LA Bíbliape jatopa mbaʼéichapa oñeñandu vaʼekue heta persóna ‘ñandeichaguánteva avei’ (Sant. 5:17). Por ehémplo, ikatu ñantende mbaʼéichapa apóstol Pablo oñeñandu vaʼekue heʼírõ guare: “Ajapose jave iporãva, pe ivaíva oĩ chendive. [...] ¡Aichejáranga che!” (Rom. 7:21-24). Ñañorairõ jave ñane imperfeksión kóntrape, tuichaiterei ñanekonsola jaikuaávo Pablo, ifiélramo jepe, oñeñandu hague avei upéicha.

Pablo omombeʼu vaʼekue avei mbaʼéichapa oñeñandu. Gálatas 2:20-pe haʼe heʼi porã vaʼekue: “Cristo [...] ningo cherayhu ha oñemeʼẽ cherehehápe”. ¿Ndépa reñandu avei Cristo nderayhuha ha omano hague nderehehápe? Sapyʼánte oiméne nahániri.

Oiméramo ñande ñañeñandu vaieterei gueteri jafalla haguére yma Jehová kóntrape, sapyʼánte ikatu ñapensa haʼe nañanderayhuiha ha nañaneperdonaiha. Ikatu voi ijetuʼu ñandéve jahecha hag̃ua Jesús sakrifísio haʼeha peteĩ rregálo ñandéve g̃uarã. ¿Añetehápe piko Jesús oipota rakaʼe jahecha pe isakrifísio peteĩ rregáloramo? ¿Mbaʼépa ikatu ñanepytyvõ jahecha hag̃ua upéicha? Ñambohovaimína koʼã mokõi porandu.

Jesús ningo oipota vaʼekue jahecha isakrifísio peteĩ rregáloramo ñandéve g̃uarã. ¿Mbaʼérepa ikatu jaʼe upeichaha? Ñañeimahinamína umi mbaʼe oñemombeʼúva Lucas 23:39-43-pe. Jesús ykére ningo oĩ vaʼekue peteĩ kuimbaʼe ojeklaváva avei yvyráre. Pe kuimbaʼe orrekonose vaʼekue ojapo hague heta mbaʼe ivaíva. Ha katuete oiméne ivaieterei raʼe umi mbaʼe ojapo vaʼekue, pórke yma péicha ojekastiga umi kriminál hembiapo vaietereívape. Ko kuimbaʼe añetehápe ombyasyeterei la isituasión ha ojerure asy Jesúspe: “Nemanduʼákena cherehe reike vove ne Rréinope”.

¿Mbaʼépa ombohovái raʼe chupe Jesús? Ñañeimahinamína mbaʼeichaitépa oiméne Jesús osufri hína kuri, upéicharõ jepe oñehaʼãmbaite ojere omaña hese. Jesús ohasa asyetereíramo jepe, oñehaʼã opukavy pe kuimbaʼépe ha ombopyʼaguapy chupe, heʼívo: “Añetehápe haʼe ndéve koestedía: Reiméta chendive pe hardín neporãvape”. Jesús ikatúnte kuri omomanduʼa pe kuimbaʼépe “pe Yvypóra Raʼy” ou hague “omeʼẽ hekove, opaga ha oguenohẽ hag̃ua hetápe pekádo poguýgui” (Mat. 20:28). Péro upéva rangue, Jesús ohechauka pe kuimbaʼépe mbaʼéichapa pe isakrifísio oipytyvõta chupe personálmente. Ha upéva ojekuaa porãvéntema heʼírõ guare chupe mborayhúpe: “Reiméta chendive”. Jesús heʼírõ guare chupe oikotaha peteĩ paraísope ko yvy ape ári, omyesakã avei upe kuimbaʼépe ikatuha ohupyty peteĩ mbaʼe iporãitereíva pe rreskáte rupive.

Añetehápe ningo Jesús oipota vaʼekue pe kuimbaʼe ontende ideprovechotaha avei chupe pe sakrifísio ojapótava. Ñapensamíntena: Upe kriminál ningo ndorekói vaʼekue oportunida oservi hag̃ua Ñandejárape. Upéicharõ jepe, Jesús oipota vaʼekue pe kuimbaʼe ontende haʼe omanotaha avei hesehápe. Jesús ningo oipota vaʼekue peteĩ kriminál ontende upéva, upéicharõ koʼytevéntema oipotáta ontende upéva peteĩ kristiáno ojevautisámava ha oservíva hína Ñandejárape. Upéicharõ, ¿mbaʼépa ñanepytyvõta jaguerovia hag̃ua Cristo sakrifísio ideprovechotaha avei ñandéve personálmente, oiméramo jepe yma japeka raʼe?

