1. ¿Mbaʼe priviléhiopa ñande jareko?

¡TUICHAITEREI mbaʼe ningo ñandéve g̃uarã ñaime Jehová kongregasiónpe! Ñande jareko tuicha pyʼaguapy ha javyʼa jaadorávo Jehovápe ñane ermáno ha ñane ermanakuérandi kongregasiónpe. ¿Mbaʼe lugárpa jareko ha mbaʼéichapa ñandedeprovécho kongregasiónpe?

2. ¿Mbaʼe ehémplopa apóstol Pablo oipuru vaʼekue heta vése, oskrivírõ guare umi kárta espíritu sánto rupive?

² Ñande ikatu ñaaprende heta mbaʼe ko témagui, ha upearã ikatu ñaanalisa peteĩ ehémplo apóstol Pablo oipuru vaʼekue heta vése, oskrivírõ guare umi kárta espíritu sánto rupive. Koʼã kártape Pablo okompara vaʼekue pe kongregasión peteĩ persóna retére. Ombojoja avei káda persóna oĩvape kongregasiónpe peteĩ párte oĩvare ñande retépe (Rom. 12:4-8; 1 Cor. 12:12-27; Efes. 4:16).

3. ¿Mbaʼépa hína umi mbohapy mbaʼe jahechátava ko artíkulope?

³ Ko artíkulope ñaaprendéta mbohapy mbaʼe iñimportánteva pe ehémplo apóstol Pablo oipuru vaʼekuégui. Primero, jahecháta káda uno jarekoha peteĩ lugár * Jehová kongregasiónpe. Segundo, ñaanalisáta mbaʼépa ikatu jajapo ijetuʼúramo ñandéve jahecha hag̃ua mbaʼe lugárpa jareko kongregasiónpe. Ha tercero, jahecháta mbaʼérepa tekotevẽ jasegi ñambaʼapo jejopy  ñakumpli hag̃ua pe asignasión Jehová omeʼẽva ñandéve kongregasiónpe.

4. ¿Mbaʼépa ñanemboʼe Romanos 12:4, 5 heʼíva?

⁴ Primeroite voi, Pablo ehémplogui ñaaprende káda uno jarekoha peteĩ lugár iñimportánteva Jehová famíliape. Oñepyrũvo iñehémplo Pablo heʼi: “Ñande retépe ningo jareko heta párte, péro káda párte ojapo peteĩ mbaʼe idiferénteva. Upéicha avei ñande ñandereta péro ñaime rupi unído Crístondi, oiko ñandehegui peteĩ kuérponte. Káda uno ñanediferénte péro ñaikotevẽmba ojuehe” (Rom. 12:4, 5). ¿Mbaʼépa heʼise rakaʼe Pablo? Káda uno jarekoha diferénte traváho kongregasiónpe, péro enterovépe ojevaloraitereiha.

5. ¿Mbaʼe rregálopa Jehová omeʼẽ vaʼekue kongregasiónpe?

⁵ Repensávo umi orekóvare peteĩ lugár Jehová organisasiónpe, ikatu primeroite ou ndéve ne akãme umi oporogiáva kongregasiónpe (1 Tes. 5:12; Heb. 13:17). Jaikuaa ningo Jesús rupive, Jehová omeʼẽ hague heta “kuimbaʼépe rregáloramo” ikongregasiónpe g̃uarã (Efes. 4:8). Umíva apytépe oĩ pe Kuérpo Governánte, umi iñajudantekuéra, umi oĩva komite de sukursálpe, superintendénte de sirkuíto, umi eskuelakuéra instruktór, umi ansiáno ha siérvo ministeriál oĩva kongregasiónpe. Entéro koʼã ermáno ningo oñenombra espíritu sánto rupive, oñangareko hag̃ua Jehová ovechakuéra haʼe hakateʼỹetévare ha omombarete hag̃ua kongregasiónpe (1 Ped. 5:2, 3).

