1, 2. a) ¿Mbaʼéicha javépa koʼýte ñanemanduʼa umi jahayhúva omano vaʼekuére? b) ¿Mbaʼépa Jesús heʼi idisipulokuérape pe pyhare omano mboyve?

 OHASÁMARÕ jepe hetaiterei áño, ñande jasegi gueteri ñanemanduʼa umi jahayhúva omano vaʼekuére. Ha koʼýte ñanemanduʼa hesekuéra og̃uahẽvo ohóvo pe fécha omano hague.

² Ñandéngo siémpre ñanemanduʼa Jesúsre, pórke jahayhu chupe (1 Ped. 1:8). Ha koʼýte jajapo upéva, hiʼag̃uívo pe fécha omano hague. Káda áño, hetaiterei persóna oĩva ko yvy ape ári oñembyaty jepi ogueromanduʼa hag̃ua upe fécha. ¿Ha mbaʼérepa ñande avei jajapo upéva? Jagueromanduʼa hag̃ua upe persóna omeʼẽ vaʼekuépe hekove ñanderehehápe, ñaneguenohẽ hag̃ua pekádo ha ñemano poguýgui (Mat. 20:28). Avei, Jesús voi oipota vaʼekue idisipulokuéra ogueromanduʼa pe fécha haʼe omano hague. Upévare, pe pyhare omano mboyve, Jesús ombohasa pe pan ha pe víno idisipulokuérape ha heʼi chupekuéra: “Pesegíkena pejapo ko mbaʼe penemanduʼa hag̃ua cherehe” (Luc. 22:19).

3. ¿Mbaʼépa ñaanalisáta ko artíkulope?

³ Káda áño hetaiterei persóna oho pe Konmemorasionhápe, ha umívagui saʼimínte oĩ la orekóva esperánsa ohotaha oiko yvágape. Péro la majoría oreko esperánsa opytataha oiko ko yvy ape ári. Ko artíkulope jahecháta mbaʼérepa koʼã mokõi grúpo ohosete pe Konmemorasionhápe, ha mbaʼépepa oipytyvõ chupekuéra upéva. Primeroite voi jahecháta mbaʼérepa umi unhidokuéra ohosete pe Konmemorasionhápe.

4. ¿Mbaʼérepa umi unhído hoʼu pe pan ha pe víno Konmemorasionhápe?

⁴ Káda áño umi unhído oho pe Konmemorasionhápe ha hoʼu pe pan ha pe víno. ¿Mbaʼérepa haʼekuéra ojapo upéva? Jaikuaa hag̃ua, ñaanalisamíta mbaʼépa Jesús ojapo vaʼekue pe pyhare omano mboyve. Pe Páskua rire, Jesús ohechauka idisipulokuérape mbaʼéichapa ojapo vaʼerã pe Konmemorasión. Haʼe ombohasa umi 11 apóstol ifiélvape pan ha víno, ha heʼi chupekuéra hoʼu hag̃ua. Upérõ Jesús oñeʼẽ chupekuéra mokõi kompromísore. Peteĩva haʼe pe kompromíso pyahu, ha pe ótro katu haʼe pe kompromíso ogoverna hag̃ua hikuái hendive Irréinope (Luc. 22:19, 20, 28-30). * Koʼã kompromíso rupive, umi apóstol ha hetaitereive persónagui oikóta rréi ha saserdóte yvágape (Apoc. 5:10; 14:1). Umi unhído hembýva gueteri * añoite ikatu hoʼu pe pan ha pe víno Konmemorasionhápe, pórke haʼekuérante oike umi mokõi kompromísope.

5. ¿Mbaʼépa oikuaa umi unhído?

⁵ Umi unhído ohose avei pe Konmemorasiónpe pórke upépe ikatu ojepyʼamongeta hikuái iñesperánsare. Iporãitereíntema ningo pe esperánsa Jehová omeʼẽva chupekuéra. Por ehémplo haʼekuéra oikóta yvágape, orekóta peteĩ kuérpo ikatuʼỹva oñembyai ha ikatuʼỹva omano, ikatúta ogoverna Crístondi ha umi ótro 144.000-ndi, ha la iporãveha ikatúta ohecha Jehovaitépe voi (1 Cor. 15:51-53; 1 Juan 3:2). Umi unhído oikuaa oñeinvitaha chupekuéra oho hag̃ua yvágape, péro la oho hag̃ua omano meve ifiél vaʼerã (2 Tim. 4:7, 8). Umi unhído ningo ovyʼaiterei ojepyʼamongetávo iñesperánsare (Tito 2:13). ¿Péro mbaʼépa ikatu jaʼe umi ‘ótro ovechakuérare’? (Juan 10:16). ¿Mbaʼérepa haʼekuéra ohosete avei pe Konmemorasionhápe?

