Harvey umíva oĩ vaʼekue éntre 4 ermáno, ha haʼe vaʼekue la ijypykue. Ifamília oñepyrũ vaʼekue oservi Jehovápe Midland Júnctionpe, oéste gotyo Austráliape. Upérõ ipoʼi vaʼekue la pióla áño 1930 rire. Harvey michĩete guive ohayhu vaʼekue Jehovápe, ha ojevautisa orekópe 14 áño. Haʼe pyaʼe voi oaprende ani hag̃ua orrechasa umi asignasión oñemeʼẽva chupe kongregasiónpe. Peteĩ jey, peteĩ ermáno ojerure chupe olee hag̃ua pe rrevísta Ñemañaha rreunionhápe, péro haʼe ndoaseptái oimoʼãgui ndaikatumoʼãiha ojapo porã upéva. Upéi pe ermáno oñemoñeʼẽ chupe opensa porã hag̃ua heʼívo: “Oĩramo ojeruréva ndéve rejapo hag̃ua peteĩ mbaʼe Jehová organisasiónpe, haʼe opensa hína nde ikatuha rejapo upéva” (2 Cor. 3:5).

Che, che sy ha che ermána majór roikuaa vaʼekue Jehovápe Inglatérrape. Ñepyrũrã che túape ndogustái vaʼekue umi testígo de Jehová, péro tiémpo rire oiko avei chugui Testígo. Chupe ndogustáiramo jepe, che ajevautisa vaʼekue arekópe 9 áñonte. Añemoĩ la méta oikotaha chehegui prekursóra ha upe rire misionéra. Che túa nopermitimoʼãi kuri chéve oiko chehegui prekursóra  areko mboyve 21 áño. Péro che nahaʼarõséi la hetaiterei. Upévare arekórõ guare 16 áño, che túa omeʼẽ chéve permíso aha hag̃ua aiko che ermána majór ova vaʼekuéndi Austráliape. Upévare ambotýrõ guare 18 áño, añepyrũma la che prekursorádo.

Austráliape aikuaa vaʼekue Hárveype. Mokõivéva roservise vaʼekue Jehovápe de misionéro, ha romenda 1951-pe. Rojapo rire ore prekursorádo 2 áñore, roñeinvita roservi hag̃ua de superintendénte de sirkuíto. Tuichaiterei vaʼekue ore sirkuíto oéste gotyo Austráliape, upévare roviaha vaʼerã mombyrymbyry umi lugár iséko ha ndaiporihárupi mbaʼeve.

Áño 1954-pe roñeinvita roho hag̃ua Galaádpe, pe kláse número 25-pe. Ore suéño roservívo de misionéro oñekumpli potaitéma. Roho hag̃ua Nueva Yórkpe roviaha várkope, ha rog̃uahẽ rire roñepyrũ rostudia umi mbaʼe hypyʼũva oĩva la Bíbliape. Galaádpe rostudia vaʼerã avei español, ha upéva oforsa vaʼekue Hárveype pórke nosẽi chupe la “r”.

Pe eskuéla aja, umi instruktór heʼi umi ohoséva oservi Japónpe ikatuha oñeanota peteĩ kúrsope oaprende hag̃ua japonés. Péro ore rodesidi rohejatanteha Jehová organisasión oelehi ore asignasión. Upe riremínte Albert Schroeder, peteĩva umi instruktór de Galaad, ohechakuaa noroñanotái hague roaprende hag̃ua japonés. Upémarõ heʼi oréve: “Pepensamiéna hese”. Péro ohechávo lomímonte noroñeanotái hague, ermáno Schroeder heʼi oréve: “Umi ótro instruktór ha che poanotáma pe kúrsope, pehechána ikatúpa peaprende avei japonés”. Upéva ifasilvéma kuri Hárveype oaprende hag̃ua.

