1. ¿Mbaʼe konséhopa jatopa Filipenses 2:3-pe, ha mbaʼépa jahupytýta jajapóramo upépe heʼíva?

ÑANDE ningo ñaneumíldegui ñaneñeʼẽrendu Jehovápe, pórke jahechakuaa haʼe siémpre oikuaaha mbaʼépa iporãve ñandéve g̃uarã (Efes. 4:22-24). Ñaneumílderamo ñapensáta Jehová oipotáva iñimportanteveha ñande jaipotávagui, ha umi ótro ñande rapicha iñimportanteveha ñandehegui. Upéicha rupi jareko peteĩ amista iporãva Jehovándi, ha jajogueraha porã ñane ermanokuéra kongregasionpeguándi (elee Filipenses 2:3).

2. a) ¿Mbaʼépa apóstol Pablo ohechakuaa vaʼekue? b) ¿Mbaʼépa jahecháta ko artíkulope?

² Ko múndope umi hénte ijorgullóso ha opensa ijehénte, * ha nañañatendéiramo ikatu hína ova ñanderehe upéva. Amalisia umi kristiáno ypykuére ováma vaʼekue, upévare apóstol Pablo oskrivi vaʼekue umi rrománope: “Ajerure peẽme anive hag̃ua pepensa peneimportantetereiha. Iporãramo jepe ñapensa porã ñandejehe ndovaléi jahasa la rrája” (Rom. 12:3). Pablo ohechakuaa vaʼekue tekotevẽha ñapensa porã ñandejehe, upéicharõ jepe ñaneumílderamo ndajaikomoʼãi ñapensa ñaneimportantetereiha ha ndajahasamoʼãi la rrája. Ko artíkulope jahecháta mbohapy situasión tekotevẽhápe ñaneumílde ani hag̃ua jaiko ñapensaiterei ñandejehe. Umíva hína: 1) Ñane matrimóniope, 2) jarekóramo priviléhio kongregasiