1. a) ¿Mbaʼépa odesidi vaʼerã umi mitãrusu ha mitãkuña? b) ¿Mbaʼépa ikatu oipytyvõ chupekuéra ani hag̃ua ojepyʼapyeterei? (Ehecha pe taʼanga oĩva iñepyrũme).

OIMÉRAMO nde peteĩ mitãrusu térã mitãkuña, katuete reikuaa iñimportanteha replanea porã reviaha mboyve peteĩ lugárpe. Nde rekove ningo ikatu rekompara pe viáhere, ha ne huventu haʼe pe moménto replanea hag̃ua mbaʼépa rejapóta. Añetehápe heta vése ijetuʼu rejapo hag̃ua upéva. Peteĩ ermána hérava Heather heʼi: “Apensávo adesidi vaʼerãha mbaʼépa ajapóta amo gotyove, akyhyjeterei”. Oiméramo nde reñeñandu avei upéicha, iporã nemanduʼa Jehová heʼívare: “Ani rekyhyje pórke che aĩ nde ykére. Che ningo nde Jára, upévare ani rejepyʼapy. Che romombaretéta ha roipytyvõta” (Is. 41:10, TNM).

2. ¿Mbaʼéichapa ikatu reñemeʼẽ enkuénta Jehová oipotaha revyʼa?

² Jehová nemokyreʼỹ repensa porã hag̃ua mbaʼépa rejapóta nde rekovépe (Ecl. 12:1; Mat. 6:20). Haʼe ningo oipota revyʼa. ¿Mbaʼérepa jaʼe upéva? Rehecha, rehendu térã retantea jave umi mbaʼe okrea vaʼekue, reñemeʼẽta enkuénta upeichaha. Haʼe avei oñangareko ñanderehe heta hendáicha. Por ehémplo, omeʼẽ ñandéve heta konsého ha ñanemboʼe mbaʼépa jajapo vaʼerã javyʼa hag̃ua. Péro Jehová ndoguerohorýi umi persóna omboykévape ikonsého. Haʼe heʼi entéro umi nohenduséivape chupe: “Peẽ pedesidi pejapo la chéve ndachegustáiva”.  Ha heʼi avei: “Che siervokuéra ovyʼáta, peẽ katu peñemotĩta. Che siervokuéra osapukáita vyʼágui, pórke oñeñandu porãitereíta” (Is. 65:12-14, TNM). Añetehápe jadesidi porã jave, ñambotuicha hína Jehovápe (Prov. 27:11).

3. ¿Mbaʼépa Jehová oipota rejapo?

³ ¿Mbaʼépa Jehová oipota rejapo? Revyʼaséramo, tekotevẽ reikuaa Ñandejárape ha reservi chupe. Upearã voi haʼe ñandeapo vaʼekue (Sal. 128:1; Mat. 5:3). Umi animál ningo okaru ha ifamília, ha péicha haʼekuéra oĩ porãma. Péro Jehová ñandeapo ikatu hag̃uáicha javyʼa a medída jaikuaa ha jaservi chupe. Haʼe oipota nde repensa porã mbaʼépa rejapóta ikatu hag̃uáicha revyʼa ha isentído ndéve la nde rekove. La Biblia heʼi ñande Apohare haʼeha “Ñandejára oporohayhúva” ha “ovyʼáva”, ha avei ojapo hague yvyporakuérape “ijoguaháramo” (2 Cor. 13:11; 1 Tim. 1:11; Gén. 1:27, TNM). Nde katuete revyʼáta resegíramo ñande Ru ñanderayhuetéva ehémplo. Iñeʼẽme heʼi avei: “Javyʼaiteve ñameʼẽvo, ñandéve oñemeʼẽ rangue” (Hech. 20:35). ¿Revyʼámapa rejapo rupi ko téxto heʼíva? Oiméne katuete rehechakuaáma upeichaha, pórke péva siertoite hína. Upéicharõ, Jehová oipota rehechauka rehayhuha chupe ha nde rapichakuérape opa mbaʼe redesidívare (elee Mateo 22:36-39).

4, 5. ¿Mbaʼépa ombovyʼa vaʼekue Jesúspe?