Rog̃uahẽ Japónpe áño 1955-pe. Upérõ upe paíspe oĩ vaʼekue 500 puvlikadórnte. Harvey oreko vaʼekue 26 áño ha che katu 24. Roñeasigna roho hag̃ua pe siuda de Kóbepe, ha ropyta roservi upépe 4 áñore. Upéi rovyʼaiterei roñeasigna jeýrõ guare roservi hag̃ua peteĩ sirkuítope, ag̃uieténte pe siuda de Nagóyagui. Opa mbaʼénte voi oregusta ore asignasióngui Japónpe: Rohayhueterei umi ermanokuérape, ha oregusta avei umi tembiʼu ha umi lugár porã porã. Péro upe riremínte roreko jeýma peteĩ oportunida ani hag̃ua roʼe no Jehovápe.

Roservi rire 3 áño de superintendénte de sirkuíto, pe sukursál oĩva Japónpe oporandu oréve  ndorohoséipa Taiwánpe roservi hag̃ua pe grúpo indíhena amis apytépe. Unos kuánto ermáno upe trivupeguágui oiko vaʼekue apóstata, ha pe sukursál oĩva Taiwánpe oikotevẽ vaʼekue peteĩ ermáno oñeʼẽ porãva japonés oñehaʼã hag̃ua osolusiona upe provléma. * Oréve ningo oregustaiterei la ore asignasión Japónpe, upévare ijetuʼueterei vaʼekue oréve rojedesidi hag̃ua. Péro Harvey oaprendéma vaʼekue núnka ndoguevimoʼãiha peteĩ asignasióngui, upémarõ roasepta.

Rog̃uahẽ upépe noviembre de 1962-pe. Upérõ Taiwánpe oĩ vaʼekue 2.271 puvlikadór, ha la majoría amis vaʼekue. Péro primero tekotevẽ kuri roaprende chino. Ore ningo roreko vaʼekue peteĩ lívronte roaprende hag̃ua chino ha peteĩ profesóra noñeʼẽiva inglés, péro lomímonte roaprende.

Rog̃uahẽ riremi Taiwánpe, Hárveype oñenombra siérvo de sukursál. Pe sukursál michĩ rupi, Harvey itiémpo vaʼekue ojapopa hag̃ua hembiapokuéra sukursálpe ha oservi hag̃ua umi ermáno amis ndive 3 semána por mes. Káda siérto tiémpo haʼe oservi vaʼekue avei de superintendénte de distríto, ha upévare ojapo jepi diskúrso umi asambleahápe. Harvey ikatu vaʼekue ojapo idiskúrso japonéspe ha umi ermáno amis ontendétante avei kuri. Péro pe goviérno opermiti vaʼekue ojejapo umi rreunión rrelihiósa chínope añoiténte. Upévare Harvey ojapo idiskúrso chínope oforsáitiramo jepe chupe, ha peteĩ ermáno otradusi ámispe.

Upe tiémpope Taiwán oĩ vaʼekue umi militár poguýpe, upévare umi ermanokuéra okonsegímante vaʼerã permíso ojapo hag̃ua umi asambléa. Ijetuʼu vaʼekue oñekonsegi hag̃ua peteĩ permíso, ha sapyʼánte heta oñehaʼarõ vaʼerã upearã. Umi polisía nomeʼẽiramo pe permíso ha og̃uahẽma pe semána ojejapotaha pe asambléa, Harvey ohomi vaʼerã pe komisaríape ha opyta oguapy upépe oñemeʼẽ peve chupe. Umi polisía otĩ jepi oĩ haguére peteĩ extranhéro ohaʼarõva hína pe komisaríape, upévare pyaʼe omeʼẽ jepi oréve la permíso.

Ropredika jave umi ermanokuérandi, roguata jepi una órarupi térã hetave, rojupi umi montáña ha rohasa umi rrío. Chemanduʼa pe primera ves ajupírõ guare peteĩ montáñape. Pyharevete pyaʼe pyaʼe rorambosa ha rojagarra peteĩ kolektívo la 5:30 de la mañána ohóva peteĩ puevloʼi mombyry opytávape. Upéi rohasa yvýrupi peteĩ rrío ipererĩva ha roñepyrũ rojupi peteĩ montáña. Pe montáña ningo ijyvateterei, upévare amañávo che raperãre pe ermáno ohóva che renonderã pyta oja oja ohóvo che syváre.

