1. ¿Mbaʼe mbaʼépa nde reaprendéma Jehovágui nemichĩete guive?

¿NDE tuakuérapa haʼéma vaʼekue Testígo nde renasérõ guare? Oiméramo upéicha, nde reikuaáma Jehovápe nemichĩete guive ha reaprendéma haʼe haʼeha ñande Apohare. Avei reaprendéma haʼe orekoha heta kualida iporãitereíva, ha ojaposeha ko yvýgui peteĩ paraíso (Gén. 1:1; Hech. 17:24-27).

2. ¿Mbaʼépa oñepensa jepi umi ogueroviávare oexistiha peteĩ Apohare?

² Péro heta hénte ndogueroviái Ñandejára oexistiha térã haʼe ojapo hague opa mbaʼe. Upéva rangue, haʼekuéra oguerovia la vída oñepyrũ hague ijehegui reínte, ha opensa umi plánta ha animál michĩvéva okambia hague ohóvo mbeguekatúpe oiko peve chuguikuéra umi mbaʼe tuichavéva. Ha oĩ voi umi hénte ijestúdio porãva ogueroviáva koʼã mbaʼe. Haʼekuéra heʼi la siénsia ohechaukáma hague la Biblia ojavyha, ha umi ivýrova, itavýva ha ijestudioʼívante ogueroviaha pe kreasión.

3. ¿Mbaʼérepa iñimportánte ñandete voi ñamombarete ñande jerovia?

³ ¿Ñandeafektátapa umi mbaʼe heʼíva umi hénte ijestúdio porãva? ¿Omokangýtapa hikuái ñande jerovia ha ñanembodudáta Jehová haʼeha ñande Apohare ñanderayhuetéva? Upéva odepende hína mbaʼéichapa ñakontesta koʼã porandu: “¿Mbaʼérepa jaguerovia Jehová haʼeha ñande Apohare? ¿Jagueroviápa upéva oĩ rupínte heʼíva ñandéve, térãpa ñandete voi ñañemotiémpo raʼe jastudia hag̃ua umi pruéva oĩva?” (1 Cor. 3:12-15). Jaservímaramo jepe Jehovápe heta tiémpore térã ramoite guivénte, enterove jasegi vaʼerã ñamombarete ñande jerovia. Jajapóramo upéicha, nañandeguerahavaimoʼãi umi hénte heʼíva la Biblia omboʼéva japuha. Umíva hína umi ‘oipurúva yvypóra arandu ha heʼíva ñandéve vyrorei ñanembotavy hag̃ua’ (Col. 2:8; Heb. 11:6). Upévare jajeroviave hag̃ua oĩha peteĩ Apohare, ko artíkulope jahecháta: 1) ¿Mbaʼérepa heta hénte ndogueroviái oĩha peteĩ Kreadór? 2) ¿Mbaʼéichapa ikatu ñamombarete ñande jerovia ñande Apohare Jehováre? Ha 3) ¿mbaʼépa jajapo vaʼerã ñande jerovia siémpre imbarete hag̃ua?

4. Heʼiháicha Hebreos 11:1, ¿mbaʼépa ñaikotevẽ jajerovia hag̃ua?

⁴ Oĩ hénte opensáva jajerovia heʼiseha jakreeha peteĩ mbaʼe jarekoʼỹre pruéva. Péro la Biblia heʼi upéva ndahaʼeiha jerovia (elee Hebreos 11:1). Jaikuaa porã hag̃ua siertoha peteĩ mbaʼe jarekómante vaʼerã pruéva. Upéicha rupi, ndajahecháiramo jepe Jehovápe, Jesúspe ha pe Rréino, ñande jaikuaa porã umíva oexistiha jareko rupi heta pruéva (Heb. 11:3). Peteĩ ermáno haʼéva viokímiko heʼi: “Ñande testígo de Jehová ndahaʼéi jajerovia reínteva, síno jareko umi pruéva sientífika ohechaukáva siertoha umi mbaʼe jagueroviáva”.

5. ¿Mbaʼérepa hetaite hénte ndogueroviái oĩha peteĩ Kreadór?

