1, 2. ¿Mbaʼépa ohechakuaa peteĩ ermáno, ha mbaʼépa ojapo upémarõ?

ROBERT ojevautisa kuri orekórõ guare 15 áño, péro Ñandejára servísio ndahaʼéi vaʼekue la iñimportantevéva chupe g̃uarã. Haʼe heʼi: “Che ningo núnka ndajapói mbaʼeve ivaíva, péro aservi Jehovápe ajapo vaʼerãgui reínte. Apensa kuri aĩ porãha espirituálmente, pórke ndafaltái rreuniónpe ha ajapo jepi che auxiliár unas kuánta vése al áño. Péro añandu ofaltaha chéve algúna kósa”.

² Robert omenda rire ae opilla mbaʼépa la ofaltáva chupe. Haʼe ha hembireko ojapo jepi umi huégo bíblico ha oporandu ojupe umi mbaʼe oĩva la Bíbliape. Hembirekópe ningo ndahasyiete ombohovái hag̃ua umi pregúnta, péro Robert heta vése ndoikuaái la rrespuésta ha otĩ opytávo. Haʼe heʼi: “Añeñandu ndaikuaaiha mbaʼeve. Upémarõ haʼe chejupe: ‘Oimérõ amoakã porãse che rogapy, tekotevẽ ajapo álgo’”. Robert heʼi avei: “Añepyrũ astudia meme la Biblia ha isentidove chéve heta mbaʼe. Antende porãiteve pe añetegua, ha la iñimportantevéva añemoag̃uive Jehováre”.

3. a) ¿Mbaʼépa ikatu ñaaprende Robert rembiasakuégui? b) ¿Mbaʼépa ñahesaʼỹijóta ko artíkulope?

³ Heta mbaʼe ikatu ñaaprende Robert rembiasakuégui. Ikatu ningo jaikuaa heta mbaʼe la Bíbliagui, ndajafaltái rreuniónpe ha predikasiónpe, péro umíva ndeʼiséi katuete ñandeespiritualha.  Ikatu avei oime japrogresáma espirituálmente, péro jajepyʼamongetávo japilla ikatuha gueteri ñamehora (Filip. 3:16). Ko artíkulope ñahesaʼỹijóta mbohapy mbaʼe iñimportánteva: 1) ¿Mbaʼépa ñanepytyvõta jaikuaa hag̃ua oimépa añetehápe ñandeespirituál? 2) ¿Mbaʼéichapa ikatu ñandeespiritualve? Ha 3) ¿mbaʼéichapa káda día ñanepytyvõ ñaĩ porãramo espirituálmente?

4. ¿Mávape g̃uarãpa pe konsého jatopáva Efesios 4:23 ha 24-pe?

⁴ Ñañepyrũrõ guare jaservi Ñandejárape, katuete jajapóne raʼe heta kámbio. Ha jajevautisa rire jepe, jasegi ñakambia. La Biblia heʼi: “Akóinte pembopyahu vaʼerã pepensa lája” (Efes. 4:23, 24). Ñaneimperfékto rupi, siémpre jasegi vaʼerã ñamehora. Jaservímarõ jepe Jehovápe heta áñore, lomímonte tekotevẽ ñañehaʼãmbaite ñañemoag̃uive hag̃ua hese (Filip. 3:12, 13).

5. ¿Mbaʼe porandúpa ikatu ñanepytyvõ jahecha hag̃ua ñaĩ porãpa hína espirituálmente?

