1. Heʼiháicha Hebreos 12:1, ¿mbaʼépa jajapo vaʼerã ñamohuʼã hag̃ua pe “karréra oĩva ñane renonderãme”?

 LA Biblia heʼi peteĩ kristiáno rekove ojoguaha peteĩ karrérape. Umi omohuʼãva pe karréra orresivíta vída etérna (2 Tim. 4:7, 8). Ñañehaʼãmbaite vaʼerã ko karrérape, koʼýte koʼág̃a pórke ñamohuʼã mbotaitéma hína. Apóstol Pablo ningo omohuʼã porã vaʼekue ko karréra, ha heʼi vaʼekue mbaʼépa ñanepytyvõta ñagana hag̃ua. Haʼe heʼi: ‘Jaipeʼákena ñande avei entéro umi kárga. Jasegíkena jadipara ha ñaaguanta pe karréra oĩva ñane renonderãme’ (elee Hebreos 12:1).

2. ¿Mbaʼépa heʼise jaipeʼa vaʼerãha “entéro kárga”?

² Apóstol Pablo heʼírõ guare jaipeʼa vaʼerãha ñandejehegui “entéro kárga”, ¿heʼisépa raʼe ndajaguerahamoʼãiha mbaʼeveichagua kárga? Nahániri. Haʼe oñeʼẽ kuri umi kárga natekotevẽivare jagueraha. Koʼãichagua kárga ikatu ñanemokaneʼõ ha ñandejoko ñamohuʼã hag̃ua pe karréra. Upévare ñaaguanta hag̃ua tekotevẽ jaikuaa mbaʼépa umi kárga natekotevẽiva jaraha ha pyaʼe jaipeʼa ñandejehegui. Péro nañamboykéi vaʼerã umi kárga okorrespondéva ñandéve jaraha, péicharõmante jasegíta japartisipa ko karrérape (2 Tim. 2:5). ¿Mbaʼépa hína umi kárga okorrespondéva ñandéve jaraha?

3. a) Heʼiháicha Gálatas 6:5, ¿mbaʼépa káda uno jagueraha vaʼerã? b) ¿Mbaʼépa jahecháta ko artíkulope ha mbaʼérepa iñimportánte upéva?

³ (Elee Gálatas 6:5). Pablo heʼi oĩha umi mbaʼe okorrespondéva  ñandéve jaraha. Haʼe oskrivi vaʼekue: “Káda uno ogueraháta ikárga”. Ape oñeñeʼẽ pe rresponsavilida káda uno jaguerekóvare Ñandejára renondépe ha ñandémante ñakumpli vaʼerã. Ko artíkulope jahecháta mbaʼépa hína umi kárga okorrespondéva ñandéve ha mbaʼéichapa ikatu jagueraha umíva. Avei jahecháta umi mbaʼe natekotevẽiva jagueraha ha mbaʼéichapa ikatu jaipeʼa ñandejehegui umíva. Jagueraháramo ñande kárga ha jahejáramo umi nañaikotevẽiva ikatúta ñamohuʼã porã pe karréra jaikove hag̃ua pára siémpre.

4. ¿Mbaʼérepa pe promésa jajapo vaʼekue Jehovápe ndahaʼéi álgo ijetuʼuetereíva? (Ehecha pe taʼanga).

⁴ Pe promésa jajapo vaʼekue Jehovápe ñañemeʼẽrõ guare chupe. Ñañemeʼẽrõ guare Jehovápe ñapromete jaadorataha chupe ha jajapotaha ivolunta. Ñande jasegi vaʼerã ñakumpli ko promésa, ha upéva peteĩ rresponsavilida isériova ñandéve g̃uarã, péro ndahaʼéi álgo ijetuʼuetereíva ñakumpli hag̃ua. ¿Mbaʼérepa? Pórke Jehová ñandeapo voi jajapo hag̃ua hembipota (Apoc. 4:11). Haʼe ñandekrea vaʼekue jaikuaase ha jaadorase hag̃ua chupe,  ñandeapo voi ijoguaháramo. Upévare ikatu ñañemoag̃ui hese ha javyʼa jajapóvo haʼe heʼíva (Sal. 40:8). Jajapo jave Jehová volunta ha jasegi Itaʼýrape ‘ñandepiroʼy’ (Mat. 11:28-30).

