1, 2. ¿Mbaʼéichapa Jehová ohechauka ipojeraha?

JEHOVÁ ningo imbaʼeporãiterei. Entéro mbaʼe oĩva ko yvy ape ári ningo imbaʼepaite, por ehémplo umi pláta, óro ha hetave mbaʼe. Haʼe omeʼẽmbaite avei ñandéve opa mbaʼe ñaikotevẽva jaikove hag̃ua (Sal. 104:13-15; Ageo 2:8). La Biblia omombeʼu Jehová heta vése oipuru hague milagrósamente koʼã mbaʼe omeʼẽ hag̃ua isiervokuérape la oikotevẽva.

² Por ehémplo, umi israelita oikórõ guare pe desiértore, 40 áñore Jehová omeʼẽ chupekuéra y ha mana hoʼu hag̃ua (Éx. 16:35). Upéicha rupi “ndofaltái chupekuéra mbaʼevete” (Neh. 9:20, 21, TNM). Proféta Eliseo rupive katu Jehová ojapo kuri peteĩ milágro ombohetave hag̃ua pe aséite oreko vaʼekue peteĩ viúda ifiélva chupe. Upéicha rupi pe viúda ikatu kuri ovende umi aséite opaga hag̃ua ideveha, ha hemby avei chupe osegi hag̃ua oñemantene haʼe ha imembykuéra (2 Rey. 4:1-7). Jehová omeʼẽ vaʼekue avei podér Jesúspe ojapo hag̃ua milágro, por ehémplo omongaru hag̃ua hetápe, ha inklúso okonsegi hag̃ua pláta oikotevẽrõ guare (Mat. 15:35-38; 17:27).

3. ¿Mbaʼépa jahecháta ko artíkulope?

 ³ Jehová ningo ikatu oipuru la tekotevẽva omantene hag̃ua entéro mbaʼe okrea vaʼekue. Upéicharõ jepe, haʼe ojerure isiervokuérape omeʼẽ hag̃ua umi mbaʼe orekóvagui oapoja hag̃ua iñorganisasión (Éx. 36:3-7; elee Proverbios 3:9). ¿Mbaʼérepa Jehová oipota ñameʼẽ chupe umi mbaʼe porã jarresivi vaʼekuégui chugui? ¿Mbaʼéichapa Jehová siervokuéra yma guare omeʼẽ vaʼekue ikontrivusión? ¿Mbaʼéichapa oipuru hína Jehová organisasión umi kontrivusión orresivíva? Ko artíkulope ñambohováita koʼã pregúnta.

4. ¿Mbaʼépa jahechauka hína Jehovápe ñameʼẽramo ñane kontrivusión?

⁴ ¿Mbaʼérepa ñameʼẽ Jehovápe umi mbaʼe jarekóvagui? Porque jahayhu ha ñamombaʼe chupe. Opokoiterei voi ñanderehe ñapensáramo opa mbaʼe haʼe ojapóvare ñanderehehápe. Siertoite la rréi David heʼi vaʼekue oexplikárõ guare mbaʼe mbaʼépa oñekotevẽ ojejapo hag̃ua pe témplo. Upérõ haʼe heʼi entéro mbaʼe jarekóva ouha Jehovágui, ha ñameʼẽramo chupe álgo, ñameʼẽ hína pe haʼe omeʼẽ vaʼekuégui ñandéve (elee 1 Crónicas 29:11-14).

5. ¿Mbaʼéichapa la Biblia ohechauka ñane kontrivusión rupive ñamombaʼeguasuha avei Jehovápe?

