1. ¿Mávapa oipytyvõ vaʼekue oñeforma hag̃ua pe kongregasión Filípospe?

PE APÓSTOL Pablo, Silas, Lucas ha Timoteo og̃uahẽrõ guare Filípospe, oĩva Roma poguýpe, otopa vaʼekue hetaiterei hénte oikuaasevéva umi notísia porã. Koʼã 4 ermáno ikyreʼỹetéva oipytyvõ oñeforma hag̃ua upépe peteĩ kongregasión, ha amalisia enterove umi ermáno ha ermána pyahu oñepyrũ oñembyaty Lidia rógape, peteĩ ermána imbaʼeporãitereíva (Hech. 16:40).

2. ¿Mbaʼe situasión ijetuʼúvapa ombohovái pe kongregasión?

² Pe kongregasión ensegidaiténtema voi ombohovái peteĩ situasión ijetuʼúva. Satanás omokyreʼỹ umi hénte ndaijaʼéivape kristianokuérare oñemoĩ hag̃ua Pablo ha iñirũnguérare. Pablo ha Sílaspe ojejagarra, ojegarrotea ha ojegueraha kárselpe. Oñeguenohẽ rire chupekuéra kárselgui, haʼekuéra oho ovisita umi ermáno ha ermána pyahúpe ha omokyreʼỹ chupekuéra. Upéi Pablo, Silas ha Timoteo oho pe siudágui, péro amalisia Lucas opyta upépe. ¿Mbaʼépa oiko raʼe umi ermáno ha ermána pyahúgui? Jehová oipytyvõ chupekuéra ijespíritu rupive ikatu hag̃uáicha osegi oservi chupe kyreʼỹme (Filip. 2:12). ¡Oime vaʼerã Pablo ovyʼaite raʼe hesevekuéra!

3. Heʼiháicha Filipenses 1:9-11, ¿mbaʼépa ojerure vaʼekue Pablo iñemboʼépe?

³ Ohasa rire 10 áñorupi, Pablo oskrivi peteĩ kárta pe kongregasión oĩvape Filípospe. Jaleévo pe kárta jahechakuaa mbaʼeichaitépa Pablo ohayhu vaʼekue umi ermanokuérape. Haʼe heʼi: “Ñandejára oikuaa mbaʼeichaitépa pohechagaʼu, pórke che pohayhueterei enterovépe Cristo Jesús penderayhuháicha” (Filip.  1:8). Haʼe heʼi chupekuéra imanduʼaha hesekuéra iñemboʼépe. Pablo ningo ojerure Jehovápe oipytyvõmi hag̃ua chupekuéra ikatu hag̃uáicha imborayhukuéra okakuaave ohóvo, ohechakuaa hikuái umi mbaʼe iñimportantevéva, anítei ojapo mbaʼeve ivaíva, ani omoñepysanga ótrope, ha hetave hag̃ua ohóvo umi mbaʼe porã ojapóva hikuái. Ñane tiémpope, ñande avei ikatu ñaaprende heta mbaʼe Pablo heʼi vaʼekuégui ikorasõite guive umi filipénsespe (elee Filipenses 1:9-11). Ko artíkulope jahecháta umi mbaʼe heʼi vaʼekue chupekuéra, ha mbaʼéichapa ikatu jajapo uno a uno umi mbaʼe.

4. a) Asegún 1 Juan 4:9, 10, ¿mbaʼéichapa Jehová ohechauka vaʼekue ñanderayhuetereiha? b) ¿Mbaʼeichaite pevépa jahayhu vaʼerã Jehovápe?

⁴ Jehová ohechauka ñanderayhuetereiha omboúvo Itaʼýrape ikatu hag̃uáicha omano ha oñeperdona ñandéve ñande pekadokuéra (elee 1 Juan 4:9, 10). Pe mborayhu tuichaite Jehová ohechaukáva ningo ñanemomýi jahayhu hag̃ua avei chupe (Rom. 5:8). ¿Péro mbaʼeichaite pevépa jahayhu vaʼerã Jehovápe? Jesús ombohovái vaʼekue upéva heʼírõ guare peteĩ fariséope: “Rehayhu vaʼerã Jehová nde Járape nde pyʼaite guive, nde rekove kompletoite reheve, ha entéro ne pensamiénto reheve” (Mat. 22:36, 37). Ñande jahayhuse Jehovápe ñane korasõ mbytete guive, ndahaʼéi vai vaínte. Ha jaipota upe mborayhu okakuaave ohóvo káda día. Pablo heʼi vaʼekue umi filipénsespe ‘imborayhukuéra okakuaave vaʼerãha ohóvo’. Upéicharõ, ¿mbaʼépa ikatu jajapo jahayhuve hag̃ua Jehovápe?

