1-3. a) ¿Mbaʼe enseñánsapa oĩ umi mbaʼe iñimportantevéva apytépe? b) ¿Mbaʼérepa pe rresurreksión iñimportantete? (Ehecha pe taʼanga oĩva iñepyrũme).

OÑEPORANDÚRÕ ndéve mbaʼe mbaʼépa umi ne kreénsia iñimportantevéva, ¿mbaʼérehepa nemanduʼáne? Ikatu ere Jehová haʼeha ñande Apohare ha haʼe rupivénte jaikoveha. Avei erekuaa ejeroviaha Jesucristo omano hague ñanderehehápe. Katuete ningo nemanduʼáta avei koʼẽrõitéma jaikotaha opa árare peteĩ paraísope ko yvy ape ári. Péro, ¿erétapa pe rresurreksión haʼeha peteĩ kreénsia iñimportantetereíva?

² Añetehápe jaʼekuaa pe rresurreksión haʼeha peteĩ kreénsia iñimportantetereíva ñandéve g̃uarã, ñapensáramo jepe jajesalvataha pe jehasa asy guasúpe ha jaikotaha opa árare ko yvy ape ári. Apóstol Pablo ohechauka kuri mbaʼérepa pe rresurreksión iñimportanteterei. Haʼe heʼi: “Umi omanóva noñemoingovejeymoʼãiramo, Crístope noñemopuʼãi avei”. Jesús ndorresusitái rire, koʼág̃a ndahaʼéi vaʼerãmoʼã Rréi yvágape, ha ñande katu reiete japredikáta umi héntepe (elee 1 Corintios 15:12-19). Péro jaikuaa porã Jesúspe oñemoingove jey hague. Umi saduséo ningo onega vaʼekue Jesús orresusita hague, péro ñande ndajajoguái chupekuéra. Koʼág̃a oĩramo jepe  oñembohorýva ñanderehe, ñande jajeroviaiterei Ñandejára omoingove jeytaha umi omano vaʼekuépe (Mar. 12:18; Hech. 4:2, 3; 17:32; 23:6-8).

³ Pablo heʼi vaʼekue pe rresurreksión haʼeha peteĩ enseñánsa iñimportantetereíva, ha oĩha “umi mbaʼe ñaaprende vaʼekuépe ñepyrũrã Crístogui” (Heb. 6:1, 2). Haʼe heʼi kuri ogueroviaha oikotaha pe rresurreksión (Hech. 24:10, 15, 24, 25). Ko enseñánsa haʼéramo jepe “umi mbaʼe tenondegua oĩva Ñandejára marandu apytépe”, ndeʼiséi natekotevẽiha ñahesaʼỹijo porã (Heb. 5:12). ¿Mbaʼérepa jaʼe upéva?

4. ¿Mbaʼépa ikatu algúno oikuaase?

⁴ Ñañepyrũrõ guare jastudia la Biblia, ñaaprende kuri oĩ hague rresurreksión, por ehémplo ñaaprende Lázarope oñemoingove jey hague. Avei jahecha kuri oĩ hague kuimbaʼe ifiélva oikuaa porãva oñemoingove jeytaha amo gotyove umi omano vaʼekuépe, por ehémplo Abrahán, Job ha Daniel. Péro ikatu oĩ opensáva: ¿Ikatúpa jaguerovia oñemoingove jeytaha umi omanóvape, jepe aretereíma oñepromete hague? ¿Heʼi piko la Biblia arakaʼépa oikóta pe rresurreksión? Ñambohovaimína koʼã porandu, péicha ñande jerovia imbaretevéta.

5. ¿Mbaʼérehepa ñañeʼẽta koʼág̃a?

⁵ Ikatu ningo ifasilmie ñañeimahina hag̃ua oikove jeytaha peteĩ omano ramóva (Juan 11:11; Hech. 20:9, 10). Péro, ¿ikatúpa jarovia oñemoingove jeytaha peteĩ persónape ohasáramo jepe hetaiterei tiémpoma upe promésa ojejapo hague? ¿Añetehápepa ikatu hína oikove jey peteĩ persóna, jepe omano ramónte térã aretereíma? Ñande ningo jagueroviáma oiko hague peteĩ rresurreksión hetaiterei tiémpo oñepromete rire. ¿Mávarepa ñañeʼẽ hína? ¿Ha mbaʼérepa upéva iñimportanteterei oiko hag̃ua pe rresurreksión ñahaʼarõva?

