1, 2. ¿Mbaʼérepa káda áño jaha Konmemorasionhápe?

 OJAPÓMA haimete 2.000 áño Jesús omano hague. Isakrifísio rupive jareko la esperánsa jaikóvo pára siémpre. Pe pyhare omano mboyve Jesús hoʼu vaʼekue pe pan ha pe víno, ha heʼi isegidorkuérape ogueromanduʼa hag̃ua isakrifísio oipurúvo avei pan ha víno (1 Cor. 11:23-26).

² Ñande ningo jajapose la Jesús heʼi vaʼekue pórke jahayhueterei chupe (Juan 14:15). Upévare káda áño pe Konmemorasión tiémpope, ñañemotiémpo jajepyʼamongeta hag̃ua Jesús sakrifísiore ha la ojehupytývare upéva mediánte. Avei ñañehaʼãmbaite ñasẽve hag̃ua predikasiónpe, péicha ñainvita ikatúvape guive oho hag̃ua avei pe Konmemorasionhápe ñanendive. Ha ñande voínte avei si o si ñaĩse pe Konmemorasiónpe toiko la oikóva.

3. ¿Mbaʼépa jahecháta ko artíkulope?

³ Ymaite guive voínte Jehová siervokuéra oñehaʼãmbaite ojapo pe Konmemorasión. ¿Mbaʼéichapa ohechauka hikuái upéva? 1) Oñehaʼãvo ojapo jey pe Konmemorasión Jesús oipota haguéicha, 2) oinvitávo la héntepe Konmemorasionrã  ha 3) ojapóvo pe Konmemorasión ijetuʼúramo jepe sapyʼánte.

4. ¿Mbaʼe mbaʼépa oñemyesakã ñandéve pe diskúrso de Konmemorasiónpe, ha mbaʼérepa ikatu jaʼe iñimportanteha koʼã mbaʼe? (Lucas 22:19, 20).

⁴ Káda áño pe Konmemorasionhápe ñahendu jepi peteĩ diskúrso ojeexplikahápe ñandéve heta mbaʼe. Por ehémplo ñantende porãve mbaʼérepa ñaikotevẽ peteĩ ñanderreskata vaʼerã, ha mbaʼéichapa la peteĩ persóna ojapo vaʼekue ikatu osalva hetaitereípe. Ñantende porãve avei mbaʼépa orrepresenta pe pan ha pe víno ha máva mávapa la hoʼu vaʼerã umíva (elee Lucas 22:19, 20). Pe diskúrso aja umi orekóva esperánsa oikóvo ko yvy ape ári ikatu ojepyʼamongeta iñesperánsare (Is. 35:5, 6; 65:17, 21-23). Koʼã mbaʼe ñaaprendéva iñimportanteterei, ndahaʼeiete hína vyrorei. Péro oĩ hetaiterei persóna nontendéiva koʼã mbaʼe, upévare nomombaʼéi ni michĩmi. Upéicha rupi avei haʼekuéra nogueromanduʼái Jesús sakrifísio haʼe oipota hagueichaite. ¿Mbaʼérepa jaʼe upéva?

5. ¿Mbaʼéichapa ojejapo pe Konmemorasión omano rire umi apostolkuéra?

⁵ Omano rire la majoría Jesús apostolkuéra, oñepyrũma ojagarrapaite umi kristiáno guaʼu (Mat. 13:24-27, 37-39). Haʼekuéra omboʼe vaʼekue “umi mbaʼe noĩporãiva ogueraha hag̃ua hapykuéri umi disípulope” (Hech. 20:29, 30). ¿Mbaʼépa la omboʼe vaʼekue hikuái ajeve ojeʼe noĩporãiha? Por ehémplo, la Biblia heʼi ‘Cristo oñemeʼẽ hague ñanderehehápe una vénte ogueraha hag̃ua heta héntegui ipekádo’, péro haʼekuéra heʼi upéva ndahaʼeiha siérto ha Jesucristo sakrifísio tekotevẽha ojejapo manterei (Heb. 9:27, 28). Koʼág̃arupi hetaiterei persóna ipyʼaporãva oguerovia koʼã japu, upévare oho jepi hikuái misahápe okomulga b hag̃ua. Oĩ ohóva káda tánto ha algúno káda día voi. Oĩ avei hetave rrelihión nogueromanduʼáiva Jesús sakrifísio la pyʼỹieterei, ha umíva apytépe la majoría nontendeporãi mbaʼépa ojehupyty Jesús sakrifísio rupive. Oĩ voi oikuaaséva añetépa Jesús sakrifísio rupive ikatu oñeperdona chupe ipekadokuéra. Hetaitereípy oĩ koʼág̃arupi la odudáva Jesús sakrifísiogui, upévare ombodudapáma avei umi ótrope. ¿Mbaʼépa ojapo Jehová puévlo oipytyvõ hag̃ua koʼãichagua persónape?

