1, 2. a) ¿Mbaʼérepa ikatu jaʼe ñande yvypóra ikatuha jaiko Ñandejára amígoramo? b) ¿Mbaʼérehepa ñañeʼẽta ko artíkulope?

JAIKOVE aja pukukue entéronte ñaikotevẽ ótro ñanderayhu. Katuete ningo javyʼa jareko haguére amígo ñanderayhúva. Péro oĩ peteĩ mbaʼe ñaikotevẽvéva upévagui: ñaikotevẽ Ñandejára ñanderayhu. ¿Mbaʼépa jajapo vaʼerã upearã? Tekotevẽ jaiko iñamígoramo. Péro heta persóna opensa yvyporakuéra núnka ndaikatumoʼãiha ohupyty upéva. ¿Mbaʼérepa? Pórke Ñandejára ipoderosoiterei ha ndajahechái chupe. Upéicharõ jepe, ñande jaikuaa porã ikatuha jaiko iñamígoramo.

² ¿Mbaʼérepa jaʼe upéva? Pórke la Biblia omombeʼu oĩ hague heta persóna haʼe vaʼekue Jehová amígo. Iporã vaʼerã jajepyʼamongeta koʼã persóna rembiasakuére, ha jasegi iñehémplo. Upéicha ikatúta ñamotenonde Ñandejára amista. Ko artíkulope jahecháta Abrahán ehémplo (elee Santiago 2:23). Ko kuimbaʼe haʼe vaʼekue Jehová amígo, pórke ojeroviaiterei hese.  Upévare la Biblia heʼi: “Abrahán hína opavave umi ojeroviáva túva” (Rom. 4:11). Ñahesaʼỹijóvo ko artíkulo, ikatu ñañeporandu: “¿Mbaʼépa ajapo vaʼerã ajerovia hag̃ua Abrahán ojerovia haguéicha, ha aiko avei Jehová amígoramo?”.

3, 4. a) ¿Mbaʼépa oiméne pe ijetuʼuvéva Abrahán ohasa vaʼekue? b) ¿Mbaʼérepa Abrahán oĩ dispuésto osakrifikávo itaʼýrape?

³ Eñeimahinamína rehechaha Abrahán ojupiha ohóvo mbeguekatu peteĩ montáñape. ^[1] Haʼe orekóma 125 áñorupi, ha itaʼýra Isaac, orekóva 25 áño, ojupi ohóvo hapykuéri. Abrahán oraha peteĩ kyse ha umi mbaʼe oikotevẽtava ojatapy hag̃ua. Isaac katu ogueraha la jepeʼa. Oime vaʼerã Abrahán ndohasáiva gueteri peteĩ mbaʼe ijetuʼuvéva upévagui. Ndahaʼéi voi ijedáma haguére, pórke haʼe imbarete gueteri. Síno pórke osakrifika vaʼerã itaʼýrape, Jehová omanda haguéicha chupe (Gén. 22:1-8).

⁴ Añetehápe pe situasión ohasáva Abrahán ijetuʼueterei, pórke tekotevẽ ohechauka ojeroviaha ipyʼaite guive. Oĩ ningo heʼíva Ñandejára ipyʼahatãguinte omanda hague Abrahánpe osakrifika hag̃ua itaʼýra. Ótro katu heʼi Abrahán ndohayhúi hague voi itaʼýrape, ha upévare oĩ kuri dispuésto ojukávo chupe. Umi opensáva péicha, ndorekói fe ha nontendéi mbaʼéichapa opensa umi persóna orekóva fe (1 Cor. 2:14-16). Abrahán iñeʼẽrendu Jehovápe ojeroviágui hese ipyʼaite guive. Haʼe ndojapói upéva opensa porãʼỹre. Oikuaa porã Jehová núnka ndojeruremoʼãiha peteĩ mbaʼe operhudikátava chupe. Avei oĩ segúro haʼe iñeʼẽrendúramo, Ñandejára ovendesitaha chupe ha itaʼýrape. Péro ikatu hag̃uáicha ojerovia peichaite peve, Abrahán tekotevẽ kuri ojapo mokõi mbaʼe: Primero, oikuaa porã Jehovápe. Ha segundo, ohechakuaa vaʼerã mbaʼéichapa oipytyvõ chupe.

5. a) ¿Mbaʼéicha rupípa Abrahán oikuaa Jehovápe? b) ¿Mbaʼépa ojapo Abrahán oikuaa rupi Jehovápe?

