¿NDÉPA eréne ndejehe ndeagradesidoha? Iñimportanteterei ningo káda uno ñapensa ko pregúntare. La Biblia heʼi vaʼekue ñane tiémpope oĩtaha heta hénte ‘imalagradesídova’ (2 Tim. 3:2). Oiméne jaikuaa algúna persóna opensáva ótro ojapónte vaʼerãha voi entéro mbaʼe hesehápe, ha oimoʼã natekotevẽiha oagradese ótrope umi mbaʼe orresivívare. ¡Ajépa ndaigustoiete ñaime peichagua persónandi!

Péro Jehová heʼi isiervokuérape: “Siémprekena pehechauka pendeagradesidoha” (Col. 3:15). Ha añetehápe ningo jahupyty heta mbaʼe porã ñandeagradesídoramo. Jahechamína mbaʼe mbaʼépa ikatu jahupyty.

Iñimportánte ñandeagradesído, pórke upéva ñanepytyvõ ñañeñandu porãve hag̃ua ñanendive voi. ¿Mbaʼérepa ikatu jaʼe upéva? Ikatu ñamoĩ peteĩ ehémplo: Oiméramo peteĩ persóna ojapo raʼe álgo ñanderehehápe, ñande ñañandu jaagradese vaʼerãha chupe, ha jahechakuaa upe persóna ojapo hague upe mbaʼe ñandevalora ha opensa rupi ñamereseha upéva. Upe persóna ohechauka hína ojepyʼapyha ñanderehe, ha jahechakuaávo upéva, katuete ñañeñandu porãta. Ikatu jaʼe Rut oñeñandu hague upéicha. Boaz ipojerárõ guare hendive, Rut katuete ovyʼáne raʼe ohechakuaávo oĩha peteĩ persóna ojepyʼapýva hese (Rut 2:10-13).

Koʼýte ningo iñimportánte jaagradese Ñandejárape umi mbaʼe ojapóvare ñanderehehápe. Katuete oiméne ñande ñapensa jepi voi entéro umi rregálo porãite Jehová omeʼẽ vaʼekuére ñandéve ha osegíva omeʼẽ (Deut. 8:17, 18; Hech. 14:17; 1 Tes. 5:18). Péro jaiko rangue ñapensa a la apuráda umi mbaʼe porã oúvare Ñandejáragui, iporãta jajepyʼamongetáramo mbaʼeichaitépa Jehová ipojera ñanendive ha umi jahayhúvandi. Upéva ñanepytyvõta ikatu hag̃uáicha ñamombaʼeve ñande Apoharépe, ha avei jahechakuaa hag̃ua mbaʼeichaitépa haʼe ñanderayhu ha ñandevalora (1 Juan 4:9).

Péro ani ñañekontenta jajepyʼamongeta haguérente umi vendisión jarresivívare Jehovágui ha mbaʼeichaitépa ipojera ñanendive, síno jaagradese vaʼerã chupe imbaʼeporã haguére ñanendive (Sal. 100:4, 5). Ojeʼe voíngo la ñandeagradesídoramo javyʼaveha.

Iñimportánte avei ñandeagradesído, pórke péicha ñamombarete umi amista jarekóva. Entéro ningo jaipota umi hénte ñandevalora. Ñande jaagradeséramo ñande pyʼaite guive peteĩ persónape ojapo haguére álgo iporãva ñanderehehápe, mokõivéva ñaneunidove (Rom. 16:3, 4). Avei umi persóna ijagradesídova ojepokuaa oporopytyvõ. Haʼekuéra ohechakuaa ótro imbaʼeporã hague hendivekuéra, ha upéva omomýi chupekuéra imbaʼeporã hag̃ua avei ótrondi. Añetehápe ñanembovyʼa ñaipytyvõramo ótrope, ha péicha jahechakuaa oñekumpliha la Jesús heʼi vaʼekue: “Javyʼaiteve ñameʼẽvo, ñandéve oñemeʼẽ rangue” (Hech. 20:35).

Universidad de Califórniape ojejapo vaʼekue peteĩ estúdio ojekuaa hag̃ua mbaʼérepa iñimportánte ñandeagradesído. Peteĩva umi karai odirihíva ko estúdio hérava Robert Emmons heʼi: “Ñandeagradesído hag̃ua, jahechakuaa vaʼerã ñadependeha ojuehe. Sapyʼánte ñameʼẽ ha sapyʼánte oñemeʼẽ ñandéve”. Añetehápe ningo upeichaite hína, ikatu hag̃uáicha jaikove ha javyʼa ñadepende ótrore hetaiterei hendáicha. Por  ehémplo, ikatu oime ótra persóna omeʼẽ ñandéve jaʼu vaʼerã ha oñatende ñanderehe ñanderasy jave (1 Cor. 12:21). Umi persóna ijagradesídova ohechauka omombaʼeha umi ótro ojapóva hesehápe. Upéicharõ, ¿rejepokuaápa reagradese umi mbaʼe ojejapóva nderehehápe?