6. ¿Mbaʼéichapa oñekumpli Jesúsre pe Salmo 118?

⁶ Ñañeʼẽmína peteĩ rresurreksión oiko vaʼekuére hetaiterei tiémpo oñepromete rire. Jaikuaaháicha, David oskrivi kuri pe Salmo 118. Upépe heʼi: “Jehová, oresalvamína por favór”. Upéi heʼi avei: “Toñevendesi upe kuimbaʼe oúva Jehová rérape”. Jesús oikérõ guare Jerusalénpe el 9 de nisán, umi persóna ohecháva chupe imanduʼa ko profesíare (Sal. 118:25, 26, TNM; Mat. 21:7-9). Péro, ¿mbaʼérepa jaʼe Salmo 118 oñeʼẽha peteĩ rresurreksión oikótavare kuri heta tiémpo rire? Pe Salmo heʼive: “Pe ita umi konstruktór omboyke vaʼekue, pévagui oiko pe ita prinsipál” (Sal. 118:22, TNM).

7. ¿Mbaʼéichapa umi judío ohechauka vaʼekue orrechasaha Jesúspe?

⁷ “Umi konstruktór” orrechasáva pe Mesíaspe haʼe vaʼekue umi líder rrelihióso judío. Haʼekuéra ndahaʼéi omboykénteva Jesúspe, térã ndoaseptáinteva haʼeha pe Cristo. Heta judío orrechasa voi Jesúspe ha ojerure Pilátope ojuka hag̃ua chupe (Luc. 23:18-23). Jahechaháicha, umi judío káusare ojejuka vaʼekue Jesúspe.

8. ¿Mbaʼéichapa oiko Jesúsgui “pe ita prinsipál”?

⁸ Jesúspe ojerrechasa ha ojejuka kuri, ¿mbaʼéichapa upéicharõ oikóta chugui “pe ita prinsipál”? Upearã haʼe tekotevẽ kuri orresusita. Jesús omyesakãve upéva omombeʼúrõ guare peteĩ istória oñeʼẽva peteĩ karai ijyvy hetávare. Ko karai oreko unos kuánto personál ombaʼapóva chupe ikokuépe. Peteĩ jey omondo hendapekuéra unos kuánto mensahérope, péro umi personál omaltrata chupekuéra. Upéi pe karai omondo itaʼýrape, oimoʼãgui umi personál ohendutaha chupe. Péro upéva rangue, haʼekuéra ojuka pe patrón raʼýpe. Péicha avei, umi israelita omaltrata vaʼekue umi proféta Ñandejára omondóvape chupekuéra. Jesús  omombeʼupa rire ko istória, omensiona pe profesía oĩva Salmo 118:22-pe (Luc. 20:9-17). Apóstol Pedro omensiona avei ko profesía oñeʼẽrõ guare “Jerusalénpe umi mburuvicha, karai guasu ha mboʼehára leipegua” ndive. Upérõ oñeʼẽ “Jesucristo Nazaretgua” rehe, ha heʼi chupekuéra haʼekuéra omosaingo hague chupe yvyráre, péro Ñandejára omopuʼã jey hague chupe omanóva apytégui. Upéi heʼi avei: “Jesús hína ‘pe ita peẽ óga apoha pemboyke vaʼekue ndovaleiramoguáicha, upéicharõ jepe, haʼe hína pe ita iñimportantevéva oĩva pe eskínape’” (Hech. 3:15; 4:5-11; 1 Ped. 2:5-7).

9. ¿Mbaʼépa ojeprofetisa Salmo 118:22-pe?

⁹ Jahechaháicha, pe profesía oĩva Salmo 118-pe oñeʼẽ peteĩ rresurreksión oikótavare heta tiémpo upe rire. Pe Mesíaspe ojerrechasa ha ojejuka, péro oñemoingove jey chupe, ha péicha oiko chugui “pe ita prinsipál”. Jesús orresusita rupi ikatu jajesalva. La Biblia heʼi: “Peikuaáke ndaiporiha ótro ikatúva ñandesalva, ndaipórigui ko yvy ape ári ótro téra, Ñandejára oiporavo vaʼekue yvyporakuéra apytépe, ñandesalva hag̃ua” (Hech. 4:12; Efes. 1:20).

