1. ¿Mbaʼérepa iñimportánte jajevautisa? (Ehecha pe taʼanga oĩva iñepyrũme).

KÁDA áño hetaiterei estudiánte de la Biblia ojevautisa. Umíva apytépe oĩ mitãrusu, mitãkuña ha mitã. Heta ijapytepekuéra oĩ michĩ guivéma oikuaáva pe añetegua. ¿Ndépa rejevautisáma? Oiméramo upéicha, rejapo peteĩ mbaʼe iporãitereíva. Añetehápe entéro kristiáno tekotevẽ ojevautisa ikatu hag̃uáicha ojesalva ha oikove pára siémpre (Mat. 28:19, 20; 1 Ped. 3:21).

2. ¿Mbaʼérepa nderekyhyjéi vaʼerã reñemeʼẽ hag̃ua Jehovápe?

² Rejevautisa rire, Jehová nevendesi heta hendáicha. Péro péicha avei, upe guive erekovéma rresponsavilida. ¿Mbaʼérepa jaʼe upéva? Pe ermáno ojapo vaʼekue pe diskúrso de vautísmo, oporandu kuri: “Jesucristo ojesakrifika rupi nderehehápe, ¿reñembyasýmapa ne rembiapo vaikuére ha reñemeʼẽmapa Jehovápe rejapo hag̃ua hembipota?”. Nde rerresponde kuri rejapomaha upéva. Repromete rehayhutaha  Jehovápe, ha iservísio iñimportantevetaha ndéve g̃uarã opa mbaʼégui. ¿Rembyasy vaʼerãpa rejapo haguére upe kompromíso? Nahániri. Núnka nerembyasýi vaʼerã repermiti haguére Jehovápe ndegia. Umi ndoikuaáiva Jehovápe oĩ Satanás poguýpe. Ha jaikuaaháicha, Satanás noñeinteresái avavére. Haʼe ovyʼáta remboykéramo Jehovápe ha reperde pe esperánsa reikove hag̃ua opa árare.

3. ¿Mbaʼéichapa Jehová nevendesi reñemeʼẽ haguére chupe?

³ Epensamína mbaʼeichaitémapa Jehová nevendesi reñemeʼẽ rupi chupe ha rejevautisa. Nde ningo rentrega kuri chupe nde rekove, upévare ikatu ere: “Ndakyhyjemoʼãi asy pórke Jehová oĩ che ykére, ¿mbaʼe piko ojapóta cherehe peteĩ persóna cheichagua?” (Sal. 118:6, TNM). Jehová ndeguerohory reñemoĩ haguére ifavórpe. Añetehápe ndaipóri ótra kósa iporãvéva upévagui.

4, 5. a) ¿Mbaʼérepa jaʼekuaa ñane amista Jehovándi nodependeiha ótrore? b) ¿Mbaʼépa ñambohovái entéro kristiáno tahaʼe haʼéva ñande eda?

⁴ Oiméramo nde rejevautisáma, nemanduʼa vaʼerã ne amista Jehovándi nodependeiha nde tuakuérare, reikóitiramo jepe hendivekuéra. Nderehe ningo odepende rejesalva hag̃ua. ¿Mbaʼérepa siémpre iñimportánte ereko enkuénta upéva? Pórke amo gotyove rembohovaikuaa heta mbaʼe ikatúva nemomombyry Jehovágui. Oiméramo rejevautisa raʼe nemitãme, umi mbaʼe reñandúva ha rehasáva koʼág̃a nde kariaʼy térã ne kuñataĩvo rehóvo, katuete idiferénteta umi mbaʼe rembohovái vaʼekuégui ymave. Peteĩ mitãkuña heʼi: “Ne mitãme ningo nerepensái ijetuʼuha nde fiél kómo testígo de Jehová ndovaléi haguére reʼu peteĩ tórta de kumpleáño ne kompañerokuérandi. Péro rekakuaavévo rehóvo, og̃uahẽma avei ndéve pe deséo ereko hag̃ua rrelasión sexuál. Rembohovái porã hag̃ua koichagua situasión, reĩ vaʼerã segúro iporãiteveha rejapo Jehová omandáva”.

⁵ Péro ndahaʼéi mitãrusu ha mitãkuñanguérante la ombohováitava umi situasión ijetuʼúva ymave ndohasái vaʼekue. Umi ojevautisáva okakuaapa riréma jepe ohasánte avei umi situasión nohaʼarõietéva ha ikatúva omokangy chupekuéra. Por ehémplo, ikatu iprovléma imatrimóniope, itraváhope térã ou hasykatu. Añetehápe ningo enterovéva ñandefiél vaʼerã Jehovápe tahaʼe haʼéva situasiónpe, lomímonte ñanemitã térã ñandeedáramo (Sant. 1:12-14).

6. a) ¿Mbaʼépa heʼise reñemeʼẽ Jehovápe? b) ¿Mbaʼépa ikatu reaprende Filipenses 4:11-13-gui?

⁶ ¿Mbaʼépa nepytyvõta ndefiél hag̃ua? Siémpre ereko vaʼerã enkuénta reñemeʼẽma hague Jehovápe. Upéva heʼise repromete hague pe Rréi del univérsope reservitaha chupe toiko la oikóva, ohejáramo jepe Jehovápe nde sy, nde túa térã ne amigokuéra (Sal. 27:10). Tahaʼe haʼéva situasiónpe, ejerure vaʼerã Jehovápe tanepytyvõ siémpre rekumpli hag̃ua pe promésa rejapo vaʼekue chupe (elee Filipenses 4:11-13).

7. ¿Mbaʼépa heʼise “peñehaʼãmbaitékena Ñandejára pendesalva hag̃ua”?

⁷ Jehová ningo ndepota iñamigorã. Péro jaikuaaháicha, ndahaʼéi la ifásilva remantene hag̃ua upe amista ha rehupyty hag̃ua pe salvasión. Filipenses 2:12 heʼi: “Peñehaʼãmbaitékena Ñandejára pendesalva hag̃ua”. Upéva heʼise tekotevẽha ñapensa porã jaikuaa hag̃ua mbaʼépa jajapo vaʼerã ani hag̃ua ñañemomombyry Jehovágui, ha ñandefiél hag̃ua chupe toiko la oikóva. Ñanemanduʼa vaʼerã avei umi oservi arémava Jehovápe jepe ofalla hague avei. Upévare, aníkena ejeroviaiterei ndejehe. ¿Mbaʼe mbaʼépa ikatu nepytyvõ upearã?

8. ¿Mbaʼéichapa jajapo vaʼerã ñande estúdio personál, ha mbaʼérepa iñimportánte upéva?

⁸ Ikatu hag̃uáicha oiko ñandehegui Jehová amígo tekotevẽ ñahendu ha ñañeʼẽ chupe. Ñande ikatu ñahendu Jehovápe jajapo jave ñande estúdio personál. Upearã jalee ha jajepyʼamongeta vaʼerã la Bíbliare ha umi puvlikasión oñeʼẽvare hese. Péro jastudia la Biblia ndeʼiséi ñamemorisánte vaʼerãha umi mbaʼe oĩva pype ojejapoháicha jepi koléhiope oñerrendi hag̃ua. Upéva rangue, ikatu ñakompara peteĩ viáhe igustoitereívare, ikatutahápe retopa ha reikuaa heta mbaʼe ipyahúva. Restudia jave la Biblia retopa heta detálle nepytyvõva reikuaave hag̃ua Jehovápe. Upéicha ningo reñemoag̃uivéta hese ha haʼe avei oñemoag̃uivéta nderehe (Sant. 4:8).

9. ¿Mbaʼe erramiéntapa ideprovécho ndéve rejapo hag̃ua nde estúdio personál?

