1, 2. ¿Mbaʼépa jajapo vaʼerã ñahaʼarõ aja og̃uahẽ pe múndo pyahu?

 ÑANDE ningo jaagradeseterei Jehovápe opromete haguére omoĩtaha peteĩ múndo pyahu ihústova ko múndo aña rekovia (2 Ped. 3:13). Ndajaikuaáiramo jepe arakaʼépa og̃uahẽta upe múndo pyahu, entéro mbaʼe oikóva ñande jerére ohechauka ñandéve koʼẽrõitéma oñekumplitaha upéva (Mat. 24:32-34, 36; Hech. 1:7).

² Enterovéva ningo jasegi vaʼerã ñamombarete ñande jerovia upe promésare, oiméramo jepe jaservíma heta tiémpore Jehovápe. ¿Mbaʼérepa? Pórke pe persóna ijerovia mbaretevéva jepe ikatu ou ikangy. Apóstol Pablo heʼi vaʼekue voi pe jerovia kangy haʼeha “pe pekádo ndahasyietéva ñandereity hag̃ua” (Heb. 12:1). Ani hag̃ua oiko ñanderehe upéva, jajepokuaa vaʼerã jastudia jey umi pruéva ohechaukáva Jehová koʼẽrõitéma oguerutaha pe múndo pyahu (Heb. 11:1).

3. ¿Mbaʼépa jahecháta ko artíkulope?

³ Ko artíkulope jahecháta mbohapy mbaʼe ñanepytyvõtava jajerovia hag̃ua Jehová katuete oguerutaha pe múndo pyahu. Jahecháta tekotevẽha: 1) Jajepyʼamongeta pe rreskátere, 2) ñapensa mbaʼeichaitépa Jehová ipoderóso, ha 3) jajapo umi mbaʼe ñanemoag̃uivétava Jehováre. Upéi ñaanalisáta mbaʼéichapa umi mbaʼe Jehová heʼi vaʼekue Habacúcpe omombarete ñande jerovia. Péro jahecha raẽna mbaʼérepa tekotevẽ koʼág̃a ñamombarete ñande jerovia Jehová okumplitaha ipromésa.

 ¿MBAʼÉREPA TEKOTEVẼ ÑANDEJEROVIA MBARETE?

4. ¿Mbaʼéicha javépa tekotevẽ ñandejerovia mbarete?

⁴ Káda día jadesidi vaʼerã heta mbaʼe, upévare tekotevẽ ñandejerovia mbarete. Por ehémplo jadesidi vaʼerã mávarepa ñañamigáta, mbaʼéichapa jajedivertíta, mbaʼépa jastudiáta, mávarepa ñamendáta, mbaʼépa jajapóta ñane família rehehápe ha mbaʼépepa ñambaʼapóta. Iporãta ñañeporandúramo: “¿Mbaʼépa ojekuaa cherehe umi mbaʼe adesidíva rupive? ¿Ojekuaapa cherehe ahechakuaaha ko múndo koʼẽrõitéma oñehunditaha ha Ñandejára múndo pyahu omyengoviataha chupe? ¿Térã umi mbaʼe adesidívare ajogua umi hénte opensávape ndoikomoʼãiha pára siémpre?” (Mat. 6:19, 20; Luc. 12:16-21). Jadesidi porãta ningo heta mbaʼépe jajerovia mbaretéramo koʼẽrõitéma pe múndo pyahu og̃uahẽtaha.

5, 6. ¿Mbaʼérepa tekotevẽ ñandejerovia mbarete jahasa jave peteĩ pruévare? Emoĩ peteĩ ehémplo.

⁵ Ñambohovái avei umi pruéva tekotevẽhápe ñandejerovia mbarete. Por ehémplo pe persekusión, mbaʼasy igravéva térã oimeraẽ ótra situasión ikatúva ñandereja yvýre. Ñepyrũrã ikatu ndajakyhyjéi ñambohovái hag̃ua pe provléma. Péro sapyʼánte koʼãichagua provléma ikatu ipuku, ha tekotevẽta ñandejerovia mbarete jagueropuʼaka hag̃ua ha jasegi hag̃ua jaservi vyʼápe Jehovápe (Rom. 12:12; 1 Ped. 1:6, 7).

