1. ¿Mbaʼéichapa peteĩ mitãʼi ohechauka ojeroviaha pe rresurreksiónre?

 PETEĨ mitãʼi hérava Matthew oreko peteĩ mbaʼasy igráveva, ha upévare heta vése tekotevẽ vaʼekue ojopera. Orekópe 7 áño, peteĩ díape ohecha ifamíliandi pe prográma mensuál Broadcástingpe. b Opakuévo, pe vidéo musikálpe ojekuaa mbaʼéichapa ojerresivi umi oikove jeývape. Opa rire pe prográma, Matthew oñemboja ituakuérare, ojagarra chupekuéra ipógui ha heʼi: “Pehechapa mama ha papa la amanóramo ikatuha aikove jey. Pecheraʼarõnte vaʼerã ningo”. Ñapensamína mbaʼeichaitépa oime vaʼerã oñeñandu raʼe isy ha itúa ohechávo ifamília peichaite peve ojeroviaha pe rresurreksiónre.

2, 3. ¿Mbaʼérepa iñimportánte jajepyʼamongeta pe rresurreksiónre?

² Iñimportánte ningo jajepyʼamongeta jepi pe rresurreksiónre (Juan 5:28, 29). ¿Mbaʼérepa? Ñande ndajaikuaái rupi mbaʼépa la ñaneraʼarõva, ikatu hína jaju tuicha ñanderasy térã omano peteĩ jahayhúva (Ecl. 9:11; Sant. 4:13, 14). Pe esperánsa de la rresurreksión ñanepytyvõ ikatu hag̃uáicha jagueropuʼaka koʼãichagua situasión (1 Tes. 4:13). La Biblia heʼi ñandéve ñande Túa yvagapegua ñandekuaa porãitereiha ha ñanderayhuha (Luc. 12:7). Tekotevẽ voi oikuaa porã mbaʼeichagua persónapa ñande ha umi mbaʼe jahasa vaʼekue ikatu hag̃uáicha ñanemoingove jey. Ha ñanderayhu rupi omeʼẽ ñandéve la oportunida jaikove hag̃ua pára siémpre. Ñamanóramo jepe haʼe ñanemoingove jeýta.

³ Ko artíkulope jahecháta mbaʼérepa ikatu jajerovia pe rresurreksiónre. Avei jahecháta peteĩ rreláto bíblico omombaretétava ñande jerovia. Upégui oñenohẽ pe téxto ko artíkulope g̃uarã heʼíva: “Ne ermáno opuʼã jeýta” (Juan 11:23). Ipahaitépe  jahecháta mbaʼépa ikatu jajapo ñamombareteve hag̃ua ñande jerovia pe rresurreksiónre.

4. ¿Mbaʼépa ñaikotevẽ ñakonfia hag̃ua peteĩ promésare? Emoĩ peteĩ ehémplo.

⁴ Jajerovia hag̃ua peteĩ promésare tekotevẽ ñaime segúro pe persóna oprometéva ñandéve orekoha pe deséo ha podér, térã pe kapasida okumpli hag̃ua. Ñapensamína peteĩ ehémplore, ñamoĩ chupe peteĩ torménta káusare ñande róga oñembyai vai hague. Ha peteĩ ñane amígo heʼi ñandéve: “Roipytyvõta remyatyrõ hag̃ua nde róga”. Ñande jaikuaa ñane amígo ñanepytyvõseha, ivaleha konstruksiónpe ha orekoha umi erramiénta oñekotevẽva. Upévare jajerovia pe ñane amígo oprometévare ñandéve. ¿Ha mbaʼépa ikatu jaʼe pe promésa de la rresurreksiónre? ¿Orekópa Ñandejára pe deséo ha podér okumpli hag̃ua pe promésa?

5, 6. ¿Mbaʼérepa ñaime segúro Jehová orekoha pe deséo omoingove jeývo umi omano vaʼekuépe?