⁵ ¿Mbaʼérepa ñameʼẽ avei Jehovápe umi mbaʼe jarekóvagui? Pórke péicha ñamombaʼeguasu hína chupe. Peteĩ visiónpe apóstol Juan ohendu umi Ñandejára siérvo yvagapegua heʼiha: “Ñandejára Jehová, nde ningo remerese opavave nemombaʼe ha omeʼẽ ndéve tekomimbipa ha podér, nde rejapo rupi opa mbaʼe, ha nde reipotágui oĩ ha ojejapo vaʼekue opaite mbaʼe” (Apoc. 4:11). Añetehápe ningo Jehová omerese ñambotuicha ha jaadora chupe. Upévare ñameʼẽ vaʼerã chupe umi mbaʼe iporãvéva jarekóva. Moisés rupive Jehová heʼi vaʼekue umi israelítape ojapo hag̃ua tres fiésta káda áño. Umi fiésta omeʼẽ chupekuéra oportunida omombaʼeguasu hag̃ua Jehovápe iñofrénda rupive. Pe Léi heʼi vaʼekue voi: “Avave noñepresentái vaʼerã henondépe po nandi” (Deut. 16:16, TNM). Ñande avei koʼág̃a ñameʼẽramo Jehovápe ñande pyʼaite guive umi mbaʼe jarekóvagui, ñamombaʼeguasu hína chupe. Péicha jahechauka javalora ha jaapojaha umi mbaʼe ojapóva Jehová organisasión ko yvy ape ári.

6. ¿Mbaʼérepa ojapo porã ñanderehe ñameʼẽramo la jarekóvagui? (Ehecha pe taʼanga oĩva iñepyrũme).

⁶ Iporã ningo ñandepojera ha ani siémpre ñahaʼarõnte oñemeʼẽmba ñandéve (elee Proverbios 29:21). Por ehémplo, epensami peteĩ mitã ojoguaha peteĩ rregálo ituakuérape g̃uarã, ha upearã oipuru pe pláta haʼekuéra voi omeʼẽ vaʼekue chupe. Katuete itúa ha isy ovyʼaitereíta ifamília ojapo haguére upéva. Ñapensamína avei peteĩ prekursór imitãvare. Ikatu haʼe oiko gueteri hína itúa umíandi, ha omeʼẽ jepi chupekuéra pláta oipytyvõ hag̃ua umi gásto oĩvape ogapýpe. Ituakuéra ningo nohaʼarõi haʼe ojapo upéva, péro lomímonte oasepta chugui pórke péicha pe prekursór ohechauka omombaʼeha la ojapóva hikuái hesehápe. Péicha avei, Jehová oikuaa ojapo porãtaha ñanderehe jajepokuaáramo ñameʼẽ umi mbaʼe jarekóvagui.

7, 8. a) ¿Mbaʼéichapa Ñandejára siervokuéra omeʼẽ vaʼekue ikontrivusión ojejapo hag̃ua peteĩ traváho espesífiko? b) ¿Mbaʼéichapa omeʼẽ avei hikuái ikontrivusión Jehová servísiope g̃uarã?

⁷ La Biblia heʼi Ñandejára siervokuéra yma guare omeʼẽ hague ikontrivusión ojejapo hag̃ua umi traváho haʼe omandáva. Sapyʼánte haʼekuéra okontrivui vaʼekue ojejapo hag̃ua peteĩ traváho espesífiko. Por ehémplo, Moisés omokyreʼỹ kuri umi israelítape okontrivui hag̃ua ojejapótarõ guare pe tavernákulo.  Tiémpo rire, rréi David ojapo vaʼekue avei upéicha oñemopuʼã hag̃ua pe témplo (Éx. 35:5; 1 Crón. 29:5-9). Rréi Jehoás ogovernárõ guare, umi saserdóte omyatyrõ vaʼekue pe témplo, ha upearã oipuru pe pláta umi hénte omeʼẽva (2 Rey. 12:4, 5). Síglo primérope, kristianokuéra oikuaárõ guare iñermanokuéra Judeagua ohasaha ñembyahýi, káda uno oguerahaka la ikatumíva oipytyvõ hag̃ua chupekuéra (Hech. 11:27-30).

⁸ Jehová siervokuéra yma guare omeʼẽ vaʼekue avei ikontrivusión oipytyvõ hag̃ua umi odirihívape chupekuéra. Umi israelita oĩrõ guare pe Léi Mosáika poguýpe, umi levítape noñemeʼẽi vaʼekue erénsia oñemeʼẽháicha umi ótro trívupe. Upévare, umi ótro trivugua omeʼẽ chupekuéra pe diésmo, térã 10 por siénto umi mbaʼe oprodusívagui hikuái. Péicha rupi umi levíta ikatu vaʼekue oñemeʼẽmbaite itraváhope pe tavernákulope (Núm. 18:21). Upéicha avei, Jesús tiémpope oĩ vaʼekue heta kuña omeʼẽva umi mbaʼe orekóvagui oapoja hag̃ua pe tembiapo ojapóva Jesús ha ijapostolkuéra (Luc. 8:1-3).

