1, 2. a) ¿Mbaʼépa ikatu jaʼe pe mborayhu ha pe fére? b) ¿Mbaʼe porandúpa ñambohováita ko artíkulope?

ÑANDE Ru Jehová opromete ovendesitaha isiervokuéra iñeʼẽrendúvape. Péicha haʼe ohechauka ñanderayhuha, ha ñande avei jahayhu chupe “haʼe raẽve ñanderayhu rupi” (1 Juan 4:19). Amáske jahayhu Jehovápe jajeroviave hese, ha jaikuaa porã haʼe opremiaha umi ohayhúvape chupe (elee Hebreos 11:6).

² Jehová ningo orrekompensa isiervokuérape. Upéva haʼe peteĩ kualida iporãitereíva haʼe orekóva. Iñimportanteterei jajerovia Jehováre ñane korasõ mbytete guive. La Biblia heʼi mbaʼépa heʼise pe fe: “Heʼise jagueroviaha pyʼamokõiʼỹre oikotaha katuete umi mbaʼe ñahaʼarõva” (Heb. 11:1). Jahechaháicha, jajerovia Jehováre heʼise ndajadudaiha ni michĩmi haʼe katuete ovendesitaha umi ifiélvape chupe. Péro, ¿ou porãpa ñandéve ñahaʼarõ peteĩ rrekompénsa? ¿Mbaʼéichapa Jehová koʼág̃ama voi opremia isiervokuéra ifiélvape, ha mbaʼéichapa ojapóta upéva amo gotyove? Jahechamína koʼã mbaʼe.

3. ¿Mbaʼe promésapa jatopa Malaquías 3:10-pe?

³ Jehová opromete opremiataha isiervokuéra iñeʼẽrendúvape,  ha oipota ñañehaʼãmbaite jahupyty ivendisión. Malaquías 3:10 heʼi: “Pejeroviántena cherehe [...] ha pehecháta mbaʼéichapa yvága guive ahykuavo pende ári heta mbaʼe porã, ndofaltavéi peve peẽme mbaʼevete” (TNM). Jaasepta jave ko invitasión ojapóva ñandéve, jahechauka jaagradeseha chupe ñande pyʼaite guive.

4. ¿Mbaʼérepa jajeroviakuaa Mateo 6:33 heʼívare?

⁴ Jesús opromete vaʼekue idisipulokuérape omotenondéramo hikuái Ñandejára Rréino, Jehová oipytyvõtaha chupekuéra (elee Mateo 6:33). Haʼe oikuaa porã Itúa katuete okumpliha ipromésa (Is. 55:11). Ñande avei ñakonfiáramo Jehováre ñane korasõite guive, haʼe katuete okumplíta ipalávra. La Biblia heʼi mbaʼépa ojapóta: “Arakaʼeve ndorohejamoʼãi ha arakaʼeve noromotyreʼỹmoʼãi” (Heb. 13:5). Ko promésa ñanepytyvõ jajerovia hag̃ua Jesús heʼi vaʼekuére idisipulokuérape.

5. ¿Mbaʼérepa omombarete ñande jerovia Jesús heʼi vaʼekue Pédrope?

⁵ Peteĩ vuéltape apóstol Pedro oporandu Jesúspe: “Ore ningo rohejapaite opa mbaʼe ha romoirũ. ¿Mbaʼépa rohupytýta upévare?” (Mat. 19:27). Jesús ndokorrehíri Pédrope oporandu haguére upéva, síno heʼi oñepremiataha chupekuéra ojesakrifika haguére. ¿Mbaʼépa ohupytýta hikuái? Umi apóstol ha ambue Ñandejára siérvo iñeʼẽrendúva ogovernáta Jesúsndi yvágape. Péro heʼi avei oñerrekompensataha umi siérvo fiél koʼag̃aguápe. Jesús heʼi: “Opavave oheja vaʼekue hóga, iñermáno ha iñermanakuéra, isy ha itúva, itaʼyrakuérape térã ijyvy, che réra rehehápe, chupekuéra oñemeʼẽta hetaitereive upe oheja vaʼekuégui, ha ohupytýta jeikove opaveʼỹva” (Mat. 19:29). Entéro  omoirũva Jesúspe, jaʼe porãsérõ g̃uarã otopáta kongregasiónpe túa, sy, ermáno, ermána, taʼýra ha tajýra. Ha jaikuaaháicha, upéva tuichave mbaʼe oimeraẽ sakrifísio ikatu vaʼerãgui ojejapo Ñandejára Rréino rehehápe.