6. ¿Mbaʼépa oaprende raʼe Russell ha iñirũnguéra áño 1872-pe?

⁶ Áño 1870-rupi, Charles Taze Russell ha unos kuánto omoirũva chupe oñepyrũ ostudia porã la Biblia. Haʼekuéra ojapo upéicha ontende porã hag̃ua mbaʼépa ojehupyty Jesús sakrifísio rupive ha mbaʼéichapa ojegueromanduʼa vaʼerã upéva. Áño 1872-pe haʼekuéra oaprende Jesucristo ojesakrifika hague enterovéva rehehápe, ha upéva oñepyrũ omombeʼu hikuái opa ikatúvape. Upearã onohẽ hikuái la oaprende vaʼekue lívrope, diáriope ha rrevístape. Upe riremíntema voi, oñepyrũma avei oñembyaty hikuái káda áño ogueromanduʼa hag̃ua Jesús sakrifísio, ojapo haguéicha umi kristiáno yma guare.

7. ¿Mbaʼéichapa ñanepytyvõ la oaprende vaʼekue ñane ermanokuéra yma guare?

⁷ Koʼag̃aite peve ningo ideprovécho ñandéve la oaprende vaʼekue ñane ermanokuéra yma guare. Ha Jehová rupive avei, koʼág̃a ñantende porãvéma maʼerãpa Jesús ojesakrifika rakaʼe ha mbaʼépepa ñanepytyvõ upéva (1 Juan 2:1, 2). Koʼág̃a jaikuaáma avei  oĩha mokõi esperánsa. Oĩ umi ohótava yvágape oikove hag̃ua pára siémpre ha upépe la hetekuéra noñembyaimoʼãi arakaʼeve. Ha oĩ umi opytátava ko yvy ape ári oiko hag̃ua avei pára siémpre. Tuicha ningo jahayhuve Jehovápe ñantende porãvo mbaʼeichaite pevépa Haʼe ñanderayhu ha mbaʼéichapa ñanepytyvõ Jesús sakrifísio (1 Ped. 3:18; 1 Juan 4:9). Upévare, ojapo haguéicha ñane ermanokuéra yma guare, ñande avei ñainvita la héntepe ou hag̃ua pe Konmemorasiónpe ogueromanduʼa hag̃ua Jesús sakrifísio haʼe oipota hagueichaite.

8. ¿Mbaʼe mbaʼépa ojapóma Jehová puévlo oporoinvita hag̃ua pe Konmemorasionrã? (Ehecha pe taʼanga).

⁸ Ymaiterei guivéma ñande testígo de Jehová ñaporoinvita Konmemorasionrã. Áño 1881-pe ojeʼéma vaʼekue voi ermanokuérape oho hag̃ua peteĩ ógape Alleghénype (Pensilvania), pe Konmemorasionrã. Upéi káda kongregasión ojapóma la ikonmemorasión. Marzo de 1940-pe, primera ves ojeʼe ermanokuérape oinvita hag̃ua opa ohendu porãvape chupekuéra predikasiónpe. Ha 1960-pe, primera ves Betel omeʼẽ ermanokuérape invitasión orreparti vaʼerã. Upe guive, hetaiterei rasa invitasiónma oñemeʼẽ ko múndo tuichakuére. ¿Mbaʼérepa la peichaite peve voi ñañehaʼã ñaporoinvita hag̃ua?

9, 10. ¿Máva mávapepa ñaipytyvõta ñañehaʼãmbaitéramo ñaporoinvita Konmemorasionrã? (Juan 3:16).

⁹ ¿Mbaʼérepa jaipotaite la hénte oho Konmemorasionhápe? Pórke jaipotaiterei haʼekuéra oikuaa la Jehová ha Jesús ojapo vaʼekue ñanderehehápe (elee Juan 3:16). Ha hiʼã avei ñandéve la oaprendéva hikuái upe  pyharépe, toipytyvõ chupekuéra oservise hag̃ua Jehovápe.