9. ¿Moõguipa Ñandejára siervokuéra onohẽ vaʼekue omeʼẽ hag̃ua ikontrivusión?

⁹ ¿Moõguipa onohẽ vaʼekue hikuái omeʼẽ hag̃ua ikontrivusión? Por ehémplo, ojejapo hag̃ua pe tavernákulo pe desiértope, umi israelita posívlemente omeʼẽ vaʼekue kómo kontrivusión umi mbaʼe ogueru vaʼekue Egíptogui (Éx. 3:21, 22; 35:22-24). Síglo primérope katu oĩ vaʼekue ovendéva ikosakuéra, hóga térã ijyvy ha ogueraha ontrega pe pláta umi apóstolpe. Ha umi apóstol oipuru vaʼekue umi pláta oipytyvõ hag̃ua umi ermáno oikotevẽvape (Hech. 4:34, 35). Oĩ vaʼekue avei umi ojepokuaámava voi omboyke pláta omeʼẽ hag̃ua kómo kontrivusión, ha upéicha oipytyvõ umi traváho ojejapóvape Jehovápe g̃uarã (1 Cor. 16:2). Péicha entéro kristiáno ikatu vaʼekue omeʼẽ ikontrivusión, tahaʼe umi irríko ha imboriahúva (Luc. 21:1-4).

10, 11. a) ¿Mbaʼéichapa ikatu ñandepojera Jehová siervokuéra yma guare ojapo haguéicha? b) ¿Mbaʼéichapa nde reñeñandu ikatu haguére reapoja umi mbaʼe ojejapóva Jehová organisasiónpe?

¹⁰ Koʼág̃arupi avei sapyʼánte oñekotevẽ kontrivusión ojejapo hag̃ua peteĩ traváho espesífiko, por ehémplo oñemyatyrõ térã oñemopuʼãta jave peteĩ Salón pyahu ñane kongregasiónpe g̃uarã. Sapyʼánte ikatu avei ojeʼe ñandéve oñekotevẽha fóndo oñembaʼapo hag̃ua pe sukursál rehe, ojekuvri hag̃ua umi gásto ojeguerekóva ojejapo hag̃ua ñane asambléa, térã oñepytyvõ hag̃ua ermanokuérape oiko rire peteĩ desástre naturál. Umi kontrivusión ñameʼẽva ningo ojepuru avei oñepytyvõ hag̃ua umi misionéro, prekursór espesiál, superintendénte de sirkuíto ha umi ermáno ombaʼapóvape sentrál mundiálpe, ha entéro umi sukursál oĩvape ko yvy tuichakuére. Katuete ñane kongregasiónpe ojedesidi avei mboýpa omondóta jepi káda mes ojejapo hag̃ua umi Salón del Reino ha Salón de Asambléa. Upéva ningo ovenefisia entéro ermánope ko yvy tuichakuére.

¹¹ Enterovete ikatu ñameʼẽ ñane kontrivusión jaapoja hag̃ua Jehová organisasión koʼã ára pahápe. La majoría umi kontrivusión ojerresivíva ndojekuaái mávapa omeʼẽ, pórke oñemoĩnte umi káha de kontrivusión oĩvape Salón del Réinope, térã oñemondo jw.org rupive. Sapyʼánte ikatu ñapensa michĩetereiha pe kontrivusión ñameʼẽva ha noipytyvõmoʼãiha mbaʼevépe. Péro añetehápe, la majoría umi fóndo orekóva Jehová organisasión oñembyaty kuri enterove omeʼẽ rupi la ikatumíva, ndahaʼéi katuete unos kuánto omeʼẽ rupi heta kontrivusión. Enterove ermáno ningo imboriahúramo jepe osegi umi kristiáno Macedoniagua ehémplo. Haʼekuéra “imboriahuetereíramo jepe”, ojerure asy vaʼekue oñemeʼẽ hag̃ua  avei chupekuéra oportunida omeʼẽ hag̃ua ikontrivusión, ha pojerápe voi omeʼẽ vaʼekue hikuái (2 Cor. 8:1-4).

12. ¿Mbaʼépa ojapo Jehová organisasión ikatu hag̃uáicha ojepuru porã umi kontrivusión oñemeʼẽva?

