1. ¿Mbaʼéichapa ñañeñandu jajepyʼamongetáramo la Jehová oprometévare ñandéve?

 JEHOVÁ ningo opromete umi iñeʼẽrendúvape chupe orekotaha “vída etérna” (Rom. 6:23). Jajepyʼamongeta jave upe mbaʼe porãite Jehová oprometévare ñandéve, amás día jahayhuve chupe. ¿Mbaʼérepa haʼe omeʼẽse ñandéve ko rregálo? Pórke hakateʼỹeterei ñanderehe ha ndoipotái voi ni peteĩ iñamígo omano chugui.

2. ¿Mbaʼéichapa ñanepytyvõ jaikuaávo ikatutaha jaikove pára siémpre?

² Ñandejára opromete rupi ñandéve ikatuha jaikove pára siémpre, ñande ikatu ñaaguanta umi situasión ijetuʼúva jahasáva. Ha oĩramo jepe umi ñane enemígo ñaneamenasáva ñandejukataha, ñande lomímonte jasegíta jaservi Jehovápe. ¿Mbaʼérepa? Pórke ñande jaikuaa ñandefiélramo Jehovápe ñamano meve, haʼe ikatutaha ñanemoingove jey ha jarekotaha la esperánsa núnka mas nañamanovéivo (Juan 5:28, 29; 1 Cor. 15:55-58; Heb. 2:15). ¿Mbaʼérepa ñaimekuaa segúro ikatuha jaikove pára siémpre? Jahechamína koʼág̃a unos kuánto mbaʼe ohechaukáva ñandéve upéva.

3. ¿Mbaʼérepa ñaimekuaa segúro Jehová ikatuha ñanemoingove pára siémpre? (Salmo 102:12, 24, 27).

³ Ñande jaikuaa Jehová ikatutaha ñanemoingove pára siémpre, pórke chugui voi ou hína la vída ha haʼe voi oikove pára siémpre (Sal. 36:9). Unos kuánto téxto oĩva la Bíbliape ohechauka ñandéve Jehová siémpre oexisti hague ha siémpre oexistitaha. Salmo 90:2 heʼi Jehová oĩha “ymaite guive ha opa ára g̃uarã”, ha Salmo 102 heʼi avei upéicha hese (elee Salmo 102:12, 24, 27). Ha proféta Habacuc heʼi vaʼekue ñande Ru  yvagapeguápe: “Jehová, nde ningo siémpre reexisti vaʼekue, nde hína che Dios Sánto ha núnka neremanomoʼãi” (Hab. 1:12).

4. ¿Mbaʼérepa natekotevẽi jajepyʼapy ijetuʼúramo ñantende Jehová siémpre oexisti hague? Emyesakã.

⁴ ¿Ndévepa ijetuʼu rentende hag̃ua Jehová siémpre oexisti hague ha siémpre oexistitaha? (Is. 40:28). Heta persónape g̃uarã ningo ijetuʼu ontende hag̃ua upéva. Elihú heʼi vaʼekue Ñandejárare: “Avave ndaikatúi okonta mboy áñomapa haʼe oikove” (Job 36:26). Péro ñande nañantendéi haguére peteĩ mbaʼe ndeʼiséi hína ndasiertoiha. Por ehémplo, ñande nañantendeporãiramo jepe mbaʼéichapa ofunsiona pe elektrisida, upéva ndeʼiséi hína ndoexistiriha, ¿ajépa? Upéicha avei ikatu ndaijái ñane akãme la Jehová siémpre oexisti hague ha siémpre oexistitaha, péro upéva ndeʼiséi ndasiertoiha (Rom. 11:33-36). Haʼe ningo oexistíma vaʼekue voi ndaipóri mboyve mbaʼeve ko univérsope, umíva apytépe oexisti mboyve pe kuarahy ha estrellakuéra. Ikatu ningo ñaime segúro Jehová ‘ojapo hague ko yvy ipodér rupive’, ha haʼe oexistíma hague ‘oipyso mboyve pe yvága’ (Jer. 51:15; Hech. 17:24). ¿Mbaʼérepa avei ñaimekuaa segúro ikatuha jaikove pára siémpre?

5. ¿Mbaʼe esperánsapa oreko vaʼekue Adán ha Eva?