10. a) ¿Mbaʼépa ojeprofetisa Salmo 16:10-pe? b) ¿Mbaʼérepa ñaĩ segúro Salmo 16:10 noñeʼẽiha David rehe?

¹⁰ Jahechamína ótro téxto oñeʼẽva avei pe rresurreksiónre, péro kóva oñekumpli mas de 1.000 áño ojeprofetisa haguépe. Upéva ñanepytyvõ ani hag̃ua jaduda ikatuha oñemoingove jey peteĩ persónape, ohasámarõ jepe hetaiterei tiémpo oñepromete hague. David oskrivi vaʼekue la oĩva Salmo 16-pe. Upépe heʼi: “Che aikuaa nde ndacherejareimoʼãiha pe sepultúrape. Nde nderehejamoʼãi pe iñeʼẽrendúva ipyʼaite guive oho opyta pe yvyguýpe” (Sal. 16:10, TNM). David ndeʼiséi kuri haʼe núnka nomanomoʼãiha ni ndohomoʼãiha pe sepultúrape. Ñandejára Ñeʼẽ heʼi porã David ou hague ituja ha “omano, ha oñeñotỹ chupe Siuda de Davídpe” (1 Rey. 2:1, 10, TNM). ¿Mávarepa upéicharõ oñeʼẽ Salmo 16:10?

11. ¿Arakaʼépa Pedro omyesakã mávarepa oñeñeʼẽ Salmo 16:10-pe?

¹¹ Mas de 1.000 áño David oskrivi rire pe profesía oĩva Salmo 16:10-pe, apóstol Pedro omyesakã mávarepa oñeñeʼẽ upépe. Unas kuánta semána Jesús omano ha orresusita rire, Pedro ojapo peteĩ diskúrso, ha oñeʼẽ pe Sálmore hetaiterei judíope ha avei umi ndahaʼéivape judío (elee Hechos 2:29-32). Pedro omomanduʼa chupekuéra David omano ha oñeñotỹ hague. Upéi heʼi David oikuaáma hague voi pe Mesías “oñemoingove jeytaha ha omombeʼu upéva”. La Biblia ndeʼíri oĩ hague okontradesíva Pédrope umi hénte apytépe.

12. a) ¿Arakaʼépa oñekumpli Salmo 16:10? b) ¿Mbaʼéichapa ñanepytyvõ jaikuaávo oñekumpli hague Salmo 16:10?

¹² Upérõ Pedro imanduʼa avei David oskrivi vaʼekuére Salmo 110:1-pe (elee Hechos 2:33-36). Haʼe oipuru umi téxto ohechauka hag̃ua siertoha la heʼíva. Upévare umi henteita oñemeʼẽ enkuénta Ñandejára omoĩ hague Jesúspe “ñande Ruvicha ha Crístoramo”. Enterovéva umi ohendúva ontende Salmo 16:10 oñekumpli hague Jesús orresusitárõ guare. Tiémpo rire, apóstol Pablo oipuru avei umi téxto oñeʼẽrõ guare umi judío Antioquía de Pisidiaguápe. Umi héntepe osorprende la ohendúva, upévare oikuaaseve hikuái umi mbaʼégui (elee Hechos 13:32-37, 42). Koʼã pruéva ohechauka porã oñekumpli hague umi profesía oñeʼẽva pe rresurreksiónre, jepe ohasáma kuri hetaiterei tiémpo oñepromete hague.

13. ¿Mbaʼépa ikatu ñañeporandu?

¹³ Javyʼaiténgo jaikuaa haguére ikatuha oñemoingove jey umi omano vaʼekuépe ohasámarõ jepe hetaiterei tiémpo oñepromete  hague upéva. Péro ikatu ñañeporandu: “¿Ahaʼarõiti vaʼerã piko hetaiterei tiémpo ahecha hag̃ua peteĩ ahayhúva omano vaʼekuépe? ¿Arakaʼe piko oikóta pe rresurreksión?”. Jesús heʼi vaʼekue ijapostolkuérape oĩha heta mbaʼe ndoikuaáiva hikuái ni ndaikatumoʼãiva gueteri ontende. Oĩ detálle ndajaikuaáiva “arakaʼépa oikóta”, térã “mbaʼe tiémpopa ojeporavo upearã, pe Túva añoite ikatu odesidi upéva” (Hech. 1:6, 7; Juan 16:12). Upéicharõ jepe, ñande heta mbaʼéma jaikuaa pe rresurreksióngui.