6. Heʼiháicha 1 Tesalonicenses 2:6-8, ¿mbaʼépa oñehaʼãmbaite ojapo umi ermáno oñenombra vaʼekue espíritu sánto rupive?

⁶ Umi ermánope oñenombra espíritu sánto rupive okumpli hag̃ua heta rresponsavilida. Ñande po, ñande py, ha heta párte oĩva ñande retépe ombaʼapoháicha oñondive ñande rete kompletoite rehehápe, upéicha avei umi ermáno oñenombráva espíritu sánto rupive ombaʼapo jejopy pe kongregasión kompletoite rehehápe. Haʼekuéra ndojapói upéva oipotágui umi ótro ombotuicha chupekuéra. Upéva rangue haʼekuéra oñehaʼã omokyreʼỹ ha omombarete iñermáno ha iñermanakuérape (elee 1 Tesalonicenses 2:6-8). Jaagradesete ningo Jehovápe omeʼẽ haguére ñandéve koʼã ermáno ikatupyrýva, siémpre omotenondéva hapichakuéra oikotevẽva.

7. ¿Mbaʼe vendisiónpa ohupyty umi oservíva de tiémpo kompléto?

⁷ Oĩ avei algúno kongregasiónpe oñenombra vaʼekue oservi hag̃ua de misionéro, prekursór espesiál térã prekursór rregulár. Jaikuaa ningo ko múndo tuichakuére oĩha ermáno ha ermána odesidíva opredika ha oporomboʼe de tiémpo kompléto. Péicha oipytyvõma hikuái hetápe oiko hag̃ua chuguikuéra Jesús disípulo. Umi oservíva de tiémpo kompléto ndaiplatahetái jepi, péro Jehová omeʼẽ chupekuéra heta vendisión (Mar. 10:29, 30). Jahayhueterei ningo koʼã ermáno ha ermánape, ha jaagradese oĩ haguére hikuái kongregasiónpe.

8. ¿Mbaʼérepa entéro puvlikadór iñimportánte Jehovápe g̃uarã?

⁸ Péro, ¿oreko piko peteĩ lugár kongregasiónpe umi ermáno oñenombra vaʼekue, ha umi oservíva de tiémpo kompléto añoiténte? ¡Ni mbaʼevéicharõ! Entéro puvlikadór oikuaaukáva umi notísia porã ningo iñimportánte Ñandejára ha kongregasiónpe g̃uarã (Rom. 10:15; 1 Cor. 3:6-9). Upéva upéicha, pórke peteĩva umi mbaʼe iñimportantevéva ojapóva pe kongregasión haʼe hína oipytyvõ la héntepe oiko hag̃ua chuguikuéra Jesucristo disípulo (Mat. 28:19, 20; 1 Tim. 2:4). Entéro puvlikadór oĩva kongregasiónpe, tahaʼe vautisádo térã no vautisádo oñehaʼãmbaite  omotenonde hekovépe ko traváho (Mat. 24:14).

9. ¿Mbaʼérepa ñamombaʼete umi ermanakuérape?

⁹ Jehová ningo ohechauka omombaʼeha ermanakuérape omeʼẽvo chupekuéra peteĩ lugár kongregasiónpe. Haʼe ovalora umi tembireko, sy, viúda ha ermána solterakuérape oservíva chupe fiélmente. La Bíbliape oñeñeʼẽ heta kuña ijojahaʼỹvare Ñandejára oguerohory vaʼekue. Chupekuéra ningo ojefelisita omoĩ haguére ehémplo porã, pórke iñarandu, ojerovia, ikyreʼỹ, ipyʼaguasu, ipojera ha ojapo heta mbaʼe iporãva (Luc. 8:2, 3; Hech. 16:14, 15; Rom. 16:3, 6; Filip. 4:3; Heb. 11:11, 31, 35). Jaagradeseterei Jehovápe jareko haguére kongregasiónpe umi ermána orekóva koʼãichagua kualida iporãitéva.

10. ¿Mbaʼérepa ñamombaʼete umi ermáno ha ermána ijedámavape?

