¿OĨPA peteĩ priviléhio jarekoséva kongregasiónpe péro koʼag̃aite ndaikatúiva jahupyty? Ikatu oime peteĩ priviléhio ótro ermáno orekóva, térã peteĩ asignasión ymave jareko vaʼekue. Péro oiméne koʼág̃a ndaikatuvéima jajapo heta mbaʼe ymave guaréicha ñandeedáma rupi, ñanderasykatu, ñandesogue térã ñañangareko rupi ñane famíliare térã peteĩ ñane héntere. Ikatu oime jaheja raʼe peteĩ asignasión heta áñore jareko vaʼekue oĩ rupi kámbio Jehová organisasiónpe. Tahaʼe haʼeháicha, ikatu hína ñañandu ndajajapoiha entéro mbaʼe jajaposéva Jehová servísiope, ha upéicha rupi ikatu jaju ñañedesanima. ¿Mbaʼépa ikatu ñanepytyvõ ani hag̃ua jaiko ñañedesanimaháre, ñandepyʼaro térã ñañamarga? ¿Mbaʼépa ikatu ñanepytyvõ jasegi hag̃ua javyʼa?

Juan el Bautista ehémplo ningo tuichaiterei ikatu ñanepytyvõ jasegi hag̃ua javyʼa. Juan oreko vaʼekue heta asignasión iñimportantetereíva, péro oiméne noimoʼãi raʼe mbaʼeichaitépa okambiáta kuri hekove. Haʼe ningo oĩ jepe kárselpe hetave tiémpo upe ohasa vaʼekuégui opredikávo. Upéicharõ jepe, Juan osegi vaʼekue ovyʼa oservívo Jehovápe, ha osegi upéicha omohuʼã meve iservísio. ¿Mbaʼépa oipytyvõ raʼe chupe? ¿Ha mbaʼéichapa ikatu jasegi javyʼa ñambohovái jave umi mbaʼe ñahaʼarõʼỹva ha ikatúva ñanedesanima?

Áño 29-pe, mes de abril rupi, Juan oñepyrũ vaʼekue iñasignasión oprepara hag̃ua umi héntepe orresivi hag̃ua pe Mesíaspe. Haʼe heʼi: “Peñarrepentíke, pórke pe Rréino yvagapegua hiʼag̃uimbaitéma” (Mat. 3:2; Luc. 1:12-17). Heta hénte ohendu porã vaʼekue. Oĩ voi umi oúva mombyrýgui ohendu hag̃ua chupe, ha heta oĩ oñarrepentíva ha ojevautisáva. Juan avei pyʼaguasúpe oavisa vaʼekue umi líder rrelihióso hovamokõivape mbaʼépa oikóta hesekuéra nokambiáiramo (Mat. 3:5-12). Péro 6 méserupi upe rire, mes de octúbrerupi áño 29-pe, Juan ojapo pe mbaʼe iñimportantevéva iservísiope ovautisárõ guare Jesúspe. Upe guive, Juan omokyreʼỹ umi héntepe osegi hag̃ua Jesúspe, pe Mesías oñepromete vaʼekue (Juan 1:32-37).

Pe traváho Juan ojapóva ningo iñimportanteterei vaʼekue, upévare Jesús heʼi vaʼekue hese: “Ndaipóri ko yvy ape ári ni peteĩ persóna tuichavéva Juan el Bautístagui” (Mat. 11:11). Juan katuete  ovyʼáne raʼe umi vendisión orresivi vaʼekuére. Upéicha avei, koʼág̃arupi oĩ heta ermáno ha ermána orresivi vaʼekue Jehovágui heta vendisión iporãitereíva. Jahechamína ermáno Terry ehémplo. Haʼe ha hembireko Sandra ningo oservíma Jehovápe de tiémpo kompléto mas de 50 áño. Terry omombeʼu: “Che ningo areko jepéma heta priviléhio iporãitereíva. Por ehémplo, aservíma kómo prekursór rregulár, betelita, prekursór espesiál, superintendénte de sirkuíto ha distríto, ha koʼág̃a aĩ jey de prekursór espesiál”. Katuete ningo javyʼa oñemeʼẽ jave ñandéve peteĩ priviléhio Jehová organisasiónpe, péro Juan el Bautista ehémplo ñanemboʼéta iñimportanteha ñañehaʼã jasegi hag̃ua javyʼa okambia jave ñane situasión.

