JESÚS omboʼérõ guare idisipulokuérape mbaʼéichapa opredika vaʼerã pe marandu porã, heʼi avei kuri nameméi umi hénte ohendusetaha pe mensáhe (Luc. 10:3, 5, 6). Péicha oiko avei koʼág̃arupi. Sapyʼánte umi persóna iñeʼẽ arhél ñandéve térã ikatu voi iviolénto. Oiko jave upéva, ijetuʼu jaiporiahuvereko ha japredikase hag̃ua chupekuéra.

Peteĩ persóna oporombyasykuaáva ohecha la hapicha nesesida ha umi provléma ohasáva. Upévare oiporiahuvereko ha oipytyvõse chupekuéra. Péro, ¿mbaʼépa oikóta ndajaiporiahuverekóiramo umi hénte japredikávape? Ikatu hína jaju ndajapredikasevéi. Upéva heʼise ikatuha nañanekyreʼỹvéi ha péicha hasýta ñaipytyvõ hag̃ua ñande rapichápe. Pe ánimo jarekóva predikasiónpe ikatu ñambojoja pe tatáre. Ani hag̃ua ogue la tata tekotevẽ ñahatapyña. Upéicha avei, jasegi hag̃ua ñanekyreʼỹ predikasiónpe iñimportanteterei japoroporiahuvereko (1 Tes. 5:19).

¿Mbaʼépa ikatu ñanepytyvõ jaiporiahuverekove hag̃ua ñande rapichápe sapyʼánte ijetuʼúramo jepe? Jahechamína umi ehémplo porãite ohejáva ñandéve Jehová, Jesús ha apóstol Pablo.

Hetaiterei tiémporema ojeʼe heta japu ha mbaʼe vai Jehováre. Péro haʼe osegi imbaʼeporã “umi imalagradesído ha iñañávandi” (Luc. 6:35). ¿Mbaʼéichapa Jehová ohechauka imbaʼeporãha? Haʼe ningo ipasiénsia enterovére. Ñandejára oipota “opaichagua tapicha” ojesalva (1 Tim. 2:3, 4). Oiméramo jepe ombojeguaru chupe umi mbaʼe vai ojejapóva, haʼe omombaʼeterei yvyporakuérape ha ndoipotái avave oñehundi (2 Ped. 3:9).

Jehová oikuaa Satanás ivaletereiha ogueroviaka hag̃ua la héntepe umi mbaʼe ndasiértoiva (2 Cor. 4:3, 4). Hetápe ningo imichĩete guive oñemboʼe vaʼekue heta japu Ñandejáragui. Upéicha rupi koʼã persóna opensáva ha oñandúva noipytyvõi chupekuéra oaprende hag̃ua pe añetegua. Péro Jehová oajudaseterei umi héntepe. ¿Mbaʼérepa jaʼe upéva?

Ñapensamína mbaʼépa Jehová oñandu vaʼekue umi hénte oiko vaʼekuére pe siuda de Nínivepe. Koʼã persóna ningo iviolénto vaʼekue, péro Jehová heʼi Jonáspe: “¿Mbaʼéicha piko che nambyasymoʼãi Nínivepe, pe siuda tuichaitéva, oĩháme mas de 120.000 persóna nodiferensiakuaáiva iporãva ivaívagui?” (Jon. 4:11). Jehová ombyasy vaʼekue umi ninivítape pórke haʼekuéra ndoikuaái chupe. Upévare omondo Jonáspe omeʼẽ hag̃ua chupekuéra peteĩ mensáhe.

Ñande avei ñañehaʼã ñapensa Jehová opensaháicha. Enterove persóna ningo iñimportánte chupe g̃uarã. Upévare ñañehaʼã jajapo ikatúva guive umi persóna oaprende hag̃ua Jehovágui, oimérõ jepe heta vése ndoaseptaséi hikuái pe añetegua.

Umi hénte ndorresiviporãi jave ñande mensáhe iporãta ñañehaʼãramo ñantende mbaʼérepa ojapo hikuái upéicha. Ikatu oime ndoguerohorýi la  Biblia ni umi kristiánope pórke ohecha umi heʼíva ijehe kristianoha ojapoha mbaʼe vai. Térã ikatu ohendu hikuái heta japu ojeʼéva ñanderehe. Sapyʼánte ikatu avei okyhyje ihénte térã ivesíno oñembohorýrõ g̃uarã hesekuéra ñanerendu haguére.

Sapyʼánte umi persóna jatopáva ñande territóriope ohasa vaʼekue heta mbaʼe ivaietereíva ha oafektáva chupekuéra. Peteĩ misionéra hérava Kim heʼi heta hénte oĩva iterritóriope osufri hague peteĩ gérra káusare ha operdepaite la orekomíva. Upévare haʼekuéra nohaʼarõi mbaʼeve iporãva. Haʼekuéra oñandu ndaikatuiha okambia la isituasión ha nokonfiái avavére. Avei heta vése ijapytepekuéra oĩ umi ojokoséva Testigokuérape ani hag̃ua opredika. Peteĩ vuéltape, ojeataka voi kuri Kímpe predikasiónpe.

