1. ¿Mbaʼérepa koʼág̃arupi oĩ heta ndojeroviáiva la Bíbliare?

 HETA hénte ningo koʼág̃arupi ndoikuaavéima mávarepa ikatu okonfia. Heta oĩ orrespetáva umi polítikope, umi sientífiko ha umi komersiántepe, péro ndoikuaái hikuái iñintensión porãpa hína. Avei ndorrespetái hikuái umi líder rrelihiósope heʼíva ijehe kristianoha. Upévare ndajahecharamói koʼã hénte ndojeroviaiha la Bíbliare, pórke umi líder rrelihióso heʼi guaʼu osegiha pe gía omeʼẽva la Biblia.

2. Heʼiháicha Salmo 119:160, ¿mbaʼe rehepa ñaime vaʼerã konvensído?

² Enterove Jehová siervokuéra ningo ñaime konvensído Ñandejáragui ouha pe añetegua, ha haʼe siémpre oipotaha pe iporãvéva ñandéve g̃uarã (Sal. 31:5; Is. 48:17). Ñande ningo jaikuaa porã umi mbaʼe jaleéva la Bíbliape haʼeha la verda. Jaguerovia voi opa mbaʼe heʼíva Ñandejára ‘siertogua memeteha’ (elee Salmo 119:160). b Ñande ñaime de akuérdo peteĩ biblista heʼi vaʼekuéndi: “Ñandejára ningo ndaijapúi ni michĩmi entéro mbaʼe heʼívape, ha ndaipóri ni peteĩ posivilida haʼe ojavýne hag̃ua. Ñandejára puévlo ojerovia la haʼe heʼívare, pórke haʼekuéra okonfia hese”.

3. ¿Mbaʼépa ñaanalisáta ko artíkulope?

³ ¿Mbaʼéichapa ikatu ñaipytyvõ ñande rapichakuérape okonfia  hag̃ua avei Ñandejára Ñeʼẽre? Ñaanalisamína mbohapy rrasón ohechaukáva mbaʼérepa ikatu jajerovia la Bíbliare. Jahecháta pe mensáhe oĩva la Bíbliape noñekambiái hague, umi profesía siémpre oñekumpliha, ha la Biblia orekoha pe podér okambia hag̃ua la héntepe.

4. ¿Mbaʼérepa oĩ umi persóna opensáva oñekambia hague la Biblia heʼíva?

⁴ Jehová ningo ojevale vaʼekue amo 40 kuimbaʼe ifiélvare oskrivi hag̃ua umi lívro oĩva la Bíbliape. Péro ko tiémpope ndaiporivéima ni peteĩ umi manuskríto orihinál. c Upévare oĩ umi persóna odudáva la Bíbliape oĩne hag̃ua pe ojeskrivi ypy haguéicha. ¿Mbaʼéichapa ikatu ñaime segúro la Biblia heʼíva noñekambiái hague?

5. ¿Mbaʼéichapa ojekopia vaʼekue umi Escrituras Hebreas? (Ehecha pe taʼanga oĩva ko rrevísta apére).

⁵ Jehová ningo oprotehe hag̃ua pe mensáhe oĩva la Bíbliape, haʼete voi heʼi isiervokuérape okopia hag̃ua pe oĩva pype. Haʼe omanda vaʼekue umi rréi de Israélpe haʼekueraite voi okopia hag̃ua pe léi heʼíva, ha avei onombra vaʼekue umi levítape omboʼe hag̃ua pe puévlope umi léi (Deut. 17:18; 31:24-26; Neh. 8:7). Umi judíope ojegueraha rire Babilóniape, peteĩ grúpo de kopísta profesionál oñepyrũ ojapo heta kópia pe Escrituras Hebréasgui (Esd. 7:6). Koʼã kuimbaʼe ningo oñatende porã vaʼekue la ojapóvare. Upéi tiémpo rire oñepyrũ okonta hikuái umi palávra ha létra jepe ojasegura hag̃ua okopiapa porãpa hína hikuái. Péro haʼekuéra iñimperfékto rupi, ojavy mimi vaʼekue avei okopiávo. Péro ojejapo rupi heta kópia ikatu kuri ojepilla umi errór ohasa vaʼekue. Jahechamína mbaʼéichapa ojepilla vaʼekue umíva.