Upe pyhareve Harvey oho kuri opredika unos kuánto ermáno upepeguándi, che katu apyta apredika cheaño peteĩ puevloʼi oikohápe umi hénte oñeʼẽva japonés. Asaje la únarupi chekangypáma pórke ohasáma heta óra ndaʼuvéi hague mbaʼevete. Upéi hasypeve rojotopa Harvey ndive, péro umi ermáno ohopáma. Harvey okambia kuri unos kuánto rrevísta mbohapy ryguasu rupiʼáre. Haʼe ohechauka chéve mbaʼéichapa ikatu ambokua pe ryguasu rupiʼa los 2 ládo haʼu hag̃ua péicha ipyraite. Ndahaʼéirõ jepe la chestirapáva, atantea peteĩ. Ha pekalkulami mávapa hoʼu raʼe pe tercer ryguasu rupiʼa. Harvey omeʼẽ chéve pórke haʼe opensa ndaikatumoʼãiha cherupi  chegueraha peichahágui adesmaja mbaʼérõ tapére.

Peteĩ jey rohórõ guare peteĩ asambléa de sirkuítope, ahasa peteĩ mbaʼe nahaʼarõietéva. Ore ropyta kuri peteĩ ermáno rógape oĩva pe Salón ykerete. Umi ámispe g̃uarã ningo iñimportanteterei la jajahu, upévare pe superintendénte rembireko oprepara oréve umi mbaʼe roikotevẽtava rojahu hag̃ua. Harvey ningo hembiapoiterei hína kuri, upévare heʼi chéve che raẽ ajahu hag̃ua. Pe ermána oprepara kuri mbohapy mbaʼyru: Peteĩ válde oĩháme y roʼysã, pe ótrope oĩ y taku ha peteĩ latonaʼi nandi. Che añesorprende omoĩ haguére umíva okápe oĩha gotyo umi ermáno ombaʼapóva hína pe Salón del Réinope oprepara hag̃ua pe asambléa. Upémarõ ajerure pe ermánape peteĩ kortína térã álgo añemoʼã hag̃ua, ha haʼe ojagarra ogueru chéve peteĩ kortína transparénte. Che apensa kuri ahávo pe óga kupépe, péro upépe oĩ unos kuánto gánso ikatúva chesuʼu. Upémarõ haʼe chejupe: “Umi ermáno ningo hembiapoiterei ha ni ndopillaichéne la che ajahuha hína. Avei ndajahúiramo aofendéta chupekuéra”. Upémarõ aha reíntema hese ha ajahu.

Harvey ohechakuaa vaʼekue ijetuʼuha umi ermáno ámispe ojerovia mbarete hag̃ua oĩ rupi heta ndoleekuaáiva, ha avei ndaipóri rupi puvlikasión iñidiomapekuéra. Pe idióma amis ningo oñeñepyrũ ramónte vaʼekue ojeskrivi, upévare iporã kuri oñemboʼe umi ermánope oleekuaa hag̃ua iñidiomaitépe voi. Upearã ningo hetaiterei oñembaʼapo, péro tiémpo rire umi ermáno ikatúma kuri oaprende Jehovágui iñidiomaitépe voi. Áño 1966 rupi osẽ vaʼekue umi primera puvlikasión idióma ámispe, ha 1968-pe oñepyrũ osẽ pe Ñemañaha.

Péro pe goviérno oproivi vaʼekue umi puvlikasión noĩriva chínope. Upéicha rupi, ani hag̃ua oĩ provléma, Ñemañaha oĩva ámispe osẽ vaʼekue diferénte fórmape. Por ehémplo, peteĩ tiémpore pe Ñemañaha oreko vaʼekue umi artíkulo oĩva idióma ámispe ha chino mandarínpe. Upéicha oĩramo oporandúva, haʼeténte vaʼekue romboʼéva hína chino umi héntepe. Upe guive, Jehová organisasión oguenohẽma heta puvlikasión idióma ámispe oipytyvõ hag̃ua umi héntepe oikuaa hag̃ua la Biblia omboʼéva (Hech. 10:34, 35).

