1. ¿Mbaʼépa ikatu oiko nañañatendéiramo? Emoĩ peteĩ ehémplo. (Ehecha pe taʼanga oĩva iñepyrũme.)

EÑEIMAHINAMÍNA oñepyrũmbotaitemaha pe asambléa. Pe presidénte ojupi platafórmape ha omeʼẽ la vienvenída enterovévape. Oñepyrũtama ipu pe músika ha entéro jaikuaa jaguapýma vaʼerãha ñane asiéntope. ¡Ajépa ñahendusete umi melodía iporãitéva ha umi diskúrso! Péro oĩ umi noñatendéiva pe presidénte heʼívare, ha ni noñemeʼẽi enkuénta pe músika ipumaha. Noñatendéi rupi, ndohechakuaái hikuái pe asambléa oñepyrũmaha, ha okorrénte oikóvo térã oñemongetajoa iñamigokuérandi. Ko ehémplo ohechauka porã mbaʼépa ikatu oiko ñanderehe nañañatendéiramo. Ikatu hína ndajahechakuaái ko múndo ivaipaiteha ohóvo ha oñehundi potaitemaha. Avei ñanemomanduʼa koʼẽrõite oikotaha peteĩ mbaʼe iñimportánteva, ha upearã tekotevẽ ñaime preparádo. ¿Mbaʼérehepa ñañeʼẽ hína?

2. ¿Mbaʼérepa Jesús omanda idisipulokuérape oñatende porã hag̃ua?

² Jesucristo oñeʼẽrõ guare ko múndo ára pahaitére, omanda vaʼekue idisipulokuérape: “Pejesareko meméke ha peñatende  porãke, cháke ndapeikuaái pe ára Ñandejára oiporavo vaʼekue”. Upéi Jesús heʼi jey: “Peñatende porãke peikóvo” (Mat. 24:3; elee Marcos 13:32-37). Pe lívro de Mateo ohechauka Jesús heta vése oñeʼẽ hague idisipulokuérandi ko témare. Haʼe heʼi chupekuéra: “Peñatende porãke peikóvo, cháke ndapeikuaái hína mbaʼe díapa oúta pende Ruvicha”. Upe rire heʼi avei: “Pehechaukáke pejepreparamaha, cháke peimoʼãʼỹve jave oúta pe Yvypóra Raʼy”. Ha upéi heʼi jey: “Peñatende porãke peikóvo, cháke ndapeikuaái mbaʼe día ni mbaʼe óratapa” (Mat. 24:42-44; 25:13).

3. ¿Mbaʼérepa ñañatende vaʼerã pe adverténsia Jesús omeʼẽ vaʼekuére?

³ Ñande testígo de Jehová ñañatende porã pe adverténsia Jesús omeʼẽ vaʼekuére. Upévare jaikuaa porã jaikoha umi ára pahápe ha saʼíma ofaltaha og̃uahẽ hag̃ua pe “jehasa asy guasu” (Dan. 12:4; Mat. 24:21). Jesús oprofetisa haguéicha, Jehová siervokuéra opredika ko yvy tuichakuére pe marandu porã oñeʼẽva pe Rréinore. Avei haʼe heʼi haguéicha, koʼág̃a jahecha opárupi hetaveha gérra, mbaʼasy, terremóto, ñembyahýi, ha umi hénte iñañaverei ha iviolentoveha. Hiʼarive, pe rrelihión fálsa ohesareapa ha ombotavy umi héntepe (Mat. 24:7, 11, 12, 14; Luc. 21:11). Upévare, ñande jaipotaitereíma Jesús ou ikatu hag̃uáicha okumpli Itúa volunta (Mar. 13:26, 27).

4. a) ¿Mbaʼérepa ikatu jaʼe Jesús oikuaamaha arakaʼépa oñepyrũta pe gran trivulasión? b) Ndajaikuaáiramo jepe arakaʼépa oñepyrũta pe jehasa asy guasu, ¿mbaʼépa la jaikuaa porãva?

