• “Añeñandu che ména chemoakãratĩramoguáicha heta vése”.

• “Apensa ndavaleiha mbaʼeverã, nacheporãiha che ménape g̃uarã ha añeñandu yvýre”.

• “Asufri cheañoite ha avave ndoikuaáigui la oikóva ndaipóri chekonsola vaʼerã”.

• “Haʼete chéve Jehová ndoikuaaséiva chehegui mbaʼeve”.

Koʼã mbaʼe heʼi peteĩ tembireko, ha péva ohechauka mbaʼéichapa osufri peteĩ tembireko iména ohecháramo pornografía. Ha oimérõ pe ména ojapo oikóvo upéva kañyháme unos kuánto mésere térã áñore, hembireko ikatu ou nokonfiavéi hese. Peteĩ tembireko heʼi voi: “Ndaikuaavéima mbaʼeichaguápa añetehápe che ména ha añeporandu mbaʼe ótra kósapa oiméne omokañy hína chehegui”.

Ko artíkulo ojeprepara umi tembirekokuérape g̃uarã orekóva iména ohecháva pornografía. a Ñaanalisáta jahávo umi téxto bíblico okonsolátava umi tembirekokuérape. Jahecháta mbaʼérepa pe tembireko ikatu oĩ segúra Jehová ohayhuha chupe ha avei mbaʼéichapa ikatu ipyʼaguapy ha osegi oñemoag̃ui Jehováre. b

Siérto ningo, nde ndaikatúi rekontrola ha redomina entéro mbaʼe ojapóva ne ména. Péro oĩ kósa ikatúva rejapo ndepyʼaguapyve hag̃ua. Jahechamína umíva.

Ani rejekulpa. Peteĩ tembireko ikatu ou opensa haʼe ofalla hague álgope ha upévare iména ohechaha pornografía. Por ehémplo Alicia c omombeʼu opensaha ijehe naiporãiha iménape g̃uarã ha upévare omañaseha ótro kuñáre. Umi tembireko oñeñandu vai jepi la oikóvare ha oĩ umi ojekulpa jeýva upévare ha oimoʼãva haʼe ombyaiveha la situasión. Daniela heʼi: “Aju arrenega ha chepochy la oikóvare, ha upéi apensa añeñandu haguére upéicha la ore situasión ivaiveha ohóvo”.

Oimérõ nde reñeñandu péicha, iporã ereko enkuénta Jehová nopensaiha nde reĩha rresponsávle la ne ména ojapóvare. Santiago 1:14 heʼi: “Káda  únope ojeprova, ohejávo omoñuhã chupe umi mbaʼe ojaposéva ha umi deséo orekóva” (Rom. 14:12; Filip. 2:12). Aníkena nderesarái Jehová nandekulpaiha ndéve la oikóvare. Upéva rangue ndevaloraiterei resegi haguére neñeʼẽrendu chupe (2 Crón. 16:9).

Ne ména ohecháramo pornografía ndeʼiséi nde naneporãiha térã nerekumpliriha hína hendive. Umi ostudiáva ko témare oexplika voi umi ohecháva pornografía ouha itavyete pe séxore ha ndaiporiha kuña okontenta vaʼerã chupe.

Eñehaʼã ani eñekevrantaiterei. Caterine heʼi ndaikatuiha oipeʼa iñakãgui la iména ohechaha pornografía. Francisca omombeʼu avei: “Ndaikuaáirõ hína moõpa oĩ che ména ajedesespera”. Ótro tembireko katu heʼi otĩetereiha oĩ jave umi ermáno oikuaávandi la iména ohechaha pornografía, ha ótro tembireko omombeʼu oñeñanduha haʼeñoiterei pórke opensa avave nontendeiha la ohasáva.

La reñeñandu péicha ningo normál, péro repytáramo tódo el tiémpo repensa la oikóvare reñeñandu vaivéta. Upéva rangue ikuentavéta remombarete ne amista Jehovándi, pórke upéva nepytyvõta resegi hag̃ua reaguanta (Sal. 62:2; Efes. 6:10).