6. ¿Mbaʼéichapa ñanepytyvõ Jehová promésa?

⁶ Koʼág̃ama voi javyʼa jarresivi haguére heta vendisión, ha tenonde gotyove katu jahupytýta umi mbaʼe porã ndaijojaháiva. Koʼã mbaʼe ñanembovyʼavétantema (1 Tim. 4:8). Jehová opromete orrekompensataha isiervokuéra ifiélvape. Ko garantía ñanepytyvõ jagueropuʼaka hag̃ua umi pruéva ijetuʼuetéva. Ndajadudáiramo ni michĩmi haʼe “omyengovia porãha umi oñehaʼãvape ipyʼaite guive ojapo hembipota”, ikatúta ñandefiél chupe (Heb. 11:6).

7. ¿Mbaʼéicha rupípa ikatu ñakompara ñane esperánsa peteĩ ánklare?

⁷ Jesús ojapórõ guare pe Sermón del Mónte, heʼi vaʼekue: “Pendepyʼarory ha pevyʼaitereíkena péicha jave, ha penemanduʼa yvágape oĩha peteĩ rregálo tuichaitereíva peẽme g̃uarã. Penemanduʼa avei yma upéicha ojepersegi hague umi profétape” (Mat. 5:12). Unos kuánto Ñandejára siérvo orresivi pe prémio oho hag̃ua yvágape. Ha hetápe oñepremiáta avei ojehejávo oiko opa árare ko yvy ape ári peteĩ paraísope. Ndareíri Jesús heʼi vaʼekue “pendepyʼarory ha pevyʼaitereíkena” (Sal. 37:11; Luc. 18:30). Tahaʼe haʼéva ñane esperánsa, oiméne jahechakuaa haʼeteha “peteĩ ánkla ñande rekovépe g̃uarã, oĩ hatãva ha ikatúva jajerovia hese” (Heb. 6:17-20). Pe ánkla ningo tuichaiterei oipytyvõ pe várkope ani hag̃ua pe torménta oraha vaipa térã ohundi chupe. Péicha avei, ñane esperánsa tuichaiterei ñanepytyvõ, pórke ñanemombarete ñaaguanta hag̃ua umi mbaʼe ijetuʼuetéva.

8. ¿Mbaʼérepa jaʼekuaa pe esperánsa ikatuha ombovevýi ñane kevránto?

⁸ Ñane esperánsa ombovevýi umi kevránto. Haʼete avei peteĩ pohã jajepichyha oaliviáva pe mbaʼasy. Péicha avei, Ñandejára promésa omeʼẽ ñandéve trankilida. ¡Ajépa tuichaite ñandevevýi jahejávo Jehová pópe umi mbaʼe pohýi ñandepyʼapýva! (Sal. 55:22). Ñande ñaĩ segúro Jehová ojapotaha “hetaitereive mbaʼe jajerure térã ñaimoʼãvagui” (Efes. 3:20). Jahechaháicha, haʼe noprometéi ojapotaha heta mbaʼe ñanepytyvõ hag̃ua, síno “hetaitereive mbaʼe jajerure térã ñaimoʼãvagui”.

9. ¿Mbaʼérepa ñai segúro Jehová ñanevendesitaha?

