1. ¿Mbaʼéichapa ñanevenefisia ñamombeʼúramo mbaʼéichapa jaikuaa vaʼekue “pe añetegua”?

 “¿MBAʼÉICHAPA nde eikuaa raʼe pe añetegua?”. Oiméne heta vésema oñeporandu ndéve upéva. Katuete peteĩ ermáno térã ermána ndekuaa ramóva la oporandúva ndéve. Ñandéve ningo ñandegustaiterei ñahendu peteĩ ñane ermáno térã ermána omombeʼúrõ mbaʼéichapa oikuaa rakaʼe pe añetegua, ha ñande avei javyʼaiterei ñamombeʼu jave mbaʼérepa ñamombaʼete pe añetegua (Rom. 1:11). Ñañeʼẽvo koʼãichagua témare, ñanemomanduʼa mbaʼérepa javaloraite pe añetegua, ha upéva ñanemokyreʼỹ jasegi hag̃ua jaguata “pe añetegua rapére”. Upéva heʼise jasegitaha jaiko Jehová oipotaháicha ikatu hag̃uáicha haʼe ñanevendesi ha ñandeguerohory (3 Juan 4).

2. ¿Mbaʼépa jahecháta ko artíkulope?

² Ko artíkulope jahecháta mbaʼérepa ñande ñamombaʼete pe añetegua. Jahecháta avei mbaʼéichapa ikatu jasegi jahechauka javaloraha pe añetegua. Jahechávo koʼã mbaʼe katuete jaagradeséta Jehovápe ñanemoag̃ui haguére pe añeteguáre (Juan 6:44). Avei upéva ñanemokyreʼỹta ñañeʼẽ hag̃ua pe añeteguáre ótrope.

3. ¿Mbaʼépa hína la iñimportantevéva ñanepytyvõva ñamombaʼe hag̃ua pe añetegua?

³ Ñande ñamombaʼe pe añetegua heta mbaʼére. Péro la iñimportantevéva  hína: Ñande jahayhueterei Jehovápe, pórke chugui ou pe añetegua. La Biblia rupive ñande ndahaʼéi jaikuaánteva Jehová ipoderosoitereiha ha okrea hague entéro mbaʼe yvágape ha ko yvy ape ári, síno jaikuaa avei haʼeha ñande Túa ñanderayhuetéva ha ojepyʼapýva ñanderehe (1 Ped. 5:7). Ha avei jaikuaa Jehová haʼeha peteĩ Dios “oporoporiahuverekóva ha oporombyasýva, ndaipochyreíriva, oporohayhuetereíva ha nopyrũiva iñeʼẽre” (Éx. 34:6). Jehová ningo ohayhu pe hustísia (Is. 61:8). Chupe hasyeterei voi ohechávo mbaʼéichapa jahasa asy ha oipotaitereíma og̃uahẽ pe tiémpo oipeʼatahápe entéro mbaʼe ñanembohasa asýva (Jer. 29:11). Ñandéve hiʼãitereíma avei og̃uahẽ upe tiémpo. ¡Ndareíri ningo la jahayhuete Jehovápe!

4, 5. ¿Mbaʼérepa Pablo ombojoja vaʼekue pe esperánsa jaguerekóva peteĩ ánklare?

⁴ ¿Mbaʼérepa javalora pe añetegua? Pe añetegua ningo ñanevenefisia. Jahechamína peteĩ ehémplo. Ñañeʼẽvo pe añeteguáre ñañeʼẽ avei pe esperánsa jarekóvare amo gotyove g̃uarã. Jahechakuaa hag̃ua mbaʼérepa iñimportánte pe esperánsa, apóstol Pablo heʼi vaʼekue: “Ñane esperánsa ningo peteĩ ánkla ñande rekovépe g̃uarã, ha ñanepytyvõ jajepytaso mbarete hag̃ua ha ani hag̃ua ni michĩmi jaduda” (Heb. 6:19). Peteĩ ánkla oipytyvõháicha peteĩ várkope ani hag̃ua okacha vaipa, péicha ñane esperánsa ñanepytyvõta ani hag̃ua umi ñane provlemakuéra ñanembokacha vaipa.

