1, 2. a) ¿Mbaʼéichapa oñekumpli Isaías 60:22 koʼã ára pahápe? b) ¿Mbaʼépa oñekotevẽ koʼág̃arupi Ñandejára organisasiónpe?

LA Biblia heʼi: “Pe saʼivéva hetavéta, ha pe michĩvévagui oikóta peteĩ tetã guasu” (Is. 60:22, TNM). Ko profesía oñekumpli hína koʼã ára pahápe. Por ehémplo, áño 2015-pe oĩma kuri 8.220.105 testígo de Jehová opredikáva oparupiete ko yvy ape ári. Jehová avei oprofetisa vaʼekue: “Che, Jehová, pyaʼe ha hiʼaraitépe ajapóta”. Upéva heʼise jarekovetaha traváho jajapo hag̃ua. ¿Ñañehaʼãmbaitépa hína jajapo opa ikatúva japredika ha ñamboʼe hag̃ua ñande rapichakuérape pe marandu porã? Heta ermáno ha ermána ojapo iprekursorádo rregulár térã auxiliár. Oĩ katu ováva umi lugár oĩvehápe nesesida, térã ombaʼapo jejopýva omopuʼã hag̃ua umi Salón del Reino.

² Káda áño oñeforma 2.000 kongregasiónrupi, upévare oñekotevẽterei ermáno ikatupyrýva ombaʼapo vaʼerã umi kongregasiónpe. Por ehémplo, oñekotevẽ ansiáno ha siérvo ministeriál rehe. Hiʼãiterei ningo káda áño heta ermánogui oiko siérvo ministeriál, ha heta siérvo ministeriálgui oiko ansiáno. Jahechaháicha, entéronte jareko heta mbaʼe jajapo vaʼerã “ñande Ruvicha servísiope” (1 Cor. 15:58).

3, 4. ¿Mbaʼe métapa ikatu ñamoĩ?

³ (Elee 1 Timoteo 3:1.) Apóstol Pablo oguerohory vaʼekue umi ermáno oñehaʼãmbaitévape ohupyty priviléhio kongregasiónpe. Umi mbaʼe heʼíva ñanemopensa peteĩ persóna oñehaʼãmbaitévare ojagarra álgo oĩva mombyry chugui, ha upearã oipysopaitéva ijyva. Por ehémplo, ñapensami peteĩ ermáno oserviseha kómo siérvo ministeriál. Haʼe ohechakuaa tekotevẽha oñehaʼãve omehora hag̃ua kómo kristiáno. Ñamoĩ chupe ko ermáno omehoraha heta mbaʼépe, ha oñenombra chupe siérvo ministeriál. Upéva ndeʼiséi noñehaʼãvéima vaʼerãha, síno osegi vaʼerã omehora ikatu hag̃uáicha okumpli umi rrekisíto ha oiko chugui ansiáno.

⁴ Heta ermáno oñehaʼãmbaite okambia tekotevẽhápe, ku “oipysorõguáicha ijyva”, ikatu hag̃uáicha oservi porãve Jehovápe. Por ehémplo, ikatu hína oĩ oserviséva de prekursór, ombaʼaposéva Betélpe, térã oipytyvõséva omopuʼã ha omyatyrõ hag̃ua Salón del Reino. Jahechamína mbaʼéichapa la Biblia ikatu ñanepytyvõ japrogresa hag̃ua Jehová servísiope.

5. ¿Mbaʼéichapa heta ermáno imitãva oaprovecha oservi porã hag̃ua Jehovápe?

⁵ Umi imitãvéva ningo imbareteve ha hesãi, upévare ikatu ojapo hetave mbaʼe Jehová servísiope (elee Proverbios 20:29). Heta ermáno ha ermána imitãva gueteri ombaʼapo Betélpe oñeimprimihápe umi lívro. Oĩ umi oipytyvõva oñemopuʼã ha oñemyatyrõhápe umi Salón del Reino. Ótro katu oñekuaveʼẽ oipytyvõ hag̃ua umi oiko haguépe desástre naturál. Heta prekursór avei oaprende ótro idióma, térã ova ótro lugárpe opredika hag̃ua.