La Biblia oñeʼẽ unos kuánto kuña yma guarére osufrieterei vaʼekue, péro haʼekuéra tuicha konsuélo otopa oñemboʼévo Jehovápe. Katuete ningo ndéve nepytyvõta releérõ koʼã istória ha rejepyʼamongetárõ hese. Koʼã rreláto ohechauka Jehová nosolusionaiha katuete la iprovlemakuéra péro ombopyʼaguapy chupekuéra. Por ehémplo “Ana ningo oñamargaite” vaʼekue la isituasiónre, péro “oñemboʼe are” rire Jehovápe tuicha oñetrankilisa ndoikuaáiramo jepe mbaʼépa ohaʼarõ chupe (1 Sam. 1:10, 12, 18; 2 Cor. 1:3, 4).

Ejerure umi ansianokuérape tanepytyvõ. Haʼekuéra haʼetéta ndéve g̃uarã ‘peteĩ lugár ikatuhápe reñemoʼã yvytu atãgui ha peteĩ lugár ikatuhápe rekañy ama ha torménta vaígui’ (Is. 32:2). Umi ansiáno ikatu orrekomenda ndéve peteĩ ermána de konfiánsa ikatu vaʼerãndi reñemongeta la oikóvare haʼe nekonsola hag̃ua (Prov. 17:17).

¿Ikatúpa reipytyvõ ne ménape oheja hag̃ua ivísio ha ndohechavéi pornografía? Ikatu hína. La Biblia heʼi voi ‘mokõi iporãveha peteĩgui’ ñasolusionase jave peteĩ provléma térã ñandepuʼaka hag̃ua peteĩ enemígo ipoderósovare (Ecl. 4:9-12). Oĩ investigasión ohechaukáva avei peteĩ matrimónio  olucháramo oñondive, pe ména ikatuha opoi ko vísiogui ha hembireko ikatu okonfia jey hese.

Tuicha ningo odepende ne ménare. Haʼe la ndohechasevéi vaʼerã pornografía ha ojedesidiete ombaʼapo jejopytaha oheja hag̃ua ko vísio. Epensamína, ¿ojerure asýmapa Jehovápe omombarete hag̃ua chupe ha ohómapa umi ansiáno rendápe ojerure hag̃ua ajúda? (2 Cor. 4:7; Sant. 5:14, 15). ¿Ohechámapa mbaʼe mbaʼépa tekotevẽ ojapo? Por ehémplo, ¿okalkulámapa ne ména mbaʼéichapa ojeíta umi situasión ipeligrósovagui chupe g̃uarã? ¿Ojedesidímapa oipuru saʼivetaha iselulár, ikomputadóra ha umícha? (Prov. 27:12). ¿Oaseptápa haʼe nde reipytyvõ chupe ha isinséro porãpa nendive? Oimérõ ne ména ojapo hína koʼã mbaʼe nde ikatúta reipytyvõ chupe.

¿Mbaʼéichapa nde ikatu rejapo upéva? Jahechamína Felicia ha Iván káso. Iván oñenvisia vaʼekue pe pornografíare imitãʼi guive. Iván heʼi ifasilha chupe oñeʼẽ Felicia ndive káda ke ohechaseterei jey pe pornografía. Iván omombeʼu: “Chesinséro porã che rembirekóndi ha haʼe mborayhúpe chepytyvõ ajei hag̃ua umi tentasióngui. Pyʼỹinte oporandu chéve mbaʼéichapa aha hese ha oñatende cherehe ani hag̃ua aipurueterei Internet”. Jaikuaa ningo Felíciare ojapo vaiha oikuaávo iména ohechaseha pornografía, péro haʼe heʼi: “Aikónterõ chepochy ha añeñandu vai naipytyvõmoʼãi chupe oheja hag̃ua ivísio. Ha roñemongetapa rire isituasiónre haʼe avei chepytyvõ anivéma hag̃ua añeñandu yvýre”.

Umi omendáva ojepokuaárõ péicha oñemongeta oñondive, pe ménape ifasilvéta oheja hag̃ua pe pornografía ha pe tembireko katu okonfia jeýta hese. Pe ména oñeʼẽramo sinséramente hembirekóndi pe provlémare, omombeʼúrõ chupe umi mbaʼe ojapóva káda día ha moõpa ohóta, hembirekópe ifasilvéta ojerovia hag̃ua hese pórke oikuaa iména nomokañyiha chugui mbaʼeve.

