Jehová omanda vaʼekue umi ñande túa ypykuépe: “Pemyenyhẽ ko yvy ha peipuru”. Ha heʼívo upéicha ohechauka ko yvy kompletoitégui oikotaha peteĩ paraíso (Gén. 1:28). Ha umi oikótava pe múndo pyahúpe tekotevẽta avei okumpli ko mandáto. Péro ñanemanduʼa vaʼerã upe tiémpope ndaiporimoʼãiha peteĩ paraíso oĩ haguéicha pe hardín de Edénpe, síno oĩta hetaiterei mbaʼe ojejapo vaʼerã. Ñañepyrũta voi de nuevoite hína, por ehémplo ñamopotĩ ha ñamyatyrõta umi lugár koʼág̃a oñembyaipáva ohóvo. ¡Ajépa hetaite traváho jaguerekóta!

Upéva ñanemomanduʼa umi israelítare osẽ jeýrõ guare Babilóniagui oho jey hag̃ua hetãme. Haʼekuéra ningo la ijyvy opyta rei vaʼekue 70 áñore ha avave ndoikói upépe. Péro Isaías oprofetisa vaʼekue Jehová vendisión rupive ikatutaha omyatyrõ jey hikuái upe lugár. Upe profesía heʼi: “Pe desiértogui oikóta peteĩ hardín  neporãva, Edén iporã haguéicha. Umi ñu perõ iporãta Jehová hardín iporãháicha” (Is. 51:3). Ha upeichaite oiko, Jehová oipytyvõ umi israelítape omoporã jey hag̃ua pe ijyvy. Upéicha avei umi oikótava pe múndo pyahúpe oguerekóta Jehová vendisión, ha oñangarekóta ko yvýre ha omoporã jeýta. Péro koʼág̃ama voi ningo ikatu rehechauka rejaposeha koʼã traváho.

Por ehémplo ikatu eñehaʼã emantene potĩ ha ordenádo nde róga ha nde korapy. Upéva ikatu rejapo jepe ne vesinokuéra ndojapói upéicha. Ikatu avei rejeofrese remopotĩ hag̃ua pe Salón del Reino térã pe Salón de Asambléa. Ha ikatúramo rejeofresekuaa reservi hag̃ua kómo voluntário reipytyvõ hag̃ua oĩ jave umi desástre naturál. Rejapóvo koʼã mbaʼe rehechaukáta reipytyvõseha ne ermanokuérape. Upévare eñeporandumína: “¿Ikatúnepa koʼág̃ama voi aaprende peteĩ avilida ideprovéchotava chéve pe múndo pyahúpe?”.

Jesús omborresusita riremi Jairo rajýpe, heʼi vaʼekue oñemeʼẽ hag̃ua pe mitãkuñaʼíme álgo hoʼumi vaʼerã (Mar. 5:42, 43). Ikatu ningo upéva ndahaʼéi kuri la ijetuʼuetereíva, pórke upe mitãkuñaʼi oreko kuri 12 áñonte. Péro koʼág̃a epensami umi mbaʼe tekotevẽtavare jajapo ág̃a Jesús omoingove jey vove “enterove umi oĩva pe sepultúrape” (Juan 5:28, 29). La Biblia nomeʼẽiramo jepe heta detálle mbaʼéichapa oikóta pe rresurreksión, katuete umi orresusitáva oikotevẽta ñaipytyvõ chupekuéra oguereko hag̃ua hoʼu vaʼerã, ijaorã ha peteĩ hogarãmi. ¿Ikatúpa rehechauka koʼág̃ama voi reipytyvõseha ótrope? Oĩ hína algúna kósa koʼág̃ama voi ikatúva ejapo.

