1. ¿Mbaʼérepa ñakomenta umi rreunionhápe?

 ¿MBAʼÉREPA jaha umi rreunionhápe? Primeroite voi ñamombaʼeguasu hag̃ua Jehovápe (Sal. 26:12; 111:1). Avei jaha jave umi rreunionhápe ñañomokyreʼỹ koʼã tiémpo ijetuʼuetévape (1 Tes. 5:11). Upéicharõ, ñande ñakomenta jave jahupyty koʼã mokõi mbaʼe.

2. ¿Mbaʼe oportunidápa jareko ñakomenta hag̃ua jepi?

² Káda semána ningo jareko heta oportunida ñakomenta hag̃ua umi rreunionhápe. Por ehémplo, fin de semanakue ikatu ñakomenta jastudia jave pe Ñemañaha. Ha éntre semána ikatu ñakomenta ojejapo jave pe párte hérava Óro kuʼi oĩva la Bíbliape, pe Estúdio bíblico kongregasionpeguápe ha umi ótra párte ojejerurehápe ñakomenta hag̃ua.

3. a) ¿Mbaʼe mbaʼépa ikatu ñandejoko ñakomentáta jave? b) ¿Mbaʼéichapa ñanepytyvõ Hebreos 10:24, 25 heʼíva?

³ Entéro ningo ñambotuichase Jehovápe ha ñamokyreʼỹse ñane ermanokuérape ñane komentário rupive. Péro ikatu hína oñepresenta umi mbaʼe ñandejokoséva. Ikatu ñanenerviosoiterei ha nañañanimái ñakomenta hag̃ua. Térã ikatu ñakomentase heta vése, péro noñemeʼẽi ñandéve káda ke jahupi ñande po. Pe kárta Pablo oskrivi vaʼekuépe umi hebréope jatopa peteĩ mbaʼe ikatúva ñanepytyvõ. Haʼe oñeʼẽvo umi rreunionkuérare, heʼi mbaʼépa la iñimportantevéva: “Ñañomokyreʼỹ vaʼerã” (elee Hebreos 10:24, 25). Jarekóramo enkuénta ikatuha ñamokyreʼỹ  ñane ermanokuérape ñane komentário isensílloramo jepe saʼive ñanenerviósota. Ha ndaikatúiramo jepe ñakomenta heta vése ñandéve ñandegustaháicha, javyʼáta umi ótro ikatu haguére avei okomenta (1 Ped. 3:8).

4. ¿Mbaʼépa umi mbohapy mbaʼe jahechátava ko artíkulope?

⁴ Ñepyrũrã ko artíkulope jahecháta mbaʼéichapa ikatu ñañomokyreʼỹ peteĩ kongregasión michĩvape, oĩháme saʼi ermáno ha ikatuhápe heta vése ñakomenta. Upéi jahecháta mbaʼéichapa ikatu jajapo upéva peteĩ kongregasión tuichávape, oĩháme heta ermáno okomentaséva. Ha ultimoitépe jahecháta mbaʼéichapa ñakomenta vaʼerã ikatu hag̃uáicha añetehápe ñamokyreʼỹ ótrope.

5. ¿Mbaʼépa ikatu jajapo ñañomokyreʼỹ hag̃ua ñanembovýramo peteĩ rreuniónpe?

⁵ Peteĩ grúpo térã kongregasión michĩvape saʼi oĩ la ikatu vaʼerã okomenta oipytyvõ hag̃ua pe odirihívape pe rreunión. Sapyʼánte pe ermáno ohaʼarõʼimi vaʼerã oĩ peve algúno ohupíva ipo. Péicha rupi haʼete pe rreunión ipukuetereíva, ikaiguéva ha nomokyreʼỹiva avavépe. ¿Mbaʼépa ikatu jajapo peichagua situasiónpe? Ñañehaʼã vaʼerã ñakomenta hag̃ua heta vése, péicha ikatúta ñamokyreʼỹ umi ótrope okomenta hag̃ua avei.

6, 7. ¿Mbaʼépa ikatu jajapo ani hag̃ua ñandepyʼapererepa ñakomentáta jave?

⁶ Heta ermáno opensa haguénte voi okomentataha rreunionhápe ipyʼapererepáma voi. Oiméramo nde reñeñandu avei upéicha, ¿mbaʼépa ikatu rejapo? Por ehémplo, ikatu ehecha mbaʼe mbaʼépa nepytyvõta ani hag̃ua ekyhyje ekomentáta jave ha péicha emokyreʼỹve hag̃ua ótrope.