⁴ Jesús ningo omoĩ pe ehémplo iporãvéva. Haʼe imitãrõ guare katuete oime vaʼerã ohuga ha ojediverti. La Biblia heʼi voi oĩha “tiémpo japuka hag̃ua” ha “tiémpo jajeroky hag̃ua” (Ecl. 3:4, TNM). Péro Jesús ostudia vaʼekue avei Ñandejára Ñeʼẽ, ha upéva oipytyvõ chupe oñemoag̃uive hag̃ua Itúare. Haʼe orekórõ guare 12 áño, umi omboʼéva pe Léi pe témplope, “ohecharamo mbaʼeichaitépa ombohovaikuaa ha ontende heta mbaʼe” (Luc. 2:42, 46, 47).

⁵ Jesús okakuaapa riréma jepe osegi ojapo Ñandejára rembipota, ha upéva ombovyʼa chupe. Por ehémplo, Itúa oipota vaʼekue haʼe omombeʼu umi “marandu porã imboriahúvape” ha opredika umi “ohechaʼỹva ohecha jeytaha” (Luc. 4:18). Salmo 40:8 omombeʼu mbaʼéichapa Jesús oñeñandu: “Ñandejára, avyʼaiterei ajapo haguére ne rembipota” (TNM). Jesús ovyʼaiterei vaʼekue omboʼévo umi héntepe mbaʼeichagua persónapa Itúa (elee Lucas 10:21). Peteĩ jey, omboʼe rire peteĩ kuñáme mbaʼéichapa oadora vaʼerã Ñandejárape, heʼi idisipulokuérape: “Che rembiʼu hína kóva: Ajapo upe chembou vaʼekue rembipota, ha amog̃uahẽ huʼãme pe tembiapo omeʼẽ vaʼekue chéve ajapo hag̃ua” (Juan 4:31-34). Jesús ovyʼa pórke ohechauka ohayhuha Ñandejárape ha yvyporakuérape. Nde avei rejapóramo upéva katuete revyʼáta.

6. ¿Mbaʼérepa iporãitereíta reñeʼẽramo umi mbaʼe rejaposévare peteĩ ermáno iñakãguapývandi?

⁶ Heta ermáno oñepyrũ oservi kómo prekursór imitã guive, ha upéva ombovyʼa chupekuéra. ¿Ikatúpa reñemongeta hendivekuéra umi mbaʼe rejaposévare? Proverbios 15:22 heʼi: “Ndaiporihápe oguapýva oñemongeta porã mbaʼeve nosẽporãi, péro oĩramo omeʼẽva konsého porã ojehupyty heta mbaʼe” (TNM). Koʼã ermáno ha ermána provávlemente heʼíta pe prekursorádo nemboʼetaha heta mbaʼe ideprovéchotava ndéve tóda la vída. Jesús oaprende vaʼekue heta mbaʼe Itúagui oĩ aja hendive yvágape. Upéi, oĩ aja ko yvy ape ári haʼe osegi oaprende. Jesús ovyʼa vaʼekue pórke opredika pe marandu porã ha ifiél, ohasáramo jepe heta mbaʼe ijetuʼúva (elee Isaías 50:4; Heb. 5:8; 12:2). Jahechamína mbaʼérepa pe servísio de tiémpo kompléto ikatu nembovyʼa.

7. ¿Mbaʼérepa heta mitãrusu ha mitãkuña ovyʼaiterei omboʼe jave Ñandejára Ñeʼẽ ótrope?

⁷ Jesús heʼi vaʼekue: “Tapeho pemboʼe umi hénte opa tetãyguápe oiko hag̃ua chuguikuéra che disípulo” (Mat. 28:19, 20). Oiméramo nde rejapose upéva, revyʼaitereíta pórke  remombaʼeguasúta Ñandejárape. Epensamína, ikatu hag̃uáicha ñanevakeáno peteĩ ofísiope ningo oraha tiémpo, upéicha avei amáske japredika ñandekatupyryvéta jahávo. Peteĩ ermáno hérava Timoteo oñepyrũ vaʼekue oservi kómo prekursór orekórõ guare 19 áño. Haʼe heʼi: “Chegustaiterei ningo ikatu haguére aservi Jehovápe de tiémpo kompléto, upéicha ahechauka ahayhuha chupe. Primerorã ndaikatúi kuri amoñepyrũ ni peteĩ estúdio bíblico, péro upéi ava ótro lugárpe ha un mes mboyve astudiáma heta persónandi. Peteĩ che estudiánte oñepyrũ oho rreunionhápe. Upe rire, aha dos mésere Eskuéla Vívlika umi Kuimbaʼe Soltérope G̃uarã, ha opávo pe eskuéla arresivi peteĩ asignasión pyahu. Upe lugárpe añepyrũ astudia 4 persónandi. * Avyʼaiterei ikatu haguére amboʼe umi héntepe pórke ahecha mbaʼéichapa Ñandejára espíritu oipytyvõ chupekuéra okambia hag̃ua” (1 Tes. 2:19).