5. ¿Mbaʼépa jajapo vaʼerã jahayhuve hag̃ua Jehovápe?

⁵ Jahayhu hag̃ua Jehovápe tekotevẽ jaikuaa porã chupe. La Biblia heʼi: “Pe ndoporohayhúiva ndoikuaái Ñandejárape, pórke Ñandejára ningo mborayhu” (1 Juan 4:8). Apóstol Pablo heʼi vaʼekue jahayhuvetaha Jehovápe jaikuaa porãramo chupe ha ñantendéramo mbaʼéichapa ohecha entéro mbaʼe (Filip. 1:9). Ñañepyrũrõ guare jastudia la Biblia, ñande ñañepyrũ jahayhu Jehovápe ndajaikuaáiramo jepe entéro umi kualida haʼe orekóva. Péro amáske jaikuaave jahávo Jehovápe, jahayhuve avei chupe. Ndareíri ningo ñandéve g̃uarã jastudia meme la Biblia ha jajepyʼamongeta hese haʼe hína peteĩva umi mbaʼe iñimportantevéva ñande rekovépe (Filip. 2:16).

6. Asegún 1 Juan 4:11, 20, 21, ¿mbaʼépa jajapo vaʼerã okakuaave hag̃ua ñane mborayhu?

⁶ Pe mborayhu tuichaite Jehová ohechaukáva ñandéve ningo ñanemomýi jahayhu hag̃ua ñane ermanokuérape (elee 1 Juan 4:11, 20, 21). Péro ikatu ñapensa osẽ reitanteha ñandéve jahayhu ñane ermanokuérape. Amo ipahápe, enterove jaadora hína Jehovápe ha ñañehaʼã jasegi iñehémplo. Avei jasegi Jesús ehémplo, haʼe ningo ñanderayhueterei rupi omeʼẽ vaʼekue hekove ñanderehehápe. Péro añetehápe sapyʼánte ijetuʼu hína ñakumpli hag̃ua pe mandamiénto heʼíva jahayhu vaʼerãha ñane ermanokuérape. Jahechamína mbaʼépa oiko vaʼekue pe kongregasión de Filípospe.

7. ¿Mbaʼépa ñaaprende pe konsého Pablo omeʼẽ vaʼekuégui Evodia ha Síntiquepe?

⁷ Evodia ha Síntique ningo oservi vaʼekue apóstol Pablo ndive ha ikyreʼỹeterei vaʼekue hikuái. Péro amalisia koʼã mokõi ermána oiko vai raʼe ha upéicha rupi ndahaʼevéi oñoamíga. Pe kárta Pablo oskrivi vaʼekuépe, haʼe derechoite heʼi Evodia ha Síntiquepe ‘opensa vaʼerãha peteĩcha’ (Filip. 4:2, 3). Apóstol Pablo ohechakuaa avei omeʼẽ vaʼerãha ko konsého pe kongregasión kompletoitépe: “Pesegíkena pejapo opa mbaʼe pejeplageaʼỹre ha pediskutiʼỹre” (Filip. 2:14). Ko konsého Pablo omeʼẽ  vaʼekue ningo hesakã porãiterei, ha katuete oipytyvõne raʼe koʼã mokõi ermána ifiélvape ha avei pe kongregasión kompletoitépe osegi hag̃ua ojoayhuve hikuái.

8. ¿Mbaʼérepa ijetuʼueterei jepi ñandéve jahayhu ñane ermanokuérape, ha mbaʼéichapa ikatu ñambohovái upéva?