⁷ Peteĩ mbaʼe ikatúva ñanepytyvõ ningo haʼe hína jahecha jeýramo umi konsého omeʼẽva umi Ñemañaha osẽ vaʼekue anteve. b Por ehémplo, peteĩ konsého heʼi jajeprepara porã vaʼerãha (Prov. 21:5). Amáske jaikuaa porã pe informasión ojestudiátava, ifasilvéta ñandéve ñamopuʼã hag̃ua ñande po. Ótra kósa ikatúva avei jajapo haʼe ñakomenta mbykymínte (Prov. 15:23; 17:27). Mbykymíramo la ñane komentário menove avei ñandepyʼapererepáta. Jaiko rangue ñakomenta puku, ñane komentário mbykýramo una térã dos frásente ifasilvéta oñentende hag̃ua. Ñakomentáramo mbykymi ha ñande própia palávrape, ojekuaáta ñanderehe jajeprepara hague ha ñantendeha pe informasión.

8. ¿Mbaʼépa Jehová oñandu ohecha jave jajapoha opa ikatúva?

⁸ Ñamoĩ chupe reĩha peteĩ kongregasión michĩvape ha reñehaʼãmbaite rejapo umi konsého jahecha vaʼekue. Péro lomímonte nenerviosoiterei ha upéicha rupi ikatu ekomenta una térã dos vésente. ¿Mbaʼépa ikatu rejapo péicha jave? Nemanduʼákena Jehová ovaloraha opa mbaʼe rejapóva rekomenta hag̃ua (Luc. 21:1-4). Péro haʼe ndojeruréi ndehegui ejapo peteĩ mbaʼe ndeforsa rasapátava (Filip. 4:5). Upéicharõ, ekalkula mbaʼe mbaʼépa la nde ikatúva rejapo, eñehaʼãmbaite ehupyty upéva ha ejerure Jehovápe tanembopyʼaguapy. Primerorã ikatu remoĩ la méta ekomenta hag̃ua mbykymínte.

9. ¿Mbaʼe situasión ikatu oñepresenta peteĩ kongregasión tuichávape?

⁹ Oiméramo ne kongregasiónpe oĩ heta puvlikadór, ikatu idiferénte hína la situasión nde  rehasáva. Sapyʼánte ikatu emopuʼã heta vése nde po rekomenta hag̃ua, péro noñemeʼẽi ndéve pórke oĩ hetaiterei ermáno okomentaséva avei. Ñapensamína Daniela kásore, c haʼe ningo peteĩ ermána okomentasetereíva voi umi rreunionhápe. Chupe g̃uarã iñimportanteterei okomenta, pórke péicha oadora hína Jehovápe, omokyreʼỹ ermanokuérape ha opytave avei chupe iñakãme umi enseñánsa bíblica. Péro ovárõ guare peteĩ kongregasión tuichávape saʼivéma oñemeʼẽ chupe la komentário, sapyʼánte katu ni peteĩ voi. Haʼe heʼi: “Añeñandu vaieterei ningo, haʼetévaicha chéve aperde mbaʼe vaʼekue peteĩ priviléhio. Heta vése emopuʼãramo nde po ha noñemeʼẽi ndéve, haʼete voi ojejapóva nderehe a propósito mbaʼe”.

10. ¿Mbaʼépa ikatu rejapo erekove hag̃ua oportunida ekomenta hag̃ua?

¹⁰ ¿Reñeñandúmavapa avei Daniela oñeñandu haguéicha? Oiméramo upéicha, ikatu repensa ikuentavetaha neremopuʼãvéintema la nde po ha ehendúntema la ojeʼéva. Péro aníkena reñentrega. ¿Mbaʼe mbaʼépa ikatu rejapo erekove hag̃ua oportunida rekomenta hag̃ua? Eñehaʼã eprepara hetave komentário, ani peteĩnte. Pórke upéicharõ nerekomentáirõ umi párrafo oĩva oñepyrũvo, ikatúta rekomenta pe estúdio pukukue aja. Ejeprepara jave pe Ñemañaha ojestudiátava, epensa mbaʼéichapa káda párrafo oho pe artíkulo témare. Upéicha erekovéta oportunida ekomenta hag̃ua peteĩ idéa iporãva. Ótra kósa ikatúva rejapo haʼe ejeprepara porã ekomenta hag̃ua umi párrafo omyesakãva umi enseñánsa bíblica hypyʼũvéva (1 Cor. 2:10). Koʼãichagua párrafo ijetuʼu rupi oñemyesakã hag̃ua, saʼive oĩ umi omopuʼãva ipo okomenta hag̃ua. ¿Péro mbaʼépa rejapokuaa ndaikatúiramo rekomenta eñehaʼãmbaitérõ jepe esegi koʼã suherénsia? Oñepyrũ mboyve pe rreunión, ikatu reñemongeta pe ermáno odirihívandi pe estúdio, ha ere chupe mbaʼe párrafopepa rekomentase.