Avei iñimportánte ñandeagradesído, pórke upéva ñanepytyvõ ñandepositivove hag̃ua ha péicha ndajaikói ñañekonsentra umi mbaʼe vaíre. Ikatu jaʼe ñane ménte ojoguaha peteĩ koladórpe, oiporavo mbaʼe rehepa oñekonsentráta ha mbaʼe mbaʼépa ombohasátante. Umi persóna ijagradesídova oñekonsentrave umi mbaʼe porãre, ojesareko rangue umi provlémare. Amáske ñandeagradesído jahechave umi mbaʼe porã, ha upéva koʼýte ñanemomýi ñandeagradesidove hag̃ua. Jajesarekóramo umi mbaʼe porã ikatúvare jaagradese, oñekumplíta ñanderehe apóstol Pablo heʼi vaʼekue: “Siémprekena pevyʼa ñande Ruvicha servísiope” (Filip. 4:4).

Ñandeagradesídoramo ndajaikomoʼãi ñapensa mbaʼe vaírente tódo el tiémpo. Por ehémplo, ndaikatúi ningo ñandeagradesído ha avei ñaneenvidióso, ñandepyʼaro térã ñañembyasy. Avei umi ijagradesídova ndoikói pláta ha mbaʼerepy rapykuéri. ¿Mbaʼérepa? Pórke haʼekuéra omombaʼe la orekóva ha ndoikói oipota potave umi mbaʼerepy (Filip. 4:12).

Ñande kristianokuéra jaikuaa Satanás oipotaitereiha ñañembyasy ha ñañedesanima umi mbaʼe vai jahasávare koʼã ára pahápe. Haʼe ovyʼaitereíta ñande jajúramo jajeplagea manterei ha ñañekonsentra umi mbaʼe vaírente. Upéva oikóramo ñanderehe, ijetuʼuvéta umi héntepe ñanerendu hag̃ua japredika jave chupekuéra umi notísia porã. Añetehápe ñandeagradesídoramo jahechauka hína ñande rekovépe jarekoha umi mbaʼe porã oúva Ñandejára espíritugui. Por ehémplo, javyʼa umi mbaʼe Jehová omeʼẽvare ñandéve, ha jajerovia haʼe okumplitaha umi mbaʼe porã oprometéva (Gál. 5:22, 23).

Ñande jaservíva Jehovápe provávlemente jahechakuaa siertoha umi mbaʼe ñaanalisa vaʼekue ko artíkulope ha ohechaukáva mbaʼérepa ñandeagradesído vaʼerã. Upéicharõ jepe, jahechakuaa avei sapyʼánte ijetuʼuha ñandeagradesído ha ñandepositívo. Péro aníkena ñañedesanima upe haguére. ¡Ñande ikatu ñandeagradesído! ¿Mbaʼépa ñanepytyvõta upearã? Káda día ñañemotiémpo vaʼerã ñapensa hag̃ua umi mbaʼe jarekóvare ha ikatúvare jaagradese. Amáske jajapo upéva, ifasilvéta ñandéve ñandeagradesído hag̃ua. Péicha javyʼavéta umi persóna oñekonsentrávagui umi provlémarente. Jajepyʼamongetákena umi mbaʼe porã Ñandejára ha umi ótro ojapóvare ñanembovyʼa ha ñanemokyreʼỹ hag̃ua. Ikatu voi jajapo peteĩ lísta ha ñaanota pype mokõi térã mbohapy mbaʼe ikatúvare jaagradese káda día.

Umi sientífiko heʼi ñande jajepokuaáramo jaagradese ótrope okambiaha ombaʼapo lája ñande serévro, ha upéicha rupi ifasilve ñandéve ñañeñandu porã ha ñandepositívo. Umi persóna ijagradesídova katuete ovyʼave. Upévare, jajepyʼamongetákena umi mbaʼe porã jarresivívare, jadisfruta umi mbaʼe porã jahasáva ha siémprekena ñandeagradesído. Ñapensa rangue ojejapónte vaʼerãha voi entéro mbaʼe ñanderehehápe, ‘jaagradese vaʼerã Jehovápe, pórke haʼe ivuenoiterei’ ha ‘siémpre jahechauka ñandeagradesidoha’ (1 Crón. 16:34; Col. 3:15).