6. ¿Mbaʼéichapa ikatu japilla moõitépa ojavy vaʼekue umi kopísta?

⁶ Umi biblista ko tiempopegua oreko peteĩ fórma iporãitereíva opilla hag̃ua moõitépa ojejavy vaʼekue ojekopiárõ guare la Biblia. Por ehémplo, ñamoĩ chupe 100 kuimbaʼépe ojejerureha okopia hag̃ua peteĩ dokuménto, ha peteĩva umíva apytégui ojavy michĩmi peteĩ hendápe. ¿Mbaʼéichapa ikatu japilla upéva? Ñakomparáramo enterovete umi kópia. Upéicha avei umi biblista okomparávo umi hetaite manuskríto bíblico, ikatu otopa umi errór térã fálla ohasa vaʼekue umi kopístagui.

7. ¿Mbaʼéichapa jaikuaa umi kopísta oñatende porã hague ojapo hag̃ua umi kópia?

⁷ Jahechamína peteĩ ehémplo ohechaukáva mbaʼeichaitépa oñatende porã vaʼekue umi kopísta ojapo hag̃ua umi kópia. Pe manuskríto itujavéva ha oĩva kompléto haʼe hína pe Códice de Leningrado, ojejapo vaʼekue 1008 térã 1009-pe d.C. Péro ndaʼareguasúi ojetopa heta manuskríto bíblico térã peteĩ párte umi manuskrítogui, ha amo 1.000 áñorupi itujave pe Códice de Leningrádogui. Ikatu ñapensa umi manuskríto ojekopia rire heta vése umi 1.000 áño aja, pe Códice de Leningrado oiméne hag̃ua idiferentete upe ojeskrivi vaʼekuégui pe manuskríto ypykuépe. Péro ndahaʼéi upéicha. Umi biblista okomparávo umi manuskríto yma guare umi ipyahuvévare, haʼekuéra otopa saʼieterei oĩha la diferénsia umi mbaʼe heʼívape, ha pe mensáhe oĩva la Bíbliape nokambiái hague.

8. ¿Mbaʼépa la diferénsia oĩva éntre umi Escrituras Griegas Cristianas ha umi ótro lívro yma guare?

⁸ Umi kristiáno ypykue osegi pe kostúmbre orekóva umi okopia vaʼekue pe Escrituras Hebreas. Haʼekuéra oñatende porã vaʼekue okopia hag̃ua umi 27 lívro oĩva pe Escrituras Griégaspe, ha umíva oipuru vaʼekue hikuái umi irreunionkuérape ha opredika hag̃ua. Peteĩ biblista okompara vaʼekue umi Escrituras Griegas  manuskríto umi ótro lívro upe tiémpope guaréndi. Haʼe heʼi: “Koʼág̃arupi hetave kópia oĩ umi Escrituras Griégasgui ha ikompletove jepi umíva umi ótro lívrogui”. Peteĩ lívro ningo heʼi umi Escrituras Griégasre: “Ñande ningo ikatu jajerovia la jaleévare umi traduksión ojejapóvare koʼág̃arupi umi Escrituras Griégasgui, pórke oreko el mísmo mensáhe oskrivi vaʼekue umi eskritór yma guare” (Anatomy of the New Testament).

9. Heʼiháicha Isaías 40:8, ¿mbaʼépa jaikuaa porã pe mensáhe oĩvagui la Bíbliape?

⁹ Hetaiterei áñorema heta kopísta ombaʼapo jejopy vaʼekue ojapo porã hag̃ua umi kópia de la Biblia. Upéicha rupi ñande jareko peteĩ Biblia ijexáktova jalee hag̃ua ha jastudia hag̃ua koʼág̃arupi. d Jaikuaa ningo Jehová ojasegura hague pe mensáhe oĩva Iñeʼẽme ñande jareko hag̃ua koʼág̃a ha ijexákto hag̃ua (elee Isaías 40:8). Péro ikatu oĩ heʼíva noñekambiáiramo jepe pe mensáhe oĩva la Bíbliape ndeʼiséi hína upéva ouha Ñandejáragui. Upévare jahechamína koʼág̃a umi pruéva ohechaukáva añetehápe Ñandejáragui ou hague la Biblia.