6-8. a) ¿Mbaʼépa ojapo peteĩ ermáno imitãitiva oprogresa hag̃ua espirituálmente, ha mbaʼépa ohupyty upe haguére? b) ¿Mbaʼépa ikatu jajapo jahechakuaa hag̃ua “mbaʼeichaitépa Jehová ivuéno”?

⁶ Entéro ningo jahayhu Jehovápe ha ñañehaʼã jajapo opa ikatúva iservísiope. Upéicharõ jepe, ikatu ñañeñandu peteĩ ermáno hérava Aarón oñeñandu haguéicha. Haʼe ningo imitã guive opredika ha oho rreunionhápe, péro ndovyʼapái. ¿Mbaʼépa oipytyvõ chupe okambia hag̃ua?

⁷ Aarón oñehaʼã olee la Biblia káda día, ojeprepara rreunionrã, okomenta meme ha oñemboʼeve Jehovápe. Koʼã mbaʼe tuichaiterei oipytyvõ chupe oprogresa hag̃ua. Mbeguekatúpe Aarón oikuaa porãve Jehovápe ha amás día ohayhuve chupe. Upéi ojapo iprekursorádo, oho oipytyvõ umi lugár oiko haguépe desástre naturál, ha ova ótro paíspe opredika hag̃ua. Koʼág̃a Aaróngui oiko ansiáno ha oservi Betélpe. Haʼe ojapo rire koʼã mbaʼe, ovyʼave, ha heʼi okomprova hague “mbaʼeichaitépa Jehová ivuéno”. Avei ohechakuaa Jehová imbaʼeporãitereiha hendive, ha upévare ojapose ikatúva guive hesehápe. Aarón oĩ segúro Jehová ovendesivetaha chupe.

⁸ Peteĩ salmísta heʼi vaʼekue: “Petanteána ha pehecha mbaʼeichaitépa Jehová ivuéno”. Upéi heʼi avei: “Umi oñehaʼãvape oñemoag̃ui Jehováre ndofaltamoʼãi mbaʼevete” (elee Salmo 34:8-10). Jajapóramo ikatúva guive Jehová servísiope, javyʼáta pórke jaikuaa upéva ombopyʼaroryha chupe. Péicha Jehová katuete oñangarekóta ñanderehe, opromete haguéicha ñandéve.

9, 10. ¿Mbaʼérepa iñimportánte ñanepasiénsia?

⁹ Oime vaʼerã ñande katuete ñambaʼaposeve Jehová servísiope. Péro ñapensamína hetáma ñahaʼarõ hague algún priviléhio kongregasiónpe, ha ndajahupytýi, térã  jaservi porãseve Jehovápe ha ñane sirkunstánsia nomeʼẽi. ¿Mbaʼépa ikatu jajapo oikóramo ñanderehe koʼã mbaʼe? Ñañehaʼã vaʼerã ñanepasiénsia (Miq. 7:7). Jehová ikatu hína opermiti jahasa koʼã situasiónre, péro núnka nañanderejareimoʼãi. Haʼe katuete ñanepytyvõta. Ñapensamína Abrahán ehémplore. Jehová opromete kuri chupe ifamiliataha, péro ohasa heta áño, ha upéi ae Sara hyeguasu ha onase Isaac. Abrahán ipasiénsia ha siémpre ojerovia Jehováre ohaʼarõ aja (Gén. 15:3, 4; 21:5; Heb. 6:12-15).

