1, 2. a) ¿Mbaʼépa Jehová oikuaauka ñandéve? b) ¿Mbaʼe promésapa jatopa Isaías 46:10, 11 ha 55:11-pe?

JAʼEKUAA pe primera fráse oĩva la Bíbliape isensilloha, péro avei hypyʼũeterei. Upépe heʼi: “Iñepyrũme Ñandejára ojapo vaʼekue yvága ha yvy” (Gén. 1:1, TNM). Añetehápe saʼieterei jaikuaa umi mbaʼe Jehová ojapo vaʼekuégui ko univérso tuichakuére. Por ehémplo nañantendeporãi mbaʼépa pe espásio, pe lus ha pe graveda (Ecl. 3:11). Péro Jehová omombeʼu ñandéve mbaʼépa opensa ojapo ko yvýgui ha yvyporakuéragui. Haʼe ñandeapo ijoguaháramo ha oipota vaʼekue jaiko vyʼápe ko yvy ape ári (Gén. 1:26). Péicha yvyporakuéra haʼéta Ñandejára raʼy, ha Ñandejára katu haʼéta ñande Túa.

² Génesis kapítulo 3 omombeʼu Jehová propósito ojejokoʼimi hague (Gén. 3:1-7). Péro jaikuaaháicha, ndaipóri mbaʼeveichagua provléma Jehová ndaikatúiva osolusiona, ha ndaipóri avave ikatu vaʼerã ojoko chupe (Is. 46:10, 11; 55:11). Upévare, ñande ñai segúro haʼe okumplitaha hembipota itiempoitépe.

3. a) ¿Mbaʼe enseñánsapa ñanepytyvõ ñantende hag̃ua la Biblia? b) ¿Mbaʼérepa iporã koʼág̃a ñañeʼẽ koʼã enseñánsare? c) ¿Mbaʼe porandúpa ñambohováita ko artíkulope?

³ Ñande ningo jaikuaa porã mbaʼépa Ñandejára propósito ko  yvy ha yvyporakuérape g̃uarã, ha avei mbaʼéichapa Jesús oipytyvõ oñekumpli hag̃ua Itúa propósito. Añetehápe koʼã mbaʼe iñimportanteterei, ha oime vaʼerã ñaaprende raʼe ñañepyrũrõ guare jastudia la Biblia. Koʼág̃a katu ñaipytyvõma ñande rapichakuérape oaprende hag̃ua avei koʼã enseñánsa iñimportantetéva. Ko áñope jareko peteĩ oportunida iporãitereíva jajapo hag̃ua upéva. ¿Arakaʼépa? Ñainvita jave umi héntepe Konmemorasionrã (Luc. 22:19, 20). Umi persóna oúramo jagueromanduʼa jave Jesús omano hague ára, oikuaavéta Ñandejára propósito. Upévare koʼág̃a iporãiterei ñapensa mbaʼépa ikatu ñaporandu umi persóna ñainvitávape ikatu hag̃uáicha ikyreʼỹ ou hag̃ua. Ko artíkulope jahecháta mbohapy porandu: 1) ¿Mbaʼépa Ñandejára oñepropone vaʼekue ojapo ko yvýgui ha yvyporakuéragui? 2) ¿Mbaʼépa osẽ vai kuri? Ha, 3) ¿mbaʼérepa Jesús sakrifísio iñimportanteterei oñekumpli hag̃ua Ñandejára propósito?

4. ¿Mbaʼéichapa pe kreasión “ohechauka Ñandejára ipoderosoitereiha”?

⁴ Jehová hína ñande Apohare ndaijojaháiva. Opa mbaʼe ojapo vaʼekue iporãiterei (Gén. 1:31; Jer. 10:12). ¿Mbaʼépa ikatu ñaaprende pe kreasióngui? Entéro mbaʼe Jehová ojapóva ideprovécho, tamichĩ térã tatuicha jepe raʼe. ¡Ajépa jaguerohoryete peteĩ mitã onase ramóva, jahecha jave pe kuarahy oike térã ñamañávo pyharekue umi estréllare! Jehová ñandeapo ikatu hag̃uáicha jaguerohory umi mbaʼe porã (elee Salmo 19:1 ha 104:24).