⁵ Ikatu hína ñañeporandu: “¿Mbaʼérepa hetaite hénte ndogueroviái Ñandejára ojapo hague opa mbaʼe, oĩramo jepe hetaiterei pruéva ohechaukáva upéva siertoha?”. Pórke oĩ umi persóna núnka ndostudiái vaʼekue umi pruéva. Por ehémplo Robert, koʼág̃a haʼémava testígo de Jehová, heʼi: “Eskuélape ningo núnka noñeñeʼẽi vaʼekue oréve pe kreasiónre. Upévare che apensa vaʼekue oiméne hag̃ua ndasiértoi. Upéi arekórõ guare 22 áño añemongeta peteĩ testígo de Jehovándi, ha upépe ae aaprende la Biblia omeʼẽha heta pruéva ohechaukáva oĩha peteĩ Apohare”. * (Ehecha pe rrekuádro “ Peteĩ mensáhe iñimportánteva tuakuérape g̃uarã”).

6. ¿Mbaʼérepa avei heta hénte ndogueroviái oĩha peteĩ Kreadór?

⁶ Oĩ ningo umi hénte ndogueroviáiva oexistiha peteĩ Kreadór, pórke heʼi ogueroviaha umi mbaʼe ohechávante. Péro añetehápe haʼekuéra ogueroviánte avei umi mbaʼe ndohecháiva, por ehémplo pe yvytu térã pe graveda, oĩgui pruéva umíva  oexistiha. Ha pe jerovia oñeñeʼẽha la Bíbliape oreko avei umi pruéva ohechaukáva oexistiha umi mbaʼe ndajahecháiva (Heb. 11:1). Jastudia hag̃ua umi pruéva ningo tekotevẽ ñañemotiémpo ha ñañehaʼãmbaite, ha heta hénte ndojaposéi upéva. Upéicha rupi ndogueroviái hikuái Ñandejára oexistiha.

7. ¿Ikatúpa jaʼe enterove persóna ijestúdio porãva ndogueroviaiha Ñandejára ojapo hague ko univérso? Emyesakã.

⁷ Oĩ umi sientífiko oñekonvenséva Ñandejára ojapo hague ko univérso ostudia rire umi pruéva. * Robert ojapo haguéicha, oĩ umi ogueroviántemava ndaiporiha peteĩ Apohare, pórke umi universidápe núnka noñemboʼéiva oĩha peteĩ Kreadór. Upéicharõ jepe, heta sientífiko oaprende Jehovágui ha oñepyrũ ohayhu chupe. Koʼã sientífiko ojapo haguéicha, ñande avei ñamombarete vaʼerã ñande jerovia Ñandejárare, tahaʼe haʼéva pe edukasión jarresivi vaʼekue. Upéva avave ndaikatumoʼãi ojapo ñande vése.

8, 9. a) ¿Mbaʼe pregúntapa ñambohováita koʼág̃a? b) ¿Mbaʼéichapa ideprovéchota ñandéve jastudiáramo umi mbaʼe oĩva ñande jerére?

⁸ ¿Mbaʼéichapa ikatu ñamombarete ñande jerovia ñande Apoharére? Jahechami 4 mbaʼe ikatúva jajapo.

⁹ Ñaaprende umi mbaʼe oĩvagui ñande jerére. Ñande ikatu ñamombarete ñande jerovia ñande Apoharére jajesarekóvo umi animál, plánta ha estrellakuérare (Sal. 19:1; Is. 40:26). Amáske jastudia koʼãichagua mbaʼe, ñañekonvensevéta Jehová haʼeha opa mbaʼe Apohare. Ñane puvlikasionkuérape pyʼỹinte osẽ umi artíkulo oñeʼẽva umi mbaʼe oĩvare pe kreasiónpe. Aníkena ñamboyke koʼã artíkulo ñapenságui ijetuʼuetereiha ñantende hag̃ua, síno ñañehaʼãmbaite jalee ha ñaaprende la ikatumíva. Aníkena avei ñanderesarái jarrevisa hag̃ua jepi ñande sítio jw.org. Upépe jatopáta umi vidéo porã porã oñeʼẽva pe kreasiónre, oñepresenta vaʼekue umi aty guasu tres diagua ramoite ohasa vaʼekuépe.