⁵ Tahaʼe imitãva térã ijedáva, iñimportanteterei ojepyʼamongeta mbaʼetekópa oĩ hína ijespiritualida. Upearã iporã ñañeporandumi: “¿Cheespiritualvépa ahávo? ¿Ajoguavépa ahávo Crístope? ¿Amombaʼépa umi rreunión ha añekomporta porã aĩ jave upépe? ¿Mbaʼe mbaʼérepa añemongetave? ¿Mbaʼépa ohechauka añemonde ha ajearregla lája, ha mbaʼéichapa ajagarra algúno oñemoñeʼẽ jave chéve? ¿Ajepokuaápa astudia meme la Biblia? ¿Mbaʼépa ajapo oñepresenta jave chéve peteĩ tentasión? ¿Oikóma piko chehegui peteĩ kristiáno madúro?” (Efes. 4:13). Koʼã mbaʼe ikatu ñanepytyvõ jaikuaa hag̃ua ñaĩ porãpa hína espirituálmente.

6. ¿Mbaʼépa ikatu avei ñanepytyvõ jahechakuaa hag̃ua mbaʼéichapa ñaĩ hína espirituálmente?

⁶ Sapyʼánte ñaikotevẽ ótro ñanepytyvõ jaikuaa hag̃ua mbaʼéichapa ñaĩ hína espirituálmente. Apóstol Pablo heʼi umi oikóva hete rembipota rapykuéri noñemeʼẽiha enkuénta umi mbaʼe ojapóva ndogustaiha Ñandejárape. Umi persóna ijespirituálva katu oikuaa mbaʼéichapa opensa Ñandejára. Upévare haʼekuéra ohechakuaa Jehová ndoipotaiha jaiko ñande rete rembipota rapykuéri (1 Cor. 2:14-16; 3:1-3). Umi ansiáno ningo oñehaʼã opensa Cristo opensaháicha, upévare heta vése ensegída ohechakuaa peteĩ ermáno oñepyrũ jave oho tape vaíre, ha pyaʼe porã oñehaʼã oipytyvõ chupe. Oimérõ ansianokuéra oñehaʼã hína nepytyvõ, ¿rejagarra porãpa umi konsého omeʼẽva ndéve, ha rekambia tekotevẽhápe? Péicha rejapóramo rehechaukáta añetehápe reipotaha oiko ndehegui peteĩ persóna ijespirituálva (Ecl. 7:5, 9).

7. ¿Ikatúpa jaʼe jaikuaa haguérente la Biblia omboʼéva ñandeespiritualmaha?

⁷ Ndahaʼéi ningo jaikuaa haguérente umi mbaʼe oĩva la Bíbliape oikótamava ñandehegui peteĩ persóna ijespirituálva. Rréi Salomón oikuaa vaʼekue heta mbaʼe Jehovágui, ha heta mbaʼe haʼe heʼíva oñemoĩ kuri la Bíbliape. Péro amo ipahápe oñemomombyry Jehovágui ha ojapo umi mbaʼe ndogustáiva chupe (1 Rey. 4:29, 30; 11:4-6). Upévare, ndahaʼéi vaʼerã jastudiánteva la Biblia, síno jasegi vaʼerã ñamombarete ñande jerovia (Col. 2:6, 7). ¿Mbaʼéichapa ikatu jajapo upéva?

8, 9. a) ¿Mbaʼépa ikatu ñanepytyvõ ñamombareteve hag̃ua ñande jerovia? b) ¿Maʼerãpa jastudia ha jajepyʼamongeta vaʼerã? (Ehecha pe taʼanga oĩva iñepyrũme).

⁸ Síglo primérope, Pablo omokyreʼỹ  vaʼekue kristianokuérape osegi hag̃ua “tenonde gotyo”, térã oprogresa hag̃ua (Heb. 6:1). ¿Mbaʼéichapa ikatu jasegi ko konsého? Por ehémplo, ikatu jastudia pe lívro Jaikókena Ñandejára mborayhúpe. Ko lívro ñanepytyvõ jaikuaa hag̃ua mbaʼéichapa ikatu jasegi umi konsého bíblico. Oimérõ jastudiapáma ko lívro, ñahesaʼỹijokuaa avei heta ótra puvlikasión ñanepytyvõtava ñamombareteve hag̃ua ñande jerovia (Col. 1:23). Iporã jajepyʼamongeta umi mbaʼe ñaaprendévare, ha jajerure Jehovápe tañanepytyvõ jajapo hag̃ua umíva.