5. ¿Mbaʼépa ikatu ñanepytyvõ ñakumpli hag̃ua pe promésa jajapo vaʼekue Jehovápe? (1 Juan 5:3).

⁵ ¿Mbaʼéichapa ikatu jagueraha ko kárga? Ikatu ñanepytyvõ mokõi mbaʼe. Primero, amás día jahayhuve vaʼerã Jehovápe. Upearã jajepyʼamongeta vaʼerã opa mbaʼe haʼe ojapóvare ñanderehehápe ha umi vendisión omeʼẽtavare ñandéve amo gotyove. Jahayhuvévo Jehovápe, ifasilvéta avei ñandéve ñaneñeʼẽrendu hag̃ua chupe (elee 1 Juan 5:3). Segundo, jasegi vaʼerã Jesús ehémplo. Haʼe ningo ojapo porã vaʼekue Itúa rembipota pórke oñemboʼe chupe ha opensa meme umi mbaʼe porã oñemoĩvare henonderãme (Heb. 5:7; 12:2). Ñande avei ikatu jajapo Jesús ojapo haguéicha. Jajerure Jehovápe tañanemombarete ha siémpre ñapensa pe esperánsa jarekóvare jaikovetaha pára siémpre. Amáske jahayhuve Jehovápe ha jasegi Jesús ehémplo, ikatúta ñakumpli pe promésa jajapo vaʼekue Jehovápe.

6. ¿Mbaʼérepa ñakumpli vaʼerã pe rresponsavilida jarekóva ñane famíliandi? (Ehecha pe taʼanga).

⁶ Ñane rresponsavilida ñane famíliandi. Ñahaʼãvo ko karréra jahechauka vaʼerã jahayhuveha Jehová ha Jesúspe ñane parientekuéragui jepe (Mat. 10:37). Péro upéva ndeʼiséi jaheja rei vaʼerãha ñane rresponsavilida ñane famíliandi, ñaimoʼãgui upéva ñandejokotaha jaservi porã hag̃ua Jehovápe. Añetehápe, Jehová ha Jesús ñandeguerohory hag̃ua tekotevẽ ñakumpli porã pe rresponsavilida jarekóva ñane famíliandi (1 Tim. 5:4, 8). Jajapóramo péicha javyʼavéta. Jehová oikuaa voi peteĩ família oikotaha vyʼápe pe ména ha tembireko ojoayhu ha ojorrespetáramo, tuakuéra ohayhu ha ohekomboʼe porãramo ifamíliape ha umi mitã iñeʼẽrendúramo ituakuérape (Efes. 5:33; 6:1, 4).

7. ¿Mbaʼéichapa ikatu ñakumpli porã ñane rresponsavilida ñane famíliape?

⁷ ¿Mbaʼéichapa ikatu jagueraha ko kárga? Jasegíkena la Biblia konsého tahaʼe haʼéva pe rresponsavilida otokáva ñandéve ñane famíliape. Ani jajapo umi mbaʼe ñande ñapensávante oĩ porãha, ni jajegiánte umi kostúmbre oĩvare ñande jaikohápe térã umi expérto heʼívare (Prov. 24:3, 4). Jaipuru porãkena umi puvlikasión bíblica. Umíva ohechauka ñandéve mbaʼéichapa ikatu jasegi umi konsého oĩva la Bíbliape. Por ehémplo umi artíkulo osẽva jepi hérava “Ayuda para las familias”, ikatu oipytyvõ umi omendávape, umi tuakuérape ha umi mitãrusukuérape ombohovái hag̃ua umi provléma ohasáva koʼág̃arupi. b Jajedesidíkena jasegitaha umi konsého oĩva la Bíbliape umi ótro ñande rogaygua ndojapóiramo jepe upéva. Jajapóramo péicha, ñane família oho porãta hese ha Jehová ñanevendesíta (1 Ped. 3:1, 2).

8. ¿Mbaʼéichapa ikatu ñañeñandu umi mbaʼe jadesidívare?

⁸ Ñañerresponsavilisa umi mbaʼe jadesidívare. Jehová ningo omeʼẽ ñandéve la liverta jadesidi hag̃ua la jajapótava ha oipota javyʼa jadesidi porã haguére. Péro jadesidi vai jave haʼe ndoipeʼái ñandehegui umi konsekuénsia ñanderupytýva (Gál. 6:7, 8). Upévare ñande ñañerresponsavilisa jadesidi vaíramo térã jaʼe ha jajapóramo álgo ñapensa porãʼỹre. Oimérõ jajapo raʼe álgo naiporãiva ñane konsiénsia  ikatu ñandestorva. Péro ñande jaikuaa káda uno ñaĩha rresponsávle la jadesidívare ha upéva ikatu ñanemomýi ñamombeʼu hag̃ua japeka hague, jakorrehi hag̃ua jajavy haguépe ha anivéma hag̃ua jajapo jey upéva. Jajapóramo koʼã mbaʼe ikatúta jasegi jadipara pe karréra jaikove hag̃ua pára siémpre.

9. ¿Mbaʼépa ikatu jajapo oiméramo jadesidi vai raʼe? (Ehecha pe taʼanga).

⁹ ¿Mbaʼéichapa ikatu jagueraha ko kárga? Oiméramo jadesidi vaíma raʼe, ¿mbaʼépa ikatu jajapo? Ñarrekonose vaʼerã ndaikatuiha ñakambia la oikóma vaʼekue. Ani japerde rei ñane tiémpo jajekulpávo ñandejupe térã ótrope o jahechaukaségui mbaʼérepa jadesidi raʼe upéva. Síno jaasepta vaʼerã jajavy hague ha jajapo la ikatúva guive jaservi porã jey hag̃ua Jehovápe. Oiméramo ñañeñandu vai peteĩ mbaʼe jajapo vaʼekuére, ñañemboʼe Jehovápe, ñarrekonose jajavy hague ha jajerure chupe tañaneperdonami (Sal. 25:11; 51:3, 4). Jajerure perdón umi persóna jafalla vaʼekuépe ha tekotevẽramo jajerure umi ansianokuérape ñanepytyvõ hag̃ua (Sant. 5:14, 15). Ñaaprende ñande fállagui ha ñañehaʼãmbaite ani hag̃ua jajapo jey upéva. Jajapóramo koʼã mbaʼe ikatu ñaĩ segúro Jehová ñandeporiahuverekotaha ha ñanepytyvõtaha ñaikotevẽhápe (Sal. 103:8-13).

10. ¿Mbaʼérepa ipohýita ñandéve g̃uarã jajaposéramo álgo ndaikatumoʼãiva jahupyty? (Gálatas 6:4).

¹⁰ Jajaposéramo álgo ndaikatumoʼãiva jahupyty. Jaikóramo ñañekompara ótrore ha jajapose la haʼekuéra ojapóva, ñañeñandu vaíta (elee Gálatas 6:4). Ikatu jaju ñakompeti ha ñaneenvidióso (Gál. 5:26). Ñañehaʼãramo jajapo la ótro ojapóva ñande posivilida nomeʼẽiramo jepe ñandéve, ikatu jaju jajeperhudika ñandejupe voi. “Ñanemokorasõ rasy ningo otarda jave álgo ñahaʼarõitereíva” ha koʼytevéntema ñanemokangýta oiméramo ñahaʼarõ álgo núnka ndajahupytymoʼãiva (Prov. 13:12). Oikóramo ñanderehe upéicha ikatu jaju ñanekaneʼõiterei ha ñandejoko jadipara hag̃ua pe karréra jaikove hag̃ua pára siémpre (Prov. 24:10).

11. ¿Mbaʼépa ikatu ñanepytyvõ ani hag̃ua jajaposeve la ikatúvagui?