⁴ Ñande jaikuaa jepi mbaʼe órapa oñepyrũta umi asambléa, péro ndajaikuaái arakaʼetépa oñepyrũta pe jehasa asy guasu. Jesús heʼi vaʼekue: “Upe día ha upe óra avave ndoikuaái, ni umi ánhel yvagapegua, ni pe Taʼýra. Pe Túva añoite oikuaa” (Mat. 24:36). Jesús ningo hína upe odirihítava pe Armagedón, upévare ikatu jaʼe haʼe koʼág̃a oikuaamaha arakaʼépa oñepyrũta ko gérra (Apoc. 19:11-16). Péro ñande ndajaikuaáiti mbaʼe día ni mbaʼe órapa og̃uahẽta pe fin. Upévare iñimportanteterei ñañatende porã. Jehová odesidíma arakaʼépa oñepyrũta pe gran trivulasión, ha upe día hiʼag̃uimbaitéma. La Biblia heʼi voi: “Upe día nog̃uahẽmoʼãi tárde” (elee Habacuc 2:1-3). ¿Mbaʼérepa jaʼekuaa siertoha upéva?

5. Emoĩ peteĩ ehémplo ohechaukáva Jehová siémpre okumpliha ipromésa itiempoitépe.

⁵ Umi profesía Jehová omeʼẽva siémpre oñekumpli itiempoitépe. Por ehémplo, ñapensamína pe oiko vaʼekuére el 14 de nisán áño 1513-pe a.C. Upérõ Ñandejára onohẽ vaʼekue umi israelítape Egíptogui. Tiémpo rire, Moisés oskrivi kuri: “Upe diaitépe, oñekumplívo umi 430 áño, Jehová oguenohẽ ipuévlope Egíptogui” (Éx. 12:40-42, TNM). Umi 430 áño oñepyrũ oñekonta el 14 de nisán áño 1943 a.C. guive. Upérõ oñepyrũ oñekumpli Jehová promésa heʼíva ovendesitaha Abrahán desendiéntepe (Gál. 3:17, 18). Upe rire, Jehová heʼi avei Abrahánpe: “Ne familiare ohóta oiko yvy ahénope ha oikóta chuguikuéra extranhéro. Ha umi hénte upepegua orekóta chupekuéra esklávoramo ha ombohasa asýta chupekuéra 400 áño” (Gén. 15:13, TNM; Hech. 7:6). Umi 400 áño oñepyrũ oñekonta áño 1913 a.C. guive, Ismael oñepyrũrõ guare oñembohory Isaac rehe. Ha oho hese Jehová olivera peve umi israelítape Egíptogui (Gén. 21:8-10; Gál. 4:22-29). Jahechaháicha, heta tiémpo oñekumpli mboyve Jehová heʼi vaʼekue, haʼe  odesidíma kuri mbaʼe diaitépa oliveráta ipuévlope.

6. ¿Mbaʼérepa ikatu ñaĩ segúro Jehová osalvataha ipuévlope?

⁶ Josué haʼe vaʼekue peteĩva umi israelíta osẽ vaʼekue Egíptogui. Tiémpo rire, haʼe omomanduʼa Jehová puévlope: “Peẽ peikuaa porã pende pyʼaite guive ha opa pene arandukue reheve, entéro umi promésa porãite pende Jára Jehová ojapo vaʼekue umi israelítape, oñekumplipaite hague, ni peteĩ ndopytái oñekumpliʼỹre” (Jos. 23:2, 14, TNM). Jehová opromete osalvataha isiervokuérape pe gran trivulasiónpe, ha omeʼẽtaha chupekuéra vída etérna pe múndo pyahúpe. Upéicharõ, ikatu ñaĩ segúro haʼe katuete okumplitaha ipromésa. Upévare, jaikoséramo pe múndo pyahúpe, tekotevẽterei ñaĩ alérta.