¹⁰ Javyʼaiterei ningo avei jareko haguére kongregasiónpe heta ermáno ha ermána ijedámava. Oĩ kongregasión oĩháme umi ermáno ha ermána oservímava Jehovápe hekove pukukue. Ha oĩ avei umi ramoiténte oñepyrũ vaʼekue oservi Jehovápe. Tahaʼe haʼeháicha, haʼekuéra ijedáma rupi hasykatuvéma ohóvo. Umi provléma káusare, ikatu hína haʼekuéra ndaikatuvéi ojapo heta mbaʼe kongregasiónpe ni predikasiónpe. Upéicharõ jepe, koʼã ermáno ijedámava ojapo ikatúva guive predikasiónpe ha oipuru opa imbaretekue omokyreʼỹ ha omeʼẽ hag̃ua entrenamiénto ótrope. Ñande ningo ikatu ñaaprende heta mbaʼe chuguikuéra. Jehovápe g̃uarã haʼekuéra iporãiterei ha ñandéve g̃uarã avei (Prov. 16:31).

11, 12. ¿Mbaʼéichapa nemokyreʼỹma raʼe umi imitãva oĩva ne kongregasiónpe?

¹¹ Ñapensamína avei umi imitãvare. Haʼekuéra ningo ombohovái heta provléma, pórke okakuaa ko múndo oĩvape Satanás poguýpe ha henyhẽtéva umi enseñánsa ivaívagui (1 Juan 5:19). Upévare ñanemokyreʼỹeterei jahecha jave umi imitãva okomenta rreunionhápe, osẽ predikasiónpe ha pyʼaguasúpe odefende umi mbaʼe ogueroviáva. Añetehápe peẽ imitãva peguereko peteĩ lugár iñimportánteva Jehová kongregasiónpe (Sal. 8:2).

 ¹² Péro oĩ ermáno ha ermána ijetuʼúvape oguerovia hag̃ua haʼekuéra iñimportánte ha ideprovechoha kongregasiónpe. ¿Mbaʼépa ikatu ñanepytyvõ ñañandu hag̃ua káda uno jarekoha peteĩ lugár kongregasiónpe? Jahechami.

13, 14. ¿Mbaʼérepa ikatu oĩ opensáva naiñimportántei ha ndaideprovechoiha kongregasiónpe?

¹³ Pe segundo mbaʼe ñanemboʼéva Pablo ehémplo ñanemopensa peteĩ provléma heta orekóvare ko tiémpope: Ijetuʼu chupekuéra oguerovia hag̃ua haʼekuéra iñimportánte ha ideprovechoha kongregasiónpe. Pablo heʼi: “Nde py heʼíramo: ‘Che ndahaʼéi po, upévare che ndahaʼéi peteĩ párte oĩva nde retépe’, ndahaʼéi upe haguére noĩmoʼãvéimava nde retépe. Ne nambi heʼíramo: ‘Che ndahaʼéi tesa, upévare che ndahaʼéi peteĩ párte oĩva nde retépe’, ndahaʼéi upe haguére noĩmoʼãvéimava nde retépe” (1 Cor. 12:15, 16). ¿Mbaʼépa ñanemboʼese raʼe Pablo?

¹⁴ Nde reñekomparáramo ótrore ikatu hína eñepyrũ epensa nde nandedeprovechoiha voi kongregasiónpe. Oĩ jepi umi ermáno ivaléva oporomboʼe hag̃ua, oorganisakuaáva heta mbaʼe, térã ivaléva okonsola ha omokyreʼỹ hag̃ua ótrope. Ha ikatu voi repensa nde nandevaleiha haʼekuéraicha, ha ndaikatumoʼãiha rejapo umi mbaʼe haʼekuéra ojapóva. Upéva ningo ohechauka nde neumildeha ha errekonoseha umi mbaʼe ndaikatúiva rejapo (Filip. 2:3). Péro eñatendékena, nde reikóramo reñekompara umi ivaletereívare, katuete reñedesanimáta, ha ikatu hína reñandu ndereguerekoieteha voi peteĩ lugár kongregasiónpe, Pablo heʼi haguéicha. ¿Mbaʼépa ikatu rejapo anivéma hag̃ua reñeñandu péicha?

