¿Releépa raʼe umi rrevísta Ñemañaha osẽ ramovéva? Ehechamína ikatúpa nemanduʼa koʼã mbaʼére:

¿Ohechaukápa la Biblia Ñandejára ontendeha umi mbaʼe jahasáva?

Umi israelita oikórõ guare esklávoramo Egíptope, Ñandejára ohecha vaʼekue ohasa asyha hikuái ha osufri hendivekuéra (Éx. 3:7; Is. 63:9). Ñandejára ningo ñandeapo ijoguahárõ, upévare ñande avei ikatu ñantende ñande rapicha ohasa asy jave. Jehová ohechakuaa la jahasáva, ñañandúrõ jepe nañamereseiha ñanderayhu (wp18.3 páh. 8, 9).

¿Mbaʼéichapa umi mbaʼe Jesús omboʼéva oipytyvõ umi héntepe ani hag̃ua omboyke hapichápe idiferénte haguére chuguikuéra?

Jesús tiémpope umi judío omboyke vaʼekue hapicha ótro tetãyguápe. Péro Jesús heʼi idisipulokuéra iñumílde vaʼerãha ha ohechauka ivaietereiha oĩramo omboykéva hapichápe. Upévare haʼe heʼi vaʼekue chupekuéra ojotrata vaʼerãha oñoermánoicha (w18.06 páh. 9, 10).

¿Mbaʼépa ñaaprende jaikuaáramo mbaʼérepa Moiséspe noñepermitíri kuri oike pe Tiérra Prometídape?

Moisés haʼe kuri Jehová amigoite (Deut. 34:10). Péro opa mboyvemi umi 40 áño umi israelita oĩ hague pe desiértope, haʼekuéra oñepyrũ jey ojeplagea ndahiʼýi haguére. Upémarõ Ñandejára heʼi Moiséspe oñeʼẽ hag̃ua pe itápe, péro upéva rangue, haʼe ojagarra oinupã pe ita. Jehová katuete ipochýne raʼe Moisés naiñeʼẽrendúi haguére chupe, térã katu nomombaʼeguasúi rupi chupe ojapo haguére upe milágro (Núm. 20:6-12). Upéva ñanemboʼe iñimportanteha ñaneñeʼẽrendu Jehovápe ha siémpre ñamombaʼeguasu vaʼerãha chupe (w18.07 páh. 13, 14).

¿Mbaʼéicha rupípa ikatu jaju jahusga ñande rapichápe ipíntare?

Oĩ mbohapy mbaʼe ikatúva oafekta la ñapensáva ñande rapicháre: irrása térã inasionalida, oimépa ipláta térã imboriahu, ha mboy áñopa oreko. Iñimportanteterei ningo ñañehaʼãmbaite ani hag̃ua ñamboyke avavépe ha jahecha chupekuéra Jehová ohechaháicha (Hech. 10:34, 35) (w18.08 páh. 8-12).

¿Mbaʼéichapa umi ermáno ijedáva ikatu oipytyvõ ótrope?

Oimérõ peteĩ ermáno ijedáma ha orresivi peteĩ kámbio de asignasión, Jehová katuete osegíta omombaʼeterei chupe. Upe ermáno ikatu ojapo heta mbaʼe oipytyvõ hag̃ua ótrope. Por ehémplo, ikatu oipytyvõ umi ermána ména ndahaʼéivape Testígo, umi inaktívope, ikatu ojapo heta estúdio bíblico ha oñehaʼã ombaʼapove Jehová servísiope (w18.09 páh. 8-11).

¿Mbaʼe mbaʼépa jareko pe ñande Kit de Enseñánzape?

Oĩ umi tarhéta de kontákto, invitasionkuéra, 8 tratádo iporãitereíva ha avei umi rrevísta Ñemañaha ha ¡Despertad! Jareko avei folletokuéra, mokõi lívro ñambostudia hag̃ua umi héntepe ha 4 vidéo ideprovechoitereíva, umíva apytépe pe vidéo ¿Mbaʼérepa restudia vaʼerã la Biblia? (w18.10 páh. 16).

¿Mbaʼépa heʼise “ejogua pe añetegua”, oĩva Proverbios 23:23-pe?

Añetehápe natekotevẽi japaga ñaaprende hag̃ua pe añetegua, péro tekotevẽmante ñañehaʼã ha jaipuru ñane tiémpo ikatu hag̃uáicha jareko upéva (w18.11 páh. 4).

¿Mbaʼépa ikatu ñaaprende Oseas otrata lájagui hembireko Gómerpe?

Gómer heta vése omoakãratĩ vaʼekue Oséaspe, péro haʼe operdona chupe ha osegi hendive. Peteĩ kristiáno térã kristiána oúramo hekovai, hembireko térã iména ikatu avei odesidi operdona chupe, ha oñepyrũrõ oreko jey hendive rrelasión sexuál, ndorekovéima váse bíblica ojedivorsia hag̃ua (w18.12 páh. 13).