⁵ Oikuaa porã Jehovápe. Abrahán onase vaʼekue peteĩ siuda héravape Ur. Upépe umi hénte omombaʼeguasu umi dios fálso. Abrahán túa ojapo vaʼekue avei upéva (Jos. 24:2). ¿Mbaʼéichapa Abrahán oikuaa Jehovápe? La Biblia heʼi haʼe ouha Sem familiarégui, Noé raʼy. Ha Sem omano Abrahán orekórõ guare 150 áñorupi. Sem ojerovia vaʼekue ipyʼaite guive Jehováre, ha oiméne oñeʼẽ rakaʼe Jehováre ifamiliakuérape. Oime vaʼerã upéicha rupi Abrahán oikuaa Jehovápe ha ojerovia hese.

6, 7. ¿Mbaʼépa oipytyvõ Abrahánpe ojeroviave hag̃ua Jehováre ipyʼaite guive?

⁶ Ohechakuaa mbaʼéichapa Jehová oipytyvõ chupe. ¿Mbaʼépa oipytyvõ Abrahánpe ojerovia hag̃ua Jehováre ipyʼaite guive? Umi mbaʼe jaikuaáva ningo opoko ñane sentimiéntore, ha ñane sentimiénto ñanemomýi jajapo hag̃ua umi mbaʼe ñaaprendéva. Upeichaite oiko vaʼekue Abrahán rehe. Haʼe oaprende heta mbaʼe Ñandejáragui, ha umi mbaʼe oaprendéva omomýi chupe orrespeta hag̃ua ipyʼaite guive Jehovápe, “pe ojapo vaʼekue yvága ha yvy” (Gén. 14:22, NM). Abrahán ‘okyhyje vaʼekue Ñandejáragui’, upévare ndojaposéi mbaʼeve ombopochýtava chupe (Heb. 5:7). Umi mbaʼe oñandúva, omomýi chupe siémpre iñeʼẽrendu hag̃ua. Ñande avei jarrespeta vaʼerã Jehovápe ñande pyʼaite guive, péicha añoite oikóta ñandehegui iñamígo (Sal. 25:14).

⁷ Ñandejára omanda Abrahán ha Sárape  osẽ hag̃ua hetãgui, ha oho hag̃ua oiko ótro país oikuaaʼỹvape. Haʼekuéra ijedáramo jepe, oiko vaʼerã óga kárpape. Hiʼarive Abrahán oikuaa porã ohasataha heta pelígro. Péro haʼekuéra ojedesidi ojapotaha Jehová oipotáva. ¿Mbaʼépa ohupyty hikuái upe haguére? Ñandejára ovendesi ha oprotehe chupekuéra. Por ehémplo, la Biblia heʼi peteĩ rréi ohecha hague Sara iporãitereiha, upévare ogueraha chupe hógape. Pe rréi ikatu kuri ojukauka Abrahánpe, péro Jehová oprotehe milagrósamente chupe ha Sárape (Gén. 12:10-20; 20:2-7, 10-12, 17, 18). Abrahán ohechakuaa mbaʼéichapa Jehová oipytyvõ chupe, ha upévare ojeroviave hese.

8. ¿Mbaʼépa ñanepytyvõta jahayhu ha jarrespeta hag̃ua Jehovápe?

⁸ ¿Ikatúpa oiko avei ñandehegui Ñandejára amígo? Si, ikatu. Péro upearã jajapo vaʼerã Abrahán ojapo vaʼekue: jaikuaa porã Jehovápe ha jahechakuaa haʼe ñanepytyvõ jave. Abrahán ningo ndorekói vaʼekue la Biblia. Péro ñande si, upévare jareko posivilida jaikuaávo hetave mbaʼe Jehovágui (Dan. 12:4; Rom. 11:33). La Biblia omombeʼu hetaiterei mbaʼe Ñandejáragui, “pe ojapo vaʼekue yvága ha yvy”. Umi mbaʼe ñaaprendéva ñanepytyvõta jahayhuve hag̃ua Jehovápe ha jarrespeta hag̃ua chupe ñande pyʼaite guive. Ha koʼã mbaʼe ñañandúva ñanemomýita ñaneñeʼẽrendu hag̃ua. Péicha Jehová oñangarekóta ñanderehe ha ñanevendesíta, ha upéi jahechakuaáta mbaʼeichaitépa ñanepytyvõ. Jaservívo chupe ñane korasõ mbytete guive, javyʼave ha ñandepyʼaguapy (Sal. 34:8; Prov. 10:22). Amáske jaikuaa Jehovápe ha jahechakuaa mbaʼéichapa ñanepytyvõ, ñañemoag̃uivéta jahávo hese.

9, 10. a) ¿Mbaʼépa jajapo vaʼerã ani hag̃ua jadeskuida ñane amista Jehovándi? b) ¿Mbaʼéichapa Abrahán okuida iñamista Ñandejárandi?