⁸ Sapyʼánte ningo ijetuʼueterei ñandéve jahayhu hag̃ua ñane ermanokuérape jajapo rupi Evodia ha Síntique ojapo vaʼekue: Jajesarekoiterei ñane ermanokuéra deféktore. Enterove ningo jajavy káda día. Ñande jasegíramo ñapensa umi mbaʼe vai ojapóvare ñane ermanokuéra, ijetuʼuvéta ñandéve jahayhu hag̃ua chupekuéra. Ñapensamína ko ehémplore. Ñamoĩ chupe peteĩ ermáno hesaraiha ha nañanepytyvõi ñamopotĩ hag̃ua pe Salón del Reino, upévare japyta ñandepochy hendive. Ha ñañepyrũramo ñapensa entéro umi mbaʼe vai ojapo vaʼekuére upe ermáno, koʼýte ñandepochyvétantema hendive ha saʼivéma jahayhúta chupe. Jarekóramo peichagua provléma peteĩ ñane ermánondi, iporãta ñapensáramo ko mbaʼére: Jehová ohecha umi defékto jarekóva ñande ha avei umi orekóva ñane ermáno. Upéicharõ jepe, haʼe lomímonte ohayhu ñane ermánope ha ñanderayhu avei ñandéve. Ajépa iporãve upéicharõ jasegi Jehová ehémplo japorohayhúvo, ha jajesareko umi kualida porã orekóvare ñane ermanokuéra. Ñañehaʼã jave jahayhu ñane ermanokuérape, ñaimeve en unida hendivekuéra (Filip. 2:1, 2).

9. ¿Mbaʼe mbaʼépa hína ‘umi mbaʼe iñimportantevéva’ heʼi vaʼekue Pablo umi filipénsespe?

⁹ Pe espíritu sánto omomýi vaʼekue Páblope oskrivi hag̃ua umi filipénsespe ha avei entéro kristiánope: “Pehechakuaa mbaʼépa pe iñimportantevéva” (Filip. 1:10). Umíva apytépe oĩ toñembotuicha Jehová réra, toñekumpli umi ipromesakuéra ha toĩ pyʼaguapy ha unida kongregasiónpe (Mat. 6:9, 10; Juan 13:35). Koʼã mbaʼe haʼéramo pe iñimportantevéva ñandéve g̃uarã, jahechaukáta jahayhuha Jehovápe.

10. ¿Mbaʼépa jajapo vaʼerã Jehová heʼi hag̃ua ñanderehe ndajarekoiha defékto?

¹⁰ Pablo heʼi avei ‘ndajajapói vaʼerãha mbaʼeve ivaíva’. Upéva ndeʼiséi ñandeperfékto vaʼerãha. Jehová ningo ndorekói defékto, péro ñande ndaikatúi jahupyty chupe pórke ñande pekadór. Péro ñañehaʼãmbaitéramo japorohayhuve ha jahechakuaáramo mbaʼépa pe iñimportantevéva, Jehová heʼíta ñanderehe ndajarekoiha defékto. Ñañehaʼãramo ani hag̃ua ñamoñepysanga ñane ermanokuérape, jahechaukáta jahayhuha chupekuéra.

11. ¿Mbaʼérepa ndovaléi ñamoñepysanga avavépe?

¹¹ Pe konsého oñemeʼẽva ani hag̃ua ñamoñepysanga ótrope, añetehápe isério hína. ¿Mbaʼéichapa ikatu hína ñamoñepysanga ótrope? Umi mbaʼe jadesidívare jajapo térã jahecha jajediverti hag̃ua, ñañemonde lája, térã ñande traváho káusare. Ikatu oime ndajajapói mbaʼeve Jehová heʼíva naiporãiha. Péro ivaietereíta oiméramo upe jadesidíva káusare ñane ermánope omolesta ikonsiénsia ha upévare oñepysanga. Jesús ningo heʼi vaʼekue ikuentaveha peteĩ persóna oñapytĩramo ijajúrare peteĩ ita guasu ha upéi ojepoi pe mar mbytépe, omoñepysanga rangue peteĩva umi ijovechápe (Mat. 18:6).

12. ¿Mbaʼépa ñaaprende peteĩ matrimónio ehémplogui?