¹² Pe Kuérpo Governánte oipuru porã umi kontrivusión oñemeʼẽva (Mat. 24:45). Haʼekuéra ningo oñemboʼe ha upéi okalkula porã mbaʼéichapa ojepurúta umi pláta (Luc. 14:28). Yma umi kuimbaʼe ifiélvape oñenkarga vaʼekue avei umi kontrivusión oñemeʼẽva. Haʼekuéra ojasegura ojepuru hag̃ua umi pláta Jehová servísiope g̃uarãnte. Por ehémplo, Esdras oho jeýtarõ guare Jerusalénpe, pe rréi persa omeʼẽ chupe óro, pláta ha hetave mbaʼe ivaliósova. En totál umi mbaʼe ohupyty ñane tiémpope mas de 100 millones de dólares. Ésdraspe g̃uarã umíva haʼe vaʼekue rregálo Jehovápe g̃uarã. Upévare haʼe heʼi vaʼekue mbaʼépa ojejapo vaʼerã ikatu hag̃uáicha ojeprotehe umi mbaʼerepy ani hag̃ua oñemonda chuguikuéra tapére (Esd. 8:24-34). Heta tiémpo upe rire, apóstol Pablo ombyaty vaʼekue pláta oipytyvõ hag̃ua umi ermáno Judeaguápe. Haʼe avei ojasegura vaʼekue umi persóna orrepartíva umi pláta ojapo hag̃ua upéva “konsiénsia potĩ reheve, ndahaʼéi Jehová renondépente, síno avei kuimbaʼekuéra renondépe” (elee 2 Corintios 8:18-21). Koʼág̃a Jehová organisasión osegi Esdras ha Pablo ehémplo. Upévare omeʼẽ instruksión mbaʼéichapa ojepuru vaʼerã umi kontrivusión.

13. ¿Mbaʼérepa oĩ mimi kámbio Jehová organisasiónpe?

¹³ Sapyʼánte ningo oĩ família ojapóva kámbio hogapýpe ani hag̃ua ogasta hetave hikuái pe pláta oganávagui. Oĩ avei oñehaʼãva oiko sensillove ikatu hag̃uáicha ombaʼapove Jehovápe g̃uarã. Upéicha avei ojapo hína Jehová organisasión. Últimamente heta ojegasta kuri ojejapo hag̃ua umi projékto porãita, ojekalkuláramo hetave voi ojegasta pe kontrivusión oikévagui. Upévare, ojapoháicha heta família, koʼág̃a ohecha hikuái mbaʼéichapa ikatu isensillove la traváho ha ojepuru saʼive personál. Péicha ojeaprovecha porãve hína umi kontrivusión.

14-16. a) ¿Mbaʼéichapa ojepuru umi kontrivusión? b) ¿Mbaʼéichapa umi rregálo omeʼẽva Jehová organisasión nepytyvõ avei ndéve?

¹⁴ Heta ermáno áñorema oservíva Jehovápe heʼi arakaʼeve ndojerresivíri hague peichaite peve heta rregálo Jehová organisasióngui. Ha siertoite la heʼíva hikuái, por ehémplo umi áño ohasa vaʼekuépe ojejapo pe sítio jw.org ha JW Broadcasting. Avei koʼág̃a g̃uarã hetaitereive idiómapema oĩ pe Traducción del Nuevo Mundo de las Santas Escrituras. Áño 2014 ha 2015-pe katu ojejapo 14 siudápe  umi estádio tuichávape pe asambléa internasionál hérava: “Ñamotenonde meméke Ñandejára Rréino”. Entéro umi oho vaʼekue umi asambléape heta odisfruta.

¹⁵ Heta ermáno heʼi ovyʼaitereiha umi rregálo orresivívare Jehová organisasiónpe. Por ehémplo, peteĩ matrimónio oservíva Ásiape oskrivi: “Ore roservi peteĩ siuda michĩvape, upévare sapyʼánte roñeñandu oreañoitereiha. Péicha jave ndahasyiete ñanderesarái hag̃ua mbaʼéichapa tuicha umi traváho ojejapóva Jehová organisasiónpe. Péro rohechávo JW Broadcasting, roñemeʼẽ enkuénta roimeha peteĩ família tuichaitereívape, ha rorekoha heta ermáno ha ermána ko yvy tuichakuére. Umi ermáno koʼapegua ningo ovyʼa JW Broadcasting reheve. Pyʼỹinte rohendu heʼiha hikuái oikuaa porãveha pe Kuérpo Governántepe koʼã prográma mensuál rupive. Koʼág̃a haʼekuéra ovyʼavéntema oĩ haguére Jehová organisasiónpe, haʼéva peteĩ família”.