7, 8. a)  ¿Mbaʼépa ojapo yma umi guárdia, ha mbaʼépa ikatu ñaaprende iñehemplokuéragui? b) ¿Mbaʼépa ikatu oiko peteĩ guárdia opytáramo oke? Emoĩ peteĩ ehémplo.

⁷ Yma ningo umi puévlope oñemoĩ vaʼekue guárdia oñangareko hag̃ua pe siudáre. Jerusalén ha umi ótra siuda tuichavéva oreko vaʼekue murálla ijyvatetereíva ani hag̃ua oike iñenemigokuéra. Umi guárdia oñemboʼy umi murálla ári ikatu hag̃uáicha ohecha porã mombyry guive mbaʼépa oiko pe siuda jerére. Oĩ avei guárdia opytáva umi okẽme pe siuda entrádape. Enterovénte tekotevẽ vaʼekue oĩ alérta ára ha pyhare. Ha ohecha vove hikuái ouha iñenemigokuéra, oavisa vaʼerã umi hénte oikóvape pe siudápe (Is. 62:6). Umi guárdia oikuaa porã ndokéi vaʼerãha ni michĩmi, ha oñatende vaʼerãha umi mbaʼe oikóvare. Ndojapóiramo hikuái upéva, heta persóna ikatu omano (Ezeq. 33:6).

⁸ Áño 70-pe, umi soldádo romano oike Jerusalénpe. ¿Mbaʼéicha rupípa oiko upéva? Pe istoriadór Josefo heʼi umi guárdia oñenkargáva pe Tórre de Antóniare, oĩva pe murálla kóstare, opyta hague oke. Upéicha rupi, umi romano oike pe Tórrepe ha ohasa pe témplope. Upéi ohapy hikuái pe témplo ha ohundi pe siuda kompletoite. Péicha oñemohuʼã pe gran trivulasión ohasa vaʼekue umi hudío.

9. ¿Mbaʼépa ndoikuaái la majoría umi hénte?

⁹ Koʼág̃arupi, la majoría umi goviérno oreko heta soldádo ha umi sistéma de segurida imodérnova, ovihila hag̃ua umi frontéra. Péicha ojasegura ani hag̃ua mbaʼeve ni avave oapeligra pe país. Péro koʼã goviérno ndohechakuaái oĩha peteĩ goviérno ipoderosovéva yvágape, ha pe Mburuvicha haʼe hína Jesucristo. Koʼẽrõitéma Cristo goviérno oñorairõta entéro umi goviérno ko yvy arigua kóntrape (Is. 9:6, 7; 56:10; Dan. 2:44). ¡Hiʼãitéma ningo og̃uahẽ upe tiémpo! Péro tekotevẽ ñaime preparádo upe árape g̃uarã. Upévare ñande ñañatende porã hína mbaʼéichapa oñekumpli umi profesía oĩva la Bíbliape, ha jasegi jaservi porã Jehovápe (Sal. 130:6).

10, 11. a) ¿Mbaʼérepa tekotevẽ ñañatende porã? b) ¿Mbaʼérepa nde ere Satanás ombotavyha umi héntepe?

¹⁰ Ñañeimahinamína peteĩ guárdia ndokéi hague peteĩ pyhare pukukue. Katuete ningo koʼẽmbotávo ikaneʼõta ha hopehyietereíta. Péicha avei ñande jaiko ko múndo ára pahaitépe. Upévare tekotevẽ ñañatende porã ikatu hag̃uáicha ñaĩ alérta. Amáske hiʼag̃ui pe fin, ijetuʼuvéta ñañemantene hag̃ua alérta. Itristetereíta ningo koʼág̃a japytáramo jake. Jahechamína  mbohapy mbaʼe ikatúva ñanemokangy ha upeakuére nañaimevéi alérta.