14. ¿Mbaʼérepa jaʼekuaa Jesús rresurreksión idiferénte hague umi ótrogui?

¹⁴ ¿Mbaʼeichagua rresurreksiónpa la iñimportantevéva oñemombeʼúva la Bíbliape? Upéva hína Jesús rresurreksión. Haʼe ndorresusitáirire, ndajarekói vaʼerãmoʼã esperánsa jahecha jeývo peteĩ jahayhúva omano vaʼekuépe. Umi persóna oikove jeýva Jesús orresusita mboyve, por ehémplo umi omborresusita vaʼekue Elías ha Eliseo, omano jey kuri upe rire. Chuguikuéra oiko jey yvy pe sepultúrape. Péro Jesús “opuʼã rire omanóva apytégui”, pe “ñemano ndaipuʼakavéima hese”. Koʼág̃a haʼe oikove yvágape “opa ára g̃uarã” (Rom. 6:9; Apoc. 1:5, 18; Col. 1:18; 1 Ped. 3:18).

15. ¿Mbaʼérepa Jesúspe oñehenói pe “kosécha tenondegua”?

¹⁵ Jesús haʼe pe primera persóna orresusita vaʼekue oho hag̃ua oiko yvágape peteĩ espírituicha. Péva haʼe pe rresurreksión iñimportantevéva (Hech. 26:23). Péro ndahaʼéi Jesús añónte la ohótava yvágape. Haʼe opromete vaʼekue ijapostolkuéra iñeʼẽrendúvape ogovernataha avei hendive upépe (Luc. 22:28-30). Haʼekuéra orresivi hag̃ua upe rrekompénsa omano raẽ vaʼerã, ha upéi oñemoingove jeýta chupekuéra peteĩ espírituicha, Jesúspe oñemoingove jey haguéicha. Pablo oñeʼẽrõ guare Jesús rresurreksión rehe, heʼi hese haʼeha pe “kosécha tenondegua”. ¿Mbaʼérepa? Pórke chupe raẽvete oñemopuʼã vaʼekue umi omanóva apytégui. Upéi heʼi avei oĩvetaha oñemoingove jeýva oho hag̃ua yvágape. Haʼe heʼi: “Káda uno oikove jeýta otoka vove chupe: Cristo raẽve oñemoingove jey, upéi umi haʼéva Cristo mbaʼe oñemoingove jeýta ipresénsia aja” (1 Cor. 15:20, 23, nóta).

16. ¿Mbaʼe tiémpopepa orresusita umi ohóva yvágape?

¹⁶ Umi mbaʼe Pablo heʼíva ohechauka umi ohótava yvágape orresusitataha Cristo presénsia aja. ¿Mbaʼe tiémpopepa oiko upéva? Heta áñorema testígo de Jehová ohechauka la Biblia rupive Cristo “presénsia” oñepyrũ hague 1914-pe. Koʼág̃a ñande jaiko gueteri Cristo presénsia tiémpope, ha ko múndo aña oñehundi potaitéma.

17, 18. ¿Mbaʼépa oikóta umi unhído oikovévare pe jehasa asy guasu aja?

¹⁷ La Biblia oñeʼẽve umi orresusitátavare oiko hag̃ua yvágape. Pablo heʼi: “Roipota pentende mbaʼépa ohaʼarõ umi omanóvape  [...]. Ñande jajeroviáramo Jesús omano ha opuʼã jey hague omanóva apytégui, upéicha avei jajerovia Ñandejára omoingove jeytaha umi omano vaʼekuépe osegívo Jesúspe, haʼekuéra oĩ hag̃ua hendive. [...] Ñande apytégui, umi oikóva gueteri ñande Ruvicha oĩ aja, umíva oñemopuʼãta yvágape, péro haʼekuéra ni mbaʼevéicharõ naitenondemoʼãi umi okévagui ñemanóme. Ñande Ruvicha voi oguejýta yvágagui Ñandejára trompéta reheve ha hatã osapukáita [...]. Ha opuʼã raẽvéta Cristo disipulokuéra omanóma vaʼekue. Upe rire, umi oikovéva gueteri ñande apytégui ojegueraháta hendivekuéra pe araíre, ohug̃uaitĩ hag̃ua ñande Ruvichápe yvate. Upéicha ñaiméta ñande Ruvichándi opa árare” (1 Tes. 4:13-17).