⁹ Ñande ningo jastudia ha jajepyʼamongeta jajaposégui umi mbaʼe Jehová oguerohorýva ha ñaneñeʼẽrendu hag̃ua chupe (Sal. 40:8; 119:97). Tekotevẽ avei ñaaprende mbaʼéichapa ikatu ñamboyke umi mbaʼe ikatúva ñanemokangy (Tito 2:11, 12).

10. ¿Mbaʼépa ikatu ojapo umi imitãva ijespiritualve hag̃ua?

¹⁰ Oimérõ nemitã gueteri, ¿reguerekópa méta Jehová servísiope? Peteĩ ermáno oservíva Betélpe ojepokuaa oñeʼẽ asambleahápe, pe prográma oñepyrũ mboyve, umi mitãrusu ojevautisátavandi. Haʼe oporandu chupekuéra mbaʼépa ohupytyse hikuái upe rire Jehová servísiope. Ohecha oĩha heta opensa porãmava mbaʼépa ojapóta oservi porãve hag̃ua Ñandejárape. Oĩ umi oplaneáva oservi de tiémpo kompléto térã ovaséva umi lugár oĩvehápe nesesida. Péro unos kuánto ndoikuaái mbaʼépa orrespondéta. ¿Opensa piko hikuái natekotevẽiha omoĩ méta? Oiméramo nemitã, eñeporandumína: “¿Ahápa rreunionhápe ha asẽ apredika che túa umía oipotáguinte? ¿Térãpa che voi areko peteĩ amista Jehovándi?”. Tahaʼe imitãva térã ijedáva, enterovéva ñambaʼapo vaʼerã jahupyty hag̃ua hetave mbaʼe Ñandejára servísiope, péicha ñandeespiritualvéta (Ecl. 12:1, 13).

11. a) ¿Mbaʼépa tekotevẽ jajapo japrogresave hag̃ua espirituálmente? b) ¿Mbaʼe ehémplo bíblicopa ikatu jasegi?

¹¹ Jahechakuaáramo mbaʼépepa ikatu ñamehorave, ñakambia vaʼerã tekotevẽhápe. Iñimportanteterei ningo oiko ñandehegui peteĩ persóna ijespirituálva, pórke upévagui odepende jajesalvátapa térãpa nahániri (Rom. 8:6-8). Péro jaikuaaháicha, upéva ndeʼiséi ñandeperfékto vaʼerãha. Jehová ñanepytyvõ ijespíritu sánto rupive japrogresave hag̃ua jahávo. Upéicharõ jepe, tekotevẽ avei ñambaʼapo meme ñandejehe. Peteĩ jey, ermáno John Barr (oservi vaʼekue kómo miémbro del Kuérpo Governánte) oñeʼẽ kuri Lucas 13:24 rehe. Haʼe heʼi oĩha heta kristiáno noñakãrapuʼãiva pórke ofalta oñehaʼãve. Ñande ningo jasegi vaʼerã Jacob ehémplo. Haʼe ndohejái vaʼekue peteĩ ánhel oho ovendesiʼỹre chupe (Gén. 32:26-28). Igústo ningo jastudia la Biblia, péro ndajaleéi vaʼerã ñañentretene hag̃uánte. Tekotevẽ jastudia porã ikatu hag̃uáicha jatopa umi tesóro ñanepytyvõtava japrogresave hag̃ua.

12, 13. a) ¿Mbaʼépa ñanepytyvõta jajapo hag̃ua Romanos 15:5 heʼíva? b) ¿Mbaʼéichapa ñanepytyvõ Pedro ehémplo ha ikonsého? c) ¿Mbaʼépa ikatu jajapo ñandeespiritualve hag̃ua? (Ehecha pe rrekuádro “ Mbaʼéichapa ikatu japrogresave”).

