Che túa ningo héra John Mills, haʼe ojevautisa vaʼekue Nueva Yórkpe 1913-pe, orekórõ guare 25 áño. Ermáno Russell ojapo kuri pe diskúrso de vautísmo. Upe riremi papa oho Trinidádpe, ha upépe omenda peteĩ Estudiánte de la Biblia ikyreʼỹvare hérava Constance Farmer. Papa oipytyvõ iñamígo William Brównpe * ohechauka hag̃ua umi héntepe pe “Foto-Drama de la Creación”. Upéi ermáno Brown ha hembireko oñeasigna oho hag̃ua África Occidentálpe 1923-pe, péro che túa ha che sy osegi oiko Trinidádpe. Mokõivéva unhído vaʼekue.

Che tuakuéra 9 ifamília vaʼekue, ijypykuépe ombohéra Rutherford, péicha héra haguére upe tiémpope pe presidénte de la Sociedad Watch Tower. Upe rire anase che, el 30 de diciembre de 1922. Chéve katu chembohéra Woodworth pórke pe direktór pe rrevísta The Golden Age-pegua (koʼág̃a hérava ¡Despertad!) héra kuri Clayton Woodworth. Ore tuakuéra oñehaʼã vaʼekue enterovéva roho eskuélape, péro iñimportanteve kuri chupekuéra g̃uarã oremokyreʼỹ rohupyty hag̃ua umi mbaʼe porã Ñandejára servísiope. Mama orrasonakuaaiterei vaʼekue orendive la Biblia rupive. Papápe katu ogustaiterei omombeʼu jave oréve umi istória oĩva la Bíbliape. Ha ojapo jave upéva, ihestopa ha omomyimba voi hete ikatu hag̃uáicha roñeimahina porãve la oikóva.

Mama ha papa noñehaʼãreíri vaʼekue, pórke mbohapy kuimbaʼe umi 5 apytégui roho Eskuéla de Galaádpe. Avei mbohapy che ermána ojapo kuri iprekursorádo heta tiémpore Trinidad y Tobágope. Mama ha papa haʼete ku oremoĩva “Jehová rógape” pórke oremboʼe hikuái umi mbaʼe heʼíva ha ojapóva rupive. Haʼekuéra oremokyreʼỹ meme vaʼekue, ha upéva orepytyvõ rosegi hag̃ua roservi Ñandejárape ku ‘orepotyrõguáicha ikorapýpe’ (Sal. 92:13).

Che rógape oñeorganisa vaʼekue pe predikasión. Umi prekursór oñembyatými ógape ha pyʼỹinte  oñemongeta ermáno George Young rehe. Ko ermáno ningo haʼe kuri peteĩ misionéro canadiense ovisita vaʼekue Trinidad. Che túa umía katu kyreʼỹme oñeʼẽ vaʼekue pe matrimónio Brown rehe oĩva África Occidentálpe, umi ermáno anteve oservi vaʼekue hendivekuéra. Entéro koʼã mbaʼe chemomýi añepyrũ hag̃ua apredika arekórõ guare 10 áño.

Upe tiémpope ñande rrevistakuéra ndojereiete vaʼekue oñeʼẽ hag̃ua umi rrelihión japúre, umi komersiánte taryrýire ha umi goviérno korrúptore. Upéicha rupi, 1936-pe umi rrelihión japu omoakãva okonvense pe governadór de Trinidádpe oproivi hag̃ua ñane puvlikasionkuéra. Upémarõ romokañy umi rorekóva gueteri péro rosegi roipuru opaite peve. Rojapo avei márcha de informasión ha desfíle visikléta ári roipuruhápe tratádo ha kartél. Avei romoirũ peteĩ grúpo de ermáno opredikáva peteĩ áuto iparlántevape oúva Tunapúnagui, ha hendivekuéra ropredika umi lugár mombyryvehápe. ¡Chemokyreʼỹeterei koʼã mbaʼe! Upévare adesidi ajevautisa arekórõ guare 16 áño.