¹⁰ Ñande ñainvita avei umi aréma ndoservivéivape Jehovápe, péicha haʼekuéra ohechakuaáta Jehová ohayhuitiha chupekuéra. Ha ajépa ñanembovyʼaite jahechávo haʼekuéra ouha pe Konmemorasiónpe. Umi mbaʼe ohecháva ha ohendúva rupive, haʼekuéra imanduʼa jey mbaʼeichaitépa ovyʼa vaʼekue ymave oservírõ guare Jehovápe. Epensamíntena Mónica c ehémplore. Pe pandémia aja haʼe oñepyrũ jey kuri opredika ha áño 2021-pe, oho rire pe Konmemorasiónpe, haʼe heʼi: “Núnka ndacheresaraimoʼãi ko Konmemorasióngui, pórke 20 áño haguépe asẽmi jey aporoinvita pe Konmemorasionrã. Ha añehaʼãmbaite kuri ajapo porã hag̃ua ko tembiapo, pórke aagradeseterei Jehovápe ha Jesúspe la ojapo vaʼekue cherehehápe” (Sal. 103:1-4). Tahaʼe la hénte ñanerendu porã térã nahániri, lomímonte ñañehaʼã ñainvita chupekuéra pórke jaikuaa Jehová omombaʼetereiha la jajapóva.

11. ¿Mbaʼépa ere chupe, ovendesípa Jehová umi mbaʼe jajapóva ñainvita hag̃ua la héntepe? (Ageo 2:7).

¹¹ Ojekuaa porã ningo Jehová ovendesiha umi mbaʼe jajapóva. Por ehémplo áño 2021-pe, ojeproivíramo jepe heta mbaʼe pe pandémia káusare, lomímonte oĩmi 21.367.603 persóna ogueromanduʼáva Jesucristo sakrifísio. Upéva núnka ndojehupytýitiva, ni ekontapárõ la Testígo oĩva ko múndope, péva haimete voi el tríple hetave ñandehegui. Péro jaikuaaháicha, la Jehovápe ombovyʼáva ndahaʼéi mboýpa ojeho, síno Haʼe ovyʼa káda persóna oho vaʼekuére (Luc. 15:7; 1 Tim. 2:3, 4). Ojekuaa porã Jehová ojevaleha ñanderehe jarreparti jave umi invitasión, ikatu hag̃uáicha jatopa umi hénte ipyʼaporãvare (elee Ageo 2:7).

12. ¿Mbaʼérepa algúnope ijetuʼu jepi ogueromanduʼa hag̃ua Jesús sakrifísio? (Ehecha pe taʼanga).

¹² Koʼã ára pahápe oiko heta mbaʼe ijetuʼuetereíva. Por ehémplo oñemoĩ ñanderehe ñane hentekuéra, oĩ ñandepersegíva, oiko gérra, oĩ heta mbaʼasy ha oiko hetave mbaʼe (Mat. 10:36; Mar. 13:9; Luc. 21:10, 11). Koʼã mbaʼe ningo Jesús heʼíma vaʼekue voi oikotaha. Ha opa koʼã mbaʼére ijetuʼu jepi jagueromanduʼa hag̃ua Jesús sakrifísio. ¿Mbaʼe mbaʼépa ojapóma raʼe unos kuánto ermáno oguereko vaʼekue koʼãichagua provléma? ¿Ha mbaʼéichapa Jehová oipytyvõ raʼe chupekuéra?

13. ¿Mbaʼéichapa Jehová ovendesi Artiómpe ojapo haguére pe Konmemorasión kárselpe?