Oñeanunsia jave pe superintendénte de sirkuíto ovisitataha ne kongregasión, ¿ndépa rejeofrese reinvita hag̃ua chupe okaru hag̃ua nendive? O por ehémplo peteĩ betelita osẽramo Betélgui ha oñeasigna chupe ne kongregasiónpe, térã peteĩ superintendénte de sirkuíto omohuʼãramo iservísio kómo superintendénte, ¿ikatúnepa rejeofrese reipytyvõ hag̃ua chupekuéra otopa hag̃ua moõpa oikóta? Térã oiméramo nde reikohápe ojejapóta peteĩ asambléa rrehionál  térã espesiál, ¿ikatúnepa rejeofrese reipytyvõ hag̃ua oñepyrũ mboyve ha opa rire upe asambléa, térã remeʼẽ hag̃ua la vienvenída umi oúvape pe asambléa espesiálpe?

Heʼiháicha Hechos 24:15, ñande jaikuaa oĩtaha hetaiterei persóna orresusitátava, ha heta umíva apytégui ndoguerekói vaʼekue la oportunida oikuaa hag̃ua Jehovápe. Haʼekuéra ningo oguerekóta upe oportunida orresusita vove. a Entéro Ñandejára siérvo ifiélva ha oguerekóva experiénsia, opartisipáta pe traváho tuichavéva ojejapótavape oñemboʼe hag̃ua la héntepe (Is. 11:9). Charlotte, opredikámava Europa, América del Sur ha Áfricape, ohaʼarõitereíma og̃uahẽ upe moménto. Haʼe vyʼápe heʼi: “Che ningo amboʼeseterei umi persóna orresusitátavape. Por ehémplo apensa jave umi persóna oiko vaʼekuére yma, apensa mbaʼeichaitépa idiferénte vaʼeramoʼã la ivída oikuaárire Jehovápe. Upévare hiʼãitereíma chéve haʼe umi orresusitátavape mbaʼeichaitépa haʼekuéra ovyʼáta oservíramo Jehovápe”.

Oĩ ningo Ñandejára siérvo yma guare oiko vaʼekue Jesús ou mboyve, ha tekotevẽta ñamboʼe chupekuéra heta mbaʼe. Epensamíntena mbaʼeichaitépa ñanembovyʼáta jaguereko haguére pe priviléhio jaexplikávo Daniélpe mbaʼéichapa oñekumpli raʼe umi profesía haʼe oskrivi vaʼekue péro nontendéi (Dan. 12:8). Térã ñaipytyvõ Rut ha Noemípe oikuaa hag̃ua pe ifamiliarégui ou hague pe Mesías. Ajépa javyʼaite ikatúta haguére japartisipa pe traváho tuichavéva ojejapótavape oñemboʼe hag̃ua la héntepe. Ha upéva jajapóta pyʼaguapýpema, pórke ko múndo aña ndoexistimoʼãvéima.

¿Mbaʼépa nde ikatu rejapo koʼág̃a guivéma reime hag̃ua preparádo emboʼe hag̃ua umi orresusitátavape? Por ehémplo ikatu eñehaʼãmbaite ndekatupyryve eporomboʼe hag̃ua ha eñehaʼãmbaite resẽ predikasiónpe, haʼéva pe traváho tuichavéva ojejapóva koʼág̃a ñane tiémpope (Mat. 24:14). Ha oiméramo ndaikatúi koʼág̃a reapoja meme pe predikasión ndeedáma rupi térã ne situasión nopermitíri rupi ndéve, umi mbaʼe eñehaʼãmbaitéva rejapo ohechaukáta rejepreparamaha hína remboʼe hag̃ua umi orresusitátavape.

Iñimportanteterei ningo jajepyʼamongeta koʼã mbaʼére: “¿Chépa aikose pe múndo pyahúpe? ¿Chépa aipotaitereíma og̃uahẽ pe tiémpo ikatutahápe ajapo ko yvýgui peteĩ paraíso, ha avei akuida ha amboʼe umi orresusitátavape?”. ¡Koʼág̃ama voi eñehaʼãramo eaprende umi mbaʼe ideprovéchotava ndéve pe múndo pyahúpe, ehechaukáta hína rejepreparamaha reiko hag̃ua upépe!