¹⁰ Jaikuaaháicha, heta vése ningo ijetuʼu ñanepasiénsia (Prov. 13:12). Péro jaikóramo ñapensaiterei ñane situasiónre ha ñañeamarga, katuete ñañedesanimáta. Ikuentave jaipuru porã ñane tiémpo ñamehorave hag̃ua kómo kristiáno, ha ñañembokatupyryve ikatu hag̃uáicha ñakumpli porã umi rresponsavilida kongregasiónpe. Jahechamína mbohapy mbaʼe ikatúva jajapo ñahaʼarõ aja.

11. ¿Mbaʼéichapa ikatu ñamehorave jahávo, ha mbaʼérepa iñimportánte upéva?

¹¹ Ñamehora jahávo. Jaleéramo la Biblia ha jajepyʼamongeta hese, ñanearanduvéta, ñaneentendidovéta ha jadesidi porãta. Umi ermáno oprogresaséva tekotevẽ omehora koʼã mbaʼépe ikatu hag̃uáicha oñangareko kongregasiónre (Prov. 1:1-4; Tito 1:7-9). Jastudiávo la Biblia, jahechakuaáta mbaʼépa opensa Jehová heta témare. Péicha káda día ikatúta jaipuru umi mbaʼe ñaaprendéva jadesidi hag̃ua umi mbaʼe Jehová oguerohorýva. Por ehémplo, jaikuaáta mbaʼéichapa jatrata vaʼerã ñande rapichakuérape, mbaʼéichapa jaipuru vaʼerã ñande pláta, ha mbaʼéichapa ñañemonde ha jajediverti vaʼerã.

12. ¿Mbaʼépa enterovéva jajapo vaʼerã ikatu hag̃uáicha ojejerovia ñanderehe?

 ¹² Ñañehaʼã ñakumpli porã umi asignasión oñemeʼẽva ñandéve. Ñandejára puévlo omyatyrõrõ guare pe témplo, Nehemías oikotevẽ kuri heta kuimbaʼe oñenkarga vaʼerã umi traváhore. ¿Mávapepa oiporavo? Umi persóna rresponsávle ha herakuã porãvape. Haʼe oikuaa porã koʼã kuimbaʼe ohayhuha Jehovápe ha ojapo porãtaha oimehaichagua traváho oñemeʼẽva chupekuéra (Neh. 7:2; 13:12, 13). Ñane tiémpope avei oiko upéva. Peteĩ ermáno iñeʼẽrendúramo Ñandejárape ha ombaʼapo jejopýrõ chupe g̃uarã, oñeñeʼẽ porãta hese. Ha ikatu oñemeʼẽ chupe hetave rresponsavilida (1 Cor. 4:2). Péro tahaʼe kuimbaʼe térã kuña, entéro jajapo porã vaʼerã oimehaichagua traváho oñenkargáva ñandéve (elee 1 Timoteo 5:25).

13. ¿Mbaʼéichapa ikatu jasegi José ehémplo oĩ jave ñandetrata vaíva?

¹³ Jajerovia Jehováre. ¿Mbaʼépa ikatu jajapo peteĩ ermáno reiete ñandetrata vaíramo? Ikatu ñañemongeta upe ermánondi ha ñamombeʼu chupe mbaʼéichapa ñañeñandu. Péro ani jaiko ñañedefendesénte, ha jahechaukase chupe haʼe la ofalla hague. Péicha ningo ñambotuichavéta la provléma. Ñanemanduʼamína José ehémplore. Ñepyrũrã iñermanokuéra otrata vaieterei kuri chupe. Upéi katu oñemboja hese ojapo hague peteĩ mbaʼe vai ha oho kárselpe. Upéicharõ jepe, José noñemomombyrýi Jehovágui, síno opensa meme ipromesakuérare ha osegi iñeʼẽrendu (Sal. 105:19). Haʼe ohasávo umi mbaʼe ijetuʼuetéva, noñekonsentrái iprovlémare, síno oñehaʼã ohecha mbaʼéichapa ikatu omehora ohóvo. Koʼã mbaʼe oipytyvõ chupe okumpli porã hag̃ua peteĩ rresponsavilida iñimportánteva oñemeʼẽva chupe upe rire (Gén. 41:37-44; 45:4-8). Koʼág̃a avei oĩramo ñandetrata vaíva, jajerure vaʼerã Jehovápe tañanemoarandu. Haʼe ñanepytyvõta ñanetrankílo ha ñaneamávle hag̃ua ñañeʼẽ vove ñande rapichándi (elee 1 Pedro 5:10).