⁵ Ko téxtope Pablo oñeʼẽ pe esperánsa oguerekóvare umi unhído. Upéicharõ jepe, la Pablo heʼi vaʼekue ikatu oipytyvõ avei umi kristiáno oguerekóvape pe esperánsa oikóvo pára siémpre ko yvy ápe ári (Juan 3:16). Añetehápe jaikuaávo jaguerekoha pe esperánsa jaikotaha pára siémpre omeʼẽ sentído ñande rekovépe.

6, 7. ¿Mbaʼéichapa ovenefisia Yvónnepe oaprende pe añetegua oñeʼẽva ñane esperánsare?

⁶ Jahechamína peteĩ ermána hérava Yvonne experiénsia. Haʼe ningo imitãme ndoikuaái vaʼekue pe añetegua ha okyhyje pe ñemanógui. Haʼe imanduʼa opyta hague iñakãme peteĩ fráse heʼíva: “Ikatu hína koʼẽrõ nañanekoʼẽvéi”. Haʼe omombeʼu: “Chemanduʼávo ko frásere avése ndaikatúi ake apensávo mbaʼépa la ñaneraʼarõva amo gotyove. Ha añeporandu voi: ‘¿Sera piko peichaite peve mbyky la ñande rekove? ¿Mbaʼe propósitopa oreko la che rekove?’. Che ningo namanoséi”.

⁷ Upe rire imitãkuñáme Yvonne oñepyrũ ostudia la Biblia testígo de Jehovándi. Haʼe heʼi: “Añepyrũ aguerovia ikatutaha aiko pára siémpre peteĩ paraísope ko yvy ape ári”. ¿Mbaʼéichapa ovenefisia Yvónnepe oikuaa pe añetegua? Haʼe heʼive: “Koʼág̃a ndaikovéima apáy pyharekue apensa hag̃ua che renonderãre ha pe ñemanóre”. Jahechaháicha, pe añetegua ivaliosoiterei Yvónnepe g̃uarã ha haʼe ovyʼaiterei ikatu rupi omombeʼu pe esperánsa porãite ótra persónape (1 Tim. 4:16).

8, 9. a) Pe ehémplo Jesús oipuru vaʼekuépe, ¿mbaʼéichapa pe kuimbaʼe ohechauka ovaloraha pe tesóro otopa vaʼekue? b) ¿Mbaʼéichapa nde ehechauka emombaʼeha pe añetegua?

⁸ Ñañeʼẽvo pe añeteguáre ñañeʼẽ avei Ñandejára Rréinore. Jesús okompara vaʼekue pe Rréino pláta yvyguýre. Upéva jatopa Mateo 13:44-pe, upépe Jesús heʼi: “Pe Rréino yvagapegua ojogua pláta yvyguy oĩvape peteĩ ñúme. Peteĩ kuimbaʼe otopa pe tesóro ha oñomi jey. Haʼe ovyʼaitereígui oho ovendepa ikosakuéra ha ojogua upe ñu”.  Jahechaháicha pe kuimbaʼe ndohekái hína kuri pláta yvyguy, péro otopa rire ojapo heta sakrifísio okonsegi hag̃ua upe tesóro. Upearã ovendepaite la orekomíva. ¿Mbaʼérepa? Haʼe oikuaa rupi ivaliosoitereiha upe tesóro. Ovaletereive voi entéro mbaʼe haʼe orekóvagui.

⁹ ¿Ndépa emombaʼe avei upéicha pe añetegua? ¡Katuete ningo! Ñande jaikuaa porãiterei entéro mbaʼe oofreséva ñandéve ko múndo ndaikatuiha ñakompara pe vyʼa jaguerekóvare jaservi rupi Jehovápe ha pe esperánsa jaikovévo pára siémpre pe Rréino poguýpe. Tuichaiterei mbaʼe ningo jareko Jehovápe ñane amígoramo, ha upéva ovaleve voi oimeraẽ sakrifísio ikatúvagui jajapo. Ndaipóri voi ótra kósa ñanembovyʼavéva jaikuaávo Jehová ‘ñandeguerohoryha entéro mbaʼépe’ (Col. 1:10).

10, 11. ¿Mbaʼépa omomýi vaʼekue Michaélpe ojapo hag̃ua umi kámbio hekovépe?