¹¹ ¿Mbaʼéichapa ikatu jaipeʼa ñandejehegui ko kárga? Ani jajapose umi mbaʼe Jehová nohaʼarõiva ñandehegui. Haʼe núnka ndojeruremoʼãi ñandéve jajapo hag̃ua álgo ndaikatumoʼãiva (2 Cor. 8:12). Ikatu ñaime segúro Jehová nokomparaiha umi mbaʼe ñande jajapóva umi ótro ojapóvare (Mat. 25:20-23). Haʼe ningo omombaʼeterei jaservi haguére chupe ñande pyʼaite guive, ñandefiél ha ñaneaguánte haguére. Ñaneumíldekena ha jaasepta ndaikatumoʼãiha jajapo opa mbaʼe jajaposéva ñandeeda rupi, ñanderasykatu rupi térã ñane situasión káusare. Iporãta jasegíramo Barzilái ehémplo, ha anínte jaasepta peteĩ rresponsavilida ndaikatumoʼãiva ñakumpli ñandeeda térã ñanderasykatu rupi (2 Sam. 19:35, 36). Avei Moisés ojapo haguéicha, jaasepta ajúda ha opyta porã jave ñameʼẽ ótrope umi rresponsavilida (Éx. 18:21, 22). Ñaneumílderamo ndajaikomoʼãi jajapose umi mbaʼe ndaikatúiva jajapo ha péicha nañanekaneʼõmoʼãi ko karrérape.

12. ¿Iporãpa jajekulpa ótro odesidi vai haguére? Emyesakã.

¹² Ñañandúramo ótro odesidi vai hague ñande kúlpare. Ñande ndaikatúi jadesidi ótro rehehápe, ha ndaikatúi japrotehe chupekuéra umi mbaʼe ikatúvare ohasa odesidi vai haguére. Tuakuéra, oiméramo peteĩva pene família ou oheja raʼe Jehovápe, upéva oiméne hasyeterei peẽme. Péro pejekulpáramo pene família odesidi vai haguére, pejagarra hína peteĩ  kárga ipohyietereíva Jehová nohaʼarõiva pegueraha (Rom. 14:12).

13. ¿Mbaʼépa ikatu ojapo umi tuakuéra ifamília odesidi vaíramo?

¹³ ¿Mbaʼéichapa ikatu jaipeʼa ñandejehegui ko kárga? Tuakuéra, penemanduʼákena Jehová omeʼẽ hague káda únope la liverta odesidi hag̃ua. Upévare káda persóna odesidi vaʼerã oservítapa chupe térãpa nahániri. Jehová ningo oikuaa peẽ ndahaʼeiha perfékto, haʼe oipotánte peñehaʼãmbaite pemongakuaa porã pene famíliape. Péro pene família rresponsavilida hína umi mbaʼe odesidíva ha ndotokavéima peẽme (Prov. 20:11). Upéicharõ jepe, ikatu pesegi pepensa pefalla hague álgope pehekomboʼe lájape pene famíliape. Oimérõ upéicha, pemombeʼu Jehovápe mbaʼéichapa peñeñandu ha pejerure chupe tapeneperdona. Haʼe oikuaa ndaikatuveimaha pekambia la yma oiko vaʼekue. Jehová nohaʼarõi avei peẽ peprotehe pene famíliape umi mbaʼe vai ikatúvagui ohupyty chupekuéra odesidi vai haguére. Péro ani penderesarái oñehaʼãramo oñemoag̃ui jey Jehováre, haʼe orresivitaha pene famíliape vyʼapópe (Luc. 15:18-20).

14. ¿Mbaʼérepa ndovaléi jajekulpa rasa?

