1, 2. ¿Mbaʼe mbaʼépa ikatu hína ombohovái Jehová siervokuéra?

 OIKO jave ñanderehe peteĩ mbaʼe ivaietereíva, ñande rekove ikatu okambia peteĩ tesapirĩme. Por ehémplo, peteĩ ermáno hérava Luis omombeʼu ojetopa hague hese orekoha peteĩ kánser ivaietereíva. a Pe doktór heʼi voi chupe unos kuánto mésepe omanotamaha. Mónica ha iména ojapo kuri oikóvo oñondive heta mbaʼe Jehová servísiope. Péro peichahágui Mónica opilla iména haʼéva ansiáno oiko hague ojapo ñemiháme heta mbaʼe vai, hiʼarive áñorema voi. Peteĩ ermána soltéra hérava Olivia osẽmante kuri hógagui, pórke ojeavisa chupekuéra peteĩ torménta ivaietereíva og̃uahẽ mbotaiteha. Ohasa rire la torménta, haʼe otopa la hóga hoʼapaite hague. Peteĩ sapyʼaitépe koʼã ñane ermanokuéra rekove okambiaite. ¿Oikómapa nderehe derrepentete álgo okambiaitéva nde rekove?

² Jaservíramo jepe fiélmente Jehovápe lomímonte ikatu ñaneprovléma ha ñanderasy, oikoháicha umi hénte ndoservírivare Jehovápe. Ha hiʼarive sapyʼánte umi ndochaʼéiva Jehová puévlore oñemoĩ ñanderehe ha ñandepersegi. Jehová ndojokóiramo jepe koʼã provléma, haʼe si opromete ñanepytyvõtaha (Is. 41:10). Jehová oĩ rupi ñande ykére, ñande ikatu javyʼa, jadesidi porã ha jasegi jaservi chupe fiélmente hendýramo jepe ñanendive. Ko artíkulope jahecháta 4 mbaʼe Jehová ojapóva ñanepytyvõ hag̃ua jahasa jave umi situasión ivaietereíva. Ha jahecháta avei mbaʼépa ñande jajapo vaʼerã Jehová ñanepytyvõ hag̃ua.

JEHOVÁ OÑANGAREKÓTA ÑANDEREHE

3. Ñandeahoʼipaite jave umi provléma, ¿mbaʼépa ikatu ijetuʼu ñandéve?

³ ¿Mbaʼépa la ijetuʼúva? Ivaipaite jave ñane situasión, ijetuʼúma ñapensa ha jadesidi porã hag̃ua. ¿Mbaʼérepa? Pórke ikatu oime  ñañeñandu vaieterei, ha upe ñanekevrantáva ndaikatúi jaipeʼa ñane akãgui, haʼete voi japytáva pytũmbyetépe ha ndajaikuaái ni moõ gotyopa jajapíta. Jahechamína mbaʼépa heʼi raʼe umi ermána ñañeʼẽ vaʼekuére ajeʼi. Olivia heʼi: “Atopárõ guare che róga hoʼapaite hague pe torménta káusare, apyta ndaikuaái mbaʼépa ajapóta. Chesuperaite voi la situasión”. Ha Mónica katu heʼi: “Ni naimoʼãiete kuri la che ména ojapóva cherehe. Apyta añedesepsionaite, hasy asy chéve upe oiko vaʼekue. Upéi ndaikatuvéi ajapo ni umi mbaʼe isensillovéva jepe”. ¿Mbaʼéichapa Jehová ikatu ñanepytyvõ ñandeahoʼipaite jave umi provléma?

4. Heʼiháicha Filipenses 4:​6, 7, ¿mbaʼépa Jehová opromete ñandéve?

⁴ ¿Mbaʼépa Jehová ojapo? La Biblia rupive haʼe opromete omeʼẽtaha ñandéve ‘ipyʼaguapy’ (elee Filipenses 4:​6, 7). Upe trankilida térã pyʼaguapy ikatu ñañandu sólamente Jehová haʼe haguére ñane amigoite. La Biblia heʼi ‘Ñandejára pyʼaguapy tuichaveha entéro mbaʼe yvyporakuéra ikatúvagui ontende’. ¿Mbaʼépa heʼise upéva? Ñande ndaikatuiha ni ñañeimahina mbaʼeichaite pevépa Ñandejára ikatu ñanembopyʼaguapy. Por ehémplo ñapensamíntena, ¿oikómapa ñanderehe la ñañemboʼe Jehovápe ñande pyʼaite guive ha upéi ñanesorprende mbaʼeichaitépa ñanetrankílo japytávo? Upéva hína “Ñandejára pyʼaguapy”.

