1. ¿Mbaʼépa ikatu ñañeporandu rréi David ojapo haguéicha?

ENTEROVE ningo jaikose trankílo ha pyʼaguapýpe. Avave ndoikoséi voi ojepyʼapyháre. Péro sapyʼánte ñañekevrantánte voi. Upévare ikatu oĩ Jehová siervokuéra oñeporandúva avei rréi David ojapo haguéicha oporandúrõ guare Jehovápe: “¿Mboy tiémpo piko asegi vaʼerã aaguanta koʼã provléma? Che ningo añekevrantaháre aiko káda día” (Sal. 13:2).

2. ¿Mbaʼépa jahecháta ko artíkulope?

² Ndaikatúiramo jepe jaipeʼaite umi kevránto ñandejehegui, heta mbaʼe ikatu jajapo ani hag̃ua ñañekevrantaiterei. Ko artíkulope jahecha raẽta mbaʼe mbaʼépa ikatu ñandepyʼapyeterei. Upéi jahecháta 6 mbaʼe ikatúva ñanepytyvõ ñaime hag̃ua pyʼaguapýpe ñambohovái jave ñane provlemakuéra.

3. ¿Mbaʼe mbaʼépa ikatu hína ñandepyʼapyeterei, ha ikatúpa jajoko umi mbaʼe?

³ Heta mbaʼe ningo ikatu ñandepyʼapy, ha umíva apytépe oĩ umi mbaʼe ñande ndaikatúiva jajoko. Por ehémplo, ndaikatúi jajoko ani hag̃ua káda áño hepyve umi hiʼupy, ao, óga térã alkilér. Ndaikatúi avei jajoko umi ñane kompañéro de traváho térã eskuelapeguápe ani hag̃ua ñanemboliga jajapo hag̃ua peteĩ mbaʼe ivaíva térã ñanderekovai hag̃ua. Ha ndaikatúi avei jajapo mbaʼeve anive hag̃ua oĩ umi delinkuénte pe lugár jaikohápe. Ñande ningo jahasa koʼã mbaʼe, pórke ko múndope la majoría umi hénte ndoikói la Bíbliape heʼiháicha. Avei Satanás hína ko múndo jára, ha haʼe oikuaa oĩtaha umi hénte ‘ojepyʼapyetereíva umi mbaʼe oikotevẽvare oikove hag̃ua ko múndope’, ha upéicha rupi ndoservimoʼãiva Jehovápe (Mat. 13:22; 1 Juan 5:19). Upévare  ndajahecharamói ko múndope henyhẽteha umi kevránto ha la hénte oikoha ojepyʼapyháre.

4. ¿Mbaʼépa ikatu oiko jajepyʼapyetereíramo ñane provlemakuérare?

⁴ Jajepyʼapyeterei jave ñane provlemakuérare, ndaikatúi voi jaipeʼa umíva ñane akãgui. Por ehémplo ikatu jajepyʼapy ofaltárõ g̃uarã ñandéve pláta jajogua hag̃ua umi mbaʼe ñaikotevẽva, térã ñanderasykatúrõ g̃uarã ha ndaikatúi ñambaʼapo, térã ñañemosẽrõ g̃uarã ñande travahohágui. Ikatu avei ñandepyʼapy ñatraisionárõ g̃uarã Jehovápe oĩ jave ñandejopýva ani hag̃ua ñakumpli iléi. Koʼẽrõitéma ningo Satanás ojevaléta umi hénte oĩvare ipoguýpe oataka hag̃ua Ñandejára puévlope, ha upévare ikatu jajepyʼapy mbaʼéichapa ñarreaksionáta oiko vove upéva. Ikatu oime ñañeporandu: “¿Ivai piko la ajepyʼapy koʼã mbaʼére?”.

5. ¿Mbaʼépa heʼise vaʼekue Jesús heʼírõ guare: “Anive pejepyʼapyeterei”?

