (1 Tes. 3:1-3). Umi ermáno oĩva Tesalónicape ningo ovyʼaitereíne raʼe Timoteo siémpre oĩ haguére disponívle oipytyvõ hag̃ua chupekuéra, ha oho hag̃ua umi lugár oñekotevẽhápe.

15. ¿Mbaʼéichapa okambia jave ñane situasión ikatu oafekta umi ñane méta? Emoĩ peteĩ ehémplo.

¹⁵ ¿Mbaʼépa ñanemboʼe apóstol Pablo ehémplo? Ñande avei sapyʼánte ikatu ñamoĩ peteĩ méta, péro upéi jahechakuaa ñane situasión nopermitiriha ñandéve jahupyty upéva (Ecl. 9:11). Oiméramo nde rejecha hína upe situasiónpe aníkena eñedesanima, eiporavokuaánte ótra méta si ikatútava ehupyty. Ha upéva hústamente la ojapo vaʼekue Ted ha Hiedi. Ko matrimónio ningo oservi vaʼekue Betélpe, péro upéi hasykatu rupi ohejámante hikuái upe servísio. Péro haʼekuéra ohayhueterei Jehovápe, ha upéicha rupi ohecha mbaʼépa ótra kósa ikatu ojapo hikuái osegi hag̃ua oservi chupe. Ñepyrũrã haʼekuéra ojapo iprekursorádo rregulár, ha tiémpo rire oñenombra chupekuéra prekursór espesiál, ha Tédpe katu oñepyrũ oñentrena oiko hag̃ua chugui superintendénte sustitúto. Péro upéi haʼe ijedavéma ohóvo, ha ohupytýma la eda oheja hag̃ua upe servísio. Upéicha rupi ko matrimónio ohechakuaa ndaikatuveimaha oreko upe priviléhio. Ha upéva oguapyʼíramo jepe hesekuéra, haʼekuéra ohekánte mbaʼépa ótra kósa ikatu ojapo Jehovápe g̃uarã. Ted heʼi: “Ore rohechakuaa nodependeiha peteĩ priviléhiorente javyʼa hag̃ua Jehová servísiope”.

16. ¿Mbaʼépa ñanemboʼe Gálatas 6:4?

¹⁶ Heta vése ikatu okambiánte la ñane situasión ha ñande ndaikatúi jajapo mbaʼeve, pórke nodependéi ñanderehe. Péro upéicha jave ndovaléi ñapensa Jehová nañanderayhumoʼãveimaha ndajarekovéima rupi peteĩ priviléhio. Ndovaléi avei ñañekompara ótrore ha ñapensa haʼekuéra iñimportanteveha ñandehegui oreko rupi peteĩ priviléhio. Hiedi heʼi: “Ndajavyʼamoʼãi ningo jaikóramo ñañekompara ótrore ha ñañehaʼã jahupytyse chupekuéra, pórke káda únongo la ñane situasión idiferénte” (elee Gálatas 6:4). Entónse oiméramo okambia raʼe la ñane situasión ha ndaikatuvéima jahupyty peteĩ méta jareko vaʼekue, jahekánte vaʼerã ótra kósa ikatúva jajapo jasegi hag̃ua jaservi Jehovápe ha ñane ermanokuérape. c

17. ¿Mbaʼe mbaʼépa ikatu jajapo jahupyty hag̃ua umi méta jarekóva?

¹⁷ ¿Mbaʼépa avei ñanepytyvõta jahupyty hag̃ua umi méta jarekóva Jehová servísiope? Upearã ñañehaʼã vaʼerã ñamantene peteĩ vída sensílla ha ani jadevepa rei. Ha oiméramo jareko peteĩ méta tuicháva, ñañehaʼã vaʼerã upe mboyve ñamoĩ umi méta michĩ mimíva ñanepytyvõtava mbeguekatúpe jahupyty hag̃ua upe  méta tuichavéva. Por ehémplo, ñamoĩ chupe jajaposeha la ñande prekursorádo rregulár. Upe mboyve ikatúma hína jajapo la ñande prekursorádo auxiliár de kontínuo, ikatu hag̃uáicha jajepokuaáma jahávo hese. Térã oiméramo nde la ne méta oiko ndehegui siérvo ministeriál, upéicharõ ikatu eñehaʼã esẽve predikasiónpe ha avei evisita umi ermáno ijedáva ha hasykatúvape. Umi mbaʼe reaprendéva hína koʼag̃aite, ikatúta nepytyvõ amo gotyove rekumpli hag̃ua umi méta erekóva. Nde eñehaʼãnte vaʼerã ejapo la ikatumíva guive ekumpli porã hag̃ua umi asignasión erekóva koʼág̃a (Rom. 12:11).

18. ¿Mbaʼépa ñanemboʼe ermána Beverley ehémplo? Ehecha pe fóto.

¹⁸ Aníkena núnka ñapensa ñandeedáma haguére ndaikatumoʼãveimaha jahupyty umi méta jarekóva. Ñapensamíntena por ehémplo peteĩ ermána héravare Beverley. Haʼe ningo oreko 75 áño ha hasypaitéma anga, upéicha rupi ndaikatuvéima oguata porã. Péro haʼe lomímonte oapojase kuri pe kampáña espesiál oñeinvita hag̃ua la héntepe Konmemorasionhápe. Upévare haʼe omoĩ umi méta ijespesífikova ha ovyʼaiterei ohupytýrõ guare umíva. Ha ndahaʼéi voi upévante, iñehémplo omokyreʼỹ avei kuri umi ótro ermanokuérape osegi hag̃ua oñehaʼãve predikasiónpe. ¡Katuete ningo Jehová omombaʼeterei la traváho ojapóva ñane ermáno ha ermanakuéra ijedáva ha iguapoitéva! (Sal. 71:17, 18).

19. ¿Mbaʼe métapa ikatu ñamoĩ?

¹⁹ Upéicharõ, ¡ñamoĩkena umi méta si ikatútava jahupyty! Upearã, ñañehaʼãkena jareko umi kualida porã ikatu hag̃uáicha Jehová amás día ñandeguerohory. Ñaaprendékena umi mbaʼe pyahu Jehová servísiope ñandedeprovechove hag̃ua chupe ha iñorganisasiónpe. Ha jahechákena avei mbaʼe mbaʼépa ikatu jajapove ikatu hag̃uáicha ñaipytyvõ ñane ermáno ha ermanakuérape. d Oiko haguéicha Timotéore, Jehová katuete avei ñanepytyvõta ikatu hag̃uáicha ‘enterove ohechakuaa ñañakãrapuʼãha jahávo’ (1 Tim. 4:15).