⁵ ¿Orekópa Jehová pe deséo omoingove jeývo umi omano vaʼekuépe? Si, ha ndajadudái upévagui. Haʼe ojevale vaʼekue unos kuánto eskritór de la Bíbliare oskrivi hag̃ua ko promésa (Is. 26:19; Os. 13:14; Apoc. 20:11-13). Ha Jehová opromete jave peteĩ mbaʼe, katuete okumpli (Jos. 23:14). Jehová ningo omoingoveseterei umi omano vaʼekuépe. ¿Mbaʼérepa ikatu jaʼe upéva?

⁶ Ñapensamína Job heʼi vaʼekuére. Haʼe oĩ vaʼekue segúro omanóramo, Jehová ohechaseterei jeytaha chupe (Job 14:14, 15). Peichaite avei Jehová ohechaseterei jey entéro isiervokuéra omano vaʼekuépe. Haʼe ningo omoingovese chupekuéra ikatu hag̃uáicha oikove jey, hesãi ha ovyʼa. ¿Ha mbaʼépa oñandu Jehová entéro umi hénte omano vaʼekuére oikuaaʼỹre chupe? Ñande Túa ñanderayhuetéva omoingovese jey avei chupekuéra (Hech. 24:15). Haʼe oipota oiko chuguikuéra iñamígo ha oikove ko yvy ape ári pára siémpre (Juan 3:16). Jahechaháicha, Jehová oreko pe deséo omoingove jeývo umi omano vaʼekuépe.

7, 8. ¿Mbaʼérepa ñaĩ segúro Jehová orekoha pe podér omopuʼã jey hag̃ua umi omano vaʼekuépe?

⁷ ¿Orekópa Jehová pe podér omoingove jey hag̃ua umi omano vaʼekuépe? Si oreko. Haʼe hína “Ñandejára Todopoderóso” (Apoc. 1:8). Ha oreko pe podér ohundi hag̃ua oimehaichagua enemígope, umíva apytépe pe ñemano jepe (1 Cor. 15:26). Jaikuaávo ko mbaʼe ñanemombarete ha ñanekonsola. Jahechamína ñane ermána Emma Arnold experiénsia. Haʼe ha ifamília ombohovái vaʼekue heta pruéva ijetuʼúva pe segunda gérra mundiál aja. Heta persóna haʼekuéra ohayhúva omano pe kámpo de konsentrasión názipe. Ko ermána okonsola hag̃ua imemby kuñáme heʼi chupe: “Umi omanóva núnka ndaikatumoʼãirõ oikove jey, upéva heʼiséta pe ñemano imbareteveha Ñandejáragui, péro ñande jaikuaa ndaupeichaiha”. Añetehápe ndaipóri mbaʼeve ni avave imbaretevéva Jehovágui. Haʼe voi ningo okrea vaʼekue entéro oikovévape, upévare oreko pe podér omoingove jeývo umi omano vaʼekuépe.

⁸ Jaikuaa avei Jehová ikatuha omoingove jey umi omano vaʼekuépe, pórke haʼe imanduʼa entéro mbaʼére. La Biblia heʼi haʼe ohenoiha káda estréllape hérarupi (Is. 40:26). Péicha avei haʼe ndahesaráiri umi omano vaʼekuégui (Job 14:13; Luc. 20:37, 38). Jehovápe ndoforsaiete imanduʼa hag̃ua umi omoingove jeýtavare, mbaʼeichagua persónapa rakaʼe, ilája, ipínta, ha umi mbaʼe ohasa vaʼekuére hikuái.

9. ¿Mbaʼérepa rejerovia pe rresurreksiónre?

⁹ Jahecháma haguéicha, ikatu jajerovia pe  rresurreksiónre pórke Jehová oreko pe deséo ha podér okumpli hag̃ua pe promésa. Jaikuaa avei Ñandejára ikatuha oporomoingove jey pórke yma ojapóma vaʼekue voi upéva. Jehová omeʼẽ vaʼekue pe podér ojapo hag̃ua upéva unos kuánto kuimbaʼépe, umíva apytépe Jesúspe. Jahechamína pe rreláto oñeʼẽva peteĩ rresurreksión Jesús ojapo vaʼekuére. Upéva jatopa Juan kapítulo 11-pe.

10. ¿Mbaʼépa oiko Jesús opredika aja pe ótro ládo pe Jordángui, ha mbaʼépa haʼe ojapo? (Juan 11:1-3).