10. Emombeʼu mbaʼéichapa oñekumpli vaʼekue peteĩ profesía ohechaukáva siertoha 2 Pedro 1:21 heʼíva. (Ehecha umi taʼanga).

¹⁰ La Bíbliape oĩ hetaiterei profesía oñekumplíma vaʼekue, ha oĩ voi umi ojeskrivi vaʼekue hetaiterei áño upe mboyve. Pe istória ningo okonfirma umi profesía oñekumpli hague. Ha upéva ñandéve nañanesorprendéi, pórke jaikuaa umi profesía ou hague Jehovaitégui voi (elee 2 Pedro 1:21). Ñapensamíntena mbaʼéichapa oñehundi vaʼekue pe siuda de Babilonia. Éntre umi áño 778 ha 732 a.C., Jehová ojevale vaʼekue proféta Isaíasre opredesi hag̃ua Babilonia ojejagarrataha. Hiʼarive haʼe heʼi vaʼekue Ciro herataha pe ojagarrátava upe siuda, ha oexplika vaʼekue voi en detálle mbaʼéichapa ojapóta upéva (Is. 44:27–45:2). Isaías oprofetisa vaʼekue avei tiémpo rire Babilonia oñehundietetaha, ha avave ndoikomoʼãvéima upépe (Is. 13:19, 20). Ha upeichaite oiko vaʼekue. Babilonia ningo haʼe vaʼekue peteĩ siuda ipoderosoitereíva,  péro umi medo ha persa ojagarra vaʼekue áño 539 a.C.-pe. Ha koʼag̃aite peve eskómbro reínte opyta upépe (ehecha pe vidéo La Biblia oprofetisa vaʼekue oñehunditaha Babilonia, oĩva pe lívro ¡Jaikóta vyʼápe pára siémpre!, leksión 3, púnto 5-pe).

11. ¿Mbaʼéichapa oñekumpli hína Daniel 2:41-43?

¹¹ Péro umi profesía bíblica ningo ndahaʼéi ymánte la oñekumpli vaʼekue. Ñande ningo koʼág̃arupi jahecha hína mbaʼéichapa oñekumpli umi profesía. Por ehémplo, ñapensamíntena mbaʼéichapa oñekumpli hína umi profesía de Daniel oñeʼẽva umi poténsia mundiál oformávare Gran Bretaña ha Estados Unidos (elee Daniel 2:41-43). Upe profesía heʼi péva orekotaha peteĩ párte imbaretéva iérroicha ha ótra párte ikangýva ñaiʼũicha. Ha upéva hína la jahecháva koʼág̃arupi oikoha. Umi mokõi país ningo imbarete iérroicha, tuichaiterei mbaʼe voi la ojapóva hikuái oñegana hag̃ua umi mokõi gérra mundiál, ha oreko hikuái tuichaiterei podér militár. Upéicharõ jepe, umi hénte oikóva ipoguýpe oreko umi sindikáto, ojapo umi protésta iderechokuéra rehehápe, ha avei umi sistéma komersiál ha pe goviérno kóntrape. Ramoiténte peteĩ karai ivaléva polítika internasionálpe heʼi: “Koʼág̃arupi ndaipóri ótro país demokrátiko ko múndope ojedividivéva Estados Unídosgui”. Ha Gran Bretaña, pe ótra poténsia mundiál, umi áño ohasa vaʼekuépente ojedividi avei, pórke umi hénte noĩri de akuérdo pe tráto orekóvandi hikuái pe Unión Européandi. Péicha ojedividipa rupi hikuái, pe poténsia mundiál oformávape Gran Bretaña ha Estados Unidos ijetuʼueterei ojedesidi hag̃ua ojapo heta mbaʼe.

12. ¿Mbaʼépa oasegura ñandéve umi profesía bíblica oñekumplímava?

