1. Heʼiháicha 1 Tesalonicenses 5:11, ¿mbaʼeichagua traváhopepa enterovete ñambaʼapo hína?

 ¿NE KONGREGASIÓNPA omopuʼãmava térã orrenovámava pene Salón del Reino? Oiméramo upéicha nemanduʼáne eho jeýramo guare pe primera rreuniónpe pe Salón pyahúpe. ¡Mbaʼeichaitépa oiméne eagradese raʼe Jehovápe! Oiméne nderesay pororopa ha revyʼaitereígui ndaikatúi voi ni repurahéi oñepyrũtarõ guare pe rreunión. Pe Salón oñemopuʼã vaʼekue ningo omombaʼeguasu Jehovápe. Péro oĩ hína ótra kósa ikatúva jajapo ñamombaʼeguasuve hag̃ua Jehovápe. Upéva tuichave mbaʼe hína peteĩ óga ñemopuʼãgui, pórke ñamopuʼã térã ñamombarete hína umi persóna oúvape koʼã lugárpe oadora hag̃ua Jehovápe. Apóstol Pablo imanduʼa vaʼekue upévare oskrivírõ guare umi mbaʼe heʼíva 1 Tesalonicenses 5:11-pe, haʼéva pe téxto omopyendáva ko artíkulo (elee).

2. ¿Mbaʼépa jahecháta ko artíkulope?

² Apóstol Pablo ningo omoĩ ñandéve peteĩ ehémplo iporãitereíva, pórke haʼe oikuaa vaʼekue mbaʼéichapa omombaretéta umi ermanokuérape. Haʼe oñemoĩ vaʼekue ilugarpekuéra. Ko artíkulope jahecháta mbaʼéichapa Pablo oipytyvõ vaʼekue umi ermáno ha ermanakuérape: 1) Ogueropuʼaka hag̃ua umi pruéva, 2) oĩ hag̃ua pyʼaguapýpe hikuái oñondive, ha 3) omombarete hag̃ua ijerovia Jehováre. Jahechamína koʼág̃a mbaʼéichapa ikatu jasegi Pablo ehémplo ñamombarete hag̃ua ñane ermanokuérape (1 Cor. 11:1).

3. ¿Mbaʼéichapa Pablo ohecha vaʼekue hendápe porã entéro mbaʼe?

³ Pablo ningo ohayhueterei vaʼekue umi ermáno ha ermanakuérape. Haʼe voi ohasa vaʼekue heta mbaʼe ijetuʼúva. Upévare Pablo oiporiahuvereko vaʼekue umi ermanokuérape. Haʼe oñemoĩ ilugarpekuéra ohasa jave umi situasión ijetuʼúva. Upéi tiémpo rire, peteĩ vuéltape Pablo opyta vaʼekue isogue, ha upémarõ haʼe oñemoĩ ombaʼapo ikatu hag̃uáicha oñemantene haʼe ha umi iñirũnguéra (Hech. 20:34). Pablo ningo ojapo vaʼekue óga kárpa, upéva  haʼe vaʼekue la ijofísio. Ha og̃uahẽrõ guare Coríntope, primerorã ombaʼapo vaʼekue Áquila ha Priscílandi ojapóvo umi óga kárpa. Péro “káda sábado” haʼe opredikámi vaʼerã umi judío ha umi griégope. Upéi og̃uahẽ rire Silas ha Timoteo upépe, “Pablo oipurupaite itiémpo opredika hag̃ua Ñandejára ñeʼẽ” (Hech. 18:2-5). Pablo núnka ndahesaráiriva pe iñimportantevéva hekovépe haʼeha oservi Jehovápe. Haʼe ningo omokyreʼỹ umi ermanokuérape, pórke haʼe omoĩ ehémplo porã ombaʼapo jejopývo predikasiónpe ha oñemantenévo ijupe voi. Pablo omomanduʼa vaʼekue umi ermánope ani hag̃ua umi provléma ha pe rresponsavilida orekóva omantene hag̃ua ifamíliape ojapoka chupekuéra ko mbaʼe: Ou ombotapykue “umi mbaʼe iñimportantevéva” oadora hag̃ua Jehovápe (Filip. 1:10).