⁵ Ñande jaikuaa Jesús heʼi hague isegidorkuérape: “Anive pejepyʼapyeterei” (Mat. 6:25). ¿Heʼisépa upéva haʼe ndoipotaiha jajepyʼapy mbaʼevete asýre? Nahániri. Ñanemanduʼa vaʼerã yma oĩ hague Jehová siervokuéra ifiélva ojepyʼapyeterei vaʼekue avei, péro Jehová lomímonte osegi oguerohory chupekuéra (1 Rey. 19:4; Sal. 6:3). * Añetehápe ningo Jesús ñanekonsola hína umi mbaʼe heʼívare. Haʼe ndoipotái jajepyʼapyeterei umi mbaʼe ñaikotevẽvare, ha upéicha rupi ñambotapykue ñande servísio Jehovápe. ¿Mbaʼe mbaʼépa ikatu jajapo jajepyʼapy rasa jave? (Ehecha pe rrekuádro “ Mbaʼéichapa ikatu jajapo upéva”).

6. Heʼiháicha Filipenses 4:6, 7, ¿mbaʼépa ikatu ñanepytyvõ ñandepyʼaguapy hag̃ua?

⁶ 1) Ñañemboʼe meme. Oĩ jave peteĩ mbaʼe ñandepyʼapyetereíva ikatu ñañemboʼe Jehovápe, ha jajerure chupe ñane korasõite guive tañanepytyvõ (1 Ped. 5:7). Jehová okontestáta ñane ñemboʼe ha omeʼẽta ñandéve pe “pyʼaguapy tuichavéva entéro mbaʼe yvyporakuéra ikatúvagui ontende” (elee Filipenses 4:6, 7). Péicha Jehová ñanembopyʼaguapýta ijespíritu sánto rupive (Gál. 5:22).

7. ¿Mbaʼérepa ñanemanduʼa vaʼerã ñañemboʼe jave Ñandejárape?

⁷ Ñañemboʼe jave Jehovápe, ñamombeʼupaitékena chupe mbaʼéichapa ñañeñandu. Ñamombeʼu chupe mbaʼépa la ñane provléma, ha mbaʼéichapa upéva ñanemoñeñandu. Ikatúramo oñesolusiona upe provléma, jajerure chupe tañanemoarandu jaikuaa hag̃ua mbaʼépa jajapo vaʼerã, ha tañanemombarete jajapo hag̃ua upéva. Péro ñande ndaikatúiramo ñasolusiona upe provléma, jajerure Jehovápe tañanepytyvõ ani hag̃ua ñañekevrantaiterei. Upévare, ñamombeʼúramo Jehovápe la jahasáva ha mbaʼépa ifálta ñandéve, upéi jahecha porãvétama mbaʼéichapa haʼe okontesta ñandéve ñane ñemboʼe. Péro aníkena ñañentrega noñekontestáiramo ñandéve ensegidaite pe ñane ñemboʼe. Jehová oipota ñamombeʼu chupe mbaʼetépa hína la ñane provléma ha mbaʼépa ñaikotevẽ, péro oipota avei jasegi ñañemboʼe chupe upévare (Luc. 11:8-10).

8. ¿Mbaʼépa avei jajapo vaʼerã ñañemboʼe jave?

⁸ Ñamombeʼu jave Jehovápe umi mbaʼe ñanekevrantáva, jajasegura vaʼerã avei jaagradese hag̃ua chupe. Ñaneprovléma hetáramo jepe, iporãta ñapensa entéro umi mbaʼe  porã jarekóvare. ¿Péro mbaʼépa ikatu jajapo ndajaikuaái jave mbaʼéichapa ñamombeʼúta Jehovápe umi mbaʼe ñañandúva? Upéicha jave, ñanemanduʼa vaʼerã Jehová okontestataha ñane ñemboʼe jaʼénteramo jepe chupe: “Chepytyvõmína Jehová” (2 Crón. 18:31; Rom. 8:26).

9. ¿Mbaʼépa jajapo vaʼerã jakyhyje jave?

⁹ 2) Jajerovia Jehováre, ha ani ñandejehe. Proféta Isaías tiémpope, umi hénte oikóva Judápe okyhyje vaʼekue umi asirio oatakárõ g̃uarã chupekuéra. Haʼekuéra ndopytaseieterei kuri umi asirio poguýpe, upéicha rupi ojerure Egíptope oipytyvõ hag̃ua chupekuéra (Is. 30:1, 2). Jehová oavisa vaʼekue chupekuéra oikotaha hesekuéra sarambi ojerovia haguére umi egípciore (Is. 30:7, 12, 13). Isaías rupive Jehová heʼi pe puévlope mbaʼépa la ojapo vaʼerã ikatu hag̃uáicha oiko segúro porã. Isaías heʼi vaʼekue: “Tuicha penembaretevéta pepytáramo pyʼaguapýpente ha pejerovia” Jehováre (Is. 30:15b).