¹² Jahechamína mbaʼéichapa peteĩ matrimónio oservíva de prekursór okumpli upe Jesús heʼi vaʼekue. Haʼekuéra ningo oservi peteĩ kongregasión oĩháme peteĩ matrimónio ojevautisa ramoitéva. Ko matrimónio ojevautisa ramóva okakuaa vaʼekue umi família ojeproivihápe chuguikuéra heta mbaʼe. Haʼekuéra opensa voi umi kristiáno ndohói vaʼerãha sinehápe, ndaivaíriramo jepe pe pelíkula ojehechaukáva.  Upéicha rupi ipochyeterei voi hikuái oikuaárõ guare pe matrimónio prekursór oho hague sinehápe ohecha peteĩ pelíkula. Upe rire pe matrimónio prekursór odesidínte ndohomoʼãveimaha sinehápe, umi ermáno pyahu ohekomboʼe porã meve ikonsiénsia ha opilla porãve mbaʼépa iporã ha mbaʼépa ivai (Heb. 5:14). Péicha ohechauka hikuái ohayhuha iñermanokuérape umi mbaʼe ojapóvape, ndahaʼéi umi mbaʼe heʼívapente (Rom. 14:19-21; 1 Juan 3:18).

13. ¿Mbaʼéichapa sapyʼánte ikatu ñambopeka ótrope?

¹³ Avei ikatu ñamoñepysanga ñane ermánope jaʼéramo chupe álgo ikatúva ombopeka chupe. ¿Mbaʼéichapa ikatu oiko upéva? Epensamína ko situasiónre. Heta oñehaʼã rire, peteĩ estudiánte de la Biblia hasypeve ojejokokuaa anivéma hag̃ua hoʼu rasa umi vevída alkoólika. Haʼe ohechakuaa ndoʼuvéima vaʼerãha vevída arakaʼeve. Ko estudiánte okambia kuri heta mbaʼe hekovépe ha upéi ojevautisa. Upe rire peteĩ ermáno oinvita chupe hógape okomparti hag̃ua ótro ermanokuérandi, péro oofrese chupe vevída, ha heʼi chupe: “Nde ningo rejevautisáma ha ereko Jehová espíritu. Pe espíritu sánto ñanepytyvõ jajejokokuaa hag̃ua. Oiméramo nde rejejokokuaa, katuete reʼukuaáta rehasaʼỹre la rrája”. ¡Ajépa ñambyasyete vaʼerã pe ermáno pyahu ohendúramo pe konsého vaiete ha oñepyrũ jey hoʼu rasa vevída!

14. ¿Mbaʼéichapa umi rreunión ñanepytyvõ ñamoĩ hag̃ua en práktika umi konsého jatopáva Filipenses 1:10-pe?

¹⁴ Umi rreunión ñanepytyvõ ñamoĩ hag̃ua en práktika heta hendáicha umi konsého jatopáva Filipenses 1:10-pe. Primero, umi mbaʼe  jastudiáva rreunionhápe ñanemomanduʼa mbaʼe mbaʼépa iñimportanteve Jehovápe g̃uarã. Segundo, ñaaprende mbaʼéichapa jajapóta umi mbaʼe ñaaprende vaʼekue ani hag̃ua jajapo mbaʼeve ivaíva. Ha tercero, “ñañomokyreʼỹ japorohayhu hag̃ua ha jajapo hag̃ua iporãva” (Heb. 10:24, 25). Péicha ñane ermanokuéra ñanemokyreʼỹ rupi, amás día jahayhuvéta Ñandejárape ha avei ñane ermanokuérape. Ha jahayhu rupi chupekuéra ha Jehovápe ñane korasõite guive, ñañehaʼãmbaitéta ani hag̃ua ñamoñepysanga ñane ermanokuérape.

15. ¿Mbaʼépa heʼise ‘ñande rekove ha ñane kondúkta siémpre iporãha’?