⁶ Jahasa jave peteĩ pruéva ningo ikatu voi ñapensa Jehová núnka ndoguerumoʼãiha pe múndo pyahu. ¿Heʼisépa upéva ñandejerovia kangyha? Ndahaʼéi katuete la upéichava. Ñamoĩmína peteĩ ehémplo, roʼy tiémpope, pe hoʼysãve jave, haʼete voi pe arahaku núnka nog̃uahẽmoʼãiva. Péro pe veráno siémpre og̃uahẽ. Upéicha avei ñañedesanima jave ikatu hína ñapensa pe múndo pyahu núnka voi nog̃uahẽmoʼãiha. Péro ñandejerovia mbaretéramo jaikuaa porãta umi mbaʼe Ñandejára oprometéva katuete oñekumplitaha (Sal. 94:3, 14, 15; Heb. 6:17-19). Péicha jajeroviáramo jasegíta ñamotenonde Jehová servísio ñande rekovépe.

7. ¿Mbaʼéichapa ndovaléi ñapensa?

⁷ Avei tekotevẽ ñandejerovia mbarete japredika hag̃ua. Ñamombeʼu jave la héntepe koʼẽrõitéma Ñandejára oguerutaha peteĩ múndo pyahu, oĩ umi ndogueroviapáiva pórke iporãitereíma upe notísia (Mat. 24:14; Ezeq. 33:32). Ñañatende vaʼerã ani hag̃ua núnka jaju jaduda umi mbaʼe Jehová ñanemboʼévagui koʼã hénteicha. Ani hag̃ua upéva oiko ñanderehe jasegi vaʼerã ñamombarete ñande jerovia. Jahechamína mbohapy mbaʼe ikatúva jajapo upearã.

JAJEPYʼAMONGETA PE RRESKÁTERE

8, 9. ¿Mbaʼéichapa omombaretéta ñande jerovia jajepyʼamongetáramo pe rreskátere?

⁸ Jajepyʼamongetárõ pe rreskátere ñamombaretéta ñande jerovia. Pe rreskáte oasegura ñandéve oñekumplitaha katuete umi mbaʼe Jehová opromete vaʼekue. Iñimportánte ñañemotiémpo jajepyʼamongeta hag̃ua mbaʼérepa Jehová omeʼẽ vaʼekue pe rreskáte, ha mbaʼépa osakrifika vaʼekue ñanderehehápe. Péicha ndajadudamoʼãi Jehová oguerutaha peteĩ múndo iporãvéva ikatutahápe jaiko pára siémpre. ¿Mbaʼérepa ikatu jaʼe upéva?

⁹ Ñapensamíntena, ¿mbaʼépa heʼise pe rreskáte? Jehová ningo ombou vaʼekue Itaʼýra peteĩetépe haʼéva iñamigoite, ikatu hag̃uáicha onase ko yvy ape ári peteĩ kuimbaʼe perféktoicha. Jesús oĩrõ guare ko yvy ape ári ohasa vaʼekue heta situasión ijetuʼúva, osufri ha omano asyeterei. ¡Ajépa hepyete opaga vaʼekue Jehová! Haʼe oporohayhueterei ha núnka ndohejamoʼãi kuri Itaʼýra ohasa peichagua  sufrimiéntore, upéi oheja jeýtarõ jaiko porã sapyʼamínte (Juan 3:16; 1 Ped. 1:18, 19). Jehová hepyeterei opaga rupi ojaseguráta jaiko hag̃ua para siémpre pe múndo pyahúpe.

JAJEPYʼAMONGETA JEHOVÁ PODÉR REHE

10. Heʼiháicha Efesios 3:20, ¿mbaʼépa Jehová ikatu ojapo?

¹⁰ Jajepyʼamongetáramo pe podér Jehová orekóvare ñamombaretéta ñande jerovia, pórke haʼe oreko la podér okumpli hag̃ua entéro mbaʼe opromete vaʼekue. Siérto, hetápe g̃uarã haʼetévaicha imposívle la jaiko peteĩ múndo pyahúpe. Péro Jehová heta vése opromete umi mbaʼe haʼetévaicha ndaikatumoʼãiva oñekumpli. Jaikuaaháicha haʼe hína pe Todopoderóso (Job 42:2; Mar. 10:27). Upévare, nañanesorprendéi haʼe opromete jave umi mbaʼe ijojahaʼỹva (elee Efesios 3:20).

11. Emombeʼumi peteĩ promésa ijojahaʼỹva Jehová ojapo vaʼekue. (Ehecha pe rrekuádro “ Umi promésa ijojahaʼỹva Jehová okumpli vaʼekue”).