10. ¿Mbaʼe kásopepa ikatu jahechauka jajeroviaha Jehováre?

¹⁰ ¿Mbaʼéichapa ikatu jahechauka jajeroviaha Jehováre? Jahechami unos kuánto ehémplo. Ñamoĩ chupe ojeofreseha ndéve peteĩ traváho regana porãvetahápe, péro upéva hoʼupaitéta ndehegui ne tiémpo ha ndaikatumoʼãvéima reservi porã Jehovápe. Térã ñamoĩ chupe peteĩ ne kompañéro térã kompañéra de traváho oñepyrũha onovillea nderehe, péro haʼe ndahaʼéi peteĩ Testígo vautisádo. Térã peteĩ nde rogaygua rehayhúva neamenasa heʼívo: “Eelehi vaʼerã: O che, o la nde Jehová”. Jahechakuaa káda kásope ijetuʼuha jajedesidi hag̃ua, péro káda situasiónpe Jehová omeʼẽta ñandéve pe gía ñaikotevẽva (Mat. 6:33; 10:37; 1 Cor. 7:39). ¿Péro jajeroviátapa Jehováre ha jasegi pe gía omeʼẽva?

11. ¿Mbaʼe rreláto oĩva la Bíbliapepa ikatu jastudia jasegi hag̃ua ñaime trankílo oĩ jave oñemoĩ mbaretéva ñanderehe?

¹¹ 3) Ñaaprende umi ehémplo iporãva ha ivaívagui. La Bíbliape jatopa heta rreláto ohechaukáva iñimportantetereiha jasegi ñaime pyʼaguapýpe ha jajerovia Jehováre. Jastudiakuévo umi rreláto, ñapensa mbaʼépa oipytyvõ vaʼekue Ñandejára siervokuérape osegi hag̃ua oĩ trankílo, oĩrõ guare oñemoĩ mbaretéva ikontrapekuéra. Por ehémplo, pe Trivunál Suprémo Judío omandárõ guare umi apóstolpe anivéma hag̃ua opredika, haʼekuéra ndokyhyjéi. Upéva rangue, pyʼaguasúpe heʼi hikuái: “Ore ningo oreñeʼẽrendu vaʼerã Ñandejárape ore governánteramo, yvypórape rangue” (Hech. 5:29). Umi apóstolpe oñembyepotíramo jepe, haʼekuéra ndopytái vaʼekue oryrýi osusũ okyhyjetereígui. ¿Mbaʼérepa? Pórke oikuaa vaʼekue hikuái Jehová oĩha hendivekuéra, ha haʼe oguerohoryha chupekuéra. Upévare haʼekuéra osegi opredika umi notísia porã (Hech. 5:40-42). Upéicha avei, pe disípulo Estébanpe ojejuka potaitérõ guare, haʼe oĩ vaʼekue pyʼaguapýpe ha trankiloite. Upéicha rupi “pe hova haʼete voi peteĩ ánhel rova” (Hech. 6:12-15). ¿Mbaʼérepa? Pórke haʼe oĩ vaʼekue segúro Jehová oguerohoryha chupe.