10. Emoĩ peteĩ ehémplo ohechaukáva oĩha peteĩ Kreadór (Romanos 1:20).

¹⁰ Jastudia jave umi mbaʼe oĩva ñande jerére, jajepyʼamongetákena mbaʼe mbaʼépa umíva ñanemboʼe ñande Apoharégui (elee Romanos 1:20). Por ehémplo, pe kuarahy ningo ombyaku ha ohesape ko yvy ikatu hag̃uáicha ojeikove pype. Péro pe kuarahy opoi avei umi rrájo ultravioléta ikatúva ñandeperhudika. Upévare ñaikotevẽmante peteĩ mbaʼe ñandeprotehe vaʼerã umívagui. Ha añetehápe oĩ voi peteĩ mbaʼe ñandeprotehéva. ¿Mbaʼépa hína upéva? Ko yvy ningo oreko pe kápa de osóno, haʼéva peteĩ gas oĩva ko yvy jerére ha ñandeprotehéva umi rrájo opoívagui pe kuarahy ha ikatúva ñandeperhudika. Amáske imbareteve umi rrájo ultravioléta, pe kápa de osóno iñanambusuve avei. ¿Ajépa upéva ohechauka oĩha peteĩ Kreadór ñanderayhuetereíva ha ivaletereíva?

11. ¿Moõpa ikatu jatopa informasión oñeʼẽva pe kreasiónre ha omombaretétava ñande jerovia? (Ehecha pe rrekuádro “ Umi informasión omombaretétava ñande jerovia”).

¹¹ Ñande ikatúta jatopa heta informasión oñeʼẽva pe kreasiónre ha omombaretétava ñande jerovia, pe Índice de las publicaciones Watch Tówerpe ha jw.org-pe. Ñañepyrũ hag̃ua ikatu jahecha umi artíkulo ha vidéo oĩva pe párte héravape “¿Oĩpa peteĩ Kreadór?”. Umíva ningo mbyky ha omyesakã heta mbaʼe iñinteresantetereíva umi animál ha plantakuérare. Umívape jatopáta avei umi ehémplo ohechaukáva mbaʼéichapa umi sientífiko oñehaʼã okopia umi mbaʼe ohecháva pe naturalésape.

12. ¿Mbaʼe mbaʼépa jareko vaʼerã enkuénta jastudiakuévo la Biblia?

¹² Jastudia la Biblia. Pe viokímiko ajeʼi ñañeʼẽ hague ndogueroviái vaʼekue ensegidaite oĩha peteĩ Kreadór. Péro tiémpo rire, haʼe oñepyrũma ojerovia. Haʼe heʼi: “Che ningo ajerovia, ndahaʼéi aaprende haguérente heta mbaʼe astudiávo la siénsia, síno avei aaprende haguére heta mbaʼe astudiávo la Biblia”. Ikatu oime jaikuaa porãma umi mbaʼe la Biblia omboʼéva. Upéicharõ jepe, ñamombarete hag̃ua ñande jerovia ñande Apoharére, tekotevẽta jasegi jastudia Ñandejára Ñeʼẽ (Jos. 1:8; Sal. 119:97). Por ehémplo, ñapensami mbaʼeichaitépa la Biblia ijexákto oñeʼẽvo umi mbaʼe oiko vaʼekuére yma. Ñapensamínte avei entéro umi profesía oñekumplímavare ha oĩva la Bíbliape, ha mbaʼéichapa umi diferénte persóna oskrivi vaʼekue la Biblia noñokontradesíri. Jajapóramo upéicha, koʼýte jagueroviavéta ñandeapo hague peteĩ Kreadór iñarandúva, ha haʼe oskrivika hague la Biblia (2 Tim. 3:14; 2 Ped. 1:21). *