¹⁰ (Elee Juan 11:1-3). Jesús oreko vaʼekue iñamigokuéra oikóva Betániape: Lázaro ha umi mokõi iñermána hérava María ha Marta (Luc. 10:38-42). Opakuévo áño 32, Lázaro ou hasy ha iñermanakuéra ojepyʼapy hese. Upévare oavisaka hikuái Jesúspe, oĩva hína kuri pe ótro ládo pe Jordángui. Upe lugárgui ojeguata vaʼerã 2 día oñeg̃uahẽ hag̃ua Betániape (Juan 10:40). Ñambyasýramo jepe, oñemog̃uahẽrõ guare pe notísia Jesúspe, Lázaro omanóma kuri. Jesús oikuaáramo jepe iñamígo omano hague odesidi opyta 2 día mas pe oĩháme. Upévare og̃uahẽrõ guare Betániape, ojapóma kuri 4 día Lázaro omano hague. Upérõ Jesús ojapose kuri peteĩ mbaʼe ovenefisiátava iñamigokuérape ha omombaʼeguasútava Jehovápe (Juan 11:4, 6, 11, 17).

11. ¿Mbaʼépa ikatu ñaaprende pe amistágui ko rrelátope?

¹¹ ¿Mbaʼépa ñaaprende pe amistágui ko rrelátope? María ha Marta oavisakárõ guare Jesúspe Lázaro hasyha, ndojeruréi kuri chupe oho hag̃ua Betániape. Haʼekuéra oipotánte kuri Jesús oikuaa iñamígo hasyha (Juan 11:3). Lázaro omanórõ guare, Jesús ikatu kuri mombyry guivénte orresusita chupe. Péro Jesús odesidi oho Betániape oĩ hag̃ua María ha Marta ndive, pórke haʼekuéra iñamíga vaʼekue. ¿Erekópa nde peichagua amígo nepytyvõtava ejerureʼỹre chupe? Oiméramo péicha, nde reikuaa upe ne amígo oĩtaha “nde ykére rehasa asy jave” (Prov. 17:17). Jasegíramo Jesús ehémplo, ñandehegui avei oikóta peichagua amígo. Jasegimína ñaanalisa ko rreláto ha jahecha mbaʼépa oiko upe rire.

12. ¿Mbaʼépa opromete Jesús Mártape, ha mbaʼérepa haʼe ikatu okonfia kuri upe promésare? (Juan 11:23-26).

¹² (Elee Juan 11:23-26). Marta oikuaárõ guare Jesús oĩ hague ag̃ui Betániagui, pyaʼe oho ohecha chupe. Ha heʼi: “Che Ruvicha, reimérire koʼápe, che ermáno nomanomoʼãi kuri” (Juan 11:21). Siérto ningo, Jesús ikatu kuri omonguera Lázarope. Péro haʼe ojapose kuri peteĩ mbaʼe tuichavéva. Jesús opromete Mártape: “Ne ermáno opuʼã jeýta”. Avei heʼi Mártape mbaʼérepa ikatu ojerovia pe promésare. Heʼi chupe: “Che hína pe omoingove jeýva umi héntepe ha pe omeʼẽva vída chupekuéra”. Ha upéva ningo siertoite. Ñandejára omeʼẽ Jesúspe pe podér oporomoingove jey hag̃ua. Anteve Jesús omoingove jey kuri peteĩ mitãkuñaʼi omano ramoitévape, ha avei peteĩ mitãrusúpe omanoha díape (Luc. 7:11-15; 8:49-55). Péro Lázaro ningo ojapóma 4 día omano hague ha oiméne oñepyrũma raʼe oñembyai.  ¿Ikatúne piko upéicharõ oñemoingove jey chupe?