Juan el Bautista osegi vaʼekue ovyʼa iservísiope pórke oagradese vaʼekue umi priviléhio orekóva. Jahechamína peteĩ ehémplo. Jesús ojevautisa rire, hetave hénte oñepyrũ vaʼekue omoirũ chupe ha saʼivéma oĩ la omoirũva Juánpe. Juan disipulokuéra katu ojepyʼapýma, ha upévare oñemboja ha heʼi Jesúsre: “Koʼág̃a haʼe oporovautisa hína ha umi hénte ohopa hendápe” (Juan 3:26). Péro Juan heʼi chupekuéra: “Pe omendáva pe nóviare, haʼe pe nóvio. Péro pe nóvio amígo oñemboʼy pe nóvio ykére ha ovyʼaiterei ohendúvo chupe oñeʼẽha. Upéicha avei che avyʼaiterei” (Juan 3:29). Juan ndohechái vaʼekue Jesúspe ikontrárioramo, ha nopensái avei itraváho ndovaleiha mbaʼeverã iñimportanteve rupi Jesús traváho. Upéva rangue, Juan osegi vaʼekue ovyʼa pórke omombaʼeterei pe traváho ojapóva haʼe haguére “pe nóvio amígo”.

Juan ijaktitu porã rupi osegi vaʼekue ovyʼa ijetuʼúramo jepe pe asignasión oreko vaʼekue. Por ehémplo, Juan onase guive haʼe vaʼekue nazareo, upévare ndovaléi vaʼekue hoʼu víno (Luc. 1:15). Haʼe ningo oiko vaʼekue sensillomínte ha upévare Jesús heʼi vaʼekue hese: “Juan oajuna ha ndoʼúi víno”. Péro Jesús ha idisipulokuéra ndorekói vaʼekue upe proivisión, ha upévare ikatu kuri oiko oimeraẽ ótroicha (Mat. 11:18, 19). Avei Juan ndojapói vaʼekue ni peteĩ milágro, péro oikuaa Jesús disipulokuéra orresivi hague podér ojapo hag̃ua upéva, hiʼarive umíva apytépe oĩ kuri umi anteve osegi vaʼekue chupe (Mat. 10:1; Juan 10:41). Péro Juan ndojesarekói vaʼekue umi diferénsiare, upéva rangue haʼe oñekonsentra okumpli porã hag̃ua pe asignasión Jehová omeʼẽ vaʼekue chupe.

Ñande avei ñamombaʼéramo pe asignasión jarekóva Jehová servísiope, katuete jasegíta javyʼa. Terry, ajeʼi ñañeʼẽ hague heʼi: “Añekonsentra vaʼekue káda uno umi asignasión arresivi vaʼekuére”. Imanduʼávo iservísio de tiémpo komplétore, haʼe heʼi: “Nambyasýi ni michĩmi umi mbaʼe ajapo vaʼekue, upéva rangue areko heta rrekuérdo iporãitereíva”.

Ñande ningo ikatu javyʼave Jehová servísiope jajepyʼamongetáramo mbaʼérepa añetehápe ivalióso peteĩ asignasión térã rresponsavilida: Jareko pe priviléhio ‘ñambaʼapóvo Ñandejára ndive’ (1 Cor. 3:9). Ñamoĩmína peteĩ ehémplo: Peteĩ joya ningo siémpre omimbíta pyʼỹinte oñemboveráramo. Upéicha avei katuete jasegíta javyʼa siémpre jajepyʼamongetáramo pe priviléhio tuichaite jarekóvare jaservi haguére Jehovápe, ha ndajahejamoʼãi umi pensamiénto vai oike ñane akãme. Ndajaikomoʼãi ñañekompara ótrore, ni nañapensamoʼãi umi priviléhio ótro orekóva iñimportanteveha umi ñande jarekóvagui (Gál. 6:4).

Juan oiméne oikuaa raʼe hembiapo ndohopukumoʼãveimaha, péro noimoʼãine raʼe avei la degolpete opataha (Juan 3:30). Áño 30-pe, 6 méserupinte Jesús ojevautisa rire, rréi Herodes omondo kárselpe Juánpe. Péro haʼe lomímonte ojapo vaʼekue ikatúva entéro osegi hag̃ua opredika (Mar. 6:17-20). ¿Mbaʼépa oipytyvõ raʼe Juánpe osegi hag̃ua ovyʼa okambiáramo jepe isituasión? Haʼe oñekonsentra vaʼekue umi mbaʼe iñimportántevare Jehovápe g̃uarã.