¹¹ Satanás ombotavy umi héntepe. Jesús omano mboyvemi, 3 vése heʼi voi idisipulokuérape Satanás haʼeha “ko múndo ruvicha” (Juan 12:31; 14:30; 16:11). Satanás ojevale umi rrelihión fálsare ombotavy hag̃ua umi héntepe. Upévare, koʼág̃arupi heta persóna nopenái umi profesía oĩvare la Bíbliape, ohechaukáva ko múndo oñehundipotaitemaha (Sof. 1:14). Jahechaháicha, Satanás “omohesatũ” umi héntepe ani hag̃ua ontende la oikóva (2 Cor. 4:3-6). Upéicha rupi, heta oĩ nohenduséiva ñamombeʼúvo chupekuéra pe fin hiʼag̃uimaha ha Jesús ogovernamaha. Pyʼỹinte oĩ heʼíva ñandéve: “Nacheinteresái”.

12. ¿Mbaʼérepa ndajahejái vaʼerã Satanás ñanembotavy?

¹² Heta persónape ni michĩmi nointeresái umi profesía oĩva la Bíbliape. Péro ndajahejái vaʼerã upéva ñanemokangy. Ñande jaikuaa porã mbaʼérepa iñimportánte ñaĩ alérta. Apóstol Pablo heʼi vaʼekue umi ermánope: “Peẽ peikuaa porã Jehová ára ouha peteĩ mondaháicha oúva pyharekue” (elee 1 Tesalonicenses 5:1-6). Ha Jesús avei heʼi: “Akóinteke pejeprepara, cháke peteĩ óra peimoʼãʼỹve jave oúta pe Yvypóra Raʼy” (Luc. 12:39, 40). Koʼẽrõite Satanás ombotavýta umi héntepe de ótra fórma. Ogueroviakáta chupekuéra ko múndo oĩha “pyʼaguapýpe ha kyhyjeʼỹme”. Péro upeichaháguinte og̃uahẽta Jehová ára guasu. Umi hénte tuichaiterei oñemondýita. Ha ñande, ¿mbaʼéichapa ñaĩta upe moméntope? Ikatu hag̃uáicha ñaime preparádo, ndajahejái vaʼerã Satanás ñanembotavy. Upévare, jajapo vaʼerã Pablo heʼi vaʼekue: “Japyta guei japayhápe ha akóinte ñapensa hekopete”. Upearã tekotevẽ jalee la Biblia káda día ha jajepyʼamongeta umi mbaʼe Jehová heʼívare ñandéve.

13. a) ¿Mbaʼéichapa ko múndo odomina umi héntepe? b) ¿Mbaʼépa jajapo vaʼerã ani hag̃ua ko múndo ipuʼaka ñanderehe?

¹³ Umi hénte oheja ko múndo odomina chupekuéra. Koʼág̃arupi heta hénte opensa natekotevẽiha oikuaa Ñandejárape (Mat. 5:3). Upévare oñehaʼãmbaite ohupyty umi mbaʼe ko múndo oofreséva (1 Juan 2:16). Avei koʼág̃arupi oĩ  opaichagua entretenimiénto, ha umíva omokyreʼỹ umi héntepe oiko hag̃ua umi “vyʼarã rapykuéri” (2 Tim. 3:4). Koʼã mbaʼe odistrae chupekuéra, ha hesaráima iñimportanteveha oiko Ñandejára amígoramo. ¿Mbaʼépa jajapo vaʼerã ani hag̃ua ko múndo ipuʼaka ñanderehe? Pablo heʼi vaʼekue: “Ani jaiko jakalkula mbaʼéichapa jajapóta ñane rembipota vai” (Rom. 13:11-14). Jasegíramo ko konsého, katuete ñaĩta alérta.

14. ¿Mbaʼe konséhopa jajuhu Lucas 21:34, 35-pe?