5. ¿Mbaʼéichapa Ñandejára pyʼaguapy oñangareko ñane korasõre ha umi mbaʼe ñapensávare?

⁵ Filipenses 4:7 heʼi avei Ñandejára pyʼaguapy ‘oñangarekoha ñane korasõre ha umi mbaʼe ñapensávare’. Pe palávra griega ojetradusíva ‘oñangareko’ ojepuru vaʼekue yma oñeñeʼẽ hag̃ua umi soldádo oguardiávare peteĩ siuda. Haʼekuéra oñangareko vaʼekue pe siudáre ani hag̃ua ojeataka. Upéicha rupi umi hénte pe siudapegua oĩ vaʼekue trankílo porã, pórke oikuaa umi soldádo okuidaha hesekuéra. Péicha avei Ñandejára pyʼaguapy oñangareko rupi ñane korasõre ha la ñapensávare, ñande ñaĩ trankílo ha pyʼaguapýpe pórke ñañeñandu segúro porã (Sal. 4:8). Ana ehémplo yma guare ikatu ñanepytyvõ, pórke ñane situasión nokambiáiramo jepe ensegidaite, lomímonte ikatu ñanetrankílo ha ndajaikovéi ñañekevranta (1 Sam. 1:​16-18). Ñaiméramo pyʼaguapýpe, ikatu ifasilve ñandéve ñapensa ha jadesidi porã.

6. ¿Mbaʼépa jajapo vaʼerã Ñandejára ñanembopyʼaguapy hag̃ua? (Ehecha pe taʼanga).

⁶ ¿Mbaʼépa jajapo vaʼerã? Yma umi hénte pe siudapegua ikatu vaʼekue ohenói umi guárdiape oprotehe hag̃ua chupekuéra. Péicha avei jajejopy vaieterei jave ikatu jajerure Jehovápe ñanepytyvõ hag̃ua. ¿Mbaʼéichapa ikatu jajapo upéva? Ñañemboʼe ñañandu peve Jehová omeʼẽha ñandéve ipyʼaguapy (Luc. 11:9;  1 Tes. 5:17). Luis, pe ermáno ñañeʼẽma vaʼekuére, omombeʼu mbaʼépa oipytyvõ chupe ha hembireko Ánape. Pe ermáno ningo oikuaa kuri unos kuánto méserentema oikovetaha. Haʼe heʼi: “Péicha jave ijetuʼueterei jadesidi hag̃ua heta mbaʼe, ndajaikuaái ni mbaʼe tratamiéntopa iporãvéta jasegi. Péro roñemboʼe rupi roju orepyʼaguapy ha upéva orepytyvõ upe moménto ijetuʼuetévape”. Luis ha hembireko omombeʼu oñemboʼe hague hikuái heta vése ha ipyʼaite guive. Haʼekuéra ojerure Jehovápe ikatu hag̃uáicha ipyʼaguapy, iñarandu odesidi porã hag̃ua ha ani hag̃ua oñekevrantaiterei. Koʼã ermáno oñandu Jehová oipytyvõ hague chupekuéra. Péicha avei, oimérõ ñande jahasa hína peteĩ situasión ijetuʼuetereíva, jasegíkena ñañemboʼe. Ha katuete ñañandúta Jehová oñangarekoha ñane korasõre ha umi mbaʼe ñapensávare (Rom. 12:12).

JEHOVÁ NDOHEJAMOʼÃI MBAʼEVE ÑANEMBOKACHA VAIPA

7. ¿Mbaʼéichapa ikatu ñañeñandu jahasa jave peteĩ situasión ijetuʼuetereíva?