Umi mbaʼe oremboʼe vaʼekue che túa umía ha entéro umi experiénsia porã ahasáva añepyrũrõ guare apredika, chemomýi aservise hag̃ua de misionéro. Asegi vaʼekue apensa péicha ahárõ guare 1944-pe apredika hag̃ua Arúbape ermáno Edmund Cummings ndive. Rovyʼaiterei 10 persóna oasisti haguére Konmemorasiónpe 1945-pe. Pe sigiénte áñope oñeforma pe primera kongregasión upe íslape.

Upe riremi, apredika che kompañéra de traváhope hérava Oris Williams. Haʼe oñehaʼãmbaite odefende la ogueroviáva, upéicharõ jepe, oñepyrũ ostudia la Biblia ha oaprende la añetehápe omboʼéva Ñandejára. Upéi ojevautisa el 5 de enero de 1947. Tiémpo rire, roñemoĩ de nóvio ha romenda. Oris oñepyrũ oservi de prekursóra noviembre de 1950-pe. Rohasa heta mbaʼe porã Jehová servísiope.

Roñeinvita roho hag̃ua Eskuéla de Galaádpe 1955-pe. Rojeprepara roasisti hag̃ua upe eskuélape. Upearã rosẽ ore traváhogui, rovende la ore róga ha hetave mbaʼe rorekóva, ha upéi roheja Aruba. El 29 de julio de 1956 rojegradua pe kláse número 27-gui ha roñeasigna Nigériape.

Oris imanduʼávo upe tiémpore heʼi: “Jehová espíritu ñanepytyvõ jajeadapta hag̃ua umi mbaʼe jahásavare jaservívo kómo misionéro. Che napensái vaʼekue che ménaicha, haʼe ningo oservise voi vaʼekue kómo misionéro, péro chéve arakaʼeve ndachestiráiva upéva. Upéva rangue chemembyse kuri ha aikose che rógape. Péro akambia apensa lája ahechakuaa rire iñurhenteha ojepredika pe marandu porã. Upévare, rojegraduárõ guare Galaádgui ajesareko meméma vaʼekue pe tembiapo ajapótavare kómo misionéra. Roviaha kuri pe várko héravape Queen Mary, ha rosẽ mboyve oho oredespedi ermáno Worth Thornton ombaʼapóva ermáno Knorr ndive. Haʼe heʼi oréve rombaʼapotaha Betélpe. Asuspira ha haʼe: ‘¡Anínati!’. Upéicharõ jepe, ndatardaguasúi ajeadapta hag̃ua pe asignasiónpe ha avyʼa kuri Betélpe. Upépe ambaʼapo heta mbaʼépe, péro pe traváho de rresepsionísta la chegustave vaʼekue. Che ningo ahasa porãiterei jepi añemongeta jave umi héntendi, ha ambaʼapórõ guare de rresepsionísta aikuaa heta ermáno nigeriánope. Heta oĩ og̃uahẽva kaneʼõnguére, ijyvytimbopa, iñembyahýi ha ijuhéi. Péicha jave avyʼa ikatu haguére aipytyvõ chupekuéra oñeñandu porãve hag̃ua. Opa koʼã mbaʼe haʼe hína peteĩ servísio Jehovápe g̃uarã ha upévare chembovyʼaiterei”. Añetehápe, káda asignasión oñemeʼẽva oréve orepytyvõ roñakãrapuʼãve hag̃ua Jehová servísiope.

Áño 1961-pe roñembyaty la família Trinidádpe, upérõ ermáno Brown omombeʼu umi mbaʼe porãita ohasa vaʼekue Áfricape. Upéi, che avei amombeʼu mbaʼéichapa okakuaa vaʼekue ohóvo pe óvra Nigériape. Upémarõ ermáno Brown cheañuã ha heʼi papápe: “Johnny, nde arakaʼeve nderehóiva Áfricape, péro ko nde raʼy katu ojapóma upéva”. Ha papa heʼi: “¡Esegi péicha che raʼy!”. Chemokyreʼỹeterei ningo la heʼíva koʼã kuimbaʼe ijerovia mbaretetéva, upévare koʼýte ajedesidi asegitaha añehaʼãmbaite Jehová servísiope.