⁹ Jarresivi hag̃ua pe prémio Jehová oprometéva, jajerovia vaʼerã hese ñanekorasõ mbytete guive ha ñaneñeʼẽrendu chupe. Moisés heʼi vaʼekue umi israelítape: “Jehová katuete penevendesíta pe yvy Jehová pende Jára omeʼẽvape peẽme penembaʼerã. Péro upearã pejapopaite vaʼerã opa mbaʼe Jehová pende Jára heʼíva peẽme, ha pekumplipaite vaʼerã koʼã mandamiénto ameʼẽva peẽme koestedía. Jehová pende Jára penevendesíta oprometéma haguéicha peẽme” (Deut. 15:4-6, TNM). ¿Ndépa reĩ segúro Jehová nevendesitaha resegíramo reservi chupe fiélmente? ¡Ajépa ni michĩmi ndajadudái upévagui!

10, 11. ¿Mbaʼéichapa Jehová opremia Josépe?

¹⁰ La Biblia ojehai vaʼekue ñañevenefisia hag̃ua chugui. Pype jatopa heta ehémplo ohechaukáva mbaʼéichapa Jehová opremia isiervokuéra yma guarépe (Rom. 15:4). José ehémplo ohechauka porãiterei upéva. Ñepyrũrã, iñermanokuéra ovende chupe kómo esklávo. Upéi, ipatrón rembireko okulpa chupe peteĩ mbaʼe ndojapói vaʼekuére, ha oñemoinge chupe kárselpe Egíptope.  ¿Ikatúpa jaʼe Jehová oheja hague Josépe oĩ aja kárselpe? ¡Ni mbaʼevéicharõ! La Biblia heʼi: “Jehová osegi oipytyvõ Josépe ha ohechauka ohayhuha chupe ha ojeroviaha hese”. Avei heʼi: “Jehová oĩ José ndive ha Jehová oipytyvõ chupe osẽ porãmba hag̃ua opa mbaʼe ojapóva” (Gén. 39:21, 23, TNM). Haʼe ohasa aja umi tiémpo ijetuʼuetéva, ipasiénsia ha okonfia Jehováre.

¹¹ Unos kuánto áño upe rire, faraón onohẽ Josépe kárselgui, ha ko esklávo iñumildetévagui oiko pe segundo governánte iñimportantevéva Egíptope (Gén. 41:1, 37-43). José ha hembireko mokõi ifamília, pe ijypykuépe ombohéra “Manasés, pórke heʼi: ‘Ñandejára chepytyvõ cheresarái hag̃ua opa mbaʼe vai ahasa vaʼekuégui ha anivéma hag̃ua ahechagaʼu che hentekuérape’. Ha pe segundo itaʼýrape katu ombohéra Efraín, pórke heʼi: ‘Ñandejára chepytyvõ che família hag̃ua ko lugár hetaite asufri haguépe’” (Gén. 41:51, 52, TNM). Jehová orrekompensa Josépe, upévare haʼe oipytyvõ kuri umi israelita ha umi egípsiope pono omanomba ñembyahýigui. José orrekonose Jehová opremia ha ovendesi hague chupe (Gén. 45:5-9).

12. ¿Mbaʼépa oipytyvõ Jesúspe iñeʼẽrendu hag̃ua ohasárõ guare umi pruéva ijetuʼúva?

¹² Jesús iñeʼẽrendu vaʼekue avei Ñandejárape ohasárõ guare heta pruéva, ha Itúa orrekompensa chupe upe haguére. ¿Mbaʼépa oipytyvõ Jesúspe iñeʼẽrendu hag̃ua? La Biblia heʼi: “Oñemoĩgui henondépe peteĩ mbaʼe ombovyʼaitereítava chupe, haʼe oaguanta pe jehasa asy oñemosaingóvo chupe pe yvyra pohýire, notĩri upe haguére” (Heb. 12:2). Jesús ovyʼa vaʼekue pórke omopotĩ Ñandejára réra. Avei ovyʼa Itúa oguerohorýgui chupe, ha ohupyty heta mbaʼe ijojahaʼỹva. La Biblia heʼi hese: “Oguapy hína Ñandejára deréchape”. Avei heʼi: “Ñandejára ombotuicha Jesúspe, omeʼẽ chupe peteĩ puésto ijyvatevéva, ha pyʼaporãme omeʼẽ chupe pe téra iporãvéva entéro umi ótro téragui” (Filip. 2:9).