⁹ Pe amista ningo peteĩ mbaʼe ivaliosoitereíva, péro odura hag̃ua tekotevẽ ñanerakateʼỹ hese (elee Proverbios 17:17). Pe amista ndojoguái peteĩ jóyape jaipurúva adornorãnte. Síno ikatu ñakompara peteĩ plántare, pórke tekotevẽ ñañangareko hese. Abrahán ovaloraiterei vaʼekue pe amista orekóva Jehovándi, upévare siémpre hakateʼỹ hese. ¿Mbaʼéichapa ojapo upéva?

¹⁰ Abrahán siémpre iñeʼẽrendu ha orrespeta Ñandejárape. Por ehémplo, oviaha aja hogayguakuéra ha isirvientekuérandi pe tetã Ñandejára heʼihápe chupe, siémpre oreko enkuénta Jehovápe odesidíta jave, tahaʼe umi mbaʼe iñimportántevape térã naiñimportanteguasúivape. Un áño Isaac onase mboyve, Jehová omanda Abrahánpe osirkunsida hag̃ua entéro  umi kuimbaʼépe oĩva ikárgope. Upe tiémpope haʼe orekóma 99 áño. ¿Mbaʼépa ojapo Abrahán? ¿Oñemoĩpa okuestiona Jehová ojeruréva chupe? ¿Ohekápa exkúsa ani hag̃ua okumpli Ñandejára mandáto? Ni mbaʼevéicharõ. Upéva rangue, ojerovia Jehováre ha ojapo “heʼi hagueichaite chupe” (Gén. 17:10-14, 23, NM).

11. a) ¿Mbaʼépa oipyʼapy vaʼekue Abrahánpe? b) ¿Mbaʼéichapa Jehová oipytyvõ Abrahánpe?

¹¹ Abrahán ningo iñeʼẽrendu vaʼekue Ñandejárape opaite mbaʼépe, upéicha rupi siémpre oiko iñamigoitéramo. Haʼe oikuaa ikatuha oñeʼẽ hendive oimeraẽ mbaʼégui, umi téma nontendeporãivare jepe. Por ehémplo, Jehová heʼi kuri ohunditaha Sodoma ha Gomorra, ha Abrahán ojepyʼapyeterei. ¿Mbaʼérepa? Pórke opensa Jehová ohunditaha entéro hénte oĩvape umi siudápe, tahaʼe ivuénova ha iñañáva. Oiméne Abrahán imanduʼa isovríno Lot ha hogayguakuérare, oikóva Sodómape. Péro Abrahán ojeroviaiterei Jehováre, haʼéva “pe Hués hekojojavéva ko yvy ape ári”. Upévare omombeʼu porãnte chupe mbaʼérepa ojepyʼapy. ¿Mbaʼéichapa Jehová oipytyvõ Abrahánpe? Ipasiénsia hese ha ohechauka chupe haʼe oporoporiahuverekoha. Avei oexplika chupe oporohusga jave, ohekaha umi persóna ipyʼaporãvape ha osalvaha chupekuéra (Gén. 18:22-33, NM).

12, 13. a) ¿Mbaʼépa oikuaa porã vaʼekue Abrahán? b) ¿Mbaʼérepa ikatu jaʼe Abrahán ojerovia hague Jehováre?

¹² Jahechaháicha, Abrahán oikuaa porã vaʼekue Jehovápe ha oñemeʼẽ enkuénta mbaʼéichapa oipytyvõ chupe. Upéicha rupi, ndodeskuidái iñamista Jehovándi. Upévare, Ñandejára ojerurérõ guare chupe osakrifika hag̃ua Isaácpe, Abrahán ontende porã Jehová ivuenoha, ipasiénsia ha oporoporiahuverekoha. Abrahán oikuaa porã Jehová ni mbaʼevéicharõ ndoumoʼãiha de rrepénte iñaña ha ipyʼahatã. ¿Mbaʼérepa jaʼe upéva?

¹³ Abrahán ojupi mboyve pe montáñape Isaac ndive, heʼi isirvientekuérape: “Pepyta koʼápe oreraʼarõ ha rohejáta avei koʼápe ore rymba vúrro. Che ha che raʼy katu rohóta amoite roadora hag̃ua Ñandejárape ha upéi roju jeýta pene rendápe” (Gén. 22:5, NM). ¿Mbaʼérepa Abrahán heʼi chupekuéra Isaac ou jeytaha hendive? ¿Ijapúpa chupekuéra? Nahániri. La Biblia heʼi Abrahán ojerovia hague Jehová ikatuha omoingove jey Isaácpe (elee Hebreos 11:19). Abrahán oikuaa Jehová rupivénte haʼe ha Sara ou hague ifamília, pórke mokõivéva ijedáma (Heb. 11:11, 12, 18). Avei oikuaa porã Jehovápe g̃uarã ndaiporiha imposívle. Añetehápe ningo Abrahán ndoikuaái kuri mbaʼépa oikóta upe día. Péro ojerovia Jehová omoingove jeytaha  Isaácpe, ikatu hag̃uáicha oñekumpli opa mbaʼe opromete vaʼekue. Upévare la Biblia heʼi Abrahán rehe haʼeha “opavave umi ojeroviáva túva”.