¹¹ Jahechamína unos kuánto promésa Jehová ojapo vaʼekue isiervokuéra yma guarépe. Koʼã promésa haʼetévaicha kuri la imposívleva oñekumpli hag̃ua. Jehová heʼi vaʼekue Abrahán ha Sárape orekotaha peteĩ mitã ijedaitereímaramo jepe hikuái (Gén. 17:15-17). Avei oasegura vaʼekue Abrahánpe omeʼẽtaha ifamiliarépe Canaán yvy. Péro heta tiémpore umi israelita esklávo vaʼekue Egíptope. Ha jaikuaa haʼekuéra haʼe hague Abrahán familiare, upévare oiméne opensa raʼe hikuái upe promésa núnka noñekumplimoʼãiha. Péro si oñekumpli vaʼekue. Heta áño upe rire Jehová heʼi vaʼekue Elisabétpe orekotaha peteĩ mitã ijedámaramo jepe. Avei oasegura vaʼekue Maríape hyeguasutaha vírhenramo jepe, ha upe mitã haʼetaha Ñandejára raʼy. Upéva okumplíta kuri peteĩ promésa Jehová ojapo vaʼekue miles de áño upe mboyve pe hardín de Edénpe (Gén. 3:15). Entéro umi kásope Jehová nopyrũi vaʼekue iñeʼẽre.

12. ¿Mbaʼépa ohechauka ñandéve Jehová podérgui Josué 23:14 ha Isaías 55:10, 11?

¹² Ñapensávo kompletoite umi promésa Jehová ojapo vaʼekuére ha mbaʼéichapa okumplíma jahechakuaa mbaʼeichaitépa haʼe ipoderóso. Upéva ningo omombarete ñande jerovia haʼe katuete oguerutaha pe múndo pyahu (elee Josué 23:14; Isaías 55:10, 11). Upéicha rupi, ñande ñaimeve preparádo ñaipytyvõ hag̃ua ñande rapichakuérape ontende hag̃ua pe múndo pyahu ndahaʼeiha peteĩ suéño reínte, síno oñekumplitaha katuete. Hiʼarive Jehová heʼi vaʼekue pe yvága pyahu ha yvy pyahúre kóicha: “Koʼã ñeʼẽ ningo siertoite ha umi hénte ikatu ojerovia hese” (Apoc. 21:1, 5).

JAJAPO UMI MBAʼE ÑANEMOAG̃UÍTAVA JEHOVÁRE

13. ¿Mbaʼéichapa umi rreunionkuéra omombarete ñande jerovia?

¹³ Jajapóramo umi mbaʼe ñanemoag̃uivétava Jehováre, ñamombaretevéta ñande jerovia. Por ehémplo, ñapensami mbaʼeichaitépa ñanepytyvõ umi rreunionkuéra. Ana, b oservímava heta áñore de tiémpo kompléto ha ojapómava heta mbaʼe Jehová servísiope, omombeʼu: “Umi rreunión ningo chepytyvõ asegi hag̃ua chejerovia mbarete. Pe diskursánte ndahaʼéiramo jepe la ivaletereíva oporomboʼe hag̃ua, térã ndeʼíriramo jepe peteĩ mbaʼe ipyahúva, siémpre ahendu álgo chepytyvõva antendeve hag̃ua peteĩ enseñánsa bíblica. Ha péicha che jerovia imbareteve”. Umi rreunionhápe avei ñahendu umi komentário omombaretéva ñande jerovia (Rom. 1:11, 12; 10:17).

14. ¿Mbaʼéichapa pe predikasión omombarete ñande jerovia?

 ¹⁴ Ñamombarete avei ñande jerovia ñasẽvo predikasiónpe (Heb. 10:23). Barbara haʼémava testígo de Jehová mas de 70 áñore heʼi: “Pe predikasión ningo siémpre omombaretéva che jerovia, añemeʼẽ enkuénta amáske añeʼẽ Jehováre ha umi ipromésa iporãitévare la che jerovia imbareteve avei”.

15. ¿Mbaʼéichapa pe estúdio personál omombaretéta ñande jerovia? (Ehecha umi taʼanga).

¹⁵ Pe estúdio personál ikatu avei omombarete ñande jerovia. Susan heʼi oipytyvõha chupe oreko peteĩ óra ostudia hag̃ua, haʼe omombeʼu: “Domingokue astudia pe Ñemañaha ojestudiátava pe sigiénte semána. Lunes ha martes katu astudia pe rreunión éntre semanaguápe g̃uarã. Ha umi ótro día katu ajapo che estúdio personál”. Susan siémpre osegi rupi pe orário omoĩ vaʼekue ostudia hag̃ua, la ijerovia amás día imbareteve. Irene katu heta áñorema oservi pe sentrál mundiálpe, ha haʼe katu ostudia rupi umi profesía bíblica omombarete la ijerovia, haʼe heʼi: “Ahecharamoiterei ningo mbaʼéichapa umi profesiakuéra oñekumplipaite, ni peteĩ voi ndopytareíri”. c

“KATUETE OÑEKUMPLÍTA”

16. ¿Mbaʼérepa jaikuaa Jehová heʼi vaʼekue Habacúcpe ñandeafektaha avei ñandéve? (Hebreos 10:36, 37).