Áño 1962-pe, areko pe oportunida aasisti hag̃ua pe kláse número 37-pe Eskuéla de Galaádpe, odura vaʼekue 10 mése. Pe ermáno oservíva kómo superintendénte pe sukursál de Nigériape hérava Wilfred Gooch oho kuri pe kláse número 38-pe, ha upe rire oñeasigna oservi hag̃ua Inglatérrape. Upévare che apyta hendaguépe Nigériape. Añehaʼã asegi  ermáno Brown ehémplo, upévare heta aviaha ha aikuaa umi ermáno nigeriánope, ha ahayhu chupekuéra. Haʼekuéra ningo ndorekói heta mbaʼe ojerekóva jepi umi tetã irríkovape. Upéicharõ jepe ovyʼaiterei hikuái ha péicha ohechauka la iñimportantevéva ñande rekovépe nodependeiha pláta ha mbaʼerepýre. Jaikuaa porã jave mbaʼéichapa oiko hikuái, jahecharamo ikatu haguére ipotĩ, oñemonde ha ojearregla porã oho hag̃ua rreunionhápe. Ou jave asamblearã heta oĩ oúva kamiónpe térã bolekájape, * haʼéva peteĩ kolektívo ijaviertopáva. Pyʼỹinte koʼã kolektívo oreko ijapére umi fráse iñinteresánteva. Por ehémplo peteĩvare oĩ: “Otykýrõ onoʼõmante vaʼerã”.

¡Siertoite la oĩva pe kolektívore! Okonta hína la ojapóva káda uno ha ñande avei ikatu jajapo ñande párte. Áño 1974-pe Nigériape ojehupyty 100.000 puvlikadór, upe mboyve Estados Unidos añoite la ohupyty vaʼekue upéva. Jahechakuaa mbaʼeichaitépa Ñandejára rembipota oñakãrapuʼã kuri ohóvo Nigériape.

Oavansávo ohóvo pe óvra, oñepyrũ pe gérra sivíl Nigériape, 1967 guive 1970 peve. Heta mésere upe tiémpope umi ermáno oikóva pe território de Biáfrape, oĩva éste gotyo Rrío Nígergui, ndaikatuvéi oñekomunika pe sukursál ndive. Tekotevẽterei ningo rogueraha chupekuéra umi puvlikasión omombaretétava ijerovia. Haʼéma haguéicha iñepyrũme, roñemboʼe Jehovápe ha rojerovia hese rokrusa hag̃ua heta vése pe rrío.

Koʼag̃aite peve chemanduʼa porã gueteri umi mbaʼe oikóvare rokrusárõ guare pe rrío. Heta pelígro rohasa pórke upépe oĩ soldádo okontroláva ha ni ndahesapirĩmoʼãiva ohaʼã hag̃ua oimeraẽvape hiʼármape, avei ikatu kuri orerasy ha hetave mbaʼe. Ijetuʼúma voi rokrusa hag̃ua umi puésto oĩháme umi soldádo del goviérno, péro ijetuʼuvéntema rohasa hag̃ua pe Biafra ládo gotyo. Peteĩ pyharépe, Asaba guive akrusa pe Rrío Níger, chakeko ikorrentáda guasu upe rrío. Aha peteĩ kanóape ag̃uahẽ hag̃ua Onítshape. Upégui aha Enúgupe ikatu hag̃uáicha amokyreʼỹ umi superintendéntepe. Ótra vuéltape, aha amokyreʼỹ hag̃ua umi ansiáno oĩva Ábape, upépe oĩ proivído kuri oñeĩ lurendýpe pyharekue. Peteĩ vuéltape, roime aja Port Hárcourtpe tekotevẽ kuri rotermina pyaʼe porã pe rreunión kon orasión, pórke umi soldádo del goviérno oikéma Biáfrape ha oñemoag̃uíma ohóvo orerehe.