14, 15. a) ¿Mbaʼérepa akóinte ñañatende vaʼerã ñamboʼe lájare? b) ¿Mbaʼépa ikatu jajapo ndaikatúiramo ñañemongeta umi hénte oĩvandi ñande territóriope? (Ehecha pe taʼanga oĩva iñepyrũme, ha pe rrekuádro hérava “ ¿Ikatúpa japrova ótro método?”.)

¹⁴ Pablo heʼi vaʼekue Timotéope osegi hag̃ua omehora oexplika lája Ñandejára Ñeʼẽ. Upéi heʼi avei chupe: “Akóintekena eñatende ndejehe ha remboʼe lájare” (1 Tim. 4:13, 16). Jaikuaaháicha, Timoteo heta tiémporema opredika, ha oiméne ikatupyry voi raʼe. ¿Mbaʼérepa upéicharõ tekotevẽ kuri omehora? Pórke umi persóna okambia ha avei umi situasión oñepresentáva. Timoteo oipotáramo umi hénte siémpre ohendu chupe, osegi vaʼerã omehora ha okambia oporomboʼe lája. Ñande avei jajapo vaʼerã upéva japredika jave.

¹⁵ Japredika jave de kása en kása, sapyʼánte ndajajuhúi umi héntepe. Ambue hendápe katu umi hénte oĩramo jepe, noñepermitíri ñandéve jaike umi lugár térã edifísio oikohápe. Oiméramo otoka ñandéve japredika koʼãichagua territóriope, ikatu japrova ótro método ñañeʼẽ hag̃ua ñande rapichakuérandi.

16. ¿Mbaʼépa jajapokuaa ikatu hag̃uáicha japredika umi lugár púvlikope?

¹⁶ Oĩ heta ermáno opredikaséva umi lugár púvlikope, por ehémplo umi paráda de trénpe, paráda de kolektívope, merkádore térã umi plásare. ¿Mbaʼépa heʼi hikuái umi héntepe ikatu hag̃uáicha oñepyrũ oñemongeta hendivekuéra? Algúno omensiona peteĩ notísia ipyahúva, ótro katu oguerohory pe persónape ifamíliare, térã oporandu chupe  itraváhore. Upéi ohechakuaáramo pe persóna osegiseha oñemongeta, oñeʼẽma chupe la Bíbliare, ha oporandu mbaʼépa opensa upévare. Péicha ojapo rupi koʼã ermáno, ikatu oñemongeta porã hapichakuérandi.

17, 18. a) ¿Mbaʼépa ñanepytyvõta ikatu hag̃uáicha ñañeanima japredika umi lugár púvlikope? b) ¿Mbaʼépa jahupytýta ñapensáramo David opensa haguéicha?

¹⁷ Ikatu oime ijetuʼu ñandéve ñañepyrũ hag̃ua japredika peteĩ deskonosídope kállere. Upéicha oñeñandu vaʼekue Eddie, peteĩ prekursór oikóva siuda de Nueva Yórkpe. ¿Mbaʼépa oipytyvõ chupe ikatu hag̃uáicha oñeanima opredika? Haʼe heʼi: “Rojapo jave ore estúdio de família, che rembirekóndi roheka umi informasión orepytyvõtava rombohovái porã hag̃ua umi pregúnta ikatúva ojejapo oréve. Avei rojerure jepi suherénsia ótro ermánope”. Koʼág̃a Eddie ovyʼaiterei opredika jave umi lugár púvlikore.