6. ¿Mbaʼérepa umi ótro ovechakuéra oho avei pe Konmemorasionhápe káda áño?

⁶ Umi ótro ovechakuéra ohose avei pe Konmemorasionhápe. Haʼekuéra ndoʼúi pe pan ni pe víno, péro ovyʼa oĩ haguére upépe. Áño 1938-pe primera ves oñeinvita avei umi ndahaʼéivape unhído oho hag̃ua pe Konmemorasionhápe. Peteĩ Ñemañaha osẽ vaʼekue el 1 de marzo de 1938 heʼi: “Iporãitereíta ningo umi ótro ovechakuéra oĩramo pe Konmemorasionhápe ha ohecha la ojejapóva upépe. Péva ningo peteĩ moménto haʼekuéra avei ovyʼa hag̃ua”. Peteĩ kasamientohápe ningo umi invitádo vyʼápe oho, ndahaʼéiramo jepe haʼekuéra la omendátava. Ha upéicha avei umi ótro ovechakuéra vyʼápe oho pe Konmemorasionhápe, ndoʼumoʼãiramo jepe pe pan ni pe víno.

7. ¿Mbaʼérepa umi ótro ovechakuéra ohoseterei ohendu pe diskúrso de Konmemorasión?

⁷ Pe Konmemorasiónpe umi ótro ovechakuéra ojepyʼamongeta avei iñesperánsare. Haʼekuéra ohenduseterei pe diskúrso de Konmemorasión, pórke upépe oñemombeʼu mbaʼépa Jesucristo ha umi 144.000 ojapóta yvyporakuéra rehehápe. Por ehémplo, oñemombeʼu haʼekuéra ogovernataha 1.000 áñore, ha oipytyvõtaha entéro persóna ifiélvape iperfékto hag̃ua ha ojapo hag̃ua ko yvýgui peteĩ paraíso. Upe tiémpope oñekumplíta avei umi profesía oĩva koʼã téxtope: Isaías 35:5, 6; 65:21-23; ha Apocalipsis 21:3, 4. Pe Konmemorasión oipytyvõ chupekuéra oñeimahina  hag̃ua oĩmaha pe múndo pyahúpe, ha okompartiha ihénte ha iñamigokuérandi. Péva oipytyvõ chupekuéra ovyʼa hag̃ua koʼág̃ama voi, ojeroviave hag̃ua iñesperánsare ha oservi hag̃ua Jehovápe pára siémpre (Mat. 24:13; Gál. 6:9).

8. ¿Mbaʼérepa avei umi ótro ovechakuéra oho pe Konmemorasiónpe?

⁸ Umi ótro ovechakuéra ndahaʼéi ohóva pe Konmemorasiónpe ohendu hag̃uánte pe diskúrso. Haʼekuéra oho avei pórke ohechaukase ohayhu ha oapojaha umi unhídope. Ñandejára Ñeʼẽ heʼíma vaʼekue voi umi unhidokuéra ha umi ótro ovechakuéra ombaʼapotaha oñondive. Ñaanalisamína unos kuánto profesía ohechaukáva upéva.

9. ¿Mbaʼépa ohechauka Zacarías 8:23 ojapotaha umi ótro ovechakuéra?

⁹ (Elee Zacarías 8:23). Ko profesía omombeʼu ñandéve umi unhidokuéra ha umi ótro ovechakuéra ombaʼapotaha oñondive, ha ajépa ichukoiterei la omombeʼu lája ñandéve. Pe “judío” ha umi oĩva ‘hendive’ orrepresenta umi unhído hembývape ko yvy ape ári (Rom. 2:28, 29). Umi “10 kuimbaʼe oñeʼẽva opaichagua idióma” katu orrepresenta umi ótro ovechakuérape, ha haʼekuéra ‘oñakarãma hatã pe judío aóre’. ¿Mbaʼépa ohechauka upéva? Upéva ohechauka umi ótro ovechakuéra siémpre oĩtaha umi unhído ykére ikatu hag̃uáicha oadora Jehovápe. Upévare, og̃uahẽvo pe fécha Jesús omano hague, haʼekuéra oĩ pe Konmemorasionhápe ohechauka hag̃ua siémpre oĩtaha iñermanokuéra unhído ykére.

10. ¿Mbaʼépa Jehová ojapo raʼe oñekumpli hag̃ua la heʼíva Ezequiel 37:15-19, 24, 25?