13. Heʼiháicha Juan 11:32-35, ¿mbaʼépa ojapo Jesús ohechávo María ha umi ótro hasẽha? (Ehecha pe taʼanga).

¹³ (Elee Juan 11:32-35). Epensamíntena la oikóvare. María, haʼéva avei Lázaro ermána, oñemboja Jesúsre ha heʼi avei chupe: “Che Ruvicha, reimérire koʼápe, che ermáno nomanomoʼãi kuri”. María ha umi oĩva upépe ningo oñeñandu vaieterei upe oiko vaʼekuére. Jesús ohechávo ha ohendúvo hasẽha hikuái, opokoiterei hese. Ombyasyeterei rupi iñamigokuérape oñepyrũ avei hasẽ. Haʼe ningo ontende porãiterei mbaʼéichapa ñañeñandu omano jave ñandehegui peteĩ jahayhúva. Upévare oipotáma voi opa pe ñemano anivéma hag̃ua ñanembohasa asy.

14. ¿Mbaʼépa ñanemboʼe Jehovágui la Jesús orreaksiona lája María hasẽrõ guare?

¹⁴ Jesús orreaksiona lája ohechárõ guare Maríape hasẽ, ñanemboʼe Jehová haʼeha Ñandejára oporoporiahuverekóva. ¿Mbaʼérepa jaʼe upéva? Jahecháma haguéicha pe artíkulo ohasa vaʼekuépe, Jesús opensa ha oñandu Itúaicha. Upévare haʼe ohechauka porãiterei mbaʼeichaguápa hína Jehová (Juan 12:45). Upéicharõ, jalee jave Jesús hasẽ hague ohechávo iñamigokuérape oñembyasyetereiha, ohechauka ñandéve Jehováre avei opokoitereiha ohecha jave ñanerasẽ jahasa asy rupi (Sal. 56:8). Jaikuaávo upéva ningo katuete ñañemoag̃uiseve ñande Túa ñandeporiahuverekóvare.

15. Heʼiháicha Juan 11:41-44, ¿mbaʼépa oiko raʼe Lázaro sepultúrape? (Ehecha pe taʼanga).

¹⁵ (Elee Juan 11:41-44). Upéi Jesús og̃uahẽ pe sepultúra oñemoĩ haguépe Lázarope, ha ojerure ojepeʼa hag̃ua pe ita ombotýva pe entráda. Péro Marta heʼi chupe oiméne hag̃ua Lázaro rete hyakuã vaíma. Jesús orresponde chupe: “¿Ndaʼéi piko ndéve raʼe regueroviáramo rehechataha Ñandejára podér tuichaitéva?” (Juan 11:39, 40). Upémarõ Jesús omaña yvága gotyo ha oñemboʼe enterovéva renondépe. Haʼe oipota kuri oñemombaʼe Jehovápe la oikótavare ha upéi hatã heʼi: “¡Lázaro, esẽ!”. Ha Lázaro osẽ pe sepultúragui. Upérõ guare Jesús ojapo peteĩ mbaʼe haʼetévaicha  núnka ndoikomoʼãiva kuri (ehecha pe nóta de estúdio oĩva Juan 11:17-pe retopátava pe Traducción del Nuevo Mundo españólpe).

16. ¿Mbaʼéichapa ñanepytyvõ pe rreláto oĩva Juan kapítulo 11-pe jajeroviave hag̃ua pe rresurreksiónre?

¹⁶ Pe rreláto jatopáva Juan kapítulo 11-pe ñanepytyvõ jajeroviave hag̃ua pe rresurreksiónre. Ñanemanduʼamína la Jesús opromete vaʼekuére Mártape, heʼi kuri chupe: “Ne ermáno opuʼã jeýta” (Juan 11:23). Itúaicha avei Jesús oreko pe deséo ha podér okumpli hag̃ua upe promésa. Hasẽrõ guare haʼe ohechauka ikorasõ mbytete guive orresusitaseha umi omano vaʼekuépe ha ndoipotaveimaha avave ohasa asy pe ñemano káusare. Lázaro oikove jeýrõ guare, Jesús ohechauka jey orekoha pe podér omoingove hag̃ua umi omano vaʼekuépe. Ñapensami pe Jesús omomanduʼa vaʼekuére Mártape: “¿Ndaʼéi piko ndéve raʼe regueroviáramo rehechataha Ñandejára podér tuichaitéva?” (Juan 11:40). Jaguereko hetaiterei rrasón jaguerovia hag̃ua Ñandejára okumplitaha pe promésa omoingove jeývo umi omano vaʼekuépe. ¿Péro mbaʼépa ikatu jajapo jajeroviave hag̃ua ko esperánsare?