8. ¿Mbaʼépa ojapo heta mitãrusu ha mitãkuña opredika hag̃ua hetave persónape?

⁸ Oĩ avei mitãrusu ha mitãkuña oaprendéva ótro idióma. Por ehémplo peteĩ ermáno hérava Jacob, oikóva Estados Unídospe oskrivi: “Arekórõ guare 7 áño, oĩ vaʼekue heta che kompañéro eskuélape haʼéva vietnamita. Che katu añeʼẽse chupekuéra Jehováre, upémarõ tiémpo riremi añepyrũ astudia iñidiomakuéra. Heta mbaʼe aaprende akompara rupi rrevísta Ñemañaha inglespegua ha pe ojejapóva idióma vietnamítape. Avei akonsegi unos kuánto che amigorã peteĩ kongregasión idióma vietnamítape hiʼag̃uíva ógagui. Akumpli rire 18 áño, añepyrũ aservi kómo prekursór. Upéi, aha Eskuéla Vívlika umi Kuimbaʼe Soltérope G̃uarãme. Ko eskuéla cheprepara ikatu hag̃uáicha akumpli porã che asignasión kómo prekursór. Pe grúpo vietnamita aservihápe, cheañoite aĩ kómo ansiáno. Heta persóna oñeʼẽvape ko idióma omokyreʼỹeterei ohechávo aaprende hague iñidiomakuéra. Haʼekuéra cheinvita jepi hógape, ha péicha jave añepyrũ jepi astudia la Biblia hendivekuéra. Oĩ voi ijapytepekuéra ojevautisámava” (embojoja Hechos 2:7, 8 heʼívare).

9. ¿Mbaʼépa nde avei ikatu reaprende rembostudiávo la Biblia nde rapichápe?

⁹ Remboʼe jave la Biblia nde rapichakuérape, nde avei reaprende heta mbaʼe porã. Por ehémplo, reaprende ikatu hag̃uáicha nerresponsávle nde traváhope, erekuaa hag̃ua la repensáva, rejeroviave hag̃ua ndejehe ha retrata porã hag̃ua nde rapichápe (Prov. 21:5; 2 Tim. 2:24). Restudiávo la Biblia umi héntendi, revyʼaiterei avei pórke ndekatupyryve redefende hag̃ua umi mbaʼe regueroviáva. Avei, reaprende rehóvo rembaʼapo porãve hag̃ua Jehová ykére (1 Cor. 3:9).

10. ¿Mbaʼérepa lomímonte ikatu javyʼa ndaiporiguasúirõ jepe ostudiaséva ñande territóriope?

¹⁰ Oiméramo jepe jaiko peteĩ lugár hasyhápe jatopa umi hénte ostudiaséva la Biblia, lomímonte ikatu javyʼa. ¿Mbaʼérepa jaʼe upéva? Pórke entéronte ñambaʼapo oñondivepa kongregasiónpe. Peteĩ ermánonte jepe otopárõ peteĩ persóna ostudiaséva la Biblia javyʼaitereínte avei, pórke enterovéva ñaipytyvõ hína ojetopa hag̃ua koʼãichagua persónape. Por ehémplo, peteĩ ermáno hérava Brandon oservi vaʼekue kómo prekursór 9 áñore peteĩ lugár saʼihápe umi hénte ostudiaséva. Haʼe heʼi: “Avyʼaiterei apredika jave pórke upéva la ojeruréva ñandéve Jehová. Añepyrũ vaʼekue che prekursorádo amohuʼãvo che koléhio. Añeñandu porãiterei ikatu rupi amokyreʼỹ kongregasiónpe umi imitãvape, ha avyʼa ahechávo oprogresaha hikuái. Aha rire Eskuéla Vívlika umi Kuimbaʼe Soltérope G̃uarãme, arresivi peteĩ asignasión pyahu. Añetehápe koʼag̃aite peve ndatopái gueteri che territóriope ni peteĩ persóna oprogresáva ojevautisa peve. Péro oĩ ermáno oipytyvõmava iñestudiántepe ojevautisa hag̃ua. Chepyʼarory ikatu haguére aservi de tiémpo kompléto ha aipytyvõ umi héntepe oikuaa hag̃ua Ñandejárape” (Ecl. 11:6).