⁵ Jaikuaa ningo umi mbaʼe Jehová okrea vaʼekue ko yvy ape ári omano vaʼerãha kon el tiémpo, péro ñandéve nañandeapói vaʼekue upéicha. Haʼe oipota voi jaikove pára siémpre. Péro Jehová heʼi porã vaʼekue Adánpe: “Ndereʼúi vaʼerã pe yva orekóva pe yvyramáta opermitíva ojekuaa mbaʼépa iporã ha mbaʼépa ivai, pórke reʼuha díape katuete remanóta” (Gén. 2:17). Adán ha Eva iñeʼẽrendúrire Jehovápe, haʼekuéra nomanói vaʼerãmoʼã kuri. Upévare ikatu jaʼe tiémpo rire, Jehová opermitíta hague chupekuéra “hoʼu pe yva oĩva pe yvyramáta jeikove reheguáre”. Upéva heʼiséta kuri Jehová oaseguraha chupekuéra ‘oikovetaha opa ára g̃uarã’ (Gén. 3:22). b

6, 7. a) ¿Mbaʼépa ohechauka ñandéve Jehová nañandekreái hague ñamano hag̃ua? b) ¿Mbaʼépa nde rejapose ág̃a reikove vove pára siémpre? (Ehecha umi taʼangakuéra).

⁶ Umi sientífiko ningo otopa umi pruéva ohechaukáva ñande serévro orekoha la kapasida oñongatu hag̃ua hetaiterei informasión. Hetave voi umi mbaʼe ñande ikatúvagui ñaaprende térã jaikuaa jaikove aja. Pe áño 2010-pe peteĩ rrevísta sientífika Estados Unidospegua heʼi ñande serévro ikatuha oñongatu peteĩ vidéo ipukúva mas de 300 áño.  Hiʼarive péva pe kálkulo ikatu voi saʼi hína. Péro koʼã kálkulo ohechauka Jehová ojapo porãiterei hague la ñande serévro, ha ikatuha oñongatu hetaitereive informasión la oñongatúvagui 70 térã 80 áñopente (Sal. 90:10).

⁷ Jehová ningo ñandekreárõ guare omeʼẽ vaʼekue ñandéve pe deséo jaikovese hag̃ua pára siémpre (Ecl. 3:11). Upévare ningo pe ñemano ñane enemigoite voi (1 Cor. 15:26). Ñapensamína ko mbaʼére: Ñamoĩna chupe ñanderasyeteha, ¿ñandépa upéicha jave ñañentregántema ha ndajajapói mbaʼevete? Nahániri. Upéva rangue pyaʼe voi jaháta doktórpe ha jaʼúta umi pohã omeʼẽva ñandéve ikatu hag̃uáicha jakuera jey. Ñande ningo jajapo voi opa ikatúva ani hag̃ua ñamano. Ha omano jave ñandehegui peteĩ jahayhúva katu ñañeñandu vaieterei ha upéva ndohasái voi sapyʼaitépe (Juan 11:32, 33). Jaikuaa porãiterei ningo ñande Kreadór ñanderayhuetereiha, ha upévare haʼe nomeʼẽmoʼãi kuri ñandéve pe deséo ha kapasida jaiko hag̃ua pára siémpre, ndahaʼéirire upéva la ipropósito ñandéve g̃uarã. Péro jareko hína hetave rrasón jaguerovia hag̃ua ikatuha jaikove pára siémpre. Jahechamína umi mbaʼe Jehová ojapóma vaʼekue ha ojapóva hína koʼág̃a, ohechaukáva haʼe nokambiaiha pe ipropósito oguereko vaʼekue iñepyrũme.

8. ¿Mbaʼépa oasegura ñandéve Isaías 55:11?

⁸ Adán ha Eva ningo opeka vaʼekue, ha ikulpakuérare entéro ifamiliakuéra omano. Péro upéva ndeʼiséi Jehová propósito opyta rei hague (elee Isaías 55:11). Haʼe ningo oipotaiterei enterove persóna oguereko la oportunida oikove hag̃ua pára siémpre. ¿Mbaʼéichapa ñande  jaikuaa upéva? Umi mbaʼe Jehová heʼíva ha ojapóva rupive okumpli hag̃ua ipropósito.

9. ¿Mbaʼe promésapa ojapo Ñandejára? (Daniel 12:2, 13).