11. ¿Mbaʼépa ñanemokyreʼỹ jajapo hag̃ua Filipenses 2:4?

¹¹ (Elee Filipenses 2:4). Apóstol Pablo rupive Jehová omokyreʼỹ vaʼekue umi kristiánope ojepyʼapy hag̃ua umi ótrore.  ¿Mbaʼéichapa ñande ikatu jajapo upéva umi rreunionhápe? Jaraha vaʼerã enkuénta umi ótro okomentaseha avei.

12. ¿Mbaʼépa ikatu jajapo umi ótro ikyreʼỹ hag̃ua umi rreunionhápe? (Ehecha pe taʼanga).

¹² Ñamoĩmína peteĩ ehémplo ñanepytyvõtava ñantende hag̃ua upéva. Ñañemongeta jave ñane amigokuérandi, ndahaʼéi ñandénte la ñañeʼẽva, síno ñameʼẽ avei oportunida umi ótrope oñeʼẽ hag̃ua, ¿ajépa? Ñande ñahenduse enterovévape. Upéicha lénto avei oiko ñane rreunionkuérape. Ñande jaipota entéro ikatumíva guive okomenta pe rreunionhápe. Añetehápe, ikatu hína ñamokyreʼỹ umi ótrope ñameʼẽvo chupekuéra la oportunida oñeʼẽ hag̃ua umi mbaʼe ogueroviávare (1 Cor. 10:24). Jahechamína mbaʼépa ikatu jajapo oĩ hag̃ua hetave umi okomentáva.

13. ¿Mbaʼépa ikatu jajapo hetave ermáno oreko hag̃ua la oportunida okomentávo?

¹³ Primero, ñakomenta mbykymi. Jajapóramo upéva oĩvéta tiémpo hetave okomenta hag̃ua. Umi ansiáno ha umi ótro ermáno aréma oservíva Jehovápe ikatu omoĩ ehémplo ko mbaʼépe. Ñane komentário mbyky vaʼerã ha natekotevẽi ñañeʼẽ heta idéare. Ñakomenta jave ñañeʼẽramo pe párrafo kompletoitére, nahembymoʼãvéima umi ótrope mbaʼeve okomenta hag̃ua. Por ehémplo ko párrafope oĩ mokõi suherénsia: Umi komentário mbyky vaʼerã ha nañañeʼẽi vaʼerã heta idéare. Ndéve otokáramo emeʼẽ pe primer komentário ko párrafope, oikoitéta emensionáramo peteĩvante umi suherénsia.

14. ¿Mbaʼépa ikatu jareko enkuénta jadesidíta jave mboy vésepa ñamopuʼãta ñande po? (Ehecha pe taʼanga).

¹⁴ Ñanembaʼerechakuaákena jadesidíta jave mboy vésepa ñamopuʼãta ñande po ñakomenta hag̃ua. Pyʼỹieterei jahupíramo ñande po, ikatu jajopy pe ermáno odirihívape omeʼẽ hag̃ua ñandéve hetave komentário, oĩramo jepe umi neʼĩrava gueteri okomenta. Avei ikatu oĩ umi opensáva oñehaʼã reitamaha okomenta (Ecl. 3:7).

15. a) ¿Mbaʼéichapa ñarreaksiona vaʼerã oiméramo ndaikatúi raʼe ñakomenta rreunionhápe? b) ¿Mbaʼépa oreko vaʼerã enkuénta pe ermáno odirihíva la estúdio? (Ehecha pe rrekuádro “ ¿Mbaʼéichapa ojejapo vaʼerã umi párte oĩháme pregúnta ha rrespuésta?”).