⁹ Jehová organisasión ningo omeʼẽ heta erramiénta ikatúva nepytyvõ rejapo hag̃ua nde estúdio personál. Por ehémplo, ñande sítio jw.org-pe oĩ pe seksión hérava “Jóvenes”. Upépe retopáta pe párte “Actividades para estudiar la Biblia”, nepytyvõtava reaprende hag̃ua heta mbaʼe ideprovéchotava ndéve umi rreláto bíblicogui. Upe seksiónpe retopáta avei Guías de estudio “¿Qué enseña realmente la Biblia?”. Umíva nepytyvõta remombareteve hag̃ua nde jerovia ha redefendekuaa hag̃ua umi mbaʼe regueroviáva. Rrevísta ¡Despertad! de abril de 2009-pe, ikatu avei retopave informasión ideprovéchotava ndéve restudia hag̃ua, pe artíkulo héravape “Los jóvenes preguntan. ¿Cómo disfrutar la lectura de la Biblia?”. Iñimportanteterei ningo restudia ha rejepyʼamongeta ikatu hag̃uáicha rejesalva (elee Salmo 119:105).

10. ¿Mbaʼérepa pe orasión iñimportanteterei entéro kristiánope g̃uarã?

¹⁰ Jastudia jave la Biblia ñahendu hína Jehovápe, ha ñañemboʼe jave katu ñañeʼẽ hína chupe. Ñande kristianokuéra ñañatende vaʼerã jajapo lájare ñane orasión. Ani siémpre jarrepeti la mísma kósa, ni ñañemboʼe chupe jaipota javénte osẽ porã ñandéve álgo. Ñañemboʼe jave ningo ñañekomunika hína ñande Apohare Jehovándi, ha haʼe ohenduseterei la erétava chupe (elee Filipenses 4:6). Rejepyʼapy jave peteĩ mbaʼére, la Biblia nemokyreʼỹ remoĩ hag̃ua  “Jehová pópe umi mbaʼe ndepyʼapýva” (Sal. 55:22, TNM). Hetaiterei ermánoma heʼi ko konsého oipytyvõiterei hague chupekuéra. ¡Ha ndéve avei katuete ideprovéchota!

11. ¿Mbaʼérepa siémpre reagradese vaʼerã Jehovápe?

¹¹ Siémpre ñañemboʼe vaʼerã Jehovápe, ndahaʼéi jaipota javénte ñanepytyvõ. La Biblia heʼi: “Pehechaukákena pendeagradesidoha” (Col. 3:15). Sapyʼánte jajepyʼapyeterei ñane provlemakuérare ha ndajahechakuaái umi mbaʼe porã jarekóva. Eñehaʼãmína ejapo lo sigiénte: Káda día epensa mbohapy mbaʼe porã Jehová omeʼẽvare ndéve, ha eagradese chupe umívare. Peteĩ mitãkuña hérava Abigail ojevautisa vaʼekue orekórõ guare 12 áño. Haʼe heʼi: “Che apensa voi Jehová omeresetereiha jaagradese chupe, ha ndaiporiha ótra persóna ko univérsope omeresevéva chugui. Pyʼỹinte jaagradese vaʼerã chupe umi rregálo omeʼẽvare ñandéve”. Abigail heʼi avei peteĩ mbaʼe ohendu vaʼekue ha ogustaitereíva chupe: “Koʼẽrõ arekótaramo umi mbaʼe aagradese vaʼekuénte Jehovápe, ¿mboy kósapa arekóta?”. *

12, 13. a) ¿Mbaʼéichapa nde rehechakuaa Jehová ivuenoha nendive? b) ¿Mbaʼérepa iñimportánte epensa meme umívare?