12. Heʼiháicha 1 Pedro 3:14 ha 4:14, ¿mbaʼérepa ikatu javyʼa jajepersegi jave?

¹² Umi apóstol oikuaa porã vaʼekue Jehová oĩha hendivekuéra. Haʼe omeʼẽ vaʼekue chupekuéra podér ojapo hag̃ua umi milágro (Hech. 5:12-16; 6:8). Péro Jehová ningo nomeʼẽi ñandéve upe podér koʼág̃arupi. Upéicharõ jepe, Iñeʼẽ rupive haʼe mborayhúpe oasegura ñandéve jajepersegíramo jajerovia haguére hese, ikatuha javyʼa jaikuaágui haʼe ñandeguerohoryha ha ijespíritu oĩha ñanendive (elee 1 Pedro 3:14; 4:14). Upévare ndovaléi jajepyʼapyeterei ñapensávo mbaʼépa jajapóta  jajepersegírõ g̃uarã ág̃a amo gotyove. Upéva rangue, ñañehaʼãmbaite vaʼerã ñamombarete ñande jerovia Jehová ikatuha ñanepytyvõ ha ñandesalva. Umi disípulo ypykue ojapo haguéicha, ñande jajerovia vaʼerã avei Jesús opromete vaʼekuére: “Che ameʼẽta peẽme arandu ha poipytyvõta peikuaa hag̃ua mbaʼépa pejéta. Ha pene enemigokuéra ndaikatumoʼãi heʼi mbaʼeve penekontradesi hag̃ua”. Haʼe ogarantisa voi ñandéve: “Peẽ peaguantáramo pe fin peve, pesalváta pende rekove” (Luc. 21:12-19). Aníkena ñanderesarái peteĩ isiérvo ifiélva omanóramo, Jehová osegitaha imanduʼa umi detálle michĩ mimívare jepe, ha oipurúta umíva omoingove jey hag̃ua chupe.

13. ¿Mbaʼéichapa ñanepytyvõta jastudiáramo umi ehémplo vai?

¹³ Ñande ikatu avei ñaaprende umi ndoikói vaʼekuégui pyʼaguapýpe ha ndojeroviái Jehováre. Jastudiáramo umi ehémplo vai ñanepytyvõta ani hag̃ua jafalla avei haʼekuéraicha. Por ehémplo, rréi Asá ogovernárõ guare Judá, peteĩ ehérsito tuichaitereíva ou vaʼekue oataka chupe, ha haʼe ojerovia rupi Jehováre ogana upe ñorairõ (2 Crón. 14:9-12). Upéi rréi Baasá ogovernáva Israel ou oataka Asápe peteĩ ehérsito michĩvéva reheve. Péro ko vuéltape rréi Asá ndojeroviái Jehová osalvataha chupe ojapo haguéicha anteve, ha opaga umi síriope oipytyvõ hag̃ua chupe (2 Crón. 16:1-3). Upéi Asá ou vaʼekue hasyete, ha ni omano mbotárõ guare ndojeroviái vaʼekue Jehová ikatuha oipytyvõ chupe (2 Crón. 16:12).

14. ¿Mbaʼépa ikatu ñaaprende Asá ojapo vai vaʼekuégui?

¹⁴ Iñepyrũme, Asá ojerure vaʼekue Jehovápe oipytyvõ hag̃ua chupe oreko jave provléma. Péro upéi haʼe ndojapovéima upéva, oñehaʼãntema ijehegui osolusiona umi provléma. Primerorã haʼetévaicha iporã vaʼekue Asá idéa ojerurévo ajúda umi síriope, ikatu hag̃uáicha oñorairõ Israel kóntrape. Péro amo ipahápe, Judá ndoikói vaʼekue pyʼaguapýpe heta tiémpore. Jehová heʼi chupe iproféta rupive: “Rréi de Siria ehérsito jepe reguerekomoʼã kuri nde pópe, péro rejerovia rupi rréi de Síriare, ha nderejeroviái nde Jára Jehováre, koʼág̃a upéva jepe ohóma ndehegui” (2 Crón. 16:7). Ñande ñañatende vaʼerã avei ani hag̃ua ñapensa ñande ikatuha ñasolusiona umi provléma ñandejeheguínte, jahekaʼỹre Jehová gía la Bíbliape. Ñaiméramo jepe peteĩ emerhénsiape ha tekotevẽta pyaʼe jadesidi peteĩ mbaʼe, ñañetrankilisa vaʼerã, jajerure Jehovápe tañandegia ha jajerovia hese. Haʼe ningo katuete ñanepytyvõta ñasẽ porã hag̃ua.

15. ¿Mbaʼépa ikatu jajapo jalee jave la Biblia?