¿Ndépa repensa ikatuha avei reipytyvõ péicha ne ménape? Oimérõ upéicha ikatu peanalisa oñondive ko artíkulo. Ne ména ohejase vaʼerã la ivísio ha ohechauka vaʼerã ndéve ikatuha rejerovia jey hese. Ipochy rangue reñeʼẽse haguére ko situasiónre, haʼe oñehaʼã vaʼerã ontende mbaʼéichapa reñeñandu ko provléma káusare. Nde reapoja vaʼerã chupe umi mbaʼe ojapóvape anivéma hag̃ua ohecha pornografía ha remeʼẽ vaʼerã ne ménape pe oportunida ohechauka hag̃ua ndéve ikatuha rekonfia jey hese. Mokõivévante pentende porã vaʼerã mbaʼéicha rupípa umi hénte oñepyrũ ohecha pornografía ha mbaʼéichapa ikatu oñesolusiona ko provléma. d

 Ikatu oime rekyhyje pendepochy vaíramo g̃uarã peñeʼẽvo ko témare. Oimérõ péicha, ikatu ejerure peteĩ ansiánope pejepokuaávare oĩ hag̃ua penendive peñemongeta aja. Iporã reikuaa ne ména osuperáramo jepe la ivísio ikatuha ohasa heta tiémpo nde rejerovia jey hag̃ua hese. Ani reñentrega, eñehaʼã ehechakuaa ha evalora umi mbaʼe porã pehupytýva michĩramo jepe. Aníke eperde la esperánsa mokõivéva penepasiénsiarõ, kon el tiémpo pene matrimónio oĩ porã jeytaha (Ecl. 7:8; 1 Cor. 13:4).

Ikatu oime la ne ména heta tiémporema ndohechavéi raʼe oikóvo pornografía, péro upeichahágui ou jey ohecha. ¿Heʼisépa upéva naipohãveimaha ha ndohejamoʼãiha voi? Ndahaʼéi péicha katuete. Añetehápe oimérõ haʼe oñenvisiáma raʼe, olucháta hína oikove aja pukukue ko vísio kóntrape. Ikatu hína hoʼa jey ko ñuhãme oiméramo jepe heta tiémporema ndohechavéi pornografía. Ani hag̃ua oiko jey hese upéva, ojapo vaʼerã hetave mbaʼe ojeprotehe hag̃ua ha osegi vaʼerã olucha haʼetéramo jepe osuperámava ko provléma (Prov. 28:14; Mat. 5:29; 1 Cor. 10:12). Ne ména oñehaʼã vaʼerã ‘osegi ombopyahu opensa lája’ ha ‘ndochaʼéi vaʼerã umi mbaʼe ivaívare’, umíva apytépe pe pornografíare ha entéro umi ótro kostúmbre kyʼáre, por ehémplo oimérõ ojejavyky térã oñemasturva (Efes. 4:23; Sal. 97:10; Rom. 12:9). ¿Ogerreápa haʼe anivéma hag̃ua ohecha pornografía? Oimérõ upéicha ikatu hína kon el tiémpo ohejaite ko vísio. e

¿Ha mbaʼépa oikóta oimérõ ne ména noñehaʼãséi osupera hag̃ua ko provléma? Oimérõ upéicha ikatu eñeñandu vai ha pyʼỹinte ndepochy ha reñandu reñetraisionaha. Péro eñehaʼãkena eheja Jehová pópe ko situasión ikatu hag̃uáicha ndepyʼaguapy jey (1 Ped. 5:7). Esegi estudia, ejepyʼamongeta ha eñemboʼe ikatu hag̃uáicha reñemoag̃uive Jehováre. Rejapóvo upéva ani reduda haʼe oĩha nde ykére. La Biblia heʼi voi Isaías 57:15-pe Jehová oĩha “umi hénte iñumíldevandi ha umi oñeñandúvandi yvýre” oipytyvõ hag̃ua chupekuéra ovyʼa jey hag̃ua. Eñehaʼã ejapo iporãveháicha umi mbaʼe Jehová ohaʼarõva ndehegui. Ejerure umi ansiánope tanepytyvõ ha ani eperde la esperánsa amo gotyove ne ména ikatuha okambia (Rom. 2:4; 2 Ped. 3:9).