13. Emombeʼu peteĩ konsého ideprovéchova oĩva Ñandejára Ñeʼẽme.

 ¹³ Jastudiakuévo Ñandejára Ñeʼẽ, jahechakuaákena mbaʼeichaitépa ideprovécho umi konsého oĩva pype. Por ehémplo, ymaitereíma la Biblia ñandeavisa hague ikatuha jajeperhudika ñandeplatarayhúramo, ha upéva ogueruha ‘opaichagua akã rasy ha heta jehasa asy’ (1 Tim. 6:9, 10; Prov. 28:20; Mat. 6:24). ¿Ikatúpa jaʼe upe konsého ideprovechoha gueteri ko tiémpope? Si ideprovécho. Peteĩ lívro hérava La epidemia del narcisismo heʼi: “Umi hénte opensáva pe pláta iñimportanteveha oimeraẽ mbaʼégui, ndoikói jepi vyʼápe ha oñedeprimi. Ha umi ipláta hetasevéva katu ndovyʼái ha pyʼỹinte hasykatu”. ¡Ajépa ideprovechoite upéicharõ pe konsého omeʼẽva la Biblia ani hag̃ua ñandeplatarayhu! ¿Oúpa ñandéve ñane akãme ótro konsého oĩva la Bíbliape ñanepytyvõma vaʼekue? Jajepyʼamongetáramo entéro umi konsého porãite oĩvare la Bíbliape, jahechakuaáta ñande Apohare oikuaaha mbaʼépa iporãve ñandéve g̃uarã, ha upévare ñande siémpre jahekáta ikonsého (Sant. 1:5). Jajapóramo upéicha katuete javyʼaitevéta (Is. 48:17, 18).

14. ¿Mbaʼépa ñaaprendéta Jehovágui jastudiávo la Biblia?

¹⁴ Jastudia vaʼerã la Biblia jaikuaa porãsevégui Jehovápe (Juan 17:3). Jastudiakuévo la Biblia jaikuaáta mbaʼeichagua persónapa Jehová ha umi kualida haʼe orekóva. Ha koʼã kualida hína la ikatúva ñaaprende jastudiávo pe kreasión. Jaikuaa porãvévo jahávo umi kualida Jehová orekóva, umíva ñanekonvenséta haʼe añetehápe oexistiha ha ndahaʼeiha ñañeimahinánteva (Éx. 34:6, 7; Sal. 145:8, 9). Amáske jaikuaave Jehovápe, jajeroviavéta hese, jahayhuvéta chupe ha ñane amista hendive imbaretevéta.

15. ¿Mbaʼéichapa ideprovéchota ñandéve ñañeʼẽramo ótrope umi mbaʼe jagueroviávare?

¹⁵ Ñañeʼẽ ótrondi umi mbaʼe jagueroviávare. Jajapóvo upéva, ñande jerovia voi imbaretevéta. Péro, ¿mbaʼépa jajapóta pe persóna japredikávape odudáramo Ñandejára oexistiha ha ndajaikuaái mbaʼéichapa ñambohováita? Ñañehaʼã jaheka peteĩ rrespuésta bíblica ñane puvlikasionkuérape, ha upéi ñañeʼẽ pe persónandi upévare (1 Ped. 3:15). Ikatu avei jajerure peteĩ ermáno iñexperiénsiavape ñanepytyvõ hag̃ua. Pe persóna ohendu térã nohenduséiramo jepe pe rrespuésta omeʼẽva la Biblia, ñandéve lomímonte ideprovéchota pe ñainvestiga vaʼekue, pórke ñande jerovia katuete imbaretevéta. Péicha nañanembotavymoʼãi umi hénte heʼíva ndaiporiha peteĩ Kreadór, heʼíramo jepe hikuái iñarandu ha ijestúdio porãha.

16. ¿Mbaʼépa ikatu oiko ndajasegíriramo ñandejerovia mbarete?

¹⁶ Ñande jasegi vaʼerã ñamombarete ñande jerovia Jehováre, jaservímaramo jepe chupe are guive térã ramoite guivénte. ¿Mbaʼérepa? Pórke nañañatendéiramo, ñande jerovia ikatu ou ikangy. Ñanemanduʼákena ñande jarekoha pruéva jaguerovia hag̃ua umi mbaʼe ndajahecháiva. Péro ndahasyiete hína ñanderesarái hag̃ua umi mbaʼe ndaikatúivagui jahecha. Upévare Pablo heʼi vaʼekue jajúramo ndajajeroviavéi, upéva haʼeha “pe pekádo ndahasyietéva ñandereity hag̃ua” (Heb. 12:1). ¿Mbaʼépa upéicharõ ikatu jajapo ñande jerovia siémpre imbarete hag̃ua? (2 Tes. 1:3).

