1. ¿Mbaʼéicha javépa jahasa tiémpo Jehovándi?

 IGUSTOITEREI ningo jahasa tiémpo umi persóna jahayhúvandi. Upévare umi omendáva ohasaseterei tiémpo oñondive, umi imitãva ohasaseterei tiémpo iñamigokuérandi, enterovetéva jahasaseterei tiémpo ñane ermanokuérandi, ha koʼytevéntema jahasase tiémpo Ñandejára Jehovándi. Péva la iñimportantevéva hína. ¿Mbaʼéicha javépa jahasa tiémpo Jehovándi? Ñañemboʼévo chupe, jaleévo Iñeʼẽ, ha jajepyʼamongetávo umi mbaʼe ojapótavare ha umi kualida porãite orekóvare. ¡Iporãiterei ningo añete pe tiémpo ikatúva jahasa Jehovándi! (Sal. 139:17).

2. ¿Mbaʼépa ijetuʼu jepi sapyʼánte?

² Igustoiterei ningo jahasa tiémpo Jehovándi, péro sapyʼánte upéva ijetuʼu. Enterovévanteko jareko jajapo vaʼerã, ha upévare ikatu ijetuʼu hína ñandéve jadedika hag̃ua tiémpo Jehovápe. Oĩ heta mbaʼe hoʼúva ñandehegui ñane tiémpo ha ndaikatúiva ñambotapykue. Por ehémplo ñambaʼapo vaʼerã, jareko tembiapo ogapypegua, jakuida vaʼerã ñane famíliare, ha hetave mbaʼe. Upévare sapyʼánte ñañandu jepi ndajarekoveimaha tiémpo ñañemboʼe hag̃ua, jastudia hag̃ua térã jajepyʼamongeta hag̃ua.

3. ¿Mbaʼépa ikatu hoʼupa ñandehegui ñane tiémpo japillaʼỹetére?

³ Oĩ avei hetave mbaʼe ikatúva hoʼupa ñandehegui ñane tiémpo japillaʼỹetére, ha upéicha rupi ndajarekovéima tiémpo ñañemoag̃ui hag̃ua Jehováre. Por ehémplo, ñapensamíntena umi mbaʼe jajapóvare jajediverti hag̃ua. Ndaivaíri jajediverti sapyʼapyʼa, iporã voi katu upéva ñandéve g̃uarã. Péro umi mbaʼe jajapóva jajediverti hag̃ua ikatu hoʼupa ñandehegui ñane tiémpo ha nañanetiempovéima Jehovápe g̃uarã. Igústoko jajediverti  mimi, ñanemanduʼánte vaʼerã upéva ndahaʼeiha la iñimportantevéva (Prov. 25:27; 1 Tim. 4:8).

4. ¿Mbaʼépa ñaanalisáta?

⁴ Ko artíkulope ñaanalisáta iñimportanteha jahechakuaa mbaʼépa la ñamotenonde vaʼerã. Jahecháta avei mbaʼéichapa ikatu jaaprovecha porã pe tiémpo jahasáva Jehovándi, ha mbaʼéichapa upéva ou porãta ñandéve.

5. ¿Mbaʼéichapa Efesios 5:15-17 ikatu oipytyvõ peteĩ imitãvape oelehi hag̃ua pe iporãvéva?

⁵ Eelehíkena pe iporãvéva. Umi imitãva ojepyʼapy jepi ndoikuaáigui mbaʼépa ojapóta hekovégui. Upéva ijetuʼu, pórke iprofesorkuéra ha ihentekuéra ndahaʼéiva Testígo ikatu hína heʼi chupe ostudia hag̃ua álgo ogana porã hag̃ua. Péicha ojapóramo saʼíma hembýta chupe la tiémpo. Upévare, ituakuéra ha iñamigokuéra oĩva kongregasiónpe, ikatu hína omokyreʼỹ chupe oipuru hag̃ua pe tiémpo orekóva Jehová servísiope. ¿Mbaʼépa ikatu hína oipytyvõ peteĩ imitãvape odesidi porã hag̃ua? Efesios 5:15-17 tuicha ikatu oipytyvõ chupe ojepyʼamongetáramo hese (elee). Olee rire ko téxto, pe mitãrusu térã mitãkuña ohayhúva Jehovápe ikatu oñeporandu: “¿Mbaʼe la ‘Jehová oipotáva ajapo’? ¿Mbaʼépa adesidi vaʼerã ambovyʼa hag̃ua chupe? ¿Mbaʼe mbaʼépa ajapo vaʼerã aipuru porã hag̃ua pe tiémpo arekóva?”. Nemanduʼákena ‘ivaiha hína umi día’ ha ko múndo oĩva Satanás poguýpe oñehundi potaitemaha. Jadesidíramo iñarandúvaicha jadesidíta jajapo umi mbaʼe ombovyʼátava Jehovápe.

