Peteĩ ermáno ojapóramo upéva, pe kongregasiónpe g̃uarã opáma pe primer matrimónio, ha la ovaléva koʼág̃a haʼe pe matrimónio ipyahúva. Ñantende hag̃ua mbaʼérepa jaʼe upéva, ñaanalisamína la Jesús heʼi vaʼekue ko témare.

Mateo 19:9-pe Jesús heʼi vaʼekue peteĩ matrimónio opataha sólamente peteĩva omoakãratĩramo pe ótrope. Haʼe heʼi vaʼekue: “Oimeraẽ ojedivorsiáva hembirekógui, ndahaʼéiramo pe kuña hekovai haguére, ha upéi omenda jey ótrare, pe kuimbaʼe oporomoakãratĩ hína”. La Jesús heʼi vaʼekue ñanemboʼe mokõi mbaʼe iñimportantetereíva: 1) Umi omendáva ikatu ojedivorsia sólamente peteĩva omoakãratĩramo pe ótrope, ha 2) peteĩ kuimbaʼe ojedivorsiáramo, hembireko nomoakãratĩriramo jepe chupe ha upéi omenda jey ótrare, en rrealida omoakãratĩ hína pe hembireko ypykuépe. a

Péro ñamoĩ chupe peteĩ ermáno omoakãratĩha hembirekópe ha upéi ojedivorsia chugui. ¿Opytátapa pe ermáno lívre omenda jey hag̃ua ótrare? Upéva odepende la odesidívare pe ermána. ¿Mbaʼérepa jaʼe upéva? Pórke upe kásope, pe ermána la orekóva derécho odesidívo operdonátapa la iménape térãpa nahániri. Haʼe odesidíramo noperdonamoʼãiha chupe ha ojedivorsia chugui, mokõivéva opytáta lívre omenda jey hag̃ua ótra persónare opa rire umi tramitekuéra de divórsio.

Péro ikatu avei pe ermána heʼi opytaseha la iménandi ha operdonaseha chupe. ¿Mbaʼépa oikóta upe kásope pe ermáno lomímonte odesidíramo ojedivorsiataha la hembirekógui? Pe ermána heʼi rupi operdonaseha la iménape ha okontinua la imatrimónio, upéicharõ pe ména ndopytamoʼãi lívre omenda jey hag̃ua ótra persónare ojedivorsiáramo jepe la hembirekógui. Ha upe rire oñemohatãramo la opensávape ha lomímonte omenda jey ótrare, omoakãratĩ jeýta hína la hembirekópe ojapóvo upéva, ha upévare ikatu jey hína oñeforma peteĩ komite hudisiál ikóntrape (1 Cor. 5:1, 2; 6:9, 10).

Oiméramo peteĩ ermána nomoakãratĩri raʼe la iménape, péro lomímonte iména ojedivorsia chugui ha omenda jey ótrare, ¿mavaitévapa umíva umi matrimónio apytépe la ovaléva Jehová renondépe? ¿Ikatúitipa pe ermána odesidi operdonataha la iménape omendámaramo jepe ótro kuñáre? ¿Mbaʼépa oñepensa vaʼerã pe matrimónio pyahúre?

Ymave ñapensa vaʼekue pe kuimbaʼe ndopytaiha lívre omenda jey hag̃ua ótrare hembireko ypykue oikove aja entéro, ha oiméramo haʼe nomendái ótro kuimbaʼére térã ndahekovaíri. Ha upévare ñapensa vaʼekue ko situasiónpe, pe kuimbaʼe omendáramo ótro kuñáre, upe matrimónio ndovaleiha Jehová renondépe. Péro Jesús ningo nomensionái vaʼekue pe iñinoséntevape oñeʼẽrõ guare ko témare. Upéva rangue, haʼe heʼi peteĩ kuimbaʼe ojedivorsiáramo hembirekógui nomoakãratĩriramo jepe chupe, ha omenda jey ótrare, upe kuimbaʼe hína la omoakãratĩva hembirekópe. Upévare ikatu jaʼe pe iprimér matrimónio koʼág̃a ndovaleveimaha Jehová renondépe.