¹⁰ Heta oĩ ñande apytépe ojapómava hetaiterei kámbio Jehová oguerohory hag̃ua chupekuéra. Por ehémplo oĩ umi oheja vaʼekue umi karréra iñimportánteva ko múndope g̃uarã. Ótro katu ndoikovéima pláta rapykuéri irríko hag̃ua, ha oĩ avei umi okambiaitéva voi oiko lája oikuaa rire pe añetegua. Upéva hína Michael káso. Haʼe ningo ndoikuaái vaʼekue pe añetegua imitãme, ha upévare imitãrusúpe oñepyrũ opraktika karáte. Haʼe heʼi: “Che cheorgullóso voi chefísiko porã haguére, ha apensa vaʼekue chejehe cheinvensivleha”. Péro Michael oñepyrũvo ostudia la Biblia oikuaáma mbaʼépa Jehová opensa pe violénsiare (Sal. 11:5). Imanduʼávo pe matrimónio ombostudia vaʼekuére chupe, Michael heʼi: “Haʼekuéra núnka ndeʼíri vaʼekue chéve aheja hag̃ua pe karáte, upéva rangue osegínte chembostudia hikuái la Biblia”.

¹¹ Amáske Michael oikuaave Jehovápe, ohayhuve avei chupe. Haʼe oguerohoryeterei mbaʼéichapa Jehová imbaʼeporã isiervokuérandi. Tiémpo rire, Michael oñemeʼẽ enkuénta okambia vaʼerãha la oiko lája. Haʼe heʼi: “Che aikuaa porã ijetuʼuetereitaha chéve aheja pe karáte, péro aikuaa avei upéva Jehová oguerohorytaha. Ha aime vaʼekue segúro oimeraẽ sakrifísio ajapóva ovaleha la péna aservi hag̃ua chupe”. Michael oikuaa porã vaʼekue pe añetegua otopáva ivaliosoitereiha, ha upévare oĩ vaʼekue dispuésto ojapóvo umi kámbio hekovépe (Sant. 1:25).

12, 13. ¿Mbaʼéichapa pe añetegua oipytyvõ Máylipe?

¹² Ohechauka hag̃ua mbaʼeichaitépa ivalióso pe añetegua, la Biblia okompara voi pe añetegua pe lus ohesapévare pytũmbýpe (Sal. 119:105; Efes. 5:8). Peteĩ ermána hérava Mayli ha oikóva Azerbaiyánpe omombaʼeterei umi mbaʼe oaprende vaʼekue la Bíbliagui. Mayli tuakuéra ningo ndorekói vaʼekue la mísma rrelihión, itúa haʼe vaʼekue musulmán ha isy katu judía. Haʼe heʼi: “Che aguerovia vaʼekue Ñandejára oexistiha, péro nantendéi heta mbaʼe. Upévare añeporandu jepi: ‘¿Mbaʼére Ñandejára ñandeapo vaʼekue jasufri hag̃ua jaikove aja pukukue ha ñamano rire jasegi hag̃ua jasufri pára siémpre infiérnope?’. La hénte heʼi voi entéro mbaʼe oikóva haʼeha Ñandejára volunta, upévare añeporandu vaʼekue avei: ‘¿Serápa Ñandejára oreko ipoguýpe la héntepe ha ovyʼa voi ohechárõ chupekuéra ohasa asy hína?’”.

¹³ Mayli osegi vaʼekue oheka rrespuésta umi porandu oreko vaʼekuépe. Tiémpo rire haʼe oasepta peteĩ estúdio bíblico, ha upe rire oiko chugui testígo de Jehová. Haʼe heʼi: “Ahechávo mbaʼeichaitépa isentído la Biblia  omboʼéva, chepytyvõ aiko hag̃ua vyʼápe”. Haʼe heʼive: “Umi mbaʼe la Biblia omboʼéva ningo ikatu jaguerovia, ha umíva omeʼẽ chéve pyʼaguapy”. Mayli ojapo haguéicha, enterovéva ñande ñamombaʼeguasu Jehovápe ‘upe ñanerenói vaʼekue pytũmbýgui ha ñanderresivi pe lus ijojahaʼỹvape’ (1 Ped. 2:9).

14. ¿Mbaʼéichapa ikatu ñamombaʼeve pe añetegua? (Ehecha pe rrekuádro “ ¿Mbaʼe rehepa avei oñekompara pe añetegua?”).