6. ¿Mbaʼépa María odesidi ojapo, ha mbaʼérepa ikatu jaʼe odesidi hague iñarandúvaicha?

⁶ Ehechakuaákena mbaʼépa la iñimportantevéva. Sapyʼánteko jareko heta mbaʼe jajapo vaʼerã, péro umívagui jaelehi vaʼerã pe iñimportantevéva. Upéva ndeʼiséi umi mbaʼe ñambotapykue vaʼekue ivaiha, ndahaʼéinte la iñimportantevéva. Péicha jadesidíramo jaaprovecha porãta pe tiémpo jarekóva. Ñantende porã hag̃ua ko téma ñañeʼẽta Marta rehe. La Biblia omombeʼu Jesús oho hague ovisita Marta ha Maríape, ha katuete Marta ovyʼaitereíne raʼe Jesús ou haguére ovisita chupekuéra. Upévare haʼe oñepyrũ okosina heta mbaʼe. Péro haʼe okosina aja, iñermána María oho oguapy Jesús renondépe ha ojapysaka hese. Marta ningo imbaʼeporãsénte kuri Jesúndi ha ndaivaíri upéva, péro María “oelehi pe párte iporãvéva” (Luc. 10:38-42). Kon el tiémpo oiméne María ni naimanduʼavéima mbaʼépa hoʼu raʼe upe díape, péro ñaĩkuaa segúro núnka ndahesarái hague umi mbaʼe Jesús omboʼe vaʼekuégui chupe. María omombaʼe vaʼekue pe tiémpo ikatúva ohasa Jesúndi, ha ñande ñamombaʼe avei pe tiémpo ikatúva jahasa Jehovándi. ¿Mbaʼéichapa ikatu jaaprovecha porã pe tiémpo jahasáva Jehovándi?

7. ¿Mbaʼérepa iñimportantete ñañemboʼe, jastudia ha jajepyʼamongeta?

⁷ Nemanduʼákena reñemboʼe, restudia ha rejepyʼamongeta jave remombaʼeguasuha hína Jehovápe. Ñañemboʼe jave ñañemongeta hína ñande Túa ñanderayhuetévandi (Sal. 5:7). Jastudia jave la Biblia jaikuaa porãve hína Jehovápe, péicha jave ñaaprende hína pe iñaranduvévagui (Prov. 2:1-5). Ha jajepyʼamongeta jave jahechakuaa Jehová orekoha kualida iporãitereíva, ha ñantende porãve umi mbaʼe haʼe ojapótava ñanderehehápe amo gotyove. Péicha jaipuru porãma hína ñane tiémpo, ¿péro mbaʼéichapa ikatu jaaprovecha porãve pe tiémpo jahasáva Jehovándi?

8. ¿Mbaʼéichapa ikatu jasegi Jesús ehémplo jaipuru porã hag̃ua ñane tiémpo?

⁸ Ikatúramo, eho peteĩ lugár itrankilohápe. Ñapensamíntena Jesúsre. Haʼe oñepyrũ  mboyve opredika oho vaʼekue 40 díare pe desiértope (Luc. 4:1, 2). Upe lugár itrankiloitévape Jesús ikatu vaʼekue oñemboʼe ha ojepyʼamongeta la Jehová oipotávare haʼe ojapo. Koʼã mbaʼe katuete oipytyvõne raʼe Jesúspe oaguanta hag̃ua la oñepresentáva chupe upe rire. ¿Mbaʼépa ñaaprende la Jesús ojapo vaʼekuégui? Oimérõ nde rógape peiko éntre heta, ikatu oime ijetuʼu hína ndéve etopa hag̃ua peteĩ lugár trankílo. Oimérõ upéicha, ikatu por ehémplo eheka peteĩ lugár trankílo okápe. Peteĩ ermána Franciagua hérava Julie heʼi ojapoha jepi upéicha oñemboʼese jave haʼeñoháme. Haʼe ningo oiko iménandi peteĩ kotyʼípente, upévare ijetuʼu la oĩ hag̃ua haʼeño. Julie heʼi: “Káda día aha peteĩ plásape ha añepyrũ aguata upérupi, pépe ikatu aĩ cheaño, añekonsentra porã ha añemongetaite Jehovándi”.