Áño 1960 guive 1980 peve, heta ermáno amis ndoikói vaʼekue Jehová ojerureháicha. Nontendeporãi haguére la Biblia omboʼéva, oĩ hekovaíva, okaʼúva, opitáva ha ojedrogáva oisuʼúvo pe nuez de betel. Harvey ovisita vaʼekue heta kongregasión ha oñehaʼã oipytyvõ umi ermanokuérape ontende hag̃ua mbaʼépa Jehová opensa koʼã mbaʼére. Peteĩva umi viáhepe oiko vaʼekue orerehe upe amombeʼúva oñepyrũvo ko artíkulo.

Umi ermáno iñumíldeva naiprovlemaiete vaʼekue okambia hag̃ua, péro ñambyasýramo jepe heta oĩ vaʼekue avei nokambiaséiva. Upévare, 20 año aja tuichaiterei oguejy pe kantida de puvlikadór oĩva Taiwánpe, 2.450 rasamígui oguejy 900-pe. Upéva ningo oredesanimaiterei vaʼekue. Péro roikuaa avei Jehová núnka novendesimoʼãiha peteĩ organisasión naipotĩriva (2 Cor. 7:1). Tiémpo rire, umi kongregasión oservíma Jehovápe haʼe oipotaháicha, ha Jehová ovendesi rupi pe traváho ojejapóva Taiwánpe koʼág̃a oĩma mas de 11.000 puvlikadór.

Áño 1980 guive, rohecha mbaʼeichaitépa umi kongregasión amis ijerovia mbareteve ohóvo, upéicha rupi Harvey itiempovéma oipytyvõ hag̃ua umi hénte oñeʼẽvape chino. Haʼe ovyʼaiterei vaʼekue ikatu haguére oipytyvõ heta ermána ménape oiko hag̃ua chuguikuéra Testígo. Chemanduʼa mbaʼeichaitépa haʼe ovyʼa vaʼekue peteĩva koʼã karai oñemboʼérõ guare Jehovápe por primera ves. Che avei avyʼaiterei aipytyvõ haguére heta hénte ipyʼaporãvape oñemoag̃ui hag̃ua Jehováre. Ha avyʼaiterei avei ikatu haguére ambaʼapo Betel de Taiwánpe peteĩva umi che estudiantekue membykariaʼy ha imembykuñándi.

Koʼág̃a ningo che irũmi noĩvéima chendive. Haimete 59 áño romenda haguépe, che menami ahayhuetéva omano anga chehegui pe 1 de enero de 2010, heta olucha rire pe kánser ndive. Haʼe ningo oservi jepe de tiémpo kompléto haimete 60 áño. Koʼag̃aite peve ahechagaʼueterei chupe, péro avyʼaiterei aservi haguére hendive umi mokõi país iporãitévape. Ore ningo roaprende roñeʼẽ hag̃ua mokõi idióma asiático ijetuʼuetereíva, ha Harvey oaprende voi oskrivikuaa hag̃ua koʼã idiómape.

Ohasa rire 4 áño upévagui ha cheedáma rupi, pe Kuérpo Governánte odesidi iporãvetaha aha jeýramo Austráliape. Ñepyrũrã che apensa kuri: “Che ningo ndahaséi Taiwángui”. Péro Hárveygui aaprende ani hag̃ua núnka haʼe no Jehová organisasiónpe, upémarõ aha. Upéi ahecha iporã hague la adesidi vaʼekue.

Koʼág̃a éntre semanakue ambaʼapo pe sukursál de Australásiape, ha fin de semanakue apredika peteĩ kongregasión ndive. Betélpe avyʼaiterei ikatu haguére ajapo híra umi oñeʼẽvape japonés ha chino. Ahaʼarõitereíma ningo Jehová okumpli ipromésa omoingove jeývo umi omano vaʼekuépe. Aikuaa haʼe imanduʼataha Hárveyre, pórke haʼe oaprende vaʼekue ani hag̃ua núnka heʼi no Jehovápe (Juan 5:28, 29).