¹² Jehová oipytyvõ vaʼekue rréi Davídpe ombohovái hag̃ua heta situasión ijetuʼúva. David imanduʼávo umívare, heʼi: “Petanteána ha pehecha mbaʼeichaitépa Jehová ivuéno. Ovyʼa pe persóna oñemoag̃uíva hese ojeprotehe hag̃ua” (Sal. 34:8, TNM). Ko téxto ohechauka tekotevẽha ndete voi rehecha mbaʼéichapa Jehová imbaʼeporã nendive. Relee jave la Biblia ha umi puvlikasión, ha reho jave rreunionhápe, reaprende mbaʼéichapa Ñandejára oipytyvõ ótrope ifiél hag̃ua. Péro imbaretevévo ohóvo ne amista hendive, tekotevẽ avei rehechakuaa mbaʼéichapa Jehová nepytyvõ ndéve voi. ¿Rehechakuaápa Jehová ivuenoha nendive?

¹³ Entéro kristiáno ningo katuete jahechakuaáma Jehová ivuenoha. Haʼe ñaneinvita ñañemoag̃ui hag̃ua hese ha Itaʼýrare. Jesús heʼi vaʼekue: “Avave ndaikatúi ou che rendápe, che Ru chembou vaʼekue ndoguerúiramo chupe” (Juan 6:44). ¿Reñandúpa Jehová ndeporavo hague ndéve? Térãpa repensa: “Jehová ningo oiporavo kuri che tuakuérape ha che amoirũntema chupekuéra”. Ani nderesarái reñemeʼẽ guive Jehovápe ha rejevautisa, emoñepyrũ hague peteĩ amista espesiál hendive. La Biblia heʼi: “Oĩramo ohayhúva Ñandejárape, haʼe oikuaa porã chupe” (1 Cor. 8:3). Siémpre revalora vaʼerã umi mbaʼe nde ikatúva rejapo Jehová organisasiónpe.

14, 15. ¿Mbaʼérepa pe predikasión ikatu nepytyvõ rejeroviave hag̃ua Jehováre?

¹⁴ Katuete nde rehechakuaáma avei Jehová ivuenoha nepytyvõ jave ndepyʼaguasu hag̃ua. Por ehémplo, haʼe nembopyʼaguasu reñeʼẽ hag̃ua umi mbaʼe regueroviávare, tahaʼe predikasiónpe, eskuéla térã koléhiope. Oiméne ijetuʼu ndéve repredika hag̃ua ne kompañerokuérape. Ikatu ndepyʼapy ndereikuaáigui mbaʼéichapa ojagarráta hikuái la eréva. Ha ikatu voi rekyhyjeterei reexplikáta jave ne kreénsia heta persóna renondépe. ¿Mbaʼépa ikatu nepytyvõ umícha jave?

¹⁵ Iñimportánte rejepyʼamongeta ne kreénsiare, por ehémplo mbaʼérepa reguerovia umíva. Ñande sítio jw.org-pe retopáta heta gía de estúdio ojetradusíva diferénte idiómape. Ko párte nepytyvõta repensa hag̃ua ne kreénsiare, mbaʼérepa reguerovia  upéva ha mbaʼéichapa ikatu reexplika ótrope. Reĩramo konvensído ha rejeprepara porãramo, reñeʼẽséta Jehováre (Jer. 20:8, 9).

16. ¿Mbaʼépa ikatu nembopyʼaguasu reñeʼẽ hag̃ua ne kreénsiare?

¹⁶ Péro sapyʼánte rejeprepara porãramo jepe, lomímonte ikatu nenervióso reexplikáta jave la regueroviáva. Peteĩ ermána de 18 áño ojevautisa kuri orekópe 13. Haʼe heʼi: “Che aikuaa porã la agueroviáva siertoha, péro sapyʼánte ijetuʼu chéve haʼe hag̃ua umi mbaʼe apensáva”. Ko ermána oñehaʼã oñetrankilisa oñeʼẽta jave pe añeteguáre, ikatu hag̃uáicha oñeʼẽ jepiveguáicha. Haʼe heʼi: “Che kompañerokuéra de koléhio ningo trankílamente omombeʼu umi mbaʼe ojapóva. Upévanteko che la ajapo vaʼerã avei. Upearã, añeʼẽ jave chupekuéra algúna kósare, aaprovecha ha amensiona jepi la Biblia. Por ehémplo haʼe: ‘Akokuehe ningo amboʼe hína kuri la Biblia, ha...’. Upéi katu asegi jey la che konversasión. Upe rire, nañeʼẽirõ jepe direktoite la Biblia heʼívare, heta vése opytáma ikurióso hikuái ha oikuaase mbaʼépa la amboʼéva. Sapyʼánte haʼekuéra ombaʼeporandu voi chéve. Amedída ke aipuru ko método, ifasilvéma chéve añemongeta hag̃ua la agueroviávare, ha añeñandu porãiterei”.