¹⁵ 4) Jaikuaa de memória umi téxto bíblico. Jatopa jave umi téxto bíblico ohechaukáva iñimportanteha ñaime pyʼaguapýpe ha jajerovia Jehováre, ñañehaʼãkena jaikuaa umíva de memória. Upearã iporãta jaleéramo en vos álta térã jaskrivi umi téxto ikatu hag̃uáicha jarrepasa jepi. Jehová heʼi vaʼekue Josuépe siémpre olee hag̃ua pe léi en vos váha, ha péicha iñarandu hag̃ua. Umi mbaʼe oleéva pe léipe oipytyvõta kuri avei chupe ani hag̃ua okyhyje, ha pyʼaguasúpe ogia hag̃ua Jehová puévlope (Jos. 1:8, nóta, 9). Heta versíkulo oĩva la Bíbliape ñanepytyvõta ñaime hag̃ua pyʼaguapýpe oñepresenta jave umi situasión ikatúva ñanekevrantaiterei térã ñanemongyhyje (Sal. 27:1-3; Prov. 3:25, 26).

16. ¿Mbaʼéichapa Jehová ojevale pe kongregasiónre ikatu hag̃uáicha ñaime pyʼaguapýpe ha jajerovia hese?

¹⁶ 5) Jajeheʼa umi ermáno ha ermanakuérare. Jehová ojevale ñane ermanokuérare ikatu hag̃uáicha ñaime trankílo ha jajerovia hese. Por ehémplo umi rreunionhápe tuichaiterei ñanepytyvõ umi diskúrso, komentário omeʼẽva umi ermanokuéra ha umi konversasión kyreʼỹ  jarekóva hendivekuéra (Heb. 10:24, 25). Ikatu avei ojapo porãiterei ñanderehe ñamombeʼúramo umi mbaʼe ñandepyʼapýva peteĩ ñane amigoite oĩvape kongregasiónpe. Peichagua amígo ñanemokyreʼỹramo tuicha ñanepytyvõta anivéma hag̃ua ñañekevrantaiterei (Prov. 12:25).

17. Heʼiháicha Hebreos 6:19, ¿mbaʼéichapa pe esperánsa jarekóva Ñandejára Rréinore, ñanepytyvõ ñaime hag̃ua pyʼaguapýpe jahasa jave umi situasión ijetuʼuetereíva?

¹⁷ 6) Jasegi ñamombarete ñane esperánsa. Pe esperánsa jarekóva Ñandejára Rréinore haʼete “peteĩ ánkla ñande rekovépe g̃uarã”, ha upéva ñanepytyvõ hína ñaime hag̃ua pyʼaguapýpe jahasa jave umi situasión ijetuʼuetereíva térã ñanekevrantaitereíva (elee Hebreos 6:19). Jajepyʼamongetákena umi mbaʼe oprometévare ñandéve Jehová amo gotyove g̃uarã. Upe tiémpope ndaiporimoʼãvéima mbaʼeve ñandepyʼapýtava (Is. 65:17). Ñañeimahina ñaimemaha pe múndo pyahúpe oĩtahápe pyʼaguapy, upépe ningo ndoikomoʼãvéima mbaʼeve ivaíva (Miq. 4:4). Ñamombaretéta avei ñane esperánsa ñañeʼẽvo ótrope pe múndo pyahúre. Jajapókena opa ikatúva predikasiónpe ha jajapo hag̃ua disípulo. ‘Péicha ipahaite peve ndajadudamoʼãi oñekumplitaha umi mbaʼe ñahaʼarõva’ (Heb. 6:11).

18. ¿Mbaʼépa ikatu oiko amo gotyove, ha mbaʼépa ikatu jajapo ñambohovái porã hag̃ua umíva?

¹⁸ Hiʼag̃uivévo ohóvo pe fin, jarekóta hetave provléma ñandepyʼapyetereíva. Ñande téxto áño 2021-pe g̃uarã ñanepytyvõta ñambohovái hag̃ua umíva ha ñaime hag̃ua pyʼaguapýpe, ndahaʼéi jajerovia rupi ñandejehe, síno jajerovia rupi Jehováre. Ko áño pukukue jahechaukákena umi mbaʼe jajapóva rupive jajeroviaha Jehová promésare: “Tuicha penembaretevéta pepytáramo pyʼaguapýpente ha pejerovia” (Is. 30:15).