Deuteronomio 22:25-27-pe noñeñeʼẽi oñekondena vaʼerãpa térãpa nahániri pe kuimbaʼépe, pórke ojekuaa porãma ojapo hague pe mbaʼe vai. Ko léi ojepuru ojehecha hag̃ua oimépa iñinosénte pe kuñataĩ. Jahechamína mbaʼe rehepa oñeñeʼẽ upe téxto mboyve.

Unos kuánto versíkulo upe mboyve oñeñeʼẽ peteĩ kuimbaʼe orekóvare rrelasión sexuál “pe siudápe” peteĩ kuñataĩ oñekomprometévandi. Upe tiémpope umi oñekomprometéva haʼetéma voi omendáva, upévare pe kuimbaʼépe oñekondena oporomoakãratĩ haguére. ¿Ha pe kuñataĩ? Haʼe “ndosapukáiri kuri pe siudápe ojerure hag̃ua sokórro”, upévare oñekondena avei chupe. Osapukáirire, katuete oĩne ohendúva ha ohóta kuri odefende chupe. Upéicharõ mokõivévape oñekondena oporomoakãratĩ haguére (Deut. 22:23, 24).

Upe rire pe léi oñeʼẽ peteĩ situasión idiferéntevare: “Oiméramo pe kuimbaʼe otopa raʼe ñúme pe kuñataĩ oñekomprometéma vaʼekuére omenda hag̃ua, ha pe kuimbaʼe mbaretépe ojagarra ha oviola chupe, upéicharõ ojejuka vaʼerã pe kuimbaʼépe añoiténte, pe oviola vaʼekuépe pe kuñataĩme, péro ndapejapói vaʼerã mbaʼeve pe kuñataĩre, pórke pe kuñataĩ ndojapói kuri mbaʼeve ivaíva omerese hag̃ua omano. Pe ojejapo vaʼekue hese haʼeténte avei peteĩ kuimbaʼe oataka jave hapichápe ha ojuka. Pórke haʼe otopa kuri ñúme pe kuñataĩ oñekomprometéma vaʼekuépe, ha osapukáiramo jepe ndaipóri avave osokorre vaʼerã chupe” (Deut. 22:25-27).

Umichagua kásope umi hués oguerovia pe kuñataĩme. Oguerovia haʼe ‘osapukái hague ha ndaipóri hague avave osokorre vaʼerã chupe’. Upéicha rupi noñekondenái chupe ha ndojeʼéi haʼe oporomoakãratĩ hague. Péro pe kuimbaʼépe oñekondena oporomoakãratĩ ha oviola haguére pe kuñataĩme, pórke haʼe “mbaretépe ojagarra ha oviola chupe”.

Upéicharõ, ko léi ojepurúramo jepe ojehecha hag̃ua oimépa pe kuñataĩ iñinosénte térã nahániri, pe rreláto ohechauka porã pe kuimbaʼe haʼeha kulpávle, pórke oporomoakãratĩ ha oviola pe kuñataĩme. Ikatu ñaime segúro umi hués oaverigua porã raẽ hague la oiko vaʼekue, ha upéi ohecha mbaʼépa Ñandejára heʼíma vaʼekue, odesidi hag̃ua mbaʼépa ojapóta (Éx. 20:14; Deut. 13:14; 17:4).