¿Mbaʼépa ojapo Kim osegi hag̃ua ombyasy hapichápe sapyʼánte ojetrata vaíramo jepe chupe? Haʼe oñehaʼã siémpre imanduʼa Proverbios 19:11 heʼívare: “Pe persóna iñentendídova ndaipochyreíri, haʼe ombohasánte umi mbaʼe vai ojejapóva hese”. Kim oñehaʼã opensa umi mbaʼe ohasa vaʼekuére umi persóna ha upéva oipytyvõ chupe oiporiahuvereko hag̃ua umi héntepe. Péro ndahaʼéi entéro persóna oĩva iterritóriope la ijarhélva. Upe lugárpe Kim otopa avei heta rrevisíta porã.

Ikatu ningo ñañeporandu: “Che ndaikuaáirire pe añetegua, ¿mbaʼéichapa arreaksionáta umi Testígo oúramo opredikase chéve?”. Por ehémplo, ikatu hína ñahendúma kuri heta japu ojeʼéva Testigokuérare. Oiméramo péicha katuete ñarreaksiona vaiséta, ha tekotevẽta avei umi ótro ipasiénsia ha ñandeporiahuvereko. Jesús heʼi vaʼekue entéro mbaʼe jaipotáva ñande rapichakuéra ojapo ñanderehehápe, ñande jajapo vaʼerã avei hesehapekuéra. Upévare iporãitereíta ñañehaʼãramo ñapensa mbaʼéichapa umi ótro oñeñandu, ha ñanepasiénsia hesekuéra sapyʼánte ijetuʼúramo jepe (Mat. 7:12).

Apóstol Pablo ohechauka vaʼekue oiporiahuverekoha umi héntepe, oĩramo jepe oatakáva chupe opredika haguére. ¿Mbaʼérepa? Pórke imanduʼa mbaʼeichagua persónapa rakaʼe haʼe ymave. Pablo heʼi vaʼekue: “Che ataky vaʼekue Ñandejárare, apersegi ipuévlope ha akopi hesekuéra. Péro che ndaikuaáiguinte ajapo ha ndajeroviái rupi, upévare Cristo cheporiahuvereko” (1 Tim. 1:13). Pablo oikuaa Jehová ha Jesús oiporiahuverekoiterei hague chupe. Haʼe ontende porã umi hénte ojokosévape ipredikasión, pórke haʼe upéicha guare kuri.

Sapyʼánte Pablo otopa avei umi persóna oroviaitereíva umi enseñánsa japu. ¿Mbaʼépa ojapómi umícha jave? Hechos 17:16 heʼi peteĩ vuéltape oĩ aja Aténaspe ipochyeterei hague “ohechávo upe siuda henyhẽha umi ñandejára guaʼu raʼangágui”.  Péro upéi haʼe oñeʼẽ umi hénte upepeguápe umi ñandejára guaʼúgui, omboʼe hag̃ua chupekuéra (Hech. 17:22, 23). Haʼe okambia la opredika lája pórke oñeʼẽ diferénte kláse de persónape. Pablo oñehaʼãmbaite vaʼekue osalva “mbovymi jepe ijapyteguikuéra” (1 Cor. 9:20-23).

Jatopa jave umi persóna orreaksiona vaíva pe mensáhere térã ogueroviáva peteĩ mbaʼe nomboʼéiva la Biblia, iporã jasegi Pablo ehémplo. Jaaprovecha vaʼerã ha jaipuru umi mbaʼe jaikuaáva umi héntegui ñamombeʼu hag̃ua chupekuéra “oĩha álgo iporãvéva” (Is. 52:7). Peteĩ ermána hérava Dorothy heʼi: “Ore territóriope, heta persónape oñemboʼe Ñandejára ñandekastiga vaietereiha. Upévare ñepyrũrã afelisita chupekuéra ojerovia haguére Ñandejárare. Upéi ahechauka chupekuéra la Biblia rupive mbaʼeichaitépa Jehová ñanderayhu ha mbaʼépa opromete ñandéve g̃uarã amo gotyove”.

Ñañehaʼã vaʼerã avei ñamokyreʼỹ umi ermáno ha ermána osẽvape ñanendive predikasiónpe. Jessica heʼi mbaʼépa ojapo jepi oñemombeʼu jave predikasiónpe noñeñatendéi porã hague hesekuéra. Haʼe oñehaʼã omombyky umi komentário nomokyreʼỹmoʼãiva avavépe. Upéva rangue, oñeʼẽ umi téma oporomokyreʼỹtavare. Por ehémplo, ojehupytyha heta mbaʼe porã predikasiónpe sapyʼánte oĩramo jepe umi orreaksiona vaíva.

Jehová oikuaa porã sapyʼánte ijetuʼuha ñandéve japredika hag̃ua. Péro ovyʼaiterei ñañehaʼãramo jaiporiahuvereko ñande rapichápe haʼe ojapoháicha (Luc. 6:36). Upéicharõ jepe, Jehová ndosegimoʼãi oiporiahuvereko ha ipasiénsia umi héntere opa árare. Ndajadudái vaʼerã Ñandejára oikuaa porãha mbaʼe moméntopepa og̃uahẽta pe fin. Upe aja, ndajaperdéi vaʼerã tiémpo ha jasegi japredika (2 Tim. 4:2). Upévare, jasegíkena japredika kyreʼỹ ha jaiporiahuvereko ñande pyʼaite guive opaichagua tapichápe.