¹⁶ Oĩ ningo umi Jehová siervokuéra heta áñorema ohaʼarõva oñehundi ko múndo aña. Oĩ avei umi hénte opensáva otardaitereimaha pe fin oúma hag̃ua. Jehová ningo ontende la oñandúva isiervokuéra. Upévare oasegura vaʼekue voi proféta Habacúcpe: “Pe visión oñekumplíta ág̃a pe tiémpo ojedesidi vaʼekuépe oikotaha, ha pyaʼe og̃uahẽta pe tiémpo oñekumpli hag̃ua, katuete oikóta upéva. Ha haʼetéramo jepe otardáva, esegínte ehaʼarõ pórke katuete oñekumplíta. Ni mbaʼevéicharõ ndotardamoʼãi” (Hab. 2:3). ¿Koʼã mbaʼe  piko ojeʼe vaʼekue Habacúcpente, térãpa ikatu avei ñanemokyreʼỹ koʼág̃arupi? Jehová ningo apóstol Pablo rupive ohechauka vaʼekue koʼã mbaʼe ojeʼéva oafektaha avei umi kristianokuéra ohaʼarõvape hína pe múndo pyahu (elee Hebreos 10:36, 37). Ñapensáramo jepe Jehová otardaha hína, ñanemanduʼákena la haʼe oprometéva ‘katuete oñekumplitaha, ni mbaʼevéicharõ ndotardamoʼãi’.

17. ¿Mbaʼéichapa peteĩ ermána osegi pe konsého Jehová omeʼẽ vaʼekue Habacúcpe?

¹⁷ Oĩ ningo umi kristiáno heta áñorema osegíva pe konsého oñatende porã vaʼerãha. Jahechamína peteĩ ermána hérava Louise experiénsia. Haʼe ningo oñepyrũ vaʼekue oservi Jehovápe áño 1939-pe. Haʼe omombeʼu: “Che apensa vaʼekue pe Armagedón oúta hague atermina mboyve che koléhio, péro ndoikói kuri upéva. Heta áñore chepytyvõ umi rreláto oñeʼẽva umi persóna ohaʼarõ vaʼekuére Jehová okumpli umi mbaʼe oprometéva. Upearã che alee umi istória oñeʼẽva Noé, Abrahán, José ha umi ótro Jehová siérvo ohaʼarõ vaʼekuére avei oñekumpli ipromesakuéra. Ahecháma mbaʼéichapa jasegíramo ñañatende porã ñanepytyvõ ñaime hag̃ua segúro pe múndo pyahu hiʼag̃uimbaitemaha”. Katuete ningo umi heta áñorema oservíva Jehovápe opensa avei upéicha.

18. ¿Mbaʼéichapa umi mbaʼe Jehová okrea vaʼekue ñanepytyvõ jajerovia hag̃ua haʼe oguerutaha pe múndo pyahu?

¹⁸ Jaikuaa ningo pe múndo pyahu neʼirãha og̃uahẽ. Péro ñapensamíntena umi mbaʼe si oĩmavare koʼág̃a: Umi estrélla, umi yvyramáta, animalkuéra ha yvyporakuéra. Koʼã mbaʼe ningo ndahaʼéi vaʼekue siémpre oexistíva, péro avave ndeʼimoʼãi ndoexistiriha koʼág̃a. Jaikuaa oexistiha pórke Jehová okrea vaʼekue umi mbaʼe (Gén. 1:1, 26, 27). Añetehápe, Ñandejára opromete omoĩtaha peteĩ múndo pyahu. Ha haʼe katuete okumplíta upe promésa. Upépe jaikóta pára siémpre ha ñaneresãita. Itiempoitépe Ñandejára odesidíma haguéicha, oexistíta pe múndo pyahu oexistiháicha avei umi mbaʼe oĩva ko univérsope (Is. 65:17; Apoc. 21:3, 4).

19. ¿Mbaʼéichapa ikatu ñamombarete ñande jerovia?

¹⁹ Og̃uahẽ mboyve pe múndo pyahu ñañehaʼãmbaitékena jajapo opa ikatúva ñamombarete hag̃ua ñande jerovia. Siémprekena jaagradese pe rreskátere. Jajepyʼamongeta Jehová podér rehe, ha jajapo umi mbaʼe ñanemoag̃uivétava hese. Jajapóramo koʼã mbaʼe ñaiméta ‘entéro umi ojeroviáva ha ipasiénsia vaʼekue apytépe, umíva orresivi vaʼekue umi promésa porãite’ (Heb. 6:11, 12; Rom. 5:5).