9. ¿Mbaʼéichapa Jesús ohechauka vaʼekue omombaʼeha pe tiémpo ohasáva Jehovándi hembiapo hetáramo jepe?

⁹ Jesús oiko aja ko yvy ape ári oreko vaʼekue heta mbaʼe ojapo vaʼerã. Haʼe oho vaʼekue ápe ha pépe opredika hag̃ua, ha ohohápente atýra vaʼekue la hénte okorréva hapykuéri. Ha Jesús oñemotiémpomante vaʼerã kuri oipytyvõ hag̃ua chupekuéra. Peteĩ jey ‘entéro umi oikóva peteĩ siudápe oñembyaty peteĩ óga rokẽ renondépe’, oikuaágui Jesús oĩha upépe. Upéicharõ jepe Jesús oñemotiémpo vaʼekue oñemboʼe hag̃ua Jehovápe. La Biblia heʼi koʼẽ mboyve haʼe oho hague “ndaiporihápe avavete”, ikatu hag̃uáicha ohasa tiémpo haʼeñoháme Jehovándi (Mar. 1:32-35).

10, 11. Según Mateo 26:40, 41, ¿mbaʼe konséhopa Jesús omeʼẽ raʼe idisipulokuérape, péro mbaʼépa oiko upe rire?

¹⁰ Pe pyhare omano mboyve Jesús oheka jey peteĩ lugár trankílo ikatuhápe ojepyʼamongeta ha oñemboʼe. La Biblia omombeʼu haʼe oho hague pe hardín de Getsemanípe ojapo hag̃ua upéva (Mat. 26:36). Upérõ Jesús omboʼe idisipulokuérape iñimportantetereiha oñemboʼe.

¹¹ Eñehaʼãmína eñeimahina la oiko vaʼekue. Jesús ha idisipulokuéra ohórõ guare pe hardín de Getsemanípe pyharepytéma kuri, posívlemente las 12 pasádoma. Upéicharõ jepe Jesús heʼi idisipulokuérape: “Ani peke ha peñatende che ajapoháicha”, ha upéi oho oñemboʼe (Mat. 26:37-39). Péro Jesús oñemboʼe aja idisipulokuéra okepa joa, upévare Jesús oúrõ guare ha otopa hesekuéra péicha heʼi chupekuéra: “Peñatende porãke siémpre ha peñemboʼe meme” (elee Mateo 26:40, 41). Péro Jesús ohechakuaa vaʼekue avei idisipulokuéra ikaneʼõitereimaha. Upévare haʼe heʼi vaʼekue: “La hénte ojapose iporãva, péro hete ikangy”. Péicha ohechauka vaʼekue haʼe ombyasyha idisipulokuérape. Upéi Jesús oho jey oñemboʼe, péro ou jeývo otopa idisipulokuéra opyta jey hague oke. Upéi oho jey oñemboʼe, ha oúvo otopa jey hesekuéra upéicha. Umi idisipulokuéra okénte oñemboʼe rangue (Mat. 26:42-45).

12. ¿Mbaʼépa ikatu rejapo oiméramo ijetuʼu ndéve eñemboʼe hag̃ua pórke nekaneʼõiterei térã ejepyʼapyeterei?

 ¹² Eelehi porãkena la óra. Sapyʼánteko ijetuʼu ñandéve ñañemboʼe hag̃ua, pórke jareko heta mbaʼe ñandepyʼapýva, osino katu pórke ñanekaneʼõiterei. Upéva haʼe peteĩ mbaʼe oikóva heta ermáno ha ermánare. Oimérõ upéva oikóma nderehe, ¿mbaʼépa ikatu rejapo? Oĩ ningo ermáno ojepokuaa vaʼekue oñemboʼe pyharepytéma, oke mboyve. Péro opilla upéva ndoikoiha pórke hopehyietereíma. Upémarõ okambia ha oñemboʼénte voimie, hopehyieterei mboyve. Oĩ avei opilláva la oñemoĩ lája oñemboʼe hag̃ua tuichaiterei oipytyvõha chupe, por ehémplo algúno oguapy osino katu oñesũ. ¿Péro mbaʼépa ikatu rejapo ejepyʼapyetereíramo ha ndaikatúi ni eñemboʼe? Emombeʼu Jehovápe mbaʼéichapa reñeñandu, haʼe katuete nentendéta ha ndeporiahuverekóta (Sal. 139:4).

13. ¿Mbaʼéichapa umi selulár, távlet térã komputadóra umíva ikatu ñanemolesta jahasa jave tiémpo Jehovándi?

