PE PALÁVRA griega ojetradusíva jepi “kárro” pe Traducción del Nuevo Múndope, ikatu ojepuru oñeñeʼẽ hag̃ua hetaiterei kláse kárrore (Hech. 8:​28, 29, 38). Péro provávlemente pe ofisiál etíope oviaha kuri peteĩ kárro tuichavévape ha ndahaʼéi umi kárro ojepurúva rehegua karrerahápe térã gerrahápe. Jahechamína mbaʼe mbaʼérepa jaʼe upéva.

Pe ofisiál etíope omanda guasu vaʼekue ha ipuku la iviáhe upérõ. Pe ofisiál ningo “peteĩ kuimbaʼe orekóva autorida ha oservíva Candácepe, haʼéva umi etíope rréina. Ha ikárgope oĩ vaʼekue kompletoite pe rréina tesóro” (Hech. 8:27). Upe tiémpope Etiopía territóriope oike vaʼekue pe país hérava Sudán ha pe território de Egipto koʼag̃agua oĩva sur gotyove. Pe ofisiál oiméne ndohói raʼe el mísmo kárrope pe viáhe pukukue, péro katuete ogueraháne raʼe heta kósa oikotevẽtava pe viáhe aja. Síglo primérope ojepuru vaʼekue diferénte kláse kárro ojegueraha hag̃ua umi pasahérope. Por ehémplo oĩ vaʼekue umi kárro 4 irruédava ha itéchova. Peteĩ lívro oñeʼẽva la Bíbliare heʼi voi: “Peichagua kárro oiméne ideprovécho ojegueraha hag̃ua heta volsón ha ótra kósa. Péicha ikomodove umi héntepe g̃uarã ha oipytyvõ chupekuéra oviaha pukuve hag̃ua” (Acts—An Exegetical Commentary).

Pe ofisiál etíope olee hína kuri Felipe oñembojárõ guare hese. La Biblia heʼi ‘Felipe odipara hague pe kárro ykére, ha ohendu hague pe ofisiál etíope oleeha proféta Isaías oskrivi vaʼekue’ (Hech. 8:30). Umi kárro ojepurúva ojeviaha hag̃ua ndojejapói vaʼekue ojeho pyaʼe hag̃ua. Oiméne oho mbegue rupi pe kárro, ikatu kuri pe ofisiál etíope olee ohóvo, ha upévare Felipe ohupyty yvýrupinte pe kárro.

Pe etíope “ojerure asy Felípepe ojupi hag̃ua ikárrope ha oguapy hendive” (Hech. 8:31). Yma umi omaneháva umi kárro de karréra oñemboʼyhápente oho, péro umi kárro ojepurúva viaherã orekovéne raʼe lugár. Upéicha rupi pe ofisiál etíope ha Felipe ikatu kuri oguapy.

Ojereko rupi enkuénta la heʼíva Hechos kapítulo 8 ha la omombeʼúva pe istória, ndaʼareguasúi guive umi taʼanga osẽva ñane puvlikasionkuérape ojekuaa pe ofisiál etíope peteĩ kárro tuichavévape, ha ndahaʼéi peteĩ kárro de karréra térã de gérrape.