ÓTRA vuéltape, pe kuñakarai ojaʼo vaipaite jey chupe. ¿Mbaʼépa ojapo Toñi? Haʼe omombeʼu: “Ijetuʼueterei ningo chéve upe moméntope, hiʼarive che ndajapói hese mbaʼevete asy”. Upéicharõ jepe, Toñi ojediskulpa jeýnte ha heʼi pe kuñakaraípe ontendeha chupe, ha ohechakuaa ohasaha peteĩ situasión ijetuʼúva.

Reimérire Toñi lugárpe, ¿mbaʼéichapa rerreaksiona vaʼerãmoʼã? ¿Reñehaʼãtapa kuri reñekalma ha erresponde porã? ¿Ijetuʼútapa ndéve rejejoko hag̃ua? Jaikuaaháicha, hasy ñañekontrola hag̃ua péicha jave. Oĩramo ñandetrata vaíva térã ñaimérõ peteĩ situasión ijetuʼúvape, hasyeterei ñandepyʼaguapy hag̃ua.

Péro la Biblia ñanemokyreʼỹ akóinte ñandepyʼaguapy hag̃ua. Heʼi voi ñanetrankílo ha ñanderorýramo, ñanearanduha. Santiago 3:13 heʼi: “¿Mávapa iñarandu ha ontende heta mbaʼe pende apytépe? Péva hekoporã vaʼerã ikatu hag̃uáicha ohechauka ojapoha opa mbaʼe pyʼaporãme iñarandu rupi”. ¿Mbaʼérepa jaʼekuaa ñañeʼẽramo pyʼaguapýpe jahechaukaha pe arandu oúva Ñandejáragui? ¿Mbaʼépa ñanepytyvõta jahupyty hag̃ua upéva?

Okalma pe situasión. Proverbios 15:1 heʼi: “Pe persóna orrespondéva pyʼaguapýpe, ombohasaite pe pochy, péro pe orresponde vaíva, ombopochyve rei hapichápe” (TNM).

Ñarreaksiona vaíramo haʼetéta ñambyaivéva la káva raity (Prov. 26:21). Péro ñarreaksiona porãramo ikatu omehora la situasión, ha pe persóna ipochýva ikatu voi oñekalma.

Toñi ohechakuaa siertoha upéva. Haʼe norreaksionavaíri rupi, pe kuñakarai oñepyrũ hasẽ. Upéi oexplika Tóñipe hetaiterei iprovlemaha haʼe ha ifamília, ha koʼã mbaʼe ipohyietereiha chupe. Toñi oaprovecha opredika hag̃ua chupe ha oñepyrũ ostudia hendive la Biblia. Péicha jahecha iñimportantetereiha ñandepyʼaguapy.

Ñanembovyʼa. Mateo 5:5 heʼi: “Ovyʼa umi ndaipochyreíriva, Ñandejára omeʼẽta chupekuéra ko yvy”.

Heta persóna ivioléntova ou okambia ha ipyʼaguapyve, upévare koʼág̃a ovyʼave. Por ehémplo, koʼág̃a oiko trankilove ha oikuaa ohaʼarõha chupekuéra heta mbaʼe porã (Col. 3:12). Peteĩ superintendénte de sirkuíto oikóva Espáñape, hérava Adolfo ojapo upeichagua kámbio. Jahechamína mbaʼéichapa oiko vaʼekue upe mboyve.

Adolfo omombeʼu: “Naisentídoi kuri chéve la che rekove. Che ningo ajekreeterei vaʼekue, cheviolénto ha ndajejokokuaaiete voi, upévare algúno che amigokuéra oñemondýi voi ohechávo mbaʼéichapa arreaksiona. Péro upéi oiko peteĩ mbaʼe chemopensáva. Peteĩ ñorairõhápe chekutu hikuái 6 puñaláda. Añepyrũ aperde hetaiterei tuguy, ha aimetete amano”.

Koʼág̃arupi Adolfo omokyreʼỹ enterovépe oñehaʼã hag̃ua ipyʼaguapy, ha avei oñehaʼã omoĩ ehémplo porã. Haʼe iñamávle ha ikariñóso, upévare heta persóna oĩse voi hendive. Umi kámbio ojapóva ombovyʼaiterei chupe, ha oagradese Jehovápe oipytyvõ haguére chupe ponove iviolénto.

Ñambovyʼa Jehovápe. Proverbios 27:11 heʼi: “Nearandúkena che raʼy, ha embovyʼa che korasõ, péicha ikatúta ambohovái upe oñeʼẽ vaívape cherehe” (TNM).

Satanás ningo oñehaʼã opáicha rei ikatu hag̃uáicha ombopochy Jehovápe. Upéicharõ jepe, la Biblia heʼi Jehová ndaipochyreiriha (Éx. 34:6). Ñañehaʼã jave jasegi Jehová ehémplo ha ñandepyʼaguapy, jahechauka ñanearanduha ha upéva ombopyʼarory chupe (Efes. 5:1).

Amáske jaha hese, umi hénte “oñembotuicháta, ijejapóta, otakýta hapicháre, [...] okopíta ótrore, ndojejokokuaamoʼãi [ha] oñemboharáita hapicháre” (2 Tim. 3:2, 3). Péro upéva ndeʼiséi ñañehaʼãreitaha ñandepyʼaguapy. La Biblia heʼi “pe persóna orekóva arandu oúva yvágagui”, ipyʼaguapy ha noñemohatãiha haʼe heʼívapente (Sant. 3:17). Ñandepyʼaguapýramo ha ndajaikói ñañemohatã la jaʼévapente, jahechaukáta jarekoha pe arandu oúva Ñandejáragui. Ha oĩ jave ñandetrata vaíva, ñarrespondéta pyʼaguapýpe porãnte. Péicha, ára koʼẽre ñañemoag̃uivéta Ñandejára iñaranduetévare, Jehová.