⁷ ¿Mbaʼépa la ijetuʼúva? Jahasa jave peteĩ situasión ivaietereíva, ñañepyrũ jepi ñapensa ha jajapo umi mbaʼe ndajajapomoʼãiva jepi la ñaĩ porãrõ. Ñapensamína peteĩ ehémplore: Peteĩ várkope ojagarráramo peteĩ torménta vai, umi oláda ikatu oñepyrũ ojapete chupe ápe ha pépe. Péicha avei ikatu haʼete ñandéve ñane provléma ñandejapetéva ápe ha pépe. Ana, pe ermána ñañeʼẽma vaʼekuére omombeʼu iména omano rire opyta vaieterei hague, ha ni haʼe nontendéi hague la ojehúva chupe. Haʼe heʼi: “Sapyʼánte añeñandu vaieterei ha añepyrũma añemoaichejáranga. Ha avése katu arrenegaiterei la che ména omano haguére”. Ana omombeʼu sapyʼánte avei oñeñanduha haʼeño ha ipochyha pórke koʼág̃a oñenkarga vaʼerã ojapo umi mbaʼe iména yma oñatende porã vaʼekue. Haʼe oñeñandu jepi ojoguaha peteĩ várko oĩvape mar mbytépe torménta jave. ¿Mbaʼéichapa Jehová ñanepytyvõ ñañandu jave ñane provléma ñandejapeteha ápe ha pépe?

8. Heʼiháicha Isaías 33:​6, ¿mbaʼépa oasegura ñandéve Jehová?

⁸ ¿Mbaʼépa Jehová ojapo? La Biblia oasegura ñandéve Jehová ñanembopyʼaguapytaha. Upe palávra ikatu avei ojetradusi Jehová ndohejamoʼãiha jakacha vaipa (elee Isaías 33:6). Oñepyrũ jave peteĩ torménta vai, umi várko ikatu ou okacha vaipa ha upéva ipeligrosoiterei. Ani hag̃ua oiko upéva, heta várko oreko jepi mokõive ládo peteĩ aléta oipytyvõva chupe ijestávle hag̃ua ha pono okachaiterei. Péicha umi hénte oviaháva pe várkope oĩta trankílo ha segúro porã. Péro pe várko osegi vaʼerã la hape ikatu hag̃uáicha umi aléta okumpli la ifunsión. Péicha avei, jaipotáramo Jehová ñanepytyvõ  ani hag̃ua mbaʼeve ñanembokacha vaipa, tekotevẽ jasegi tenonde gotyo. Upéva heʼise jasegi vaʼerãha jaservi chupe fiélmente.

9. ¿Mbaʼéichapa ikatu ñanepytyvõ umi erramiénta jarekóva jastudia hag̃ua? (Ehecha pe taʼanga).

⁹ ¿Mbaʼépa jajapo vaʼerã? Ikatu hína ñañeñandu ñaimerõguáicha peteĩ torménta mbytépe ha nañantendéi la ojehúva ñandéve. ¿Mbaʼépa péicha jave ikatu jajapo? Ñañehaʼãmbaite vaʼerã jasegi hag̃ua ñañemboʼe, jaha rreunionhápe ha japredika meme. Jaikuaaháicha ndaikatumoʼãi jajapo entéro mbaʼe yma guaréicha, péro ani ñanderesarái Jehová ontendeha ñane situasión ha ndojerureiha ñandehegui mbaʼeve ikatuʼỹva jajapo (ekompara Lucas 21:​1-4 heʼívare). Tekotevẽterei avei ñañemotiémpo jastudia hag̃ua ñaneañoháme ha jajepyʼamongeta hag̃ua. ¿Mbaʼérepa? Pórke iñorganisasión rupive Jehová omeʼẽ ñandéve umi informasión bíblica ñanepytyvõtava ani hag̃ua umi provléma ñanembokacha vaipa. Jatopa hag̃ua la ñaikotevẽva ikatu jaipuru umi erramiénta oĩva ñane idiómape. Por ehémplo pe aplikasión JW Library^®, pe Índice de las publicaciones Watch Tower ha pe Gía oipurúva testígo de Jehová otopa hag̃ua informasión. Mónica, pe ermána ñañeʼẽma vaʼekuére omombeʼu haʼe oipuruha koʼã erramiénta oñepyrũ jave oñeñandu vaieterei. Por ehémplo, ostudia vaʼekue koʼã téma: “Pochy”, “traisión” ha “fidelida”. Ha upéi haʼe oñemoĩ vaʼekue olee oñeñandu porã peve. Mónica heʼi: “Añeñandu vaieterei jepi primerorã, péro amáske alee ahávo, haʼetévaicha chéve Jehová cheañuã mbaretéva. Astudia rupi, ahechakuaa Jehová ontendeha entéro umi mbaʼe che añandúva ha oĩha che ykére”. Jahechaháicha Jehová ñanepytyvõ rupi, ikatu ñadomina la ñañandúva ha ñañetrankilisa (Sal. 119:​143, 144).