¹² Jaikuaávo heta profesía bíblica oñekumplimaha, upéva omombarete ñande jerovia Ñandejára okumplipaitetaha umi mbaʼe opromete vaʼekue. Ñañeñandu voi pe salmísta heʼi vaʼekuéicha Jehovápe: “Hiʼãitereíma og̃uahẽ pe tiémpo nde chesalva hag̃ua. Che areko esperánsa ne promésare” (Sal. 119:81). Jehová ningo mborayhúpe oofrese ñandéve la Biblia rupive ‘esperánsa ñaneraʼarõha heta mbaʼe porã’ (Jer. 29:11). Pe esperánsa jarekóva amo gotyove g̃uarã ningo odepende hína umi promésa Jehová ojapóvare, ndahaʼéi umi umáno promésare. Upévare jasegíkena ñañehaʼãmbaite jastudia umi profesía bíblica ikatu hag̃uáicha ñamombareteve ñande jerovia Ñandejára Ñeʼẽ heʼívare.

13. Heʼiháicha Salmo 119:66, 138, ¿mbaʼe ótra pruévapa jareko ñakonfia hag̃ua la Bíbliare?

¹³ Ótra pruéva jaguerekóva ñakonfia hag̃ua la Bíbliare haʼe hína oipytyvõ rupi hetaiterei persóna osegívape ikonsého (elee Salmo 119:66, 138). Por ehémplo heta matrimónio oĩva kuri ojedivorsia hag̃uáicha, koʼág̃a ovyʼa hikuái ha oĩ unído. Upéicha rupi umi mitã oĩva koʼã famíliape ovyʼa, oñeñandu segúro ha ojehayhuha chupekuéra (Efes. 5:22-29).

14. Emoĩ peteĩ ehémplo ohechaukáva mbaʼéichapa umi konsého oĩva la Bíbliape ikatu okambiaite peteĩ persónape.

¹⁴ Umi konsého oĩva la Bíbliape ningo oipytyvõma okambia hag̃ua umi kriminál ipeligrosovévape jepe. Upéva ohechauka porãiterei peteĩ préso hérava Jack e ehémplo. Haʼe ningo haʼe vaʼekue peteĩ kriminál iviolentoitereíva ha haʼe voi vaʼekue pe préso ipeligrosovéva entéro umi préso oĩva kondénado omano hag̃ua apytépe. Peteĩ díape haʼe oguapy ohendu peteĩ kúrso bíblico ohecha rupi mbaʼéichapa umi ermanokuéra iñamavleterei, upéva opoko ikorasõre ha oasepta peteĩ kúrso  bíblico. Haʼe mbeguekatúpe omoĩ rupi en práktika umi mbaʼe oaprendéva Jack okambia, oiko chugui peteĩ mehór persóna ha imbaʼeporãve. Tiémpo riremínte ikatúma kuri oiko chugui puvlikadór no vautisádo ha ojevautisa. Haʼe ningo kyreʼỹme oñeʼẽ avei umi ótro présope Ñandejára Rréinore, ha upevakuére ikatu kuri oipytyvõ 4 présope avei oikuaa hag̃ua pe añetegua. Og̃uahẽrõ guare pe día ojejuka hag̃ua chupe, haʼe otroitéma kuri. Peteĩva umi ijavogádo heʼi voi hese: “Jack ndahaʼevéima la mísma persóna che aikuaa vaʼekue 20 áño atrás. Umi mbaʼe haʼe oaprende vaʼekue umi testígo de Jehovágui tuichaiterei okambia chupe la hekove”. Jáckpe ojejukáramo jepe upe rire, iñehémplo ohechauka porãiterei ñandéve ikatuha ñakonfia Ñandejára Ñeʼẽre ha orekoha podér okambiaite hag̃ua peteĩ persóna rekove (Is. 11:6-9).

15. ¿Mbaʼéichapa Jehová siervokuéra koʼág̃arupi idiferénte ojapo rupi la Biblia omboʼéva? (Ehecha pe taʼanga).