17. ¿Mbaʼérepa iñimportánte pyʼaguasúpe ñañeʼẽ ñane kreénsiare?

¹⁷ Rehechaukáramo reñeinteresaha nde rapichakuérare ha rerrespetaha chupekuéra, ifasilvéta avei ne kompañerokuérape nderrespeta hag̃ua ndéve ha umi mbaʼe regueroviáva. Por ehémplo, Olivia oreko 17 áño ha imitãreheve ojevautisáma kuri. Haʼe heʼi: “Ymave chepyʼapyeterei vaʼekue la umi ótro ikatúva opensa añeʼẽramo la Bíbliare. Ndaipotái opensa hikuái chefanatikaha”. Péro kon el tiémpo Olivia opensa diferéntema. Ojepreokupaiterei rangue mbaʼépa ikatu ojeʼe hese, haʼe okalkula: “Heta mitãrusu ha mitãkuña ningo ndoikuaái mbaʼeve testígo de Jehovágui. Ñandévente la ñandekuaa. Upévare, tuicha odepende mbaʼéichapa ñande ñarreaksiona, haʼekuéra orreaksiona porã hag̃ua avei. Ñaneotĩetereíramo ha nañañeʼẽguasúi voi chupekuéra ñane kreénsiare, térã jakyhyjetereíramo ñañeʼẽ jave chupekuéra la jagueroviávare, ikatu opensa hikuái nañandegustaguasuiha ñane rrelihión. Térã ikatu voi oñembohory ha ñandetrata vai hikuái ñatĩeterei haguére. Péro jahechaukáramo ndajadudaiha ni michĩmi ñane kreénsiagui, ha ñañeʼẽrõ jajapoháicha jepi normálmente, ifasilvéta chupekuéra ñanderrespeta hag̃ua”.

18. ¿Mbaʼéichapa rehechaukáta reñehaʼãmbaiteha Ñandejára ndesalva hag̃ua?

¹⁸ Jahechaháicha, ndete eñehaʼã vaʼerã Ñandejára ndesalva hag̃ua, ha upéva ndahaʼéi vyrorei. Upearã tekotevẽ relee ha rejepyʼamongeta la Bíbliare, eñemboʼe Jehovápe ha epensa umi mbaʼe haʼe ojapómavare nderehehápe. Koʼã mbaʼe nepytyvõta ani hag̃ua reduda Jehová haʼeha ne amígo, ha nekyreʼỹvéta reñeʼẽ hag̃ua ótrope ne kreénsiare (elee Salmo 73:28).

19. ¿Mbaʼérepa ovale la péna ñañehaʼãmbaite Ñandejára ñandesalva hag̃ua?

¹⁹ Jesús heʼi vaʼekue: “Oĩramo chemoirũséva toñembyesarái ijehegui, tohupi ijapére ijyvyra pohýi, ha tachemoirũ meme” (Mat. 16:24). Ikatu hag̃uáicha ñamoirũ Jesúspe, ñañemeʼẽ vaʼerã Jehovápe ha jajevautisa. Péicha jarekóta oportunida jahupyty hag̃ua hetaiterei mbaʼe porã koʼág̃ama voi, ha amo gotyove katu jaikóta opa árare Ñandejára múndo pyahúpe. Upévare, ejapókena ikatúva guive Ñandejára ndesalva hag̃ua.