JEHOVÁ ÑANEPYTYVÕTA

10. ¿Mbaʼéichapa ikatu japyta jahasa rire peteĩ situasión ijetuʼuetereíva?

¹⁰ ¿Mbaʼépa la ijetuʼúva? Jahasa rire peteĩ situasión ivaietereíva, ikatu oĩ umi día nañanderetiaʼeihápe ha ñanekangypa voi. Ikatu jajogua peteĩ deportísta ojegolpea vaʼekuépe. Oiméne haʼe ojepokuaa jepi odipara hatã, péro upéi opyta orrengea. Péicha avei, koʼág̃a ikatu ijetuʼu ñandéve jajapo umi mbaʼe ifásil vaʼekue ñandéve ymave, térã ndaigustovéi jajapo umi mbaʼe yma ñanembovyʼa vaʼekue. Elíasre oiko haguéicha yma, ikatu ñande kásope avei nañañanimái ni ñapuʼã ha jakesénte voi (1 Rey. 19:​5-7). ¿Mbaʼépa Jehová opromete ojapotaha ñanderehehápe ñanekangypa jave?

11. ¿Mbaʼéichapa avei Jehová ñanepytyvõ? (Salmo 94:18).

 ¹¹ ¿Mbaʼépa Jehová ojapo? Jehová opromete ñanepytyvõtaha (elee Salmo 94:18). Peteĩ deportísta ojegolpea vaʼekue oikotevẽ oñepytyvõ chupe osegi hag̃ua okuʼe. Upéicha avei, ñande ikatu ñaikotevẽ ajúda jasegi hag̃ua jakuʼe Jehová servísiope. Umícha jave Jehová oasegura ñandéve: “Che ningo Jehová, nde Jára, ha añakarama hatãta nderehe, nde po deréchagui rojagarráta. Che ningo haʼe ndéve: ‘Ani rekyhyje, che roipytyvõta’” (Is. 41:13). Por ehémplo, Ñandejára oipytyvõ vaʼekue rréi Davídpe. Haʼe ombohováirõ guare umi situasión ijetuʼúva ha iñenemigokuérape, heʼi vaʼekue Jehovápe: “Nde chesalva nde podér rupive” (Sal. 18:35). ¿Péro mbaʼéichapa Jehová ñanepytyvõ?

12. ¿Mávarepa Jehová ikatu ojevale ñanekangy jave?

¹² Pyʼỹinte Jehová ojevale ótrore ñanepytyvõ hag̃ua. Por ehémplo, David ikangýrõ guare, iñamígo Jonatán oho vaʼekue hendápe omokyreʼỹ hag̃ua chupe (1 Sam. 23:​16, 17). Jehová ojevale vaʼekue avei Eliséore oipytyvõ hag̃ua Elíaspe (1 Rey. 19:​16, 21; 2 Rey. 2:2). Ha koʼág̃arupi Jehová ikatu ojevale peteĩ ñane héntere, ñane amígore térã ansianokuérare ñanepytyvõ hag̃ua. Upéicharõ jepe, ñañeñandu vai jave ikatu oime japytasénte ñaneaño. Oikose jepi voi upéva. ¿Mbaʼépa ikatu jajapo péicha jave Jehová ñanepytyvõ hag̃ua?

13. ¿Mbaʼépa tekotevẽ jajapo Jehová ñanepytyvõ hag̃ua? (Ehecha pe taʼanga).

¹³ ¿Mbaʼépa jajapo vaʼerã? Ñañehaʼãmbaite vaʼerã ani hag̃ua ñañemomombyry ótrogui, pórke jajapo jave upéva ndahasyiete ñapensa hag̃ua ñandejehénte ha umi provléma jarekóvare. Ha upéva nañanepytyvõmoʼãi jadesidi porã hag̃ua (Prov. 18:1). Jaikuaa ningo enterovéva ñaikotevẽha peteĩ tiémpo ñaĩ hag̃ua ñaneaño, koʼýte oimérõ jahasa raʼe álgo ivaietereíva. Péro ñañemohaʼeño pukuetereírõ, jarrechasa hína pe ajúda Jehová omeʼẽséva ñandéve ótro rupive. Upévare ijetuʼúramo jepe ñandéve ñaĩ ñande rapichakuérandi, jaaseptákena la ojaposéva ñanderehehápe ñane hentekuéra, ñane amígo ha umi ansianokuéra. Iporã ñapensa Jehová ojevaleha hesekuéra ñanepytyvõ hag̃ua (Prov. 17:17; Is. 32:​1, 2).