 Upévare péva pe situasiónpe pe ermána ndorekovéima la posivilida operdonávo térã noperdonáivo la iménape. Upévare haʼe natekotevẽmoʼãvéima oiko ojepyʼapy hína upe témare. Avei koʼág̃a ñantende porã pe kuimbaʼe omendáramo ótro kuñáre ojedivorsia rire hembirekógui, upéva upe matrimónio pyahu ovaleha Jehovápe g̃uarã, oiméramo jepe pe hembireko ypykue osegi oikove, nomendái ótro kuimbaʼére ha ndahekovaíri. b

Ko ehémplo ñaanalisávape, pe kuimbaʼe haʼe la omoakãratĩ vaʼekue hembirekópe ha upéicha rupi ojedivorsia hikuái. Péro ñamoĩ chupe pe matrimóniope noñomoakãratĩri hague hikuái, péro lomímonte pe kuimbaʼe ojedivorsia ha upéi omenda jey ótrare. ¿Mbaʼépa oikóta upéva upe kásope? Térã ikatu avei ñapensa ótra situasiónre. Ñamoĩ chupe pe ermáno nomoakãratĩri hague hembirekópe ojedivorsia mboyve chugui, péro si omoakãratĩ chupe pe divórsio rire. Entéro koʼã kásope, pe kuimbaʼe omenda jeývo ótro kuñáre omoakãratĩ hína la hembireko ypykuépe, ha upéicha rupi upéva upe matrimónio koʼág̃a ndovalevéima Jehovápe g̃uarã. Pe kuimbaʼe omenda jeývo ótro kuñáre omoñepyrũma peteĩ matrimónio pyahu, ha upéva haʼe hína la ovaléva koʼág̃a. Heʼi haguéicha pe rrevísta The Watchtower 15 de noviembre de 1979, páhina 32-pe: “Pe kuimbaʼe omenda jeývo ótro kuñáre omoñepyrũ hína peteĩ matrimónio pyahu, ha ndaikatúi oterminánte péva pe matrimónio ha oho jey la hembireko ypykuéndi. Upéva upe matrimónio opáma kuri pórke haʼe ojedivorsia la hembirekógui, omoakãratĩ chupe ha upéi omenda jey ótrare”.

Ko entendimiénto pyahu ni mbaʼevéicharõ ndeʼiséi pe matrimónio ndahaʼeiha sagrádo, térã vyroreinteha oĩramo oñomoakãratĩva. Peteĩ ermáno ojedivorsiáramo hembirekógui oiméramo jepe haʼe nomoakãratĩri kuri chupe, ha upéi omenda jey ótro kuñáre, oñeformáta katuete peteĩ komite hudisiál ikóntrape. (Oiméramo pe kuña omendáva hese haʼe avei testígo de Jehová, oñeformáta avei peteĩ komite hudisiál ojehusga hag̃ua chupe oporomoakãratĩ rupi). Pe matrimónio pyahu ovaléramo jepe Jehová renondépe, pe kuimbaʼépe noñemeʼẽmoʼãi mbaʼeveichagua priviléhio espesiál kongregasiónpe heta áñore. Ha ohasa rire jepe heta áño, lomímonte noñemeʼẽmoʼãi chupe koʼãichagua priviléhio oiméramo la ojapo vaʼekue osegi gueteri oafekta umi ermánope. Por ehémplo, ojerekóta enkuénta mbaʼéichapa oĩ pe hembireko ypykue haʼe otraisiona vaʼekue. Avei oiméramo haʼekuéra ifamília raʼe ha umíva haʼéiti menór de eda, ojerekóta enkuénta mbaʼéichapa opyta raʼe umi mitã, haʼe oheja rei rire chupekuéra (Mal. 2:14-16).

Jahechaháicha, peteĩ ermáno ojedivorsiáramo hembirekógui haʼe nomoakãratĩriramo jepe chupe, ha omenda ótro kuñáre, tuichaiterei operhudika enterovépe. Upéicha rupi ñande kristiáno ñañehaʼãmbaite ñapensa Jehováicha pe matrimóniore. Chupe g̃uarã ningo péva haʼe peteĩ arréglo sagrádo (Ecl. 5:4, 5; Heb. 13:4).