5. ¿Mbaʼépa ojapo Jehová ikatu hag̃uáicha ikreasión ombaʼapo porãmba?

⁵ Jehová omoĩ límite opa mbaʼe okrea vaʼekuépe. Por ehémplo omoĩ léi pe naturalésape, ha avei omeʼẽ léi yvyporakuérape ojesegi hag̃ua hese. Opaichagua léi Jehová omoĩva oipytyvõ ikatu hag̃uáicha entéro mbaʼe oĩva ko univérsope ombaʼapo porã oñondivepa (Sal. 19:7-9). Ndaipóri ningo mbaʼeve ko univérsope oĩ reíva. Por ehémplo, pe léi de la graveda rupive pe atmósfera oĩ ag̃ui ko yvy apégui, avei okontrola pe oséano ha ndohejái pe y ojupieterei ni oguejyeterei. Pe léi de la graveda noĩririre ndaikatúi vaʼerãmoʼã jaikove. Umi léi Jehová omoĩ vaʼekue pe naturalésape oipytyvõ ikatu hag̃uáicha ko univérso tuichakue ombaʼapo porãmba. Koʼã mbaʼe ohechauka porã Jehová orekoha peteĩ propósito ko yvy ha yvyporakuérape g̃uarã. Ñane predikasión rupive ikatu ñaipytyvõ umi héntepe oikuaa hag̃ua ko univérso apohare ndaijojaháivape (Apoc. 4:11).

6, 7. ¿Mbaʼe rregálopa Jehová omeʼẽ vaʼekue Adán ha Évape?

⁶ Jehová oipota yvyporakuéra oiko opa ára g̃uarã ko yvy ape ári (Gén. 1:28; Sal. 37:29). Imbaʼeporã rupi, omeʼẽ kuri Adán ha Évape heta mbaʼe oipytyvõtava chupekuéra ovyʼa hag̃ua (elee Santiago 1:17). Por ehémplo, omeʼẽ chupekuéra liverta odesidi hag̃ua, ha kapasida oporohayhu ha orrasona hag̃ua. Ñandejára oñeʼẽmi vaʼekue Adán ndive, ha omboʼe chupe mbaʼéichapa iñeʼẽrendu vaʼerã, mbaʼéichapa oñangareko vaʼerã ijehe, umi animál rehe ha pe paraísore (Gén. 2:15-17, 19, 20). Avei, Jehová omeʼẽ Adán ha Évape pe kapasida ohecha, ohendu, ohetũ, opoko ha otantea hag̃ua heta mbaʼe porã ojapo vaʼekue chupekuéra g̃uarã. Haʼekuéra oreko kuri heta traváho porã ombovyʼátava chupekuéra. Opa umívare Adán ha  Eva ikatúta kuri ovyʼa pe lugár porãitépe. Haʼekuéra ikatu kuri osegi oaprende opa árare heta mbaʼe ipyahúva.

⁷ ¿Mbaʼépa oike avei Ñandejára propósitope? Jehová omeʼẽ Adán ha Évape pe kapasida oreko hag̃ua família iperféktova, ha avei ifamiliakuéra oreko hag̃ua mitã. Péicha ko yvy henyhẽta yvypóragui. Jehová oipota vaʼekue umi tuakuéra ohayhu ifamíliape haʼe ohayhu haguéicha Adán ha Évape. Ñandejára omeʼẽ yvyporakuérape ko yvy ha opa mbaʼe porã oĩva pype, ikatu hag̃uáicha oiko hikuái opa árare (Sal. 115:16).

8. ¿Mbaʼérepa Jehová omeʼẽ Adán ha Évape pe léi jatopáva Génesis 2:16, 17-pe?