¹⁴ Jaiko jajekulpaháre. Oiméramo japeka raʼe ñañeñandutánte voi kulpávle péro Jehová ndoipotái jaiko jajekulpaháre. Upéva hína peteĩ kárga jaipeʼa vaʼerã ñandejehegui. ¿Mbaʼéichapa ikatu jaikuaa noiméipa jajekulpa rasáma? Oiméramo ñamombeʼúma la ñande pekádo, ñañarrepentíma ha jajapo ikatúva guive ani hag̃ua jaʼa jey upévape, ñaimekuaa segúro Jehová ñaneperdonáma hague (Hech. 3:19). Jajapo rire koʼã mbaʼe Jehová ndoipotavéima jasegi jajekulpa pórke haʼe oikuaa upéva ikatuha ñandeperhudika (Sal. 31:10). Jajúramo ñañembyasyeterei ikatu hína ñañentrega ha jaheja pe karréra jaikove hag̃ua pára siémpre (2 Cor. 2:7).

15. ¿Mbaʼépa ikatu ñanepytyvõ oimérõ jasegi jajekulpa la jajapo vaʼekuére? (1 Juan 3:19, 20). (Ehecha pe taʼanga).

¹⁵ ¿Mbaʼéichapa ikatu jaipeʼa ñandejehegui  ko kárga? Oiméramo jasegi jajekulpa la jajapo vaʼekuére, ñapensa meme vaʼerã Jehová ‘oporoperdonakuaaitereiha’ (Sal. 130:4). Jehová opromete umi oñarrepentívape ipyʼaite guive: ‘Nachemanduʼamoʼãvéima pende pekadokuérare’ (Jer. 31:34). Upéva heʼise Jehová nopensaveimaha umi pekádo operdonáma vaʼekuére. Ha oimérõ jahasa asy hína jajavy haguére, aníkena ñapensa upéva ohechaukaha Jehová nañaneperdonái hague. Avei ani ñarrenega ñandejehe oimérõ japerde raʼe algún priviléhio térã rresponsavilida kongregasiónpe. Jehová ndosegíri opensa ñande pekadokuérare ha ñande avei ndovaléi jajapo upéva (elee 1 Juan 3:19, 20).

16. ¿Mbaʼépa tekotevẽ jahechakuaa jadipara aja pe karréra?

¹⁶ Jadipara aja pe karréra jaikove hag̃ua pára siémpre, ‘jadipara vaʼerã ñagana hag̃uáicha pe prémio’ (1 Cor. 9:24). Upearã jahechakuaa vaʼerã mbaʼeichaguápa umi kárga okorrespondéva ñandéve jaraha ha umi natekotevẽiva. Ko artíkulope ñaanalisa kuri unos kuánto ehémplo ohechaukáva ñandéve upéva. Péro oĩve hína umi kárga ñamboyke vaʼerã. Jesús heʼi vaʼekue voi ‘ani hag̃ua núnka jaiko jakaru rasa, ñamokõ rasa térã ñañekevrantaiterei umi mbaʼe ñaikotevẽvare’ (Luc. 21:34). Kóva ha ótro téxto oĩva la Bíbliape ikatu ñanepytyvõ jahechakuaa hag̃ua mbaʼépepa ñakambia vaʼerã jasegi hag̃ua jadipara pe karréra jaikove hag̃ua pára siémpre.

17. ¿Mbaʼérepa ñaimekuaa segúro ñaganataha pe karréra?

¹⁷ Ikatu ñaime segúro ñamohuʼãtaha pe karréra jaikove hag̃ua pára siémpre pórke Jehová ñanemombaretéta upearã (Is. 40:29-31). Upévare aníkena jaheja mbaʼeve ñandejoko ha jasegi apóstol Pablo ehémplo. Haʼe ningo ojapo vaʼekue ikatúva guive ogana hag̃ua pe prémio (Filip. 3:13, 14). Ndaikatúi ningo ótro odipara ñande vése ko karréra, péro Jehová ikatu ñanepytyvõ ñagana hag̃ua. Haʼe ñandeajudáta jagueraha hag̃ua umi kárga okorrespondéva ñandéve ha jaipeʼa hag̃ua ñandejehegui umi natekotevẽiva (Sal. 68:19). Ani jaduda Jehová rupive ikatuha ñaaguanta ko karrérape ha ñagana.