¹² Ñañehaʼãramo japrogresave hag̃ua espirituálmente, pe espíritu sánto ñanepytyvõta ñakambia hag̃ua ñapensa lája. Mbeguekatúpe ñapensáta jahávo Cristo opensaháicha (Rom. 15:5). Ñandejára espíritu ñanepytyvõta avei ñamboyke hag̃ua umi deséo vai ha jaiko hag̃ua haʼe oipotaháicha (Gál. 5:16, 22, 23). Jahechakuaáramo ñamotenondeha umi mbaʼerepy ha vyʼarã, ñañehaʼã vaʼerã ñakambia, ha ani ñañentrega. Jasegi vaʼerã  jajerure Jehovápe tañanepytyvõ ijespíritu rupive jaservi porãve hag̃ua chupe (Luc. 11:13). Ñanemanduʼa vaʼerã apóstol Pedro sapyʼánte nopensái hague Cristo opensaháicha (Mat. 16:22, 23; Luc. 22:34, 54-62; Gál. 2:11-14). Péro osegi oñehaʼã, ha Jehová oipytyvõ chupe. Mbeguekatúpe Pedro opensa kuri Cristo opensaháicha. Ñande avei ikatu jahupyty upéva.

¹³ Pedro omombeʼu vaʼekue mbaʼépa ñanepytyvõta upearã (elee 2 Pedro 1:5-8). Haʼe heʼi kuri ñañehaʼãmbaite vaʼerãha jajejokokuaa, ñaaguanta, jahayhuve ermanokuérape ha umícha. Iporã káda día ñañeporandu: “¿Mbaʼépepa koestedía ikatu amehora cheespiritualve hag̃ua?”.

14. ¿Mbaʼépepa ñanepytyvõta ñaĩ porãramo espirituálmente?

¹⁴ Ñapensáramo Cristo opensaháicha ojekuaáta ñanderehe ñañekomporta lájare ñande travahohápe térã koléhiope, ñañeʼẽ lájare ha la jadesidívare káda día. Opa mbaʼépe ojekuaáta ñanderehe ñañehaʼãha jasegi Cristo ehémplo. Ñaĩ porãramo espirituálmente ndajahejamoʼãi mbaʼeve ñanemomombyry Jehovágui. Ha ñambohovái jave umi tentasión ikatúta ñamboyke umíva. Jadesidíta jave álgo ñañeporandúta: “¿Mbaʼe téxtopa ikatu chepytyvõ adesidi porã hag̃ua? ¿Mbaʼépa ojapóne Cristo ko situasiónpe? ¿Mbaʼépa oipotáta Jehová ajapo?”. Jajepokuaa vaʼerã ñapensa koʼã mbaʼére jadesidi mboyve. Upévare, jahechamína unas kuánta situasión ikatúva oñepresenta, ha umi konsého bíblico ikatúva ñanepytyvõ jadesidi porã hag̃ua.

15, 16. a)¿Mbaʼéichapa ñanepytyvõta ñapensáramo Cristo opensaháicha jadesidíta jave mávarepa ñamendáta? b) ¿Mbaʼéichapa ñanepytyvõta avei upéva jaiporavóta jave ñane amigorã?

¹⁵ Jadesidíta jave mávarepa ñamendáta. Peteĩ konsého bíblico ikatúva ñanepytyvõ oĩ 2 Corintios 6:14 ha 15-pe (elee). Pablo ohechauka porã vaʼekue peteĩ persóna ijespirituálva idiferenteteha umi oikóvagui hete rembipota rapykuéri. ¿Mbaʼéichapa ko téxto ikatu ñanepytyvõ jaiporavo porã hag̃ua ñane ména térã ñane rembirekorã?