14. a) ¿Mbaʼe mbaʼépa ikatu ohasa Ñandejára siervokuéra? b) ¿Mbaʼéichapa ñanepytyvõ Abrahán ehémplo?

¹⁴ Ñane tiémpope Jehová ndojeruréi ñandéve jasakrifika hag̃ua ñane famíliape. Péro si oipota ñaneñeʼẽrendu chupe. Por ehémplo, sapyʼánte ikatu ojerure ñandéve peteĩ mbaʼe nañantendeporãiva, térã haʼetévaicha ijetuʼuetereítava ñakumpli hag̃ua. Osino ikatu ñaneotĩeterei ha upévare ñandeforsa japredika hag̃ua. Algúno katu okyhyje ohechauka hag̃ua idiferenteha ikompañéro de traváhogui térã de eskuélagui (Éx. 23:2; 1 Tes. 2:2). ¿Mbaʼépa ikatu jajapo oiméramo ñañeñandu péicha? Iporãta ñapensáramo Abrahán ehémplore. Haʼe ningo ojeroviaiterei vaʼekue Jehováre ha ipyʼaguasu. Ñamboykéramo tiémpo jajepyʼamongeta hag̃ua umi kuña ha kuimbaʼe iñeʼẽrendúva ehémplore, ñañemoag̃uivéta Jehováre (Heb. 12:1, 2).

15. ¿Mbaʼérepa jaʼekuaa Abrahán núnka nombyasýi hague iñeʼẽrendu haguére Jehovápe?

¹⁵ Abrahán núnka nombyasýi iñeʼẽrendu haguére Jehovápe. ¿Mbaʼérepa ikatu jaʼe upéva? Pórke la Biblia heʼi haʼe omano hague “trankílo porã” orekórõ guare 175 áño (Gén. 25:8, NM). Upéva ndeʼiséi Abrahán ikueraimaha oikove hague. Síno heʼise ovyʼaiterei hague oikove aja pukukue. ¿Mbaʼérepa siémpre ovyʼa? Pórke chupe g̃uarã iñimportanteve kuri iñamista Jehovándi.

16. ¿Mbaʼérepa Abrahán ovyʼaitereíta orresusita rire pe paraísope?

¹⁶ La Biblia heʼi Abrahán ohaʼarõ hague “pe siuda oguerekóva simiénto teete; upe siuda ningo Ñandejára odesidi vaʼekue mbaʼéichapa ojejapóta ha haʼe voi omopuʼã” (Heb. 11:10). Ko “siuda” orrepresenta Ñandejára Rréino. Abrahán oĩ vaʼekue segúro ohechataha Ñandejára Rréino ogoverna vove ko yvy ape ári. Epensamíntena mbaʼeichaitépa ovyʼáta Abrahán oiko vove pe paraísope, ha amás día oñemoag̃uivévo ohóvo Jehováre. Katuete ovyʼaitereíta oikuaávo iñehémplo oipytyvõ hague hetaiterei Ñandejára siérvope. Upépe oikuaáta ohórõ guare Isaac ndive pe montáñape, orrepresenta hague peteĩ mbaʼe iñimportantetereíva oiko vaʼekue upe rire (Heb. 11:19). Ha oikuaáta umi mbaʼe ohasa vaʼekue osakrifikátarõ guare itaʼýra Isaácpe, oipytyvõ hague hetápe ontende hag̃ua mbaʼéichapa oñeñandu Jehová, omboúrõ guare Itaʼýrape omano hag̃ua ñanderehehápe (Juan 3:16). Abrahán ehémplo ñanepytyvõ ñamombaʼeve hag̃ua pe sakrifísio porãite Jesús ojapo vaʼekue.

17. a) ¿Mbaʼépa ñañehaʼã vaʼerã jajapo? b) ¿Mbaʼépa jahecháta pe ótro artíkulope?

¹⁷ Ñañehaʼãmbaitékena siémpre jasegi Abrahán ehémplo, ha koʼẽ koʼẽre jajeroviave Jehováre. Ñande avei tekotevẽ jaikuaave jahávo Jehovápe, ha jahechakuaa mbaʼéichapa ñanepytyvõ. Jasegíramo ñaaprende heta mbaʼe chugui, haʼe katuete ñanevendesíta ha oñangarekóta ñanderehe (elee Hebreos 6:10-12). Péicha siémpre oikóta ñandehegui Jehová amígo. Pe artíkulo oúvape jahecháta mbohapy Ñandejára amígo ehémplo.