4. ¿Mbaʼéichapa Pablo ha Timoteo oipytyvõ vaʼekue umi ermanokuérape ombohovái hag̃ua pe persekusión?

⁴ Oñeforma riremi pe kongregasión de Tesalónica, umi ermáno pyahu ombohovái peteĩ persekusión imbaretetereíva. Pe hénte aty iñañaitereíva ndotopáimarõ Pablo ha Silas rehe, ojagarra ombotyryry umi “ótro ermanokuérape umi governánte upe siudapegua renondépe”, ha osapukái hikuái: “Koʼã kuimbaʼe oñemoĩ César dekretokuéra kóntrape” (Hech. 17:6, 7). Ikatu ñañeimahina mbaʼeichaitépa oiméne oñemondýi raʼe koʼã kristiáno pyahu ohechakuaárõ guare umi governantekuéra upe siudapegua oñemoĩha ikontrapekuéra. Haʼekuéra ikatu kuri menovénte ikyreʼỹ Jehová servísiope, péro Pablo ndoipotái kuri upéva oiko. Upévare Pablo ha Silas ohótarõ guare upégui, ojasegura oñeñangareko porã hag̃ua pe kongregasión pyahúre. Pablo omomanduʼa voi umi Tesalonicaguápe: ‘Romondo pene rendápe Timotéope penemombarete ha penekonsola hag̃ua ha pende jerovia imbareteve hag̃ua, ani hag̃ua avave ikangy umi jehasa asy káusare’ (1 Tes. 3:2, 3). Timotéope oiméne ojepersegi rakaʼe avei ivállepe Lístrape ha haʼe ohecha vaʼekue mbaʼéichapa Pablo omombarete iñermanokuérape upépe. Timoteo ohecha vaʼekue mbaʼéichapa Jehová oipytyvõ chupekuéra. Upévare haʼe oasegura vaʼekue umi ermanokuéra pyahúpe osẽ porãtaha avei entéro mbaʼépe (Hech. 14:8, 19-22; Heb. 12:2).

5. ¿Mbaʼéichapa Brýantpe ou porãiterei pe ajúda omeʼẽ vaʼekue chupe peteĩ ansiáno?

⁵ ¿Mbaʼéichapa Pablo oipytyvõ vaʼekue avei umi ermanokuérape? Pablo ha Bernabé oho jeýrõ guare Lístrape, Iconio ha Antioquíape “káda kongregasiónpe onombra hikuái ansiáno” (Hech. 14:21-23). Umi ansianokuéra ningo tuichaiterei oipytyvõ vaʼekue umi kongregasiónpe ojapoháicha avei umi ansianokuéra koʼág̃arupi. Jahechamína la heʼi vaʼekue peteĩ ermáno hérava Bryant, haʼe heʼi: “Arekórõ guare 15 áño che túa oho ógagui ha che sýpe katu oñemosẽ kongregasióngui. Añandu voi apytaha cheaño ha añedesanima”. ¿Mbaʼépa oipytyvõ vaʼekue Brýantpe oaguanta hag̃ua upe tiémpo ijetuʼuetéva? Haʼe heʼi: “Peteĩ ansiáno hérava Tony oñeʼẽ chendive aime jave rreunionhápe ha ótro moméntope avei. Haʼe oñeʼẽ chéve umi ombohováivare umi situasión ijetuʼúva ha lomímonte ovyʼáva. Olee chendive Salmo 27:10 ha imanduʼa chéve Ezequías ehémplore. Haʼe ningo oservi vaʼekue fiélmente Jehovápe, itúa ndahaʼéiramo jepe ehémplo porã chupe g̃uarã”. ¿Mbaʼéichapa ou porã vaʼekue Brýantpe ko ajúda oñemeʼẽ vaʼekue chupe? Haʼe heʼi: “Tony chemokyreʼỹ rupi, mbeguekatúpe avyʼa jey ha upéi añepyrũma pe servísio de tiémpo kompléto”. Upéicharõ umi ansianokuéra oñatende porã vaʼerã ‘omokyreʼỹ’ hag̃ua umi oñedesanimávape, oiko haguéicha Bryant rehe (Prov. 12:25).

6. ¿Mbaʼéichapa Pablo oipuru umi experiénsia omokyreʼỹ hag̃ua umi ermanokuérape?

⁶ Pablo omomanduʼa vaʼekue umi ermanokuérape oĩha “hetaiterei testígo” oaguantáma vaʼekue umi situasión ijetuʼúva Jehová omombarete rupi chupekuéra (Heb. 12:1). Pablo ohechakuaa  vaʼekue umi ohasa vaʼekue opaichagua situasión ijetuʼúva experiénsia ikatuha omokyreʼỹ ha oipytyvõ umi ermánope osegi hag̃ua oñekonsentra “Ñandejára oikovéva siudáre” (Heb. 12:22). Ha upeichaite avei oiko koʼág̃arupi. Ñanemokyreʼỹ jalee jave mbaʼéichapa Jehová oipytyvõ vaʼekue Gedeón, Barac, David, Samuel ha hetave ótrope (Heb. 11:32-35). ¿Mbaʼépa jaʼekuaa koʼag̃agua ermanokuéra ijerovia mbaretéva ehémplore? Pe sentrál mundiálpe pyʼỹinte ojerresivi kárta umi ermanokuéra omondóva, ha omombeʼúva ijerovia mbareteveha hikuái olee rire umi ermanokuéra koʼag̃agua rembiasakue.

7. ¿Mbaʼépa nde reaprende pe konsého Pablo omeʼẽ vaʼekuégui jatopáva Romanos 14:19-21-pe?

⁷ Ñande ningo ñamombarete hína ñane ermáno ha ermanakuérape jaʼe ha jajapo jave umi mbaʼe oguerúva pyʼaguapy kongregasiónpe. Ñande ningo ñapensa diferénte ojuehegui, péro ndajahejái upéva ñandedividi. Avei ñande jahejánte ohasa peteĩ situasión ndohóima guive upéva la Biblia heʼíva kóntrape. Jahechamína peteĩ ehémplo. Yma pe kongregasión oĩvape Rómape oĩ vaʼekue umi kristiáno judíova ha umi ndahaʼéiva judío. Ha pe léi mosáika ojepeʼárõ guare, natekotevẽvéima vaʼekue oñekumpli umi léi heʼíva mbaʼeichagua tembiʼúpa ikatu ojeʼu térã nahániri (Mar. 7:19). Upe tiémpo guive oĩ umi kristiáno judío oñandúva ikatumaha hoʼu opaichagua tembiʼu. Péro oĩ avei umi kristiáno judío noñanimáiva hoʼu umichagua tembiʼu. Upéva káusare pe kongregasión ojedividi. Pablo ontende vaʼekue iñimportanteha jaiko pyʼaguapýpe ha upévare heʼi: “Ikuentave ndajaʼúi soʼo ni víno, ha ndajajapói mbaʼeve, upéva omokangýtaramo ñane ermáno jerovia” (elee Romanos 14:19-21). Upévare Pablo oipytyvõ vaʼekue umi kristianokuérape ohechakuaa hag̃ua upeichagua diskusión ikatuha operhudika vai chupekuéra, ha avei pe kongregasión kompletoitépe. Ha haʼe voi oĩ vaʼekue dispuésto okambia hag̃ua mbaʼéichapa oñekomporta ani hag̃ua omoñepysanga ótrope (1 Cor. 9:19-22). Upéicha avei ñande ikatu ñamombarete ñane ermanokuérape, jajejokóramo ani hag̃ua ñañentremete umi mbaʼe káda uno ikatúvape odesidi.

8. ¿Mbaʼépa Pablo ojapo vaʼekue ojapeligrárõ guare pe pyʼaguapy oĩva kongregasiónpe?

⁸ Pablo osegi vaʼekue oĩ pyʼaguapýpe umi noĩrivandi hendive de akuérdo umi mbaʼe iñimportántevape jepe. Péicha haʼe omoĩ peteĩ ehémplo iporãva. Por ehémplo, yma síglo primérope oĩ vaʼekue kongregasiónpe umi oipotáva oñesirkunsida umi ndahaʼéivape judío ha oiko vaʼekue chugui kristiáno. Ikatu oime upéicha rakaʼe okyhyjégui hikuái oĩrõ g̃uarã oñeʼẽ vaíva hesekuéra (Gál. 6:12). Pablo noĩriete vaʼekue de akuérdo, péro oñemombarete rangue la haʼe opensávapente, haʼe iñumílde ha ojerure konsého umi apostolkuéra ha ansiáno oĩvape Jerusalénpe (Hech. 15:1, 2). Ha Pablo ojapo rupi péicha, oipytyvõ umi kristianokuérape osegi hag̃ua ovyʼa ha oiko pyʼaguapýpe kongregasiónpe (Hech. 15:30, 31).

9. ¿Mbaʼéichapa ikatu jasegi Pablo ehémplo?

⁹ Jajoavy mbaʼéramo álgiendi, ñande ñañehaʼãnte jaiko pyʼaguapýpe. Upearã jajerure konsého umi ermanokuéra Jehová onombra vaʼekuépe kongregasiónpe. Pyʼỹinte ningo jatopa pe gía ñaikotevẽva ñane puvlikasionkuérape, térã umi instruksión omeʼẽvape Jehová organisasión. Ha jasegíramo umi instruksión jaiko rangue jaipota ojejapo la ñande ñapensávante, ñaipytyvõta hína oĩ hag̃ua pyʼaguapy kongregasiónpe.

10. ¿Mbaʼépa avei Pablo ojapo oĩ hag̃ua pyʼaguapy kongregasiónpe?

¹⁰ Apóstol Pablo oipytyvõ vaʼekue oĩ hag̃ua pyʼaguapy kongregasiónpe oñeʼẽvo umi kualida porã oguerekóvare umi ermanokuéra ha ndahaʼéi  idefektokuérare. Por ehémplo, omohuʼãvo pe ikárta umi rrománope, Pablo imanduʼa heta ermánore ha la majoríare heʼi peteĩ mbaʼe iporãva térã peteĩ mbaʼe oikuaáva chuguikuéra. Ñande avei ikatu jasegi Pablo ehémplo ñañeʼẽvo umi kualida porã orekóvare ñane ermanokuéra. Jajapo jave upéicha, ñamombarete hína ñane amista ha pe mborayhu ñañandúva ojuehe kongregasiónpe ermanokuérandi.

11. ¿Mbaʼépa ikatu jajapo jaiko porã jey hag̃ua jajoavy jave ótrondi?

¹¹ Sapyʼánte ningo umi ermáno iñexperiénsiava jepe noĩri de akuérdo peteĩ mbaʼépe térã ojodiskuti oñondive hikuái. Upéva la oiko vaʼekue Pablo ha pe iñamigoite Bernabé rehe. Haʼekuéra tuichaiterei ojoavy vaʼekue ohechárõ guare oguerahátapa hikuái Márcospe hendivekuéra pe sigiénte viáhe ojapótavape opredika hag̃ua. Haʼekuéra “tuicha oiko vai” ha odesidi ndoviahamoʼãveimaha oñondive (Hech. 15:37-39). Péro Pablo, Bernabé ha Marcos oiko porã jey oñondive, ha upéva ohechauka haʼekuéra ovaloraitereiha pe pyʼaguapy ha unida oĩva kongregasiónpe. Upéi Pablo oñeʼẽ porã vaʼekue Bernabé ha Marcos rehe (1 Cor. 9:6; Col. 4:10). Ñande avei ñasolusiona vaʼerã oimeraẽ diferénsia jarekóva ótrondi kongregasiónpe, ha upéi jasegi ñañekonsentra umi kualida porã orekóvare. Péicha jajapóramo ñaipytyvõta hína oĩ hag̃ua pyʼaguapy ha unida (Efes. 4:3).

12. ¿Mbaʼe mbaʼépa ikatu hína ombohovái ñane ermanokuéra?