¹⁶ Jaiporavóta jave ñane amigorã. Ikatu jahecha pe konsého oĩva 1 Corintios 15:33-pe (elee). Umi persóna ijespirituálva ndojeheʼái umi hénte ikatúvare omokangy chupekuéra. Jahechamína mbaʼéichapa ikatu jasegi diferénte situasiónpe pe konsého oĩva 1 Coríntiospe. Por ehémplo, ¿mbaʼéichapa ñanepytyvõkuaa jaipuru porã hag̃ua umi rred sosiál? ¿Mbaʼéichapa ikatu avei ñanepytyvõ peteĩ extráño ñaneinvitárõ jahuga hag̃ua por Internét?

17-19. ¿Mbaʼéichapa ñanepytyvõ ñanembaretéramo espirituálmente a) ñamboyke hag̃ua umi mbaʼe ndaideprovéchoiva? b) jareko hag̃ua méta Jehová servísiope? c) ñaneprovléma jave ótrondi?

¹⁷ Umi mbaʼe ikatúva ñandejoko japrogresa hag̃ua. Peteĩ konsého ikatúva ñanepytyvõ oĩ Hebreos 6:1-pe (elee). ¿Mbaʼépa hína “umi tembiapo ovaleʼỹva” ha tekotevẽva ñamboyke? Umíva  hína umi mbaʼe ndaideprovéchoiva ñamombarete hag̃ua ñande jerovia. Pe konsého omeʼẽ vaʼekue Pablo ikatu ñanepytyvõ ñarresponde hag̃ua heta porandu. Por ehémplo, ¿ideprovéchopa añete ko tembiapo, térãpa ndoservíri mbaʼeverã? ¿Okonvenípa chéve ajapo ko negósio térã ambaʼapo ko traváhope? ¿Mbaʼérepa iporãvéta ndaikéiramo peteĩ grúpo oñehaʼãvape omehora ko múndo?

¹⁸ Umi méta jarekóva Jehová servísiope. Jesús omeʼẽ vaʼekue heta konsého neporãva pe Sermón del Móntepe, ha umíva ñanepytyvõkuaa jahecha hag̃ua mbaʼeichagua métapa ikatu ñamoĩ (Mat. 6:33). Peteĩ persóna ijespirituálva oñehaʼã omotenonde Ñandejára Rréino. Ko konsého ñanepytyvõ ñarresponde hag̃ua koʼã porandu: “¿Astudiátapa fakultápe atermina rire che koléhio? ¿Iporãtapa aasepta ko traváho?”.

¹⁹ Jajoavy jave ótrondi. Pe konsého Pablo omeʼẽva umi kristiáno Romaguápe ikatu ñanepytyvõ jajoavy jave ñande rapichándi (Rom. 12:18). Ñande jasegi Cristo ehémplo, upévare ñañehaʼãmbaite jaiko pyʼaguapýpe enterovéndi. ¿Mbaʼéichapa ñarreaksiona ñaneprovléma jave ótrondi? ¿Ñañehaʼãpa jaiko porã ñande rapichándi, térãpa ohecha hikuái ñañemohatãha ñande ñapensávapente? (Sant. 3:18).

20. ¿Mbaʼérepa reñehaʼãse reprogresave hag̃ua espirituálmente?

²⁰ Koʼã ehémplo ohechauka porã umi konsého bíblico ikatuha ñanepytyvõ jadesidi porã hag̃ua. Péicha ojekuaáta avei jahejaha Ñandejára espíritu ñandegia. Ñaĩ porãramo espirituálmente javyʼave. Robert, pe ermáno ñañeʼẽ hague oñepyrũvo ko artíkulo heʼi: “Amáske añemoag̃uive Jehováre, akumpli porãve umi rresponsavilida orekóva ména ha túa. Avei avyʼa ha añeñandu porãve”. Ñande avei ñañehaʼãramo ñandeespiritualve jahupytýta heta mbaʼe porã. Javyʼáta koʼág̃ama voi, ha amo gotyove jahupytýta pe jeikove añeteguáva (1 Tim. 6:19).