¹⁵ Pablo oñemboʼe vaʼekue ipyʼaite guive ha ojerure umi filipénsesre ikatu hag̃uáicha ‘hekove ha ikondúkta siémpre iporã’ (Filip. 1:11). Añetehápe umíva apytépe oĩ hína pe mborayhu haʼekuéra oñandúva Jehováre ha ipuévlore. Avei heʼise omombeʼu vaʼerãha ótrope ojeroviaha Jesúsre ha pe esperánsa porãite orekóva hikuái. Pablo heʼi avei Filipenses 2:15-pe umi kristiáno ohesapeha “peteĩ mbaʼerendýicha ko múndope”. Ko ehémplo oĩ porãiterei, pórke ñanemomanduʼa Jesús heʼi hague idisipulokuérape: “Peẽ ningo pe lus oĩva ko múndope” (Mat. 5:14-16). Jesús omanda vaʼekue avei idisipulokuérape oho hag̃ua omboʼe umi héntepe ‘oiko hag̃ua chuguikuéra idisípulo’, ha heʼi: “Oikóta pendehegui che testígo [...] umi lugár mombyryvehápe jepe ko yvy ape ári” (Mat. 28:18-20; Hech. 1:8). Ñande ningo ‘ñanekondúkta porã’ ñambaʼapo jejopy jave ko tembiapo iñimportantetévape.

16. ¿Mbaʼéichapa Filipenses 1:12-14 ohechauka ikatuha jahesape mbaʼerendýicha, ijetuʼúramo jepe ñane situasión? (Ehecha pe taʼanga oĩva ko rrevísta apére).

¹⁶ Tahaʼe haʼéva ñane situasión, ñande ikatu hína jahesape mbaʼerendýicha. Sapyʼánte oĩ umi situasión haʼetévaicha ñandejokótava  pono japredika, péro upéva ikatu hína peteĩ oportunida ñamombeʼu hag̃ua umi notísia porã. Por ehémplo, apóstol Pablo oskrivírõ guare ikárta umi filipénsespe, oreko vaʼekue prisión domisiliária Rómape. Péro Pablo oĩramo jepe enkadenádo, upéva ndojokói chupe opredika hag̃ua umi guárdiape ha umi ovisitávape chupe. Upe situasiónpe jepe Pablo osegi opredika kyreʼỹme, ha upéva omombarete ha ombopyʼaguasu umi ermánope “omombeʼu hag̃ua Ñandejára ñeʼẽ kyhyjeʼỹme” (elee Filipenses 1:12-14; 4:22).

17. ¿Mbaʼéichapa heta ermáno osegi opredika oĩramo jepe umi situasión ijetuʼúva?

¹⁷ Heta ermáno ohechauka ipyʼaguasuha avei Pábloicha. Haʼekuéra oiko umi lugár ndaikatuihápe ojepredika púvlikamente térã ogahárupi, upévare opredika vaʼerã hikuái ótro hendáicha (Mat. 10:16-20). Peteĩva umi paíspe, peteĩ superintendénte de sirkuíto heʼi káda puvlikadór opredika vaʼerãha “iterritóriope”, upéva hína iparientekuéra, ivesíno, ikompañerokuéra eskuelapegua, koléhio térã itravahopegua, ha avei umi ikonosidokuéra. Ha 2 áño haguépe, upe sirkuítope oĩma hetaitereive kongregasión. Ikatu oime ñande ndajaikói peteĩ país ndaikatuihápe ojepredika púvlikamente, péro ikatu ñaaprende heta mbaʼe iñimportánteva koʼã ermanokuéragui: Siémpre jaheka vaʼerã oportunida japredika hag̃ua entéro persónape ha oparupiete, ha jajerovia Jehová ñanemombarete ha ñanembokatupyrytaha japredika hag̃ua, oĩramo jepe umi situasión ijetuʼúva (Filip. 2:13).

18. ¿Mbaʼépa jajerresolve vaʼerã jajapo?

¹⁸ Koʼã tiémpo iñimportantetévape, jajerresolvékena ñakumplitaha umi konsého jatopáva pe kárta Pablo oskrivi vaʼekuépe umi filipénsespe. Jahechakuaákena mbaʼépa hína pe iñimportantevéva, ani jajapo mbaʼeve ivaíva, ani ñamoñepysanga ótrope, ha ñañehaʼã ikatu hag̃uáicha ñande rekove ha ñane kondúkta siémpre iporã. Péicha okakuaavéta ohóvo ñane mborayhu, ha ñambotuicháta ñande Ru ñanderayhuetéva Jehovápe.