¹³ Oĩ oñenkarseláva. Koʼág̃arupi oĩ heta ermáno oĩva kárselpe ifiél rupi Jehovápe, ha upévare ijetuʼu chupekuéra ojapo hag̃ua pe Konmemorasión. Por ehémplo ermáno Artiom. Áño 2020-pe oñemoinge chupe peteĩ seldaʼípe oguerekóva 17 métro kuadrádonte, ha upépe oĩ hikuái éntre 5 ha mbaʼe. Ijetuʼúramo jepe, haʼe ohecha okonsegi hag̃ua umi mbaʼe oikotevẽtava pe Konmemorasionrã, ha odesidi avei ojapotaha pe diskúrso ijupe g̃uarã. Péro oĩ kuri peteĩ provléma. Umi oĩva hendive pe séldape opita ha manterei ijurukyʼa. ¿Mbaʼépa haʼe ojapo upémarõ? Ojerure chupekuéra animínte hag̃ua opita ha animínte hag̃ua ijurukyʼa una oramíre jepe. Ni haʼe ndogueroviaséi, péro umi ótro oasepta chupe la ojeruréva. Upémarõ Artiom oñeʼẽse chupekuéra pe Konmemorasiónre, péro umi ótro préso ndoikuaaséi mbaʼeve. Upéicharõ jepe amo ipahápe,  umi préso oporandu chupe heta mbaʼe pórke ohecha chupe ojapokuévo pe Konmemorasión.

14. ¿Mbaʼéichapa Jehová puévlo ojapo pe Konmemorasión pe pandémia aja?

¹⁴ Pandémia de COVID-19. Oñepyrũrõ guare pe pandémia, ñande testígo de Jehová ndaikatúi kuri ñañembyaty Salónpe pe Konmemorasionrã. d Upévare pe Konmemorasión jareko kuri Internet rupive. ¿Ha mbaʼéicha ojapo raʼe umi kongregasión ndorekóiva Internet? Chupekuéra g̃uarã, pe diskúrso oñembohasa kuri téle térã rrádio rupive. Péicha ojejapo heta paíspe. Ha upéva ári jey, umi sukursál ograva pe diskúrso de Konmemorasión mas de 500 idiómape, ikatu hag̃uáicha ohecha umi ermáno oikóva mombyryeterei. Ha upéi, oĩ jey ermáno oraháva chupekuéra koʼã gravasión.

15. ¿Mbaʼépa reaprende la ohasa vaʼekuégui Sue?

¹⁵ Oĩ oñemoĩva hese ihentekuéra. Algúnope g̃uarã ijetuʼueterei kuri ojapo hag̃ua pe Konmemorasión pórke ihentekuéra oñemoĩ hesekuéra. Jahechamína la ohasa vaʼekue peteĩ  estudiánte hérava Sue. Áño 2021-pe, un día ánte pe Konmemorasión, Sue heʼi iñinstruktórape haʼe noĩmoʼãiha pe Konmemorasiónpe pórke ihentekuéra oñemoĩ mbareteterei hese. Upémarõ pe ermána olee chupe Lucas 22:44, ha heʼi chupe peichagua situasiónpe haʼe ikatuha osegi Jesús ehémplo. Jesús ojepyʼapyetereírõ guare oñemboʼe vaʼekue Itúape ipyʼaite guive ha ohejapaite ipópe umi mbaʼe oipyʼapýva chupe. Pe Konmemorasión díape, Sue oñehaʼã okonsegi hag̃ua la pan ha la víno ha ohecha pe adorasión matutína osẽva pe Konmemorasión díape g̃uarã. Upéi upe pyhare, haʼe oho ikotýpe haʼeñomi ha oñekonekta iselulár guive la Konmemorasionrã. Upe rire Sue oskrivi la iñinstruktórape ha heʼi chupe: “Ndéngo kuehe tuichaiterei chemokyreʼỹ. Upévare che koestedía ajapopaite la ikatúva guive aĩ hag̃ua pe Konmemorasiónpe, ha ahechakuaa Jehová chepytyvõ hague. Legálmente avyʼaiterei ha aagradeseterei Jehovápe chepytyvõ haguére”. ¿Ndépa ere Jehová ikatúne hag̃ua nepytyvõ avei ndéve ehasáramo peichagua situasión?

16. ¿Mbaʼérepa Jehová ñanevendesíta katuete ñañehaʼã haguére ñaĩ pe Konmemorasiónpe? (Romanos 8:31, 32).

¹⁶ Jehovángo omombaʼeterei entéro mbaʼe jajapóva jagueromanduʼa hag̃ua Itaʼýra sakrifísio. Haʼéngo katuete ñanevendesíta ohechávo jaagradesetereiha la ojapo vaʼekue ñanderehehápe (elee Romanos 8:31, 32). Jajapókena opa ikatúva ñaĩ hag̃ua ko áño pe Konmemorasionhápe, ha ñañehaʼãmbaitékena avei ñanerembiapo heta Jehová servísiope, koʼýte ko Konmemorasión tiémpope.