¹⁸ Javyʼáramo predikasiónpe ha ñañehaʼãramo ñamehora japredika lája, umi ótro ohechakuaáta ñanderehe japrogresaha jahávo (elee 1 Timoteo 4:15). Ikatu voi ñaipytyvõ hína peteĩ persónape oiko hag̃ua chugui testígo de Jehová. Rréi David heʼi vaʼekue: “Che amombaʼeguasúta Jehovápe tódo el tiémpo, siémpre ambotuicháta chupe. Añesenti orgullóso aservi haguére Jehovápe. Umi ivuénova ohendúta Ñandejára heʼíva ha ovyʼáta” (Sal. 34:1, 2, TNM).

19. ¿Mbaʼérepa javyʼa vaʼerã jajapóramo ikatúva guive Ñandejára servísiope?

¹⁹ David heʼi vaʼekue avei: “Jehová, entéro mbaʼe nde rekrea vaʼekue nembotuicha. Umi nde siérvo iñeʼẽrendúva nemombaʼeguasúta. Haʼekuéra oñeʼẽta ne rréino iporãitévare, omombeʼúta mbaʼeichaitépa ndepoderóso. Péicha umi hénte oikuaáta umi mbaʼe rejapo vaʼekue nde podér rupive. Oikuaáta hikuái mbaʼeichaitépa iporã ha ipoderóso ne rréino” (Sal. 145:10-12, TNM). Umi ohayhúva Jehovápe ha iñeʼẽrendúva chupe, omombeʼuse umi héntepe mbaʼeichagua persónapa haʼe. Péro oiméramo ñanderasykatu térã ñandeedáma jahávo, ndaikatúi ñasẽ japredika de kása en kása ñande jajaposeháicha. ¿Mbaʼépa ñanepytyvõta upe situasiónpe? Ani ñanderesarái ñañeʼẽ jave Jehováre oimeraẽ persónape, tahaʼe umi doktór térã enfermerokuérape, ñamombaʼeguasuha hína chupe. ¿Ha mbaʼépa ikatu jajapo ñaiméramo kárselpe ñaneñeʼẽrendu haguére Jehovápe? Upéicharõ jepe, ikatúnte avei jasegi japredika. Upéva ningo katuete ombovyʼáta Jehovápe (Prov. 27:11). Ñandejára ovyʼa avei jaservíramo chupe ñane hentekuéra ndojapóiramo jepe upéva (1 Ped. 3:1-4). Jahasáramo jepe umi situasión ivaivéva, lomímonte ikatu jasegi ñambotuicha Jehovápe, ñañemoag̃uive hese ha japrogresa espirituálmente.

20, 21. ¿Mbaʼéichapa ovenefisiáta ótrope jasegíramo japrogresa espirituálmente?

²⁰ Jehová ningo katuete ñanevendesíta jasegíramo ñañemoag̃ui hese ha jaservi chupe ñande pyʼaite guive. ¿Ikatúpa ñamohenda porãve ñane tiémpo, térã ñakambia tekotevẽhápe? Oiméramo ikatu hína, jarekovéta oportunida ñaipytyvõ hag̃ua hetave persónape oikuaa hag̃ua umi promésa porãite oĩva la Bíbliape. Avei ikatúta ñaipytyvõve ñane ermanokuérape. Haʼekuéra ohechávo ñañehaʼãveha ñambaʼapo meme kongregasiónpe, katuete ñanderayhuvéta.

²¹ Oiméramo ndaareguasúi ñañepyrũ hague jaservi Jehovápe, térã ojapóma heta áño, lomímonte ikatu jasegi ñañemoag̃ui hese ha japrogresa espirituálmente. Pe artíkulo oúvape jahecháta mbaʼéichapa ikatu ñaipytyvõ ótrope oprogresa hag̃ua.