¹⁴ Ñande ningo ndajaipotái ko múndo ñanedomina, síno jaipota Ñandejára espíritu ñandegia. Jehová ñanepytyvõ ijespíritu sánto rupive ñantende porã hag̃ua mbaʼépa oikóta koʼẽrõite (1 Cor. 2:12). ^[1] Péro tekotevẽ ñaĩ alérta, pórke umi mbaʼe jajapóva káda día jepe ikatu ñandedistrae, ha ndajaserviporãvéima Jehovápe (elee Lucas 21:34, 35). Ikatu oĩ heʼíva ñandevyroha ñapensa haguére ko múndo oñehundi potaitemaha (2 Ped. 3:3-7). Péro ani jaheja upéva ñanembotavy. Oĩ heta mbaʼe ohechaukáva pe fin hiʼag̃uimaha. Jaipotáramo Ñandejára espíritu ñandegia, ndajafaltái vaʼerã rreunionhápe.

15. ¿Mbaʼépa oiko Pedro, Santiago ha Juan rehe, ha mbaʼéichapa ikatu oiko avei upéva ñanderehe?

¹⁵ Umi ñande devilida ikatu ñanemokangy. Jesús oikuaa vaʼekue ñaneimperfektoha ha jarekoha devilida. Ñapensamíntena pe oiko vaʼekuére pe pyhare haʼe omano mboyve. Jesús ningo perfékto, péro oikuaa ojerure vaʼerãha Jehovápe toipytyvõmi chupe iñeʼẽrendu hag̃ua ipahaite peve. Jesús ojerure Pedro, Santiago ha Juánpe oĩ hag̃ua alérta haʼe oñemboʼe aja. Péro haʼekuéra ndohechakuaái iñimportanteha oñatende porã upe moméntope. ¿Mbaʼépa oiko hesekuéra upévare? Haʼekuéra ikaneʼõiterei, ha opyta oke. Jesús avei ikaneʼõ kuri, péro oñehaʼãmbaite ani hag̃ua oke ha oñemboʼe Itúape. Umi apóstol avei ojapo vaʼerã kuri upéicha (Mar. 14:32-41).

16. Heʼiháicha Lucas 21:36, ¿mbaʼépa jajapo vaʼerã ñaĩ hag̃ua alérta?

¹⁶ ¿Mbaʼépa ñanepytyvõta ñaĩ hag̃ua alérta ha preparádo og̃uahẽ vove Jehová ára? Jajapose vaʼerã ñande pyʼaite guive pe oĩ porãva. Péro ndahaʼéi upévante. Por ehémplo, unos kuánto día Jesús omano mboyve, heʼi vaʼekue idisipulokuérape osegi vaʼerãha ojerure Jehovápe toipytyvõ chupekuéra (elee Lucas 21:36). Upéicharõ, ikatu hag̃uáicha ñande avei ñaĩ alérta koʼã ára pahápe, tekotevẽ ñañemboʼe meme (1 Ped. 4:7).

17. ¿Mbaʼépa jajapo vaʼerã ikatu hag̃uáicha ñaime preparádo og̃uahẽ vove pe fin?

¹⁷ Jesús heʼi vaʼekue idisipulokuérape: “Peimoʼãʼỹve jave oúta pe Yvypóra Raʼy” (Mat. 24:44). Upévare ñaĩ vaʼerã preparádo. Koʼýte koʼã tiémpope ndajaikói vaʼerã jaheka umi mbaʼe ko múndo oikuaveʼẽva. Ko múndo ningo ogueroviaukase ñandéve umi mbaʼe oofreséva ñanembovyʼataha, péro upéva japu hína. Jehová ha Jesús heʼi mbaʼépa jajapo vaʼerã ñaĩ hag̃ua alérta. Upévare, ñañatendékena umi profesía oĩvare la Bíbliape ha ñañatende mbaʼéichapa oñekumpli. Jasegíkena ñañemoag̃ui Jehováre ha ñamotenonde meme Irréino. Péichamante ñaimétama preparádo og̃uahẽ vove pe fin (Apoc. 22:20). Aníkena ñanderesarái, ñande rekove odepende hína upévare.