11. ¿Mbaʼépa ombovyʼaiterei avei heta ermáno imitãvape?

¹¹ Oĩ ningo hetaiterei mbaʼe ikatúva rejapo reservi hag̃ua Jehovápe. Por ehémplo, heta ermáno ha ermána imitãva ombaʼapo kómo voluntário konstruksiónpe. Tekotevẽ ningo oñemopuʼã hetaiterei Salón del Reino. Ko tembiapo omombaʼeguasu Jehovápe, ha nde revyʼaitereíta ikatúramo reipytyvõ. Avei revyʼáta ikatu haguére rembaʼapo ne ermanokuérandi. Rembaʼapóramo pe konstruksiónpe reaprendéta heta mbaʼe, por ehémplo rembaʼapo hag̃ua rejapeligraʼỹre, ndekatupyry ha nerresponsávle hag̃ua, ha reapoja hag̃ua umi omoakãvape pe tembiapo.

12. ¿Mbaʼe oportunidápa ikatu oñepresenta oikóramo ndehegui prekursór?

¹² Peteĩ ermáno hérava Kevin heʼi: “Chemitã guive aservise vaʼekue de tiémpo kompléto Jehovápe. Arekórõ guare 19 áño, ajapo che prekursorádo, ha ikatu hag̃uáicha añemantene, ambaʼapo konstruksiónpe peteĩ ermánondi. Upéicha rupi aaprende atecha, akoloka ventána ha okẽ. Upéi ambaʼapo 2 áñore umi lugár oiko haguépe urakán, ikatu hag̃uáicha oñemopuʼã jey umi Salón del Reino ha ermanokuéra róga. Upe rire ahendu oñekotevẽha Sudáfricape umi ombaʼapokuaávare konstruksiónpe. Upémarõ ajapo che solisitu ha añeinvita. Áfricape, ambaʼapo unas kuánta semána peteĩ lugár oñemopuʼãhápe Salón ha upéi aha ótro lugár ojejapohápe avei upéva. Enterove ermáno rombaʼapóva konstruksiónpe roiko peteĩ famíliaicha, pórke roime oñondivepa, rostudia la Biblia oñondive ha rombaʼapo oñondive. Igustoiterei avei chéve apredika jave káda semána umi ermáno uperupiguándi. Chemitãme hiʼãiterei vaʼekue chéve ajapo koʼã mbaʼe, ha koʼág̃a katu naimoʼãi peichaite peve avyʼaha.

13. ¿Mbaʼérepa heta mitãrusu ha mitãkuña ovyʼa oservívo Betélpe?

 ¹³ Heta ermáno ñepyrũrã oservíva kómo prekursór, koʼág̃a oĩ Betélpe. Umi ermáno oservíva Betélpe ningo ovyʼaiterei, pórke entéro mbaʼe ojejapóva upépe ojejapo Jehovápe g̃uarã. Pe família Betel oipytyvõ ikatu hag̃uáicha og̃uahẽ ñandéve Biblia ha puvlikasionkuéra omombaretéva ñande jerovia. Peteĩ betelita hérava Dustin heʼi: “Arekórõ guare 9 áño apensáma vaʼekue aserviseha de tiémpo kompléto. Upéi, amohuʼã rire che koléhio añepyrũ che prekursorádo. Un áño imédio upe rire, añeinvita aservi hag̃ua Betélpe. Upépe aaprende amaneha umi mákina oimprimíva puvlikasión ha avei aprograma hag̃ua komputadóra. Betélpe raẽvete ningo ojekuaa umi notísia oñeʼẽva pe progréso oĩvare opárupi, ha upéva haʼe peteĩ priviléhio chegustaitereíva. Avyʼa pórke pe traváho rojapóva upépe oipytyvõ umi héntepe oñemoag̃uive hag̃ua Jehováre”.