¹³ Eñahaʼãkena ani ejedistrae restudia jave. Ndahaʼéi ningo ñañemboʼe javénte la ñañemoag̃uiva Jehováre. Jastudia jave la Biblia ha jaha jave rreunionhápe ñañemoag̃uinte hína avei hese. ¿Mbaʼe mbaʼépa ikatu rejapo eaprovecha porã hag̃ua pe tiémpo reipurúva tahaʼe restudiáta jave neaño térã reĩ jave rreunionhápe? Eñeporandumína: “¿Mbaʼe mbaʼépa chedistrae jepi rreunión aja térã añehaʼã jave astudia?”. ¿Erresivípa llamáda, mensáhe térã korréo elektróniko? Koʼág̃arupi hetaiterei persóna oreko selulár, távlet ha komputadóra umíva, pórke ideprovéchoko añete. Péro oĩ expérto heʼíva ijetuʼuha ñañekonsentra jarekóramo ñande ypýpe peteĩ selulár, oĩ haguérente hína pérupi ikatúma ñandedistrae. Peteĩ profesór de sikolohía heʼi voi: “Ndaikatúi reñekonsentra upe rejapóvare hína, upéva rangue ótro ladoite oĩ la ne akã”. Oñepyrũ mboyve umi aty guasu ojeʼe jepi ñandéve ñamoĩ hag̃ua ñande selulár téra távlet omolestaʼỹ hag̃uáicha ótrope. ¿Ndaikatuichénepa jajapo avei upéva jahasa jave tiémpo Jehovándi ñaneañoháme? Ikatu ñamoĩ ñande selulár téra távlet ñanemolestaʼỹ hag̃uáicha ñandéve.

14. Según Filipenses 4:6, 7, ¿mbaʼéichapa Jehová ikatu ñanepytyvõ ñañekonsentra hag̃ua?

¹⁴ Ejerure Jehovápe tanepytyvõ eñekonsentra hag̃ua. Epilláramo ótro ladoite oĩha hína la  ne akã, tahaʼe restudia jave neañoháme térã reĩ jave rreunionhápe, ikatu ejerure Jehovápe tanepytyvõ. Oiméramo ejepyʼapy, ijetuʼútante voi emboyke hag̃ua umi mbaʼe ndepyʼapýva, reñekonsentra hag̃ua la ojeʼévare rreunionhápe térã la releévare hína restudia aja. Péro iñimportanteterei ningo rejapo péicha. Ikatu voi eñemboʼe Jehovápe ikatu hag̃uáicha omeʼẽ ndéve pe pyʼaguapy oúva chugui, péva oñangarekóta ne korasõre ha ‘umi mbaʼe repensávare’ (elee Filipenses 4:6, 7).

15. ¿Mbaʼérepa nerembyasymoʼãi rehasa haguére tiémpo Jehovándi?

¹⁵ Emboykéramo tiémpo eñeʼẽ hag̃ua Jehovándi, ehendu hag̃ua chupe ha repensa hag̃ua hese, nerembyasymoʼãi ni michĩmi. ¿Mbaʼérepa? Primeroite voi, pórke upéva nepytyvõta redesidi porãve hag̃ua. La Biblia heʼi ‘pe oiko meméva umi iñarandúvandi iñarandutaha avei’ (Prov. 13:20). Upévare rehasáramo tiémpo Jehovándi katuete nearandúta, pórke haʼe la iñaranduvéva ko univérsope. Péicha repilla porãvéta mbaʼépa rejapo vaʼerã rembovyʼa hag̃ua chupe, ha mbaʼépa nderejapói vaʼerã ani hag̃ua haʼe oñeñandu vai.

16. ¿Mbaʼérepa jahasáramo tiémpo Jehovándi ñandevalevéta ñaporomboʼe hag̃ua?

¹⁶ Segundo, ndevalevéta reporomboʼe hag̃ua. Jastudia jave la Biblia peteĩ persónandi ñaipytyvõseterei chupe oñemoag̃ui hag̃ua Jehováre. Péro upearã ñande voi ñañemongeta pyʼỹi vaʼerã ñande Túa Jehovándi, péicha jahayhuvéta chupe. Ha jahayhúramo Jehovápe, jaikuaáta mbaʼéichapa ñaipytyvõta ñane estudiántepe ohayhu hag̃ua avei Jehovápe. Jesús peichaite ojapo vaʼekue, haʼe oñeʼẽro guare Itúare ojekuaa porã vaʼekue hese ohayhuetereiha chupe, ha upéva oipytyvõ vaʼekue idisipulokuérape ohayhu hag̃ua avei Jehovápe (Juan 17:25, 26).