¹⁰ (Elee Ezequiel 37:15-19, 24, 25). Oñekumpli hag̃ua ko profesía, Jehová oipytyvõ umi unhidokuérape ha umi ótro ovechakuérape oĩ hag̃ua unído oñondive, ha mbaʼeve ndoseparamoʼãi chupekuéra. Ko profesía oĩva Ezequiélpe oñeʼẽ mokõi yvyráre. Pe yvyra heʼíva hese “Judápe g̃uarã” orrepresenta umi ohótavape yvágape (ymave Judágui osẽ vaʼekue Israel rreirã). Ha pe ótro yvyra, heʼíva hese “Josépe g̃uarã, orrepresentáva Efraínpe”, orrepresenta umi oikótavape ko yvy ape ári. * Jehová heʼi kuri ombojoajutaha koʼã mokõi grúpo, oiko hag̃ua chuguikuéra peteĩ yvyrántema. Haʼekuéra oĩta unído ha oservíta oñondive peteĩ Rréipente, haʼéva Jesucristo. Upévare káda áño umi unhidokuéra ha umi ótro ovechakuéra oĩ pe Konmemorasiónpe oñondive. Péicha koʼã mokõi grúpo ohechauka haʼeha “peteĩ ovecha atýnte”, oĩva “peteĩ pastór” poguýpente (Juan 10:16).

11. Según Mateo 25:31-36, 40, ¿mbaʼéichapa “umi ovecha” oipytyvõ Cristo ermanokuérape?

¹¹ (Elee Mateo 25:31-36, 40). “Umi ovecha” oñeñeʼẽha ko ehémplope haʼe hína umi ihústova oikóva koʼã ára pahápe, ha orekóva esperánsa oikóvo pára siémpre ko yvy ape ári. Koʼã ovecha ojapo ikatumíva oipytyvõ hag̃ua Cristo ermanokuérape. Umi unhidokuérape ningo oñenkarga opredika hag̃ua umi notísia porã ko yvy tuichakuére, ha ojapo hag̃ua la héntegui disípulo. Ha ikatu hag̃uáicha okumpli ko rresponsavilida tuichaitéva, umi ovechakuéra oipytyvõ mbarete chupekuéra (Mat. 24:14; 28:19, 20).

12, 13. ¿Mbaʼe mbaʼépa ojapo avei umi ótro ovechakuéra oipytyvõ hag̃ua Cristo ermanokuérape?

¹² ¿Ha mbaʼéichapa umi ótro ovecha oipytyvõ avei Cristo ermanokuérape? Unas kuánta semána og̃uahẽ mboyve pe Konmemorasión, umi ótro ovecha ojapo jepi opa ikatúva oinvita hag̃ua la héntepe oho hag̃ua  Konmemorasionhápe (ehecha pe rrekuádro: “ ¿Rejepreparámapa hína pe Konmemorasión tiémpope g̃uarã?”). Haʼekuéra ojapo avei opa ikatúva káda kongregasión oĩva ko yvy ape ári ojapo hag̃ua pe Konmemorasión, ndaipóriramo jepe ikongregasiónpe ni peteĩ unhído. Umi ótro ovecha ovyʼaiterei oipytyvõ haguére péicha Cristo ermanokuérape. Haʼekuéra oikuaa Cristo heʼi hague opa mbaʼe ojapóva hikuái oipytyvõ hag̃ua iñermanokuérape, ojapoha hína hesehápe voi (Mat. 25:37-40).

¹³ ¿Mbaʼérepa enterovéva jahase avei pe Konmemorasionhápe tahaʼe haʼéva la ñane esperánsa?

14. ¿Mbaʼéichapa Jehová ha Jesús ohechauka ñanderayhuetereiha?

¹⁴ Pórke jaagradeseterei Jehová ha Jesús ñanderayhu haguére. Jehová ningo hetaiterei mbaʼéma ojapo ohechauka hag̃ua ñanderayhuha, péro umívagui oĩ peteĩ orresaltavéva. Haʼe ohechauka ñanderayhuetereiha omboúvo Itaʼýra omano hag̃ua ñanderehehápe (Juan 3:16). Ha Jesús naiprovlemaiete vaʼekue ou hag̃ua ojapo upéva ha péicha ohechauka avei ñanderayhuetereiha (Juan 15:13). Jehová ha Jesús ningo ñanderayhueterei ha núnka ndaikatumoʼãi japagapa chupekuéra la ojapo vaʼekue ñanderehehápe, péro umi mbaʼe jajapóvare káda día ikatu jahechauka ñandeagradesidoha (Col. 3:15). Ñande jahaseterei pe Konmemorasionhápe jajepyʼamongeta hag̃ua umi mbaʼe ojapo vaʼekuére hikuái ñanderayhu rupi, ha jahechauka hag̃ua avei Jehová ha Jesúspe jahayhuetereiha chupekuéra.

15. ¿Mbaʼérepa umi unhído ha umi ótro ovechakuéra omombaʼeterei Jesús sakrifísio?