¹⁴ Koʼãva ningo unos kuánto ehémplo ohechaukáva mbaʼeichaitépa ivalióso pe añetegua. Ha oiméne nde eikuaa avei hetave ehémplo. Ikatu ningo nde estúdio personálpe ehecha mbaʼérepa emombaʼe vaʼerã pe añetegua. Amáske javalora pe añetegua, jahekáta fórma jahechauka hag̃ua upéva.

15. ¿Mbaʼéichapa ñande ikatu jahechauka javaloraha pe añetegua?

¹⁵ Ikatu jahechauka javaloraha pe añetegua, jastudia meméramo la Biblia ha umi ñane puvlikasionkuéra. Jaikuaaháicha, noimportái mboy tiémpomapa jaservi Jehovápe, siémpre ikatu jasegi ñaaprendeve chugui. Pe primer Ñemañaha osẽ vaʼekue  ingléspe okompara voi pe añetegua péicha: ‘Pe añetegua ojogua peteĩ yvotyʼi kaʼaguýpe okañýva ñana apytépe. Ikatu hag̃uáicha jatopa peichagua yvotyʼi jajeporeka porã vaʼerã. Ha jatopa rire katu tekotevẽ jajayvy jaipoʼo hag̃ua. Péro upéi nañañekontentái vaʼerã peteĩmíre, síno jasegi vaʼerã jaheka hetave yvoty’. Traváho pohýi ningo hína jastudia, péro ovale la péna ñañehaʼã hese.

16. ¿Mbaʼéichapa nde restudia la Biblia nevenefisia hag̃uáicha? (Proverbios 2:4-6).

¹⁶ Naentéroipe ningo ñandegusta jalee térã jastudia. Péro Jehová ñaneinvita ‘jasegi hag̃ua jaheka’ ikatu hag̃uáicha ñantende porãve pe añetegua (elee Proverbios 2:4-6). Ha ñande jajapóramo upéicha, katuete ñañevenefisiáta. Oñeʼẽvo pe ijestúdio personál rehe, Corey heʼi oñehaʼãha ostudia porã peteĩ versíkulo. Haʼe omombeʼu: “Alee káda nóta, aheka káda rreferénsia ha ahekave informasión oñeʼẽva upe versíkulore. Astudiávo péicha aaprendeve la Biblia omboʼéva”. Oiméramo ñande jajepokuaa jastudia péicha térã ótro hendáicha, ñañemotiémpo vaʼerã ha ñañehaʼã jastudia jahechauka hag̃ua ñamombaʼeha pe añetegua (Sal. 1:1-3).

17. ¿Mbaʼépa heʼise ñamoĩ en práktika umi mbaʼe ñaaprende vaʼekue? (Santiago 1:25).

¹⁷ Ñande ningo jaikuaa porã ndahaʼeiha jastudiánte vaʼerã la Biblia heʼíva. Ikatu hag̃uáicha ñanevenefisia, jaiko vaʼerã la Biblia heʼiháicha. Upéva heʼise ñamoĩha en práktika umi mbaʼe ñaaprendéva. Upéicharõ añoite pe añetegua ikatu ñanembovyʼa (elee Santiago 1:25). ¿Mbaʼéichapa ñande ikatu jajasegura jaikoha la Biblia heʼiháicha? Peteĩ ermáno heʼi ikatuha jajepyʼamongeta ñandejehe jahecha hag̃ua ñamoĩpa hína en práktika umi mbaʼe ñaaprendéva ha moõpa tekotevẽ ñamehorave. Apóstol Pablo heʼi vaʼekue: “Oiméramo jahupytýma hína heta mbaʼe, jasegíkena jaiko upéicha ha jaha meme tenonde gotyo” (Filip. 3:16).

18. ¿Mbaʼérepa ñañehaʼãmbaite ‘jasegi hag̃ua jaiko pe añetegua rapére’?

¹⁸ Epensamíntena umi venefísio jahupytýmavare ‘jasegi rupi jaiko pe añetegua rapére’. Ndahaʼéi sólamente omehoráva ñande rekove, síno ñambovyʼa avei Jehovápe ha ñane ermanokuérape (Prov. 27:11; 3 Juan 4). Añetehápe koʼã mbaʼe ñanepytyvõ javalora ha jaiko hag̃ua pe añetegua heʼiháicha.