17. ¿Mbaʼéichapa ñañemboʼéramo ha jastudiáramo ñanepytyvõta jajeroviave hag̃ua?

¹⁷ Tercero, rejeroviavéta Jehováre. Ijetuʼu jave ñanendive jajerure jepi Jehovápe tañandegiami, tañanepytyvõ ha tañanekonsola. Ha káda ke jahecha haʼe orrespondeha ñandéve ñane ñemboʼe jajeroviave hese (1 Juan 5:15). Pe estúdio personál ikatu avei ñanepytyvõ jajeroviave hag̃ua. La Biblia heʼi voi: “Jajerovia ñahendu rire pe mensáhe” (Rom. 10:17). Upéicharõ jepe, jaikuaa haguérente heta mbaʼe ndeʼiséi jajerovia mbaretetamaha. ¿Mbaʼépa upéicharõ jajapove vaʼerã?

18. Emombeʼumína mbaʼérepa iñimportánte jajepyʼamongeta.

¹⁸ Jastudia rire jajepyʼamongeta vaʼerã umi mbaʼe ñaaprendévare. Upéva ojapo kuri pe oskrivi vaʼekue pe Salmo 77. Haʼéngo oñeñandu vaieterei kuri pórke opensa Jehová ndoguerohoryveimaha  chupe ni umi ótro israelítape. Haʼe oñeñandu vaieterei upévare ha ndaikatuvéi ni oke (versíkulo 2-8). ¿Mbaʼépa ojapo upémarõ? Haʼe heʼi Jehovápe: “Ajepyʼamongetáta ne rembiapokuére, ha siémpre apensáta umi mbaʼe rejapóvare” (versíkulo 12). Ko salmísta oikuaa porãiterei kuri umi mbaʼe Jehová ojapo vaʼekue ipuévlo rehehápe ymave, upéicharõ jepe haʼe heʼi: “Ñandejára ningo nopenavéi ñanderehe, ¿hesarái mbaʼe piko ñandehegui? ¿Ipochyeterei mbaʼe piko ajeve nombyasýi la oikóva ñanderehe?” (versíkulo 9). Ko kuimbaʼe ojepyʼamongeta avei umi mbaʼe porãita Jehová ojapo vaʼekuére yma ha mbaʼéichapa oiporiahuvereko ipuévlope (versíkulo 11). Opensa rire entéro koʼã mbaʼére, ¿mbaʼépa ohechakuaa raʼe haʼe? Pe salmísta ohechakuaa Jehová núnka ndohejamoʼãiha ipuévlope (versíkulo 15). Ha upeichaite avei ikatu jajapo ñande. Tuicha imbaretevéta ñande jerovia jajepyʼamongetáramo umi mbaʼe Jehová ojapóma vaʼekuére ipuévlo rehehápe ha umi mbaʼe ojapóma vaʼekuére avei ñanderehehápe.

19. ¿Mbaʼépepa avei ñanepytyvõta jahasáramo tiémpo Jehovándi?

¹⁹ Cuarto, jahayhuvéta Jehovápe. Péva la iñimportantevéva hína. Pórke pe mborayhu la tuichave ñanepytyvõtava ñaneñeʼẽrendu hag̃ua Jehovápe, ñambovyʼa hag̃ua chupe ijetuʼúramo jepe, ha ñaaguanta hag̃ua oimeraẽ mbaʼe (Mat. 22:37-39; 1 Cor. 13:4, 7; 1 Juan 5:3). Pe amista jarekóva Jehovándi iporãiterei, ndaipóri voi mbaʼeve iporãvéva upévagui (Sal. 63:1-8).

20. ¿Mbaʼépa rejapose koʼág̃a guive netiempove hag̃ua Jehovápe g̃uarã?

²⁰ Nemanduʼákena remombaʼeguasuha Jehovápe reñemboʼe jave chupe, restudia jave Iñeʼẽ ha rejepyʼamongeta jave hese. Jesúicha avei, ehekákena peteĩ lugár itrankílova rehasa hag̃ua tiémpo Jehovándi. Aníkena eheja mbaʼeve ndedistrae. Ejerure Jehovápe tanepytyvõ eñekonsentra hag̃ua restudia jave térã reĩ jave rreunionhápe. Reaprovecha porãramo pe tiémpo eguerekóva koʼág̃a, Jehová nevendesíta ha ikatúta reiko pára siémpre pe múndo pyahúpe (Mar. 4:24).