14. ¿Mbaʼéichapa ikatu rejeprepara reservi hag̃ua de tiémpo kompléto?

¹⁴ ¿Mbaʼéichapa ikatu rejeprepara reservi hag̃ua de tiémpo kompléto? Upearã reñehaʼã vaʼerã remombarete nde jerovia. Iporãta restudia meméramo Ñandejára Ñeʼẽ, ejepyʼamongeta porã hese ha eñehaʼãmbaite ekomenta rreunionhápe. Reĩ aja koléhiope reaprovechakuaa ndekatupyryve hag̃ua remombeʼúvo nde rapichakuérape pe marandu porã. Upearã ehechauka eñeinteresaha ótrore. Por ehémplo, eñehaʼã eikekuaa nde rapichakuérape reporandu jave mbaʼépa opensa hikuái peteĩ témare, ha upéi ejapysaka porã orresponde jave ndéve. Avei ikatu rejeofrese rembaʼapo hag̃ua kongregasiónpe, por ehémplo remopotĩ ha remyatyrõ hag̃ua Salón del Reino. Jehová ojevalese voi umi iñumílde ha ikyreʼỹvare oipytyvõ hag̃ua (elee Salmo 110:3; Hech. 6:1-3). Apóstol Pablo oinvita vaʼekue Timotéope oservi hag̃ua kómo misionéro, pórke umi ermáno “oñeʼẽ porãiterei hese” (Hech. 16:1-5).

15. ¿Mbaʼépa nepytyvõta reñemantene hag̃ua rejapo aja pe servísio de tiémpo kompléto?

¹⁵ Heta ermáno oservíva de tiémpo kompléto ombaʼapo ikatu hag̃uáicha oñemantene (Hech. 18:2, 3). Ha nde, ¿mbaʼépa ikatu rejapo? Restudiakuaa peteĩ ofísio nepytyvõtava reñemantene hag̃ua rejapo aja nde prekursorádo pe lugár reikohápe. Avei ikatu reñemongeta superintendénte de sirkuíto ha umi prekursór ndive umi mbaʼe replaneávare, ha ejerure chupekuéra konsého. La Biblia heʼi: “Emoĩ Jehová pópe entéro mbaʼe rejapóva, ha opa mbaʼe replaneáva osẽ porãta ndéve” (Prov. 16:3, TNM; 20:18).

16. ¿Mbaʼéichapa nepytyvõta reservíramo de tiémpo kompléto nemitã guive?

¹⁶ Jehová oipota osẽ porã ndéve opa mbaʼe rejapóva (elee 1 Timoteo 6:18, 19). Reservíramo de tiémpo kompléto rehasavéta tiémpo umi ótro ermáno ojapóvandi avei upéva, ha nepytyvõta neakãguapyve hag̃ua rehóvo. Péro ndahaʼéi voi upévante, reservírõ de tiémpo kompléto nemitã aja, nepytyvõta osẽ porã hag̃ua ne matrimónio remenda vove. Heta vése umi oservíva kómo prekursór omenda mboyve, osegi iprekursorádo hembireko térã iménandi (Rom. 16:3, 4).

17, 18. ¿Mbaʼépa rejapo vaʼerã Jehová omeʼẽ hag̃ua ndéve umi mbaʼe reipotáva nde pyʼaite guive?

¹⁷ Salmo 20:4 heʼi: “Ñandejára tomeʼẽ ndéve umi mbaʼe reipotáva nde pyʼaite guive, ha haʼe rupive tosẽ porã ndéve opa mbaʼe rejaposéva” (TNM). Repensa jave umi mbaʼe rejaposévare tenondeve, rekalkula vaʼerã mbaʼépa hína añetehápe la rehupytyséva. Epensa avei mbaʼépa Jehová ojapo hína ñane tiémpope ha mbaʼépa ikatu rejapo reservi porã hag̃ua chupe. Upéi, eplanea porã mbaʼéichapa rejapóta Jehová oguerohorýva.

¹⁸ Revyʼaitereíta reipurúramo nde rekove reservi hag̃ua Jehovápe, pórke péicha remombaʼeguasúta chupe. La Biblia heʼi voi: “Evyʼa nde pyʼaite guive rejapóvo Jehová heʼíva, ha haʼe katuete omeʼẽta ndéve umi mbaʼe reipotáva nde pyʼaite guive” (Sal. 37:4, TNM).