¹⁵ Jehová siervokuéra ojapo rupi umi mbaʼe omboʼéva la Biblia, haʼekuéra oĩ en unida (Juan 13:35; 1 Cor. 1:10). Ndaijojahái ningo pe pyʼaguapy ha unida jarekóva, pórke la majoría la hénte ko múndope ojedividipa tahaʼe polítika káusare, ipire kolór diferénte haguére, imboriahu térã ipláta haguére. Peteĩ mitãrusu hérava Jean ohechávo pe unida oĩva Jehová siervokuéra apytépe, oñesorprendeterei. Haʼe ningo okakuaa vaʼekue peteĩ país oĩvape Áfricape. Ha oñepyrũrõ guare la gérra, haʼe oike pe ehérsitope péro upéi osẽ oho peteĩ país oĩvape ag̃ui hetãgui. Upépe haʼe ojotopa vaʼekue primera ves umi testígo de Jehovándi. Haʼe heʼi: “Ahechakuaa umi oĩva pe rrelihión verdadérape ndoikeiha polítikape ha noĩriha hikuái dividído. Upéva rangue haʼekuéra ojoayhu”. Upéi heʼive: “Che ningo aipuru che rekove adefende hag̃ua che retãme. Péro aaprendérõ guare la verda oĩva la Bíbliape, adesidi aipurutaha che rekove aservi hag̃ua Jehovápe”. Jean okambiate vaʼekue la hekove, ha oiko rangue oiko vai la héntendi idiferénte haguére chugui, omombeʼu enterovépe mbaʼéichapa la Biblia  ñanepytyvõ jaiko hag̃ua pyʼaguapýpe. Añetehápe la Biblia omboʼéva oipytyvõ enterove héntepe tahaʼe haʼéva la ipaís. Ha upéva ohechauka porãiterei Ñandejára Ñeʼẽ haʼeha la verda.

16. ¿Mbaʼérepa iñimportantete ñandéve g̃uarã jajerovia ñande pyʼaite guive Ñandejára Ñeʼẽre?

¹⁶ La situasión ningo ko múndope amás día ivaive, ha upévare avei ijetuʼuvéntema la héntepe ojerovia hag̃ua la Biblia omboʼévare. Ikatu oĩ oñehaʼãva ñanemboduda la Biblia omboʼeha la verda, ha Jehová onombra hague pe esklávo de konfiánsa ha iñarandúvape ogia hag̃ua isiervokuérape ko tiémpope. Péro jajeroviáramo Ñandejára Ñeʼẽ haʼeha la verda, upéicharõ jagueropuʼakáta umi atáke ha mbaʼeve nomokangymoʼãi ñande jerovia. Ñande jaʼéta voi: “Che adesidíma che pyʼaite guive siémpre ajapotaha umi mbaʼe remandáva. Cheñeʼẽrendúta aikove aja pukukue” (Sal. 119:112). Ñande ‘ni mbaʼevéicharõ nañatĩmoʼãi’ ñañeʼẽ hag̃ua ñande rapichakuérape la verdáre ha ñamokyreʼỹ hag̃ua chupekuéra osegi hag̃ua umi konsého oĩva la Bíbliape (Sal. 119:46). Ha ñande ikatúta jagueropuʼaka umi situasión ijetuʼuvéva jepe, umíva apytépe pe persekusión. La Biblia heʼi voi ñande ikatutaha ‘ñanepasiénsia ha javyʼa jagueropuʼaka aja entéro mbaʼe’ (Col. 1:11; Sal. 119:143, 157).

17. ¿Mbaʼérepa ñanemomanduʼáta pe téxto áño 2023-pe g̃uarã?

¹⁷ ¡Jaagradesete ningo Jehovápe oikuaauka haguére ñandéve la verda! Upéva ningo ñanepytyvõ ñañeñandu hag̃ua trankílo ha jajerovia hag̃ua. Avei ñanemboʼe porã mbaʼéichapa jaiko vaʼerã ko múndo añáme, amás día oñekonfundipavéva ha oikóva sarambikuépe. La verda ningo omeʼẽ ñandéve esperánsa jaiko porãvetaha amo gotyove Ñandejára Rréino poguýpe. Hiʼãite ningo pe téxto áño 2023-pe g̃uarã, ñanepytyvõ jajerovia hag̃ua ñande pyʼaite guive ‘opa mbaʼe oĩva Ñandejára Ñeʼẽme siertogua memeteha’ (Sal. 119:160).