¹² Ñande ningo ñamombarete hína ñane ermanokuérape ñamombarete jave ijerovia Jehováre. Oĩ ningo umi ihentekuéra ndahaʼéiva Testígo, térã ikompañéro de traváho térã eskuelapegua oñembohorýva hesekuéra. Oĩ avei umi orekóva umi mbaʼasy igráveva, térã ijetuʼúva chupe ombohovái hag̃ua umi mbaʼe omoñeñandu vaíva chupe. Nañanderesaráiri avei umi ojapómavagui hetaiterei áño ojevautisa hague, ha hetaiterei tiémporema ohaʼarõva oñehundi ko múndo aña. Koʼã situasión ningo ikatu hína omoĩ a pruéva ñane ermanokuéra jerovia koʼág̃arupi. Koʼãichagua situasión ombohovái vaʼekue avei umi oĩva kongregasiónpe síglo primérope. ¿Mbaʼépa ojapo vaʼekue Pablo omombarete hag̃ua umi ermanokuérape?

13. ¿Mbaʼéichapa Pablo oipytyvõ vaʼekue umi ermanokuérape oĩramo oñembohorýva hesekuéra?

¹³ Pablo oipuru vaʼekue Ñandejára Ñeʼẽ omombarete hag̃ua umi ermáno ha ermanakuéra jerovia. Por ehémplo, ikatu oime umi kristiáno judío ndoikuaái vaʼekue mbaʼépa heʼíta umi ihentekuéra heʼi jave chupekuéra: “Umi mbaʼe ogueroviáva umi judío ningo iporãve umi mbaʼe ogueroviávagui umi kristiáno”. Katuete pe kárta Pablo oskrivi vaʼekue umi hebréope tuichaiterei omombarete vaʼekue umi ermánope (Heb. 1:5, 6; 2:2, 3; 9:24, 25). Umi mbaʼe heʼíva Pablo oipytyvõne raʼe chupekuéra oikuaa hag̃ua mbaʼépa heʼíta umi oñemoĩvape hesekuéra. Koʼág̃arupi avei ñande ñaipytyvõ ñane ermanokuérape oĩ jave oñemoĩva hesekuéra oipuru hag̃ua umi ñane puvlikasión ha oexplika hag̃ua umi mbaʼe ogueroviáva. Ha oĩramo ñane kongregasiónpe peteĩ imitãva ha oñeñembohorýva hese oguerovia haguére pe kreasión, ikatu ñaipytyvõ chupe oipuru hag̃ua umi informasión oĩva koʼã follétope: ¿Es la vida obra de un Creador?, ha El origen de la vida. Cinco cuestiones dignas de análisis. Koʼã informasión oipytyvõta chupe ohechauka hag̃ua mbaʼérepa oguerovia pe kreasión.

14. ¿Mbaʼépa ojapo vaʼekue Pablo hembiapo hetáramo jepe opredika ha oporomboʼe hag̃ua?

¹⁴ Pablo omokyreʼỹ umi ermanokuérape oporohayhu hag̃ua ‘ojapóvo iporãva’ (Heb. 10:24). Haʼe ningo oipytyvõ vaʼekue umi ermanokuérape ndahaʼéi umi mbaʼe heʼíva rupivénte, síno  umi mbaʼe ojapóva rupive avei. Por ehémplo, umi ermanokuéra oĩva Judéape ohasárõ guare ñembyahýi, Pablo ogueru vaʼekue chupekuéra umi mbaʼe oikotevẽva (Hech. 11:27-30). Pablo ningo hembiapo heta vaʼekue opredika ha oporomboʼe hag̃ua. Upéicharõ jepe haʼe siémpre ohecha mbaʼéichapa ikatu oipytyvõ umi oikotevẽvape hína algitomi (Gál. 2:10). Upéicha ojapóvo haʼe omombarete hína umi ermanokuérape ojerovia hag̃ua Jehová oñangarekotaha hesekuéra. Koʼág̃arupi avei oiko jave peteĩ desástre naturál, ñande jajeofrese ha jaipuru ñane tiémpo, fuérsa ha umi avilida jaguerekóva ñamombarete hag̃ua ñane ermanokuéra jerovia. Upéicha avei ikatu ñameʼẽ ñane kontrivusión pe óvra mundiálpe g̃uarã. Koʼã mbaʼe ha hetave hendáicha voi ikatu hína ñaipytyvõ ñane ermanokuérape ojerovia hag̃ua Jehová núnka ndohejareimoʼãiha chupekuéra.

15, 16. ¿Mbaʼéichapa jatrata vaʼerã umi ou vaʼekuépe ijerovia kangy?