¹⁸ Pe primera rresurreksión oiko Cristo presénsia oñepyrũ riremi. Umi unhído oikovéva pe jehasa asy guasu aja “ojegueraháta [...] pe araíre”. ¿Mbaʼépa heʼise upéva? Umi ojeguerahátava yvágape ndopytamoʼãiha “ñemanóme” heta tiémpore, síno “peteĩ tesapirĩme” oñekambiáta hikuái “ipu vove pe última trompéta” (1 Cor. 15:51, 52; Mat. 24:31).

19. ¿Mbaʼeichagua ñemoingove jeýpa ñahaʼarõ hína?

¹⁹ Ñane tiémpope, la majoría umi kristiáno ifiélva ndahaʼéi unhído, ha ndojeporavói oho hag̃ua yvágape ogoverna Crístondi. Upéva rangue ohaʼarõ “Jehová ára”, oñehunditahápe ko múndo aña. Ndajaikuaái ningo arakaʼetépa oúta pe fin, péro la jaikuaa porãva hiʼag̃uimbaitemaha (1 Tes. 5:1-3). Ñandejára múndo pyahúpe oikóta peteĩ rresurreksión idiferénteva. Ko yvy ape ári opuʼã jeýta hetaiterei persóna omano vaʼekue ikatu hag̃uáicha oiko peteĩ paraísope. Haʼekuéra orekóta peteĩ esperánsa iporãitereíva, pórke oikóta chuguikuéra yvypóra perfékto, ha núnka nomanomoʼãvéima. Umi persóna orresusita vaʼekue ymave omano jey kuri. Péro pe rresurreksión ñahaʼarõva haʼéta “peteĩ ñemoingove jey iporãvéva” (Heb. 11:35).

20. ¿Mbaʼérepa ikatu ñaĩ segúro pe rresurreksión oikotaha en órden?

²⁰ La Biblia heʼi umi ohótavare yvágape: “Káda uno oikove jeýta otoka vove chupe”. Upéva heʼise upe rresurreksión oikotaha en órden (1 Cor. 15:23). Ñande avei ñaĩ segúro ko yvy ape ári oñemoingove jeytaha en órden umi omano vaʼekuépe. Péro ikatu ñañeporandu: “¿Arakaʼépa orresusitáta umi omano ramovéva? ¿Oikove jeýtapa hikuái oñepyrũre Jesús Goviérno de Mil Áño ikatu hag̃uáicha orresivi chupekuéra ihénte ha iñamigokuéra? ¿Ha mbaʼépa jaʼekuaa umi kuimbaʼe ifiélva omoakã vaʼekuére yma Ñandejára puévlope? ¿Haʼekuéra raẽpa orresusitáta pe múndo pyahúpe ikatu hag̃uáicha oipytyvõ Ñandejára siervokuérape oñeorganisa porã hag̃ua? ¿Ha mbaʼépa jaʼekuaa umi persóna ndoservíri vaʼekuére Jehovápe? ¿Arakaʼépa oikove jeýta hikuái, ha moõpa?”. Oiméne oĩ heta mbaʼe jaikuaaséva, péro koʼág̃a natekotevẽi jajepyʼapy umívare. Iporãve ñahaʼarõnte ha jahecha mbaʼéichapa oñekumpli. Katuete javyʼaitereíta Jehová ojapo vove koʼã mbaʼe.

21. ¿Mbaʼe esperánsapa jareko?

²¹ Ñande ñamombarete vaʼerã ñande jerovia Jehováre ñahaʼarõ aja oñekumpli koʼã mbaʼe. Jesús rupive, haʼe oasegura kuri omoingove jeytaha umi persóna oĩvape imemóriape (Juan 5:28, 29; 11:23). Peteĩ jey Jesús heʼi vaʼekue mbaʼépa Ñandejára opensa Abrahán, Isaac ha Jacob rehe. Haʼe heʼi: “Chupe g̃uarã enterove haʼekuéra oikove gueteri”. Péva ohechauka porã avei Jehová katuete omoingove jeytaha umi omanóvape (Luc. 20:37, 38). Upéicharõ, enterovéva ikatu jaʼe apóstol Pablo heʼi haguéicha: “Areko esperánsa Ñandejárare, [...] oñemoingove jeytaha umi hekojojáva ha hekojojaʼỹva” (Hech. 24:15).