⁸ ¿Mbaʼépa oiko raʼe ajeve noñekumplíri Ñandejára propósito? Jehová omeʼẽ Adán ha Évape peteĩ léi isensilloitereíva, ikatu hag̃uáicha oikuaa pe liverta omeʼẽva chupekuéra orekoha límite. Jehová heʼi: “Entéro umi yva oĩva ko hardínpe ikatu reʼu reʼuseha peve. Péro ndereʼúi vaʼerã pe yva orekóva pe yvyramáta ohechaukáva mbaʼépa iporã ha mbaʼépa ivai, pórke reʼuha díape katuete remanóta” (Gén. 2:16, 17, TNM). Ko léi ndahasýi vaʼekue oñentende hag̃ua ni oñekumpli hag̃ua. Pe hardínpe oĩ kuri heta mbaʼe hetereíva ikatúva hoʼu hikuái.

9, 10. a) ¿Mbaʼépa Satanás heʼi Jehováre? b) ¿Mbaʼépa odesidi ojapo Adán ha Eva? (Ehecha pe taʼanga oĩva iñepyrũme).

⁹ Satanás oipuru peteĩ mbóipe ombotavy hag̃ua Évape, ikatu hag̃uáicha odesovedese Itúa Jehovápe (elee Génesis 3:1-5; Apoc. 12:9). Ontendeka Ñandejára iñinhustoha heʼívo Évape: “¿Añetéiko Ñandejára heʼi peẽme ndovaleiha peʼu umi yva oĩva guive ko hardínpe?”. Haʼete Satanás heʼíva Évape: “¿Añetéiko peẽ ndaikatúi pejapo la pejaposéva?”. Upéi heʼi avei chupe: “Peẽ ningo ni mbaʼevéicharõ napemanomoʼãi”. Añetehápe Satanás tuichaiterei ijapu. Upéi oñehaʼã okonvense Évape natekotevẽiha iñeʼẽrendu Ñandejárape heʼívo: “Ñandejára oikuaa porã peʼuha árape pe yva pejesapeʼataha”. Satanás heʼi Jehová ndoipotaiha hoʼu hikuái pe yva, pórke péicha ojesapeʼáta ha oikuaáta peteĩ mbaʼe iñimportánteva Jehová omokañýva chuguikuéra. Upéi Satanás opromete guaʼu: “Pejoguáta Ñandejárape ha peikuaáta mbaʼépa oĩ porã ha mbaʼépa oĩ vai”.

¹⁰ Adán ha Eva tekotevẽ kuri odesidi mávapepa iñeʼẽrendúta. Ñambyasýramo jepe, haʼekuéra odesidi naiñeʼẽrendumoʼãiha Ñandejárape. Omboyke hikuái Jehovápe ha ndoipotavéima chupe Ituáramo. Péicha ohechauka oñemoĩha Satanás ykére. Upe guive, Adán ha Eva opyta Jehová reheʼỹ ha ndoprotehevéima chupekuéra (Gén. 3:6-13).

11. ¿Mbaʼérepa Jehová ndaikatúi ombohasánte kuri Adán ha Eva pekádo?

¹¹ Adán ha Eva odesovedese rire Jehová léi, ndahaʼevéima perfékto hikuái. Upe guive oiko chuguikuéra Ñandejára enemígo, pórke haʼe ndaijaʼéi umi mbaʼe vaíre. La Biblia heʼi Ñandejára resa ipotĩetereiha “ohecha hag̃ua umi mbaʼe vai” (Hab. 1:13, TNM). Jehová ombohasa reínterire Adán ha Eva pekádo, ndaiporimoʼãi kuri pyʼaguapy ha unida ko univérso tuichakuére. Umi ánhel ha yvyporakuéra katuete odudáta umi mbaʼe haʼe heʼívagui. Péro Jehová núnka nopyrũi iñeʼẽre (Sal. 119:142). Adán ha Eva orekóramo jepe pe liverta odesidi hag̃ua, osufri vaʼerã odesidi  haguére opuʼã Jehováre. Kon el tiémpo omano hikuái ha oiko jey chuguikuéra yvytimbo (Gén. 3:19).