17. ¿Mbaʼépa jareko vaʼerã enkuénta jalee jave umi rreláto oñeʼẽva pe rresurreksiónre?

¹⁷ Jalee ha jajepyʼamongeta umi rresurreksión oiko vaʼekuére yma. La Bíbliape jatopa 8 rreláto oñeʼẽva umi hénte orresusita vaʼekuére ko yvy ape ári. c ¿Ikatúpa ñamoĩ la méta jastudia porã hag̃ua koʼã rreláto? Jastudia aja ñanemanduʼa vaʼerã koʼã persóna añetehápe oexisti hague. Jaheka mbaʼépa ikatu ñaaprende umi rrelátogui. Avei ñapensa vaʼerã mbaʼéichapa káda kásope ojehecha Jehová orekoha pe deséo ha podér omoingove jeývo umi omano vaʼekuépe. Ha aníkena ñanderesarái jajepyʼamongeta vaʼerãha pe rresurreksión iñimportantevévare, haʼéva Jesús rresurreksión. Hetaiterei  hénte ohecha vaʼekue Jesús orresusita hague, ha upe rresurreksión omopyenda hína ñande jerovia (1 Cor. 15:3-6, 20-22).

18. ¿Mbaʼéichapa ikatu jaaprovecha umi purahéi oñeʼẽva pe rresurreksiónre? (Ehecha avei pe nóta).

¹⁸ Jaaprovecha porã umi purahéi jarekóva oñeʼẽva pe rresurreksiónre (Efes. 5:19). d Koʼã purahéi ñanepytyvõta jajeroviave hag̃ua pe rresurreksiónre. Ikatu ñahendu, ñañensaja ha ñañeʼẽ la heʼívare ñande estúdio de famíliape. Ñamemorisákena ha jajepyʼamongeta hese. Péicha jahasa jave peteĩ pruéva oapeligráva ñande rekove térã omanórõ ñandehegui peteĩ jahayhúva, Jehová espíritu ñanepytyvõta ñanemanduʼa hag̃ua koʼã purahéire. Katuete koʼã músika ñanekonsola ha ñanemombaretéta.

19. ¿Mbaʼéichapa ikatu jaipuru ñane imahinasión ñapensávo pe rresurreksiónre? (Ehecha pe rrekuádro “ ¿Mbaʼépa eporandúne chupekuéra?”).

¹⁹ Jaipuru ñane imahinasión. Jehová omeʼẽ ñandéve la kapasida ñañeimahina hag̃ua ñaĩmaha pe múndo pyahúpe. Peteĩ ermána heʼi: “Che ningo añeimahina meme aimemarõguáicha pe múndo pyahúpe, ha ahetũmbávaicha voi umi rrósa hyakuã asýva oĩva pe paraísope”. Iporãta avei ñapensa mbaʼéichatapa jajotopa vove umi Ñandejára siérvo yma guare ndive. ¿Mávapepa nde reikuaase? ¿Mbaʼépa nde eporanduse chupe? Ñapensamíntena avei pe moménto jajotopa jey vove umi jahayhúva omano vaʼekuéndi. Ikatúma voi jakalkula mbaʼépa jaʼéta chupe, ñañandúma voi ñaañuãha chupe ha ñanerasẽha vyʼágui.

20. ¿Mbaʼépa jajedesidi vaʼerã jajapo?

²⁰ Jaagradesete ningo Jehovápe omeʼẽ haguére ñandéve ko promésa porãite. Ñande ñaĩ segúro Jehová omoingove jeytaha umi omano vaʼekuépe, pórke haʼe oreko pe deséo ha podér okumpli hag̃ua upéva. Jajedesidíkena jasegitaha ñamombarete ñande jerovia pe rresurreksiónre. Jajapóramo péicha ñañemoag̃uivéta Ñandejárare ha haʼetéta voi ku heʼíva ñandéve: “Pe rehayhúva omano vaʼekue opuʼã jeýta”.