 ¹⁵ Oĩramo heta ermáno omopuʼãva ipo okomenta hag̃ua, ikatu hína nañakomentái ñandéve ñandegustaháicha, ikatu voi opáma la rreunión ha ñande ni una ves nañakomentajepéi. Legálmente upéva ikatu ñanemoñeñandu vai, péro ndovaléi ñandepochy (Ecl. 7:9).

16. ¿Mbaʼépa ikatu jajapo ñamokyreʼỹ hag̃ua umi okomenta vaʼekuépe?

¹⁶ Oimérõ ndaikatúi raʼe rekomenta ndegustahaichaite, ¿mbaʼépa rejapokuaa? Ikatu ejapysaka porã umi ótrore okomenta jave ha efelisita chupekuéra opa rire la rreunión. Eipurúramo umi ñeʼẽ ijukýva efelisita hag̃ua umi ermánope, tuicha emokyreʼỹta chupekuéra nde emeʼẽrõguáicha peteĩ komentário (Prov. 10:21). Jafelisita jave ñamokyreʼỹ hína chupekuéra.

17. a) ¿Mbaʼépa ikatu ojapo umi tuakuéra? b) Asegún pe vidéo, ¿mbaʼépa umi 4 mbaʼe tekotevẽva jajapo japrepara hag̃ua peteĩ komentário? (Ehecha avei pe nóta).

¹⁷ ¿Mbaʼépa ikatu jajapove ñañomokyreʼỹ hag̃ua umi rreunionhápe? Oiméramo ereko mitã michĩva, eipytyvõkena chupe oprepara hag̃ua umi komentário asegún la ijeda (Mat. 21:16). Umi rreuniónpe oñeanalisa jepi umi téma iseriovéva. Por ehémplo oñeñeʼẽ  jepi umi provléma orekóvare umi matrimónio térã tekovaíre. Upéicharõ jepe ikatu hína oĩ peteĩ térã mokõi párrafo ikatuhápe okomenta umi mitã. Avei iporãta eipytyvõramo ne famíliape ontende hag̃ua ndaikatumoʼãiha okomenta káda ves ke omopuʼã la ipo. Reexplikáramo upéva ne famíliape, haʼe noñembyasymoʼãi oñemeʼẽ jave ótrope la oportunida okomenta hag̃ua (1 Tim. 6:18). d

18. ¿Mbaʼépa ikatu jajapo ani hag̃ua ñañeʼẽterei ñandejehe ñakomenta jave? (Proverbios 27:2).

¹⁸ Entéro ikatu japrepara umi komentário omombaʼeguasútava Jehovápe ha omokyreʼỹtava ermanokuérape (Prov. 25:11). Sapyʼánte ikatúramo jepe ñamombeʼu mbykymi peteĩ experiénsia jahasa vaʼekue, ndovaléi ñañeʼẽterei ñandejehe (elee Proverbios 27:2; 2 Cor. 10:18). Upéva rangue ñañekonsentra vaʼerã Jehováre, Iñeʼẽ la Bíbliare ha ipuévlore (Apoc. 4:11). Péro peteĩ pregúnta heʼíramo ikatuha ñamombeʼu mbykymi peteĩ experiénsia jahasa vaʼekue, iporãta la ñamombeʼúramo. Pe sigiénte párrafope jahecháta peteĩ ehémplo.

19. a) ¿Mbaʼépa ojehupytýta umi rreunionhápe jarekóramo enkuénta umi ótrope? (Romanos 1:11, 12). b) ¿Mbaʼérepa nde evyʼaiterei ikatu haguére ekomenta rreunionhápe?

¹⁹ Ndaipóriramo jepe peteĩ rrégla heʼíva mbaʼéichapa ñakomenta vaʼerã, enterovéva ikatu ñañehaʼãmbaite ñañomokyreʼỹ japartisipa jave. Algúnope g̃uarã upéva heʼise oñehaʼã vaʼerãha okomenta pyʼỹive. Ótrope g̃uarã katu heʼise oñekontenta vaʼerãha la ikatúvare okomenta ha ovyʼa oĩ haguére hetave okomentáva. Umi rreunionhápe jarekóramo enkuénta umi ótrope, katuete javyʼaitereíta ikatu haguére “ñañomokyreʼỹ” (elee Romanos 1:11, 12).