12. ¿Mbaʼépa oiko Adán ha Eva familiakuéragui?

¹² Adán ha Eva hoʼu rire pe frúta, Jehová ndaikatuvéima oasepta chupekuéra ifamíliape. Haʼe omosẽ chupekuéra pe Hardín de Edéngui ha ndohejavéima oike upépe (Gén. 3:23, 24). Upe guive haʼekuéra osufri odesidi vai haguére (elee Deuteronomio 32:4, 5). Upéicha rupi Adán ha Eva ndaikatuvéima ohechauka porã umi kualida Jehová orekóva. Adán ha ifamiliakuéra operde pe oportunida oiko hag̃ua pára siémpre. Upéicha rupi entéro umi ifamília iñimperfékto, opeka ha omano (Rom. 5:12). Adán káusare ifamiliakuéra ndaikatuvéima oiko opa ára g̃uarã. Adán ha Eva família onase imperfékto, ha ifamília vove hikuái iñimperféktota avei. Satanás omoĩ Adán ha Évape Jehová kóntrape, ha upe guive oñehaʼã ikatu hag̃uáicha entéro yvypóra ojapo avei upéva (Juan 8:44).

13. ¿Mbaʼépa Jehová oipota yvyporakuérape g̃uarã?

¹³ Adán ha Eva omboykéramo jepe Jehovápe, haʼe osegi ohayhu yvyporakuérape ha oipota haʼekuéra oiko iñamígoramo. Jehová ndoipotái avave omano (2 Ped. 3:9). Upévare, pyaʼe voi ojapo oñekotevẽva guive ikatu hag̃uáicha yvyporakuéragui oiko iñamígo, ha al mísmo tiémpo nopyrũi iñeʼẽre. Jahechamína mbaʼépa haʼe ojapo.

14. a) Ohechaukaháicha Juan 3:16, ¿mbaʼépa Jehová ojapo oipeʼa hag̃ua yvyporakuérape pekádo ha ñemano poguýgui? b) ¿Mbaʼe porandúpa ikatu ñarresponde umi héntepe?

¹⁴ (Elee Juan 3:16). Ikatu ningo umi persóna ñainvitáva Konmemorasionrã oikuaa de memória ko téxto. Péro, ¿oikuaápa hikuái mbaʼérepa Jesús sakrifísio rupive ikatu jaiko pára siémpre? Ko porandu ikatu ñarresponde umi héntepe ñainvita jave chupekuéra oasisti hag̃ua Konmemorasiónpe, pe Konmemorasión aja ha javisita jeývo chupekuéra upe rire. Umi persóna ontende porãramo maʼerãpa Jesús omano, ohechakuaáta avei mbaʼeichaitépa Jehová ñanderayhu ha iñarandu. ¿Mbaʼe mbaʼépa ikatu ñamyesakã umi héntepe?

15. ¿Mbaʼérepa jaʼekuaa Jesús idiferénte hague Adángui?

¹⁵ Jehová omeʼẽ peteĩ kuimbaʼe perfékto rekove ñandesalva hag̃ua. Ko kuimbaʼe tekotevẽ iperfékto ha iñeʼẽrendu Jehovápe. Avei oĩ vaʼerã dispuésto omanóvo yvyporakuéra rehehápe (Rom. 5:17-19). Upearã Jehová ombou yvágagui Itaʼýra Jesúspe, haʼe vaʼekue ipriméra kreasión (Juan 1:14). Upéicha Jesúsgui oiko peteĩ kuimbaʼe perfékto, haʼe haguéicha Adán. Péro Jesús idiferénte vaʼekue Adángui, pórke haʼe okumpli opa mbaʼe Jehová ohaʼarõva peteĩ kuimbaʼe perféktogui. Ohasáramo jepe heta mbaʼe ijetuʼúva, siémpre okumpli Ñandejára Léi heʼíva.

16. ¿Mbaʼérepa ikatu jaʼe Jesús sakrifísio haʼeha peteĩ rregálo ijojahaʼỹva?