¹⁵ Pórke ñamombaʼeterei Jesús sakrifísio (Mat. 20:28). Umi unhído omombaʼeterei Jesús sakrifísio pórke upéva rupive haʼekuéra oreko esperánsa ohóvo yvágape. Avei haʼekuéra ojerovia rupi pe sakrifísiore, Jehová heʼíma hesekuéra ihustoha ha oadopta chupekuéra itaʼýraramo (Rom. 5:1; 8:15-17, 23). Umi ótro ovechakuéra omombaʼeterei avei Jesús sakrifísio, pórke upéva rupive haʼekuéra oĩ porã Ñandejára renondépe, ikatu oservi chupe, ha amo gotyove ‘osẽta pe jehasa asy guasúgui’ (Apoc. 7:13-15). Umi unhído ha umi ótro ovechakuéra omombaʼe ha oagradeseterei Jesús sakrifísio, upévare káda áño oho hikuái pe Konmemorasionhápe.

16. ¿Mbaʼérepa avei jahase pe Konmemorasionhápe?

¹⁶ Pórke ñaneñeʼẽrenduse Jesúspe. Tahaʼe jahátarõ yvágape térã japytáta ko yvy ape ári, ñande jajaposeterei la Jesús omanda vaʼekue pe pyhare omano mboyve. Haʼe heʼi vaʼekue: “Pesegíkena pejapo ko mbaʼe penemanduʼa hag̃ua cherehe” (1 Cor. 11:23, 24).

17. ¿Mbaʼéichapa pe Konmemorasión ñanepytyvõ ñañemoag̃uive hag̃ua Jehováre?

¹⁷ Ñanemoag̃uive Jehováre (Sant. 4:8). Jahecháma haguéicha, pe Konmemorasión ñanepytyvõ jajepyʼamongeta hag̃ua ñane esperánsare ha avei ñapensa jey hag̃ua mbaʼeichaitépa Jehová ñanderayhu (Jer. 29:11; 1 Juan 4:8-10). Jajepyʼamongetáramo ñane esperánsare ha avei mbaʼeichaitépa Jehová ñanderayhu, tuichaiterei ñanepytyvõta jahayhuve hag̃ua chupe ha avei ñañemoag̃uive hag̃ua hese (Rom. 8:38, 39).

18. ¿Mbaʼéichapa ñanepytyvõ jajepyʼamongetáramo Jesús ehémplore?

¹⁸ Ñanemokyreʼỹ jasegi hag̃ua Jesús ehémplo (1 Ped. 2:21). Og̃uahẽvo ohóvo pe Konmemorasión, ñande jalee jepi umi téxto  omombeʼúva mbaʼépa Jesús ojapo una semána omano mboyve, mbaʼéichapa omano, ha mbaʼéichapa oikove jey. Upéi pe Konmemorasión díape pe diskúrso ñanemomanduʼa mbaʼeichaitépa Jesús ñanderayhu (Efes. 5:2; 1 Juan 3:16). Jaleévo mbaʼeichaitépa Jesús ojesakrifika vaʼekue ñanderehe ha jajepyʼamongeta hese, ñanemokyreʼỹta jaiko hag̃ua “Jesús oiko haguéicha” (1 Juan 2:6).

19. ¿Mbaʼépa jajapo vaʼerã Jehová siémpre ñanderayhu hag̃ua?

¹⁹ Ñanemokyreʼỹ ñañehaʼãmbaite hag̃ua Jehová ñanderayhu hag̃ua (Jud. 20, 21). Jehová siémpre ñanderayhúta ñañehaʼãmbaitéramo ñambovyʼa chupe, ñamopotĩ héra ha ñaneñeʼẽrendu chupe (Prov. 27:11; Mat. 6:9; 1 Juan 5:3). Pe Konmemorasión ñanemokyreʼỹ jaiko hag̃ua siémpre Jehová oipotaháicha, péicha haʼetéta voi jaʼéva chupe: “Jehová, aipota siémpre cherayhu”.

20. ¿Mbaʼérepa enterovéva jaha Konmemorasionhápe?

²⁰ Jahecháma ningo mbaʼérepa iñimportanteterei enterovéva jaha Konmemorasionhápe, tahaʼe jahátarõ jaiko yvágape térã japytátarõ ko yvy ape ári. Ñande ningo jahayhueterei Jesúspe, upévare káda áño ñañembyaty jagueromanduʼa hag̃ua pe fécha haʼe omano hague. Péro ndahaʼéi peteĩ féchante la jagueromanduʼáva, síno ñanemanduʼa mbaʼeichaitépa Jehová ñanderayhu ha ombou Itaʼýrape omano hag̃ua ñanderehehápe. Ko áñope pe Konmemorasión hoʼáta viernes 15 de abril. Ñande jahayhueterei Jehovápe ha avei jahayhueterei Jesúspe, upévare og̃uahẽvo pe fécha haʼe omano hague ndaipóri ñandejoko vaʼerã jaha hag̃ua pe Konmemorasionhápe.