15. Heʼiháicha 1 Corintios 12:4-11, ¿mbaʼépa jahechakuaa vaʼerã umi avilida ikatúvare jareko?

¹⁵ Ñapensamína ko mbaʼére, síglo primérope espíritu sánto rupive Jehová omeʼẽ vaʼekue unos kuánto kristiánope peteĩ avilida ojapo hag̃ua peteĩ mbaʼe, péro naentéroipe oñemeʼẽ vaʼekue la mísma avilida (elee  1 Corintios 12:4-11). Jehová ojerovia hesekuéra ha omeʼẽ chupekuéra diferénte avilida, upéicharõ jepe káda kristiáno ivaliosoiterei vaʼekue. Koʼág̃arupi ñande ndajarekovéima umi avilida haʼekuéra orresivi vaʼekue espíritu sánto rupive. Péro koʼag̃aite peve enterove ñandevaliosoiterei Jehovápe g̃uarã ndajarekóiramo jepe enterove la mísma avilida.

16. ¿Mbaʼe konsého Pablo omeʼẽ vaʼekuépa jasegi vaʼerã?

¹⁶ Jaiko rangue ñañekompara umi ótro ermánore, jasegi vaʼerã pe konsého apóstol Pablo omeʼẽ vaʼekue: “Káda uno tojesareko umi mbaʼe ojapóvare, péicha ovyʼáta hembiapóre ha ndahaʼéi oñembojoja haguére ótrore” (Gál. 6:4).

17. ¿Mbaʼéichapa ñanepytyvõta jasegíramo Pablo konsého?

¹⁷ Jasegíramo apóstol Pablo konsého ha jajesareko umi mbaʼe ñande jajapóvare, ikatu hína ñañepyrũ jahechakuaa jarekoha peteĩ avilida ótro ndorekóiva. Por ehémplo, ikatu oime peteĩ ansiáno ndojapokuaaguasúi diskúrso, péro ivaleterei oipytyvõ hag̃ua la héntepe oiko hag̃ua chuguikuéra Jesús disípulo. Térã ikatu oime ndahaʼéi la iñorganisadoitereíva umi ótro ansiáno oĩvaicha ikongregasiónpe. Péro ikatu oime haʼe hory ha imbaʼeporãiterei, ha umi ermáno ndokyhyjéi oñemboja hag̃ua hendápe ojerure hag̃ua chupe konsého oĩva la Bíbliape. Térã ikatu oime ojekuaa chupe orresivi porã haguére hapichakuérape hógape (Heb. 13:2, 16). Jahechakuaa jave umi avilida jarekóva, javyʼáta umi mbaʼe ikatúvare jajapo kongregasión rehehápe. Ha péicha hasyvéta ñaenvidia hag̃ua umi ermáno orekóvape peteĩ avilida ñande ndajarekóiva.

18. ¿Mbaʼéichapa ikatu ñandekatupyryve ha ñamehora ñande servísiope?

¹⁸ Tahaʼe haʼéva pe lugár jarekóva kongregasiónpe, enterove jasegise vaʼerã ñandekatupyryve ha jajapo porãve ñande servísio. Upearã Jehová omeʼẽ ñandéve entrenamiénto ijojahaʼỹva iñorganisasión rupive. Por ehémplo, ñane rreunión éntre semanaguápe oñemeʼẽ ñandéve instruksión japredika porãve hag̃ua. ¿Ñañehaʼãpa hína jajapo umi mbaʼe ñaaprendéva ko rreuniónpe?

19. ¿Mbaʼépa jajapo vaʼerã ikatu hag̃uáicha jaha pe Eskuéla de Evanhelisadórpe?

¹⁹ Pe Eskuéla de Evanhelisadórpe oñemeʼẽ avei entrenamiénto ijojahaʼỹva. Ko eskuélape ikatu oho umi ermáno ha ermána oservíva de tiémpo kompléto, ha orekóva éntre 23 ha 65 áño. ¿Ñapensápa ndaikatumoʼãiha voi jaha ko eskuélape? Jajapo rangue peteĩ lísta ñamoĩháme mbaʼérepa ndaikatumoʼãi jaha, iporãta jajapóramo peteĩ lísta ha ñamoĩ upépe mbaʼérepa jahase. Jehová rupive ñañehaʼãmbaitéramo ikatúta jajapo umi mbaʼe ñaimoʼã vaʼekue núnka ndaikatumoʼãiha jajapo.

