Amalisia nahániri. Satanás ndeʼíri Évape hoʼúramo pe yva Ñandejára oproivi vaʼekue, haʼe omanotaha ha hiʼálma osegitaha oikove ótro lugárpe. Pe mbói rupive Satanás oasegura Évape hoʼúramo pe yva ‘ni mbaʼevéicharõ nomanomoʼãiha’. Satanás ningo ontendeka Évape osegitaha oikove, ha añetehápe oiko porãvetaha ko yvy ape ári ha noikotevẽmoʼãiha Ñandejárare (Gén. 2:17; 3:3-5).

Oiméramo Edénpe noñepyrũi pe enseñánsa heʼíva pe álma nomanoiha, ¿moõpa oñepyrũ raʼe upéicharõ? Añetehápe ndajaikuaaporãi. Ñande jaikuaa umi rrelihión japu oñehundi hague pe dilúviope Noé tiémpope. Noé ha ifamília ningo oservi vaʼekue Ñandejárape, ha haʼekuéra añoite ojesalva pe dilúviope, upévare umi enseñánsa fálsa opaite vaʼekue upérõ.

Upéicharõ, pe kreénsia heʼíva ñane álma nomanoiha voi, térã pe inmortalida del álma, oñepyrũne rakaʼe pe dilúvio rire. Ñandejára okambiapárõ guare umi hénte idióma Babélpe, haʼekuéra isarambipa “ko yvy tuichakuére”. Upérõ katuete umi hénte ogueraha raʼe hendivekuéra pe kreénsia heʼíva yvyporakuéra orekoha peteĩ álma nomanóiva (Gén. 11:8, 9). Tahaʼe haʼéva pe moménto oñepyrũ hague upe enseñánsa japu, ikatu ñaime segúro Satanás, “pe japu ruvicha”, omoñepyrũ hague upéva, ha katuete ovyʼaitereíne raʼe oñemosarambi haguére opárupi ko enseñánsa japu (Juan 8:44).