⁹ Jehová opromete haʼe omoingove jeytaha entéro umi omano vaʼekuépe, ha omeʼẽtaha chupekuéra la oportunida oikove hag̃ua pára siémpre (Hech. 24:15; Tito 1:1, 2). Job oĩ vaʼekue segúro Jehová omoingovesetereimaha umi omano vaʼekuépe (Job 14:14, 15). Proféta Daniel oikuaa porã vaʼekue umi omanóva oikove jeytaha ha orekotaha la oportunida oikovévo pára siémpre (Sal. 37:29; elee Daniel 12:2, 13). Umi judío avei oikuaa porã vaʼekue Jehová ikatuha omeʼẽ pe “jeikove opaveʼỹva” umi isiervokuéra iñeʼẽrendúvape (Luc. 10:25; 18:18). Jesús ningo heta vése oñeʼẽ kuri ko promésare, ha chupe voi oñemoingove jey vaʼekue (Mat. 19:29; 22:31, 32; Luc. 18:30; Juan 11:25).

10. ¿Mbaʼépa ohechauka ñandéve umi rresurreksión oikóma vaʼekue? (Ehecha pe taʼanga).

¹⁰ Jehová ningo omeʼẽ vaʼekue ñandéve la vída, ha avei oreko la kapasida omoingove jeývo umi omano vaʼekuépe. Haʼe omeʼẽ vaʼekue upe podér proféta Elíaspe ikatu hag̃uáicha omoingove jey peteĩ viúda memby oikóva Saréptape (1 Rey. 17:21-23). Tiémpo rire, proféta Eliseo rupive Jehová omopuʼã vaʼekue peteĩ kuñakarai Sunemgua membýpe (2 Rey. 4:18-20, 34-37). Koʼãva ha hetave rresurreksión oiko vaʼekue ohechauka porãiterei ñandéve Jehová oguerekoha pe podér omoingove jey hag̃ua umi omano vaʼekuépe. Ha Jesús oĩrõ guare ko yvy ape ári ohechauka porã kuri Jehová omeʼẽ hague avei chupe upe podér (Juan 11:23-25, 43, 44). Koʼág̃a Jesús oĩma yvágape ha oñemoĩma ipoguýpe “entéro mbaʼe oĩva yvágape ha ko yvy ape ári”. Upéicha rupi haʼe ikatúta okumpli pe ipromésa: “Enterove umi oĩva pe sepultúrape” oikove jeýta oguereko hag̃ua la oportunida oikovévo pára siémpre (Mat. 28:18; Juan 5:25-29).

11. ¿Mbaʼéichapa Jesús omano rupi ñanderehehápe omeʼẽ ñandéve la oportunida jaikove hag̃ua pára siémpre?

¹¹ ¿Mbaʼérepa Jehová opermiti raʼe pe Itaʼýra ohayhuetéva omano asyete? Jesús omeʼẽ la rrespuésta heʼírõ guare: “Ñandejára ningo ohayhueterei umi héntepe, upévare ontrega Itaʼýra peteĩete orekóva, péicha entéro umi ohechaukáva ojeroviaha hese noñehundimoʼãi síno ikatúta oikove pára siémpre” (Juan 3:16). Jehová ningo omeʼẽ vaʼekue Itaʼýra omano hag̃ua ñanderehehápe ikatu hag̃uáicha ñande jajei pe pekádo poguýgui. Upéicha haʼe omeʼẽ ñandéve la oportunida jaiko hag̃ua pára siémpre (Mat. 20:28). Apóstol Pablo oexplika kuri ko mbaʼe heʼívo: “Pe ñemano ningo oñepyrũ peteĩ kuimbaʼe rupive, upéicha avei umi omanóvape oñemoingove jey peteĩ kuimbaʼe rupive. Adán káusare enterove omano, upéicha avei Cristo rupive enterovépe oñemoingove jeýta” (1 Cor. 15:21, 22).

12. ¿Mbaʼépa oipurúta Jehová okumpli hag̃ua ivolunta?

¹² Jesús omboʼe vaʼekue isegidorkuérape ojerure hag̃ua tou Ñandejára Rréino ha oñekumpli hag̃ua ivolunta ko yvy ape ári (Mat. 6:9, 10). Por ehémplo, haʼe oipota ñande jaikove pára siémpre ko yvy ape ári. Okumpli hag̃ua upéva, Jehová onombra vaʼekue Itaʼýra Jesucrístope Rréi upe Rréinope. Avei Jehová ombyaty oikóvo 144.000 persónape oipytyvõ hag̃ua Jesúspe okumpli hag̃ua ivolunta (Apoc. 5:9, 10).

13. ¿Mbaʼépa Jehová ojapo hína koʼág̃a, ha mbaʼépa ñande jajapo vaʼerã?