¹⁵ Pablo noñentregái vaʼekue ha osegi oipytyvõ umi ijerovia kangývape. Haʼe oiporiahuvereko ha oñeʼẽ chupekuéra mborayhúpe ha heʼi umi mbaʼe iporãva (Heb. 6:9; 10:39). Por ehémplo, oñepyrũ guive opa peve pe ikárta oskrivi vaʼekuépe umi hebréope, haʼe pyʼỹinte heʼi jepi “ñande”, ha péicha orrekonose haʼe avei omoĩ vaʼerãha en práktika pe konsého omeʼẽ vaʼekue (Heb. 2:1, 3). Ha Pablo ojapo haguéicha, ñande avei nañañentregái ha jasegi ñaipytyvõ umi oúvape ijerovia kangy. Ñande ningo ñamombarete chupekuéra jahechaukávo jajepyʼapyha hesekuéra ñande pyʼaite guive. Péicha jajapóramo, jaaseguráta hína ñane ermanokuérape jahayhuha chupekuéra. Ñande ñaneamávle ha ñañeʼẽramo mborayhúpe umi ñane ermánope, katuete ñamombaretéta chupekuéra.

¹⁶ Pablo oasegura umi ermanokuérape Jehová ndahesarairiha umi mbaʼe porã ojapo vaʼekuégui hikuái (Heb. 10:32-34). Ñande avei  ikatu jajapo upéicha ñaipytyvõ jave umi ñane ermáno oúvape ijerovia kangy. Por ehémplo, ikatu ñaporandu chupe mbaʼéichapa oikuaa vaʼekue Jehovápe, térã taimanduʼami mbaʼéichapa anteve Jehová oipytyvõma vaʼekue chupe. Ikatu jaaprovecha upe oportunida jaasegura hag̃ua chupe Jehová ndahesaraimoʼãiha umi mbaʼe ojapo vaʼekuégui ohechauka hag̃ua ohayhuha chupe, ha Jehová ndohejareimoʼãiha chupe amo gotyove (Heb. 6:10; 13:5, 6). Ikatu hína koʼãichagua konversasión omokyreʼỹ koʼã ermáno jahayhuetévape osegi hag̃ua oservi Jehovápe.

17. ¿Mbaʼe jajapo hag̃uápa ñandevalevéta jahávo?

¹⁷ Peteĩ ombaʼapóva konstruksiónpe tiémpo rire ojapo porãve ohóvo la itraváho. Upéicha avei ñande ñandevaleve jahávo ñañomokyreʼỹ hag̃ua. Ñande ningo ikatu ñaipytyvõ ótrope ogueropuʼaka hag̃ua umi pruéva. Ha upearã ñañeʼẽ chupekuéra umi ehémplo yma guarére, umi oaguantáma vaʼekuére heta mbaʼe. Ñande ñaipytyvõta avei oĩ hag̃ua pyʼaguapy, ñañeʼẽvo umi mbaʼe porã orekóvare umi ótro, ñañehaʼãvo jaiko pyʼaguapýpe ijetuʼúramo jepe, ha jaiko porã jeývo jajoavy jave ótrondi. Ha jasegíta avei ñamombarete ñane ermanokuéra jerovia ñakompartívo hendivekuéra umi mbaʼe iñimportánteva heʼíva la Biblia, ñaipytyvõvo chupekuéra oikotevẽ jave ha jaapojávo umi ou vaʼekuépe ijerovia kangy.

18. ¿Mbaʼépa nde ejerresolvéma ejapotaha?

¹⁸ Umi ombaʼapóva oñemopuʼã hag̃ua umi lugár ojepurútava oñemombaʼeguasu hag̃ua Jehovápe ningo ovyʼa ha oñeñandu porã la ojapóvare. Ñande ñaipytyvõramo opuʼã hag̃ua pe kongregasión, térã ñamombaretéramo umi ermanokuéra jerovia, javyʼa ha ñañeñandu porãta avei la jajapóvare. Por ehémplo, umi óga oñemopuʼãva ningo ohasávo la tiémpo oñembyai jey. Péro la ñande travahokue kongregasiónpe opytáta pára siémpre. Upévare jajerresolvékena ‘jasegitaha ñañomokyreʼỹ ha ñañomombarete’ (1 Tes. 5:11).