Koʼã rreunión aime haguépe ermanokuérandi iñimportanteterei kuri, pórke péicha ohechakuaa hikuái Jehová ohayhu ha okuidaha hesekuéra. Avei oñemeʼẽ umi konsého oikotevẽva hikuái osegi hag̃ua iñunído ha noñentremetéi pe gérrape. Umi ermáno osegi kuri ifiél Jehovápe upe tiémpo ijetuʼuetévape. Haʼekuéra ohechauka ojoayhu añeteha iñermanokuéra ótro trivuguándi jepe ha osegi iñunído. Avyʼaiterei ningo ikatu haguére aipytyvõ chupekuéra pe tiémpo ohasa asyete haguépe hikuái.

Áño 1969-pe oiko pe Asambléa Internasionál “Paz en la Tierra”, upéva ojejapo kuri Estádio de los Yánkeespe (Nueva York). Ermáno Milton Henschel oservi kómo presidénte pe asambléape, che katu aipytyvõ chupe ha heta mbaʼe aaprende chugui. Haʼetépe ambaʼapo pe asamblearã pórke ideprovécho chéve upéva oikórõ guare 1970-pe pe Asambléa Internasionál “Hombres de Buena Voluntad” Lágospe (Nigeria). Pe asambléa ningo oiko opamírente kuri pe gérra, upéicha rupi ojekuaa porãvéntema Jehová vendisión rupive osẽ porã hague pe aty guasu. Oasisti kuri 121.128 persóna ha ojehupyty peteĩ rrékor ojejapo haguére 17 idiómape. Ermáno Knorr, Henschel ha hetave visitánte ou aviónpe Estados Unidos ha Inglatérragui. Péicha haʼekuéra ohecha pe kantida de vautisádo tuichavéva ojehupytýva Pentekostés tiémpo guive. Upérõ ojevautisa 3.775 disípulo pyahu. Aipytyvõ kuri oñeorganisa hag̃ua ko akontesimiénto, ha posívlemente upérõ ambaʼapo arakaʼeve ajapoʼỹ haguéicha. Pe kantida de puvlikadór ndahaʼéi okakuaaʼimínteva, síno tuichaiterei voi okakuaa.

Aiko kuri mas de 30 áño Nigériape, ha upépe aservi avei kómo superintendénte de sirkuíto ha kómo superintendénte de sóna África Occidentálpe. Umi misionéro ningo oguerohoryeterei oñeñatende ha oñemokyreʼỹ haguére chupekuéra. Chéve katu chembovyʼaiterei ikatu haguére ahechauka umi ermánope oñemombaʼeha la ojapóva. Ko asignasión arekóva chemboʼe ñañeinteresáramo ermanokuérare ñaipytyvõ porãveha chupekuéra oprogresa hag̃ua, ha osegi hag̃ua imbarete ha iñunído Jehová organisasión.

 Jehová rupivénte ikatu kuri rogueropuʼaka umi provléma rohasáva orerasy jave ha pe gérra sivíl káusare. Siémpre rohecha mbaʼéichapa Jehová orevendesi. Oris omombeʼu:

“Mokõivépe orejagarra malária heta vése. Peteĩ vuéltape, Worth og̃uahẽ inkonsiénte peteĩ ospitál oĩva Lágospe. Ojeʼe chéve posívlemente noaguantamoʼãiha, péro méno mal ojerrekupera. Opáy rire, haʼe oñeʼẽ Ñandejára Rréinore pe enferméro oñatendévape hese. Upéi roho jey vaʼekue Worth ndive rovisita ko karai héravape Nwambiwe, pórke rohechakuaa oñeinteresaha la Bíbliare. Haʼe oguerovia pe añetegua ha tiémpo rire oiko chugui ansiáno Ábape. Avei aipytyvõ hetápe oiko hag̃ua chuguikuéra Jehová siérvo, umi musulmán imbaretévape ikreénsiape jepe. Rovyʼaiterei ikatu haguére roikuaa ha rohayhu umi nigeriánope, roguerohory ikultúra, ikostúmbre ha iñidióma”.