13, 14. ¿Mbaʼéichapa Jehová ohecha umi mbaʼe jajapóva hesehápe?

¹³ Jehová ovalora entéro mbaʼe jajapóva hesehápe. Haʼe ñanembyasy ñañandu jave ndajavaleiha mbaʼeverã, térã ñapensáramo ndaikatumoʼãiha jajapo porã peteĩ mbaʼe. Oñangareko ñanderehe jajepyʼapy jave ñanefamília remikotevẽre. Ha ñanentende ndaikatúiramo jaservi chupe ymave guaréicha, tahaʼe ñanderasykatu térã ñañedeprimi rupi. Añetehápe Jehová omombaʼeterei ñañehaʼã haguére jaservi porã chupe ñaneprovléma hetáramo jepe (elee Hebreos 6:10, 11).

¹⁴ La Biblia heʼi Jehováre: “Nde ningo rehendu umi hénte ñemboʼe”. Upévare, ani ñanderesarái chupe ointeresaha umi mbaʼe ñandepyʼapýva (Sal. 65:2, TNM). Pe “Túva oporoporiahuverekóva ha Ñandejára omeʼẽva opaichagua konsuélo”, omeʼẽta ñandéve opa mbaʼe ñaikotevẽva ani hag̃ua ñañemomombyry chugui. Upearã, sapyʼánte oipuru ñane ermanokuérape (2 Cor. 1:3). Jehová ovyʼa jaiporiahuvereko jave ñande rapichakuérape. Iñeʼẽme heʼi: “Pe imboriahúvandi imbaʼeporãva, haʼete voi Jehová ndive imbaʼeporãva hína, ha haʼe katuete omyengoviáta chupe” (Prov. 19:17, TNM; Mat. 6:3, 4). Jehovápe g̃uarã haʼete ku hendive voi ñandepyʼaporãva ñaipytyvõ jave ñane ermanokuérape. Ha hiʼarive haʼe opromete ñanepremiataha upe haguére.

15. ¿Mbaʼe prémiopa nde rehaʼarõma hína? (Ehecha pe taʼanga oĩva iñepyrũme).

¹⁵ Jesús, “ñande Ruvicha oporohusgáva hekoitépe, omboykéma” umi unhídope  g̃uarã “peteĩ koróna”, omeʼẽtava chupekuéra “peteĩ prémioicha” (2 Tim. 4:7, 8). Oiméramo ñande jareko ótra esperánsa, upéva ndeʼiséi Ñandejárape g̃uarã menove javaleha. Jesús oreko avei “ambue ovechakuéra” orresivítava peteĩ prémio: oikovéta opa ára g̃uarã peteĩ paraísope ko yvy ape ári. “Haʼekuéra ovyʼaitereíta pórke oikóta pyʼaguapýpe ha noñekevrantamoʼãi mbaʼevete asýre” (Juan 10:16; Sal. 37:11, TNM).

16. ¿Mbaʼéichapa ñanekonsola 1 Juan 3:19, 20?

¹⁶ Sapyʼánte ikatu ñapensa saʼieterei jajapoha Jehová servísiope, térã ñañeporandu oimépa añete haʼe oguerohory la jajapóva. Ikatu voi ñapensa nañamereseiha jarresivi mbaʼeveichagua rrekompénsa. Péro ani ñanderesarái “Ñandejára tuichaveha ñane korasõgui ha oikuaaha opa mbaʼe” (elee 1 Juan 3:19, 20). Jaservíramo Jehovápe jajerovia rupi hese ha jahayhúgui chupe, haʼe katuete ñanepremiáta, ñapensáramo jepe sonseraitereiha la jajapóva (Mar. 12:41-44).