20. ¿Mbaʼépa ikatu ñaaprende Romanos 12:6-8 heʼívagui?

²⁰ Pe tercer mbaʼe ikatúva ñaaprende Pablo ehémplogui jatopa Romanos 12:6-8-pe (elee). Koʼápe Pablo heʼi jey enterove oĩva kongregasiónpe orekoha diferénte avilida. Péro koʼág̃a Pablo ohechauka porã jaipuru vaʼerãha oimeraẽ avilida jarekóva ñamokyreʼỹ ha ñamombarete hag̃ua pe kongregasión.

21, 22. ¿Mbaʼépa ikatu ñaaprende Robert ha Felice ehémplogui?

²¹ Ñapensamína mbaʼépa oiko vaʼekue Robert rehe. * Oservi rire ótro paíspe oñeasigna chupe oho jey hag̃ua hetãme ha oservi Betélpe. Umi ermáno heʼíramo jepe Róbertpe noñekambiái hague chupe ndojapoporãi haguére hembiapo, haʼe heʼi: “Heta mésere ndavyʼái vaʼekue apenságui nakumpliporãi hague  che asignasión, ha sapyʼánte ahejaséma vaʼekue che servísio Betélpe”. ¿Mbaʼépa oipytyvõ chupe ovyʼa jey hag̃ua? Ótro ansiáno omomanduʼa chupe Jehová ñaneentrenaha umi asignasión jareko vaʼekue rupive, ikatu hag̃uáicha ñandedeprovechove pe asignasión jarekóvape koʼág̃a. Robert ohechakuaa nopensavéima vaʼerãha umi mbaʼe oiko vaʼekuére, síno oñekonsentra vaʼerãha umi mbaʼe ikatúvare ojapo koʼág̃a.

²² Ermáno Felice Episcopo ombohovái vaʼekue avei peichagua situasión. Haʼe ha hembireko ojegradua vaʼekue Galaádgui 1956-pe, ha oservi superintendénte de sirkuítoramo Bolíviape. Ha 1964-pe onase itaʼyraʼi. Felice heʼi: “Ijetuʼueterei kuri oréve roheja pe asignasión rohayhuete vaʼekue, ha arrekonose vaʼerã un áñorupi apyta hague añesenti. Péro Jehová chepytyvõ rupi akambia apensa lája ha añepyrũ añekonsentra pe rresponsavilida pyahu arekóvare añangarekóvo che raʼýre”. ¿Ndépa reñeñandu avei Robert térã Felice oñeñandu haguéicha? ¿Ndépa reñesenti hína ndereguerekovéima haguére umi priviléhio reguereko vaʼekue ymave? Oiméramo upéicha, revyʼavéta rekambiáramo repensa lája ha reñekonsentra umi mbaʼe ikatúvare rejapo koʼág̃a reservi hag̃ua Jehovápe ha ne ermanokuérape. Esegíkena nerembiapo heta ha eipuru umi avilida reguerekóva reipytyvõ hag̃ua ótrope. Péicha revyʼáta remombaretévo pe kongregasión.

23. a) ¿Mbaʼépa ñañemotiémpo vaʼerã jajapo hag̃ua? b) ¿Mbaʼépa jahecháta pe artíkulo oúvape?

²³ Jehová ningo káda únope ñandevaloraiterei. Haʼe oipota ñañandu ñaĩha ifamília apytépe. Ñañemotiémporamo ñapensa hag̃ua mbaʼépa ikatu jajapo ñamombarete hag̃ua ñane ermanokuérape, ha upéi ñambaʼapo jejopy jajapo hag̃ua upéva, hasyvéta hína ñapensa hag̃ua ndajarekoiha peteĩ lugár kongregasiónpe. Péro, ¿mbaʼépa ñapensa umi ermáno oĩvare kongregasiónpe? ¿Mbaʼéichapa ikatu jahechauka jahayhu ha jarrespetaha chupekuéra? Pe artíkulo oúvape ñañeʼẽta upe téma iñimportantetévare.