¹³ Jehová ningo koʼág̃a ombyaty hína avei “peteĩ aty guasu”, ha omboʼe chupekuéra oiko hag̃ua Irréino poguýpe (Apoc. 7:9, 10; Sant. 2:8). Koʼág̃arupi ko múndo ojedividipa, oiko gérra ha umi hénte ndochaʼéi ojuehe. Péro  umi oĩva pe aty guasúpe katu oñehaʼãmbaite ojogueraha porã enterovéndi, tahaʼe haʼéva la ipaís térã itrívu. Ha umi mbaʼe ojapóvare hikuái ohechauka ojapomaha arádo ijespadakuéragui (Miq. 4:3). Umi oĩva pe aty guasúpe oho rangue gerrahápe, oipytyvõ la héntepe oikuaa hag̃ua Ñandejárape ha umi mbaʼe haʼe ojapótava (1 Tim. 6:19). Haʼekuéra ningo oapoja Ñandejára Rréino, ha upeakuére ikatu ihentekuéra oñemoĩ hesekuéra térã ijetuʼu hendivekuéra ekonómikamente. Péro Jehová oasegura chupekuéra orekotaha umi mbaʼe oikotevẽva (Mat. 6:25, 30-33; Luc. 18:29, 30). Koʼã mbaʼe ohechauka ñandéve añetehápe oexistiha Ñandejára Rréino ha osegitaha okumpli Jehová propósito.

14, 15. ¿Mbaʼéichapa Jehová okumplíta ipromésa ohundietévo pára siémpre pe ñemano?

¹⁴ Jesús ningo koʼág̃a haʼéma Rréi yvágape Ñandejára Réinope, ha okumplipaitéta umi promésa Jehová ojapo vaʼekue (2 Cor. 1:20). Áño 1914 guive Jesús oganáma ohóvo iñenemigokuérape (Sal. 110:1, 2). Haʼe ha umi ogovernátava hendive, koʼẽrõitéma ohundipaitéta entéro umi hénte añáme (Apoc. 6:2).

¹⁵ Jesús goviérno poguýpe umi 1.000 áño aja umi omano vaʼekue oñemoingove jeýta, ha umi persóna iñeʼẽrendúva katu perféktotama. Ha opávo umi 1.000 áño, pe pruéva finál rire, umi persóna ihústovape Jehová ‘omeʼẽta ko yvy ha oikóta pype opa ára g̃uarã’ (Sal. 37:10,  11, 29). Oiko rire opa koʼã mbaʼe, oñehundíta pe “ñane enemígo ultimoite” haʼéva pe ñemano (1 Cor. 15:26).

16. ¿Mbaʼérepa prinsipálmente jaservi vaʼerã Jehovápe?

¹⁶ Jahecháma haguéicha ko artíkulope, la Biblia ohechauka porã ñandéve ñande ikatuha jaikove pára siémpre. Ko esperánsa ningo ñanepytyvõ jasegi hag̃ua ñandefiél Jehovápe koʼã ára paha ijetuʼuetévape. Péro jaipotáramo Jehová ñandeguerohory, ñande ndajaservíri vaʼerã chupe jaikoséguinte pára siémpre, síno jahayhúgui chupe ha Itaʼýra Jesúspe ñande pyʼaite guive (2 Cor. 5:14, 15). Pe mborayhu ñanemomýita jasegi hag̃ua iñehemplokuéra ha ñakomparti hag̃ua ótrondi pe esperánsa jarekóva (Rom. 10:13-15). Avei ñañehaʼãramo ñanembaʼeporã ñande rapichakuérandi ha nañapensái ñandejehénte, la ñane amista Jehovándi imbaretevéta, ha jasegíramo jajapo upéicha oikóta ñandehegui Jehová amígo pára siémpre (Heb. 13:16).

17. ¿Mbaʼe rresponsavilidápa jareko káda uno? (Mateo 7:13, 14).

¹⁷ Jehová ningo omeʼẽ ñandéve la oportunida jaikove hag̃ua pára siémpre. Péro ñande ñamoĩ vaʼerã avei la ñande párte jahupyty hag̃ua upéva, ha upearã jasegi vaʼerã jaguata pe tape oporoguerahávare jeikovépe (elee Mateo 7:13, 14). ¿Mbaʼéichapa nde reñeimahina jaikotaha ág̃a ikatu vove jaikove pára siémpre? Upéva jahecháta pe sigiénte artíkulope.