17. ¿Mbaʼépa ñanepytyvõta jasegi hag̃ua jajerovia mbarete?

¹⁷ Primero, pyʼỹinte jajerure asy vaʼerã Jehovápe ijespíritu sánto. ¿Mbaʼérepa? Pórke pe jerovia ou hína pe espíritu sántogui (Gál. 5:22, 23). Upévare ñaikotevẽmante pe espíritu sántore jajerovia hag̃ua ñande Apoharére, ha jasegi hag̃ua ñamombarete ñande jerovia hese. Ha kontinuadoite jajeruréramo Jehovápe ijespíritu, haʼe katuete omeʼẽta ñandéve (Luc. 11:13). Ikatu voi ñañemboʼe ha jaʼe chupe: ‘Chepytyvõmína ajeroviave hag̃ua’ (Luc. 17:5).

18. Heʼiháicha Salmo 1:2, 3, ¿mbaʼe priviléhiopa jareko koʼág̃arupi?

¹⁸ Avei jastudia meme vaʼerã Ñandejára Ñeʼẽ  (elee Salmo 1:2, 3). Ojeskrivírõ guare upe salmo, saʼi oĩ vaʼekue Israélpe umi kópia kompléta Ñandejára léigui. Upévare mbovymi persónante ikatu vaʼekue olee umíva, por ehémplo umi saserdóte ha pe rréi. Péro káda 7 áño “umi kuimbaʼe, kuña, mitã ha umi extranhéro” oikóva Israélpe oñembyaty vaʼerã ohendu hag̃ua ojeleévo Ñandejára léi (Deut. 31:10-12). Jesús tiémpope, unos kuánto persónante oreko vaʼekue umi kópia Ñandejára Ñeʼẽgui, ha la majoría umi kópia oĩ vaʼekue umi sinagógape. Koʼág̃arupi katu haimete enterove persóna oreko la Biblia, tahaʼe en párte térã kompletoite. ¡Ajépa tuichaite priviléhio upéva! ¿Mbaʼéichapa ikatu jahechauka jaagradeseha upe rregálo porãitére?

19. ¿Mbaʼépa jajapo vaʼerã jasegi hag̃ua jajerovia mbarete?

¹⁹ Pyʼỹinte jaleéramo Ñandejára Ñeʼẽ, jahechaukáta hína ñamombaʼe ha jaagradeseha jareko haguére ko rregálo porãite. Jareko vaʼerã peteĩ óra jalee ha jastudia hag̃ua la Biblia, ha ani jaʼe: “Ág̃a chetiémpo vovénte aguapýta alee”. Jajepokuaáramo jastudia meme, ikatu jasegi jajerovia mbarete.

20. ¿Mbaʼépa jajedesidi vaʼerã jajapo?

²⁰ Ko múndope ningo ‘umi iñarandúva ha ivaléva’ ndojeroviái Ñandejára Ñeʼẽre, péro ñande ndajajoguái chupekuéra pórke jareko pruéva jajerovia mbarete hag̃ua la Bíbliare (Mat. 11:25, 26). Jastudia rupi Ñandejára Ñeʼẽ, ñande jaikuaa mbaʼérepa oĩ hetaite provléma ko múndope, ha jaikuaa avei mbaʼépa Jehová ojapóta osolusiona hag̃ua umíva. Upévare, jajedesidíkena ñamombaretetaha ñande jerovia, ha ñaipytyvõtaha opa ikatúvape ojerovia hag̃ua ñande Apoharére (1 Tim. 2:3, 4). Ha jasegíkena ñahaʼarõ vyʼápe pe día, ág̃a enterove persóna oĩva ko yvy ape ári omombaʼeguasu vove Jehovápe, ha heʼi hikuái umi mbaʼe jatopáva Apocalipsis 4:11-pe: “Ñandejára Jehová, nde rejapo entéro mbaʼe [...]. Upévare nde remerese enterove nemombaʼe ha nembotuicha”.