Oĩ aja kárselpe, Juánpe oñemombeʼu vaʼekue umi mbaʼe Jesús ojapóva (Mat. 11:2; Luc. 7:18). Haʼe oĩ vaʼekue segúro Jesús haʼeha pe Mesías, péro oiméne oñeporandu raʼe mbaʼéichapa oñekumplíta entéro umi profesía oñeʼẽva pe Mesíasre. Por ehémplo, umi profesía heʼi pe Mesíasgui oikotaha rréi, upéicharõ, ¿oñepyrũtamapa Jesús ogoverna ensegidaiténtema voi? ¿Onohẽnepa chupe  kárselgui? Oikuaasetereígui koʼã mbaʼe, Juan omondo mokõi idisípulope oporandu hag̃ua Jesúspe: “¿Nde piko hína pe Ñandejára opromete vaʼekue omboutaha, térãpa oúta ótro kuimbaʼe?” (Luc. 7:19). Koʼã disípulo oho jeýrõ guare Juan rendápe, haʼe oiméne ojapysaka porã raʼe hesekuéra omombeʼu jave umi milágro Jesús ojapóva, ha pe mensáhe ogueruka vaʼekue chupe: “Umi siégo koʼág̃a ohecha, umi ndoguataporãiva oguata porãma, umi iléprava okuera, umi nohendúiva ohendu, umi omanóvape oñemopuʼã jey ha umi imboriahúvape oñemombeʼu umi notísia porã” (Luc. 7:20-22).

Juánpe katuete omokyreʼỹetereíne raʼe umi mbaʼe heʼíva chupe idisipulokuéra. Upéva ohechauka porã kuri Jesús okumpliha umi profesía oñeʼẽva pe Mesíasre. Jesús nonohẽmoʼãiramo jepe chupe kárselgui, Juan oikuaa ndopytareíri hague umi mbaʼe ojapo vaʼekue. Naiporãiramo jepe la isituasión, oĩ vaʼekue heta mbaʼe ombovyʼáva chupe.

Ñande jasegíramo Juan ehémplo ha ñañekonsentra Jehová servísiore, ñanepasiénsia ha javyʼáta jagueropuʼakávo entéro mbaʼe (Col. 1:9-11). Upearã tekotevẽ jalee la Biblia ha jajepyʼamongeta hese, upéva ñanepytyvõta jahechakuaa hag̃ua núnka ndopytareimoʼãiha umi mbaʼe jajapóva Jehovápe g̃uarã (1 Cor. 15:58). Sandra omombeʼu: “Che káda día alee un kapítulo de la Biblia, upéva chepytyvõ añemoag̃uive hag̃ua Jehováre ha añekonsentra hag̃ua hese, ndahaʼéi chejehe”. ¿Mbaʼépa avei ikatu ñanepytyvõ? Ikatu ñañekonsentra umi infórme ohechaukávare umi mbaʼe porã ojapóva ñane ermáno ha ermanakuéra Jehovápe g̃uarã. Upéicha ndajaikomoʼãi ñapensaiterei umi mbaʼe jahasávare, síno ñañekonsentráta umi mbaʼe Jehová ojapóvare hína. Sandra heʼive: “Pe Broadcasting osẽva káda mes ñanepytyvõ ñañandu hag̃ua Jehová organisasión oĩha ñande ykerete, ha ñanepytyvõ avei jasegi hag̃ua javyʼa ñane asignasiónpe”.

Juan el Bautista ningo peteĩ tiémporente opredika vaʼekue, péro Elías ojapo haguéicha, haʼe ‘ikyreʼỹ ha imbarete’ vaʼekue ojapo hag̃ua hembiapo. Ha haʼéicha avei, Juan “haʼe vaʼekue peteĩ yvypóra ñandeichaguánte avei” (Luc. 1:17; Sant. 5:17). Ñandeagradesído ha ñañekonsentráramo Jehová servísiore Juan ojapo haguéicha, ñande avei jasegíta javyʼa jaservívo Jehovápe, tahaʼe haʼéva umi mbaʼe oikóva ñande rekovépe.