17. ¿Mbaʼe vendisiónpa jahupytýma koʼág̃a?

¹⁷ Ñandejára ñanevendesi jaikóramo jepe ko múndo añáme oĩva Satanás poguýpe. Haʼe ojapo tekotevẽva guive omyesakã hag̃ua ñandéve Iñeʼẽ, ha jaiko hag̃ua pyʼaguapýpe ñane ermanokuérandi (Is. 54:13). Jesús opromete haguéicha, Jehová koʼág̃ama voi ovendesi isiervokuérape. Upévare jaiko peteĩ famíliaicha, ñaiméramo jepe opárupi ko yvy tuichakuére (Mar. 10:29, 30). Opavave ohekáva Ñandejárape ipyʼaite guive, ipyʼaguapýta, oñeñandu porãta ha ovyʼáta (Filip. 4:4-7).

18, 19. ¿Mbaʼéichapa Jehová siervokuéra oñeñandu umi vendisión orresivívare?

¹⁸ Ñane tiémpope, heta kristiáno oñandu mbaʼéichapa Jehová opremia chupekuéra. Por ehémplo, peteĩ ermána Alemaniagua hérava Bianca heʼi: “Ndaikuaái ni mbaʼéichapa aagradeséta Jehovápe chepytyvõ haguére che provlemakuéra reheve, ha siémpre oĩ rupi che ykére. Ko múndo ningo ipeligróso, ha ndaipóri esperánsa, péro che añemoĩ Jehová pópe ha cheñeʼẽrendu chupe, ha añandu ndojehumoʼãiha chéve mbaʼeve ivaíva. Káda sakrifísio ajapóvare, haʼe tuichaiterei voi chevendesi”.

¹⁹ Paula, oikóva Canadápe oreko 70 áño ha ndaikatúi ojapo heta mbaʼe pórke iprovléma ikolúmnape. Haʼe oreko espína vífida, ha ndaikatúi okuʼe porã. Paula omombeʼu: “Ndaikatúi haguére akuʼe porã ndeʼiséi ndaikatuiha ajapo mbaʼeve apredika hag̃ua. Por ehémplo, apredika por teléfono ha avei ambue hendáicha. Ikatu hag̃uáicha chekyreʼỹ, areko peteĩ kuadérno aanotahápe téxto bíblico ha umi mbaʼe chegustáva osẽva ñane puvlikasionkuérape. Sapyʼapyʼa alee jey koʼã mbaʼe ha chepytyvõiterei. Ko kuadérnope che ambohéra ‘Kuadérno de supervivénsia’. Ñañekonsentrárõ Jehová promesakuérare, ñañedesanimáramo jepe ensegidamínte javyʼa jeýma, tahaʼe haʼéva ñane provléma”. Ikatu ningo umi mbaʼe jahasáva idiferénte Bianca ha Paula situasióngui, péro katuete ñanemanduʼáne mbaʼéichapa Jehová ñanevendesi, térã ovendesi peteĩ jaikuaávape. Añetehápe ideprovechoiterei jajepyʼamongetárõ mbaʼéichapa Jehová ñanepremia koʼág̃a, ha mbaʼéichapa ojapóta upéva amo gotyove.

20. ¿Mbaʼépa ikatu ñahaʼarõ ñañehaʼãmbaitéramo ñandefiél Jehovápe?

²⁰ Aníkena ñanderesarái “tuicha oñemyengoviataha” ñandéve ñañemboʼérõ ñande pyʼaite guive. Upévare, “ikatu hag̃uáicha [jarresivi] Ñandejára opromete vaʼekue”, jajapo vaʼerã hembipota (Heb. 10:35, 36). Jasegíkena ñamombarete ñande jerovia ha jajapo opa ikatúva jaservi hag̃ua Jehovápe. Ñande ñaĩ segúro haʼe katuete ñanepremiataha (elee Colosenses 3:23, 24).