Roaprende avei kuri ótra leksión: roservi porã hag̃ua ore asignasiónpe ótro tetãme, tekotevẽ kuri rohayhu ermanokuérape, ikostúmbre diferénteramo jepe hikuái.

Roservi rire Betel de Nigériape, roñeasigna roservi hag̃ua kómo misionéro 1987-pe pe ísla caribeña iporãitévape hérava Santa Lucía. Rovyʼaiterei ore asignasión pyahúpe, péro oĩ vaʼekue avei heta mbaʼe ijetuʼúva tekotevẽva rombohovái. Por ehémplo, Áfricape umi kuimbaʼe heta hembireko vaʼekue, ha upéva la provléma. Péro Santa Lucíape umi paréha oiko oñondive omendaʼỹre. Upéicharõ jepe, Ñandejára Ñeʼẽ oipytyvõ heta ore estudiántepe okambia hag̃ua oiko lája.

Amedída oreedave rohóvo, orekangyve ha ndaikatuvéi rojapo heta mbaʼe ymave guaréicha. Upévare pe Kuérpo Governánte imbaʼeporãiterei orendive, ha 2005-pe oreasigna roho hag̃ua pe sentrál mundiálpe oĩva Broóklynpe (Nueva York). Káda día aagradese Jehovápe akonose haguére Órispe. Haʼe omano kuri 2015-pe, ha ndaikuaái ni mbaʼéichapa aexplikáta hasyetereiha chéve upéva. Oris ningo che irũmi vaʼekue, haʼe ningo ivuenaiterei, upévare ndaikatúi voi la nderehayhúivo chupe. Umi 68 áño roiko vaʼekuépe oñondive ahayhu chupe che korasõ mbytete guive. Rohechakuaa rovyʼa añete hag̃ua ore matrimóniope ha kongregasiónpe tekotevẽha rorrespeta umi omoakãvape, roporoperdonakuaa, roñehaʼã meme oreumílde ha rohechauka umi mbaʼe porã oúva espíritu sántogui.

Rohasa vaʼekue avei umi situasión oremokangýva ha oredesepsionáva, péro péicha jave rojerure Jehovápe ikatu hag̃uáicha orepytyvõ rosegi hag̃ua roservi chupe. Haʼe siémpre oreajuda roho hag̃ua hese tenonde gotyo, ha rohechakuaa omehoraveha ohóvo entéro mbaʼe. Péro la oremokyreʼỹveha katu roikuaa heta mbaʼe iporãva oreraʼarõha gueteri (Is. 60:17; 2 Cor. 13:11).

Jehová ovendesi pe traváho ojapo vaʼekue che tuakuéra ha umi ótro ermáno Trinidad y Tobágope. Umi infórme osẽ ramovévape oñemombeʼu oĩha 9.892 persóna oñemoag̃uíva Jehová organisasiónre. Arúbape katu heta ermáno oipytyvõ imbarete hag̃ua pe primera kongregasión oñeforma vaʼekue pe paíspe ha che aservi haguépe. Koʼág̃a oĩ 14 kongregasión oprogresa meméva upe íslape. Nigériape avei ojehechakuaa la kresimiénto pórke upe tetãme oĩma 381.398 puvlikadór. Ha pe ísla de Santa Lucíape katu 783 persóna oservi Jehovápe.

Koʼág̃a areko mas de 90 áño. Salmo 92:14 heʼi umi oĩvare Jehová rógape: “Ñandejára siervokuéra ijedáramo jepe, ojoguáta umi yvyramáta osegívape hiʼa heta tiémpore. Haʼekuéra siémpre imbarete ha hogue vérde asýta”. Avyʼaiterei ikatu haguére añemeʼẽmbaite Jehová servísiope. Pe erénsia tuichaitéva arresivi vaʼekue chemokyreʼỹ aservi meme hag̃ua Jehovápe che pyʼaite guive. Haʼe cherayhueterei rupi opermiti che rekove heñói “ikorapýpe” (Sal. 92:13).