JEHOVÁ ÑANEKONSOLÁTA

14. ¿Mbaʼe mbaʼépa ikatu ñanemongyhyje?

¹⁴ ¿Mbaʼépa la ijetuʼúva? Sapyʼánte ikatu jakyhyjeterei. La Biblia omombeʼu oĩ hague Ñandejára siérvo oñeñandu vaʼekue péicha. Haʼekuéra omombeʼu oñekevranta, okyhyje ha  oryrýi osusũ hague peteĩ iñenemígo térã ótro provléma káusare (Sal. 18:4; 55:​1, 5). Koʼág̃arupi avei ikatu oĩ oñemoĩva ñanderehe eskuélape, koléhiope, travahohápe, ñane hentekuéra apytépe térã pe goviérno voi. Avei ikatu hína jakyhyjeterei jaikuaágui ikatuha ñamano ñanderasyete rupi. Péicha jave ikatu ñañeñandu ñaneaño ha jakyhyjeterei peteĩ mitãmi okañývaicha. ¿Mbaʼéichapa Jehová ñanepytyvõ ñañeñandu jave péicha?

15. Heʼiháicha Salmo 94:​19, ¿mbaʼépa Jehová ojapóta ñanderehehápe?

¹⁵ ¿Mbaʼépa Jehová ojapo? Jehová ningo ñanekonsola ha ñanetrankilisa (elee Salmo 94:19). Ñapensamíntena peteĩ mitãkuñaʼi okyhyjetereívare peteĩ torménta vai jave, haʼe ndaikatúi ni oke. Péro upéi itúa oho hendápe, oañuã chupe ha opyta itajyraʼíndi oke peve. Pe torménta vai ndohasáiramo jepe, pe mitãkuñaʼi oñeñandu trankíla ha segúra porã itúa oañuã rupi chupe. Péicha avei oĩ jave álgo ñanemongyhyjetereíva, haʼete voi ñaikotevẽva ñande Ru yvagapegua ñaneañuã mbarete ñañetrankilisa peve. ¿Mbaʼépa ikatu jajapo Jehová ñanekonsola hag̃ua?

16. ¿Mbaʼépa ñande tekotevẽ jajapo Jehová ñanekonsola hag̃ua? (Ehecha pe taʼanga).

¹⁶ ¿Mbaʼépa jajapo vaʼerã? Tekotevẽ jahasa tiémpo Jehovándi ñañemboʼévo chupe ha jaleévo Iñeʼẽ (Sal. 77:​1, 12-14). Jajepokuaárõ jajapo upéva, káda ves ke ñañeñandu vai ensegídama voi jajeruréta ajúda chupe. Ñamombeʼúkena Jehovápe mbaʼépa ñanemongyhyje ha ñandepyʼapy. Upéi ñahendu chupe jaleévo Iñeʼẽ, pépe jahecháta mbaʼeichaitépa haʼe ñanekonsola (Sal. 119:28). Oĩ unas kuánta párte la Bíbliape tuichaiterei ñanekonsolátava oĩ jave álgo ñanemongyhyjéva. Por ehémplo lívro de Job, Salmos, Proverbios ha la Jesús heʼi vaʼekue Mateo kapítulo 6-pe. Amáske ñañemboʼe Jehovápe ha jalee Iñeʼẽ, jahecháta mbaʼéichapa haʼe ñanekonsola.

17. ¿Mbaʼéguipa ndajadudái vaʼerã ni michĩmi?

¹⁷ Ikatu jajerovia Jehová oĩtaha ñande ykére ojere vaipaite jave ñandéve. Ni núnka nañaimemoʼãi ñaneaño (Sal. 23:4; 94:14). Jehová opromete oñangarekotaha ñanderehe, ñanembopyʼaguapytaha, ndohejamoʼãiha mbaʼeve ñanembokacha vaipa ha ñanekonsolataha. Isaías 26:3 heʼi voi mbaʼépa Jehová ojapóta ñanderehehápe. Upépe heʼi: “Ñandejára, nde ningo reprotehéta umi ojeroviávape nderehe ipyʼaite guive, nde reipytyvõta chupekuéra oiko hag̃ua pyʼaguapýpe, pórke haʼekuéra okonfia nderehe”. Upévare jajeroviákena Jehováre, ha jajapo la ñande párte haʼe ñanepytyvõ hag̃ua. Upéicharõ nañandereitymoʼãi ni umi situasión ijetuʼuvéva.