¹⁶ Ko yvy tuichakuére oñemopuʼã térã oñerremodela 2.500 Salón del Réinorupi. Por ehémplo, unos kuánto ermáno Hondurasgua oipotaiterei kuri peteĩ Salón, ha koʼág̃a oguerekóma hikuái. Haʼekuéra oskrivi: “Rovyʼaiterei roime haguére Jehová família apytépe, ha rodisfruta rorekógui ermáno ha ermána ko yvy tuichakuére”. Heta oĩ oñeñandúva avei upéicha orresivi rire la Biblia ha ambue puvlikasión iñidiomaitépe, oñepytyvõ jave chupekuéra oiko rire umi desástre naturál, térã ohechávo umi mbaʼe porã ojehupytýva pe predikasión púvlika ha metropolitána rupive.

17. ¿Mbaʼérepa jaʼekuaa Jehová oapojaha iñorganisasión?

¹⁷ Heta persóna ndahaʼéiva testígo de Jehová ni ndoroviaséi kontrivusión voluntária rupivénte ojejapoha hetaite mbaʼe. Por ehémplo, peteĩ karai ombaʼapóva peteĩ emprésa tuichávape oho Betélpe ohecha hag̃ua pe imprénta. Haʼe ni ndoroviaséi ojeʼérõ guare chupe entéro umi ombaʼapóva upépe voluntarionteha, umi gásto ojekuvriha kontrivusión rupive, ha núnka ndojejapoiha avei mbaʼeveichagua aktivida oñembyaty hag̃ua fóndo. Haʼe heʼi imposivleha upéva. Siertoite la heʼíva, ñande jaikuaa porã Jehová ñanepytyvõ rupínte voi jahupytyha umi mbaʼe (Job 42:2).

18. a) ¿Mbaʼéichapa Jehová ñanevendesíta ñameʼẽramo umi jarekóvagui iñorganisasión rehehápe? b) ¿Mbaʼéichapa ikatu ñamboʼe ñane família ha umi ipyahúvape ojapo hag̃ua avei upéicha?

¹⁸ Jehová omeʼẽ ñandéve pe oportunida jaapoja hag̃ua umi traváho ojejapóva iñorganisasiónpe. Ha upéva peteĩ priviléhio tuichaitereíva. Haʼe opromete ñanevendesitaha katuete jajapóramo upéva (Mal. 3:10). Haʼe heʼi voi umi ipojerávape oho porãvetaha (elee Proverbios 11:24, 25). Ha ndahaʼéi upévante, la Biblia heʼi voi: “Javyʼaiteve ñameʼẽvo, ñandéve oñemeʼẽ rangue” (Hech. 20:35). Umi mbaʼe jaʼe ha jajapóva rupive ikatu hína ñamboʼe ñane família ha umi ipyahúvape, oikuaa hag̃ua mbaʼéichapa ikatu avei omeʼẽ hikuái ikontrivusión ha ohupyty heta vendisión.

19. ¿Mbaʼéichapa nemokyreʼỹ ko artíkulo?

¹⁹ Opa mbaʼe jarekóva ningo ou Jehovágui. Upévare, ñameʼẽramo chupe umi mbaʼe jarekóvagui, jahechauka jahayhuha chupe ha ñamombaʼeha la omeʼẽva ñandéve (1 Crón. 29:17). Umi israelita omeʼẽrõ guare ikontrivusión ojejapo hag̃ua pe témplo, “pe puévlo ovyʼa ojapo haguére ipyʼaite guive koʼã ofrénda voluntária Jehovápe” (1 Crón. 29:9, TNM). Ñande avei jasegi vaʼerã ñandepojera Jehovándi ha ñameʼẽ chupe pe haʼe omeʼẽvagui ñandéve. Upéicha jajapóramo, javyʼa ha ñañeñandu porãitereíta.