Jesús omeʼẽ vaʼekue Páblope pe asignasión opredika hag̃ua, upéicha rupi Pablo ohechakuaa Jesús omano hague avei hesehápe. Haʼe omombeʼu: “Aagradeseterei ñande Ruvicha Cristo Jesúspe, haʼe omeʼẽ chéve podér ha ojerovia rupi cherehe oheja che kárgope ajapo hag̃ua peteĩ tembiapo. Yma che ataky vaʼekue Ñandejárare, apersegi ipuévlope ha akopi hesekuéra” (1 Tim. 1:12-14). Jesús omeʼẽ vaʼekue Páblope ko asignasión oikuaárõ jepe haʼe ojapo hague hetaiterei mbaʼe vai. Upéva oasegura Páblope Jesús oiporiahuvereko ha ohayhuha chupe, ha avei okonfiaha hese. Jesús ningo omeʼẽ avei ñandéve, káda únope, pe asignasión japredika hag̃ua umi notísia porã (Mat. 28:19, 20). ¿Ñanepytyvõpa ko asignasión jahechakuaa hag̃ua Jesús omano hague avei ñanderehehápe?

Albert ningo oĩ vaʼekue expulsádo 34 áñore, ha ndaʼareguasúi ou jey Jehová organisasiónpe. Haʼe omombeʼu: “Che ningo ndaikatúi aipeʼa che akãgui umi mbaʼe vai ajapo vaʼekue. Péro aĩ jave predikasiónpe añeñandu apóstol Pábloicha, ha ahechakuaa Jesús omeʼẽ hague chéve pe asignasión apredika hag̃ua. Upéva chembovyʼaiterei ha chepytyvõ chepositivove hag̃ua, ha ani hag̃ua apensa vai chejehe, che rekovére ha che renonderãre” (Sal. 51:3).

Oikuaa mboyve Jehovápe, Allan iviolénto vaʼekue ha ojapo hetaiterei mbaʼe vai. Haʼe heʼi: “Koʼag̃aite peve apensa mbaʼeichaite pevépa aperhudika vaʼekue che rapichakuérape. Sapyʼánte upéva chemoñeñandu vaieterei ha añedeprimi. Péro aagradese Jehovápe opermiti haguére cheichagua pekadórpe oikuaauka ótrope umi notísia porã. Ahecha jave umi hénte ovyʼaitereiha oikuaávo umi notísia porã, upéva chemomanduʼa mbaʼeichaitépa Jehová imbaʼeporã ha oporohayhu. Añandu haʼe ojevaleha cherehe oipytyvõ hag̃ua umi ojapo vaʼekuépe avei heta mbaʼe vai”.

Ñaime jave predikasiónpe, ñande jajapo hína álgo iporãva ha ñapensa avei umi mbaʼe iporãvare. Upéva ohechauka ñandéve Jesús ñandeporiahuvereko, ñanderayhu ha okonfiaha ñanderehe.

Jaiko aja Satanás múndo añáme, ikatu hína jasegi ñañeñandu vai umi pekádo yma guarére. ¿Mbaʼépa ikatu ñanepytyvõ anive hag̃ua ñañeñandu upéicha?

Jean ningo imitãme ojeporta porã vaʼekue hógape ha Salónpe, péro ótro lugárpe ojapo heta mbaʼe noĩporãiva. Haʼe oñeñandu jepi kulpávle umi mbaʼe ojapo vaʼekuére, péro heʼi: “Avyʼaiterei aikuaa haguére ‘Ñandejára tuichaveha ñane korasõgui’” (1 Juan 3:19, 20). Ñandéve avei tuichaiterei ikatu ñanekonsola jaikuaávo Jehová ha Jesús ontendeha ñande haʼeha pekadór. Upévare iporãta ñanemanduʼa haʼekuéra mborayhúpe omeʼẽ hague pe rreskáte, ndahaʼéi umi yvypóra perféktova rehehápe, síno umi pekadór oñarrepentíva rehehápe (1 Tim. 1:15).

¿Mbaʼépa upéicharõ ñanepytyvõta ñaime hag̃ua segúro Jesús omano hague ñanderehehápe voi? Jajepyʼamongeta vaʼerã mbaʼéichapa Jesús otrata vaʼekue umi yvypóra imperféktope, ha ñañehaʼãmbaite ñakumpli porã pe asignasión Jesús omeʼẽva ñandéve japredika hag̃ua. Upéicha jajapóramo, ñande avei ikatúta jaʼe apóstol Pablo heʼi haguéicha: Jesús “ningo cherayhu ha oñemeʼẽ cherehehápe”.