¹⁶ Jesús omeʼẽ hekove perfékto opavave rehehápe, ñandepeʼa hag̃ua pekádo ha ñemano poguýgui. Haʼe iperfékto ha iñeʼẽrendu opa mbaʼépe Ñandejárape, péicha ojapo vaʼerã kuri Adán (1 Tim. 2:6). Upe sakrifísio rupive entéro kuimbaʼe, kuña ha mitã oreko oportunida oikove hag̃ua opa árare (Mat. 20:28). Jahechaháicha, Jesús sakrifísio  iñimportanteterei oñekumpli hag̃ua Jehová propósito (2 Cor. 1:19, 20).

17. ¿Mbaʼépa ikatu ojehupyty Jesús sakrifísio rupive?

¹⁷ Jehová hepyeterei opaga ñandepeʼa hag̃ua pekádo ha ñemano poguýgui (1 Ped. 1:19). Chupe g̃uarã ñande ñandevaliosoiterei, upévare omeʼẽ itaʼýra ohayhuetéva omano hag̃ua ñanderehehápe (1 Juan 4:9, 10). Upéicharõ, jaʼekuaa Jesúsgui oiko hague ñande Ru, Adán rekovia (1 Cor. 15:45). Isakrifísio rupive, Jesús omeʼẽ ñandéve oportunida jaiko hag̃ua pára siémpre ha ñaime hag̃ua Ñandejára família apytépe. Pe rreskáte rupive ikatúta ñandeperfékto ha Jehová ñandeasepta jeýta ifamíliaicha sin ke opyrũ iñeʼẽre. Ñapensamíntena mbaʼeichaitépa javyʼáta entéro persóna iñeʼẽrendúva Jehovápe iperfékto vove. Upépe ae, opavave oikóva yvágape ha ko yvy ape ári haʼéta peteĩ família oĩva peteĩ ñeʼẽme, pórke enterovégui oikóta Ñandejára raʼy (Rom. 8:21).

18. ¿Arakaʼépa “Ñandejára añoite omoakãta opa mbaʼe”?

¹⁸ Adán ha Eva omboykéramo jepe Jehovápe, haʼe osegi ohayhu yvyporakuérape. Upévare omeʼẽ Itaʼýra rekove ñanderehehápe ikatu hag̃uáicha ñandesalva. Ñaneimperféktoramo jepe, Satanás ndaikatúi ñandeovliga jadesovedese hag̃ua Jehovápe. Jesús sakrifísio rupive, Jehová ikatu ñanepytyvõ ñanderekojojaite hag̃ua. Ajépa javyʼaitereíta jahechávo enterove “oikuaáva pe Taʼýrape ha ojeroviáva hese, oikove opa ára g̃uarã” (Juan 6:40). Ñande Túa iñaranduetéva ha ñanderayhuetéva okumplíta ipropósito, ha oipytyvõta entéro yvypórape iperfékto hag̃ua. “Upéicha Ñandejára añoite omoakãta opa mbaʼe” (1 Corintios 15:28).

19. a) ¿Mbaʼépa jajapóta ñamombaʼéramo Jesús sakrifísio? (Ehecha pe rrekuádro “ Peheka petopa peve mávapa omerese ohendu”). b) ¿Mbaʼépa jahecháta pe artíkulo oúvape?

¹⁹ Jaagradeséramo Jesús sakrifísio, ñañeʼẽta ñande rapichakuérape ko rregálo porãitére. Umi hénte ningo oikuaa vaʼerã Jehová omeʼẽseha chupekuéra jeikove opaveʼỹva pe rreskáte rupive. Péro Jesús sakrifísio ndahaʼéi omeʼẽnteva ñandéve jeikove opaveʼỹva, síno avei osolusiona umi provléma Satanás omoñepyrũ vaʼekue Hardín de Edénpe. Pe artíkulo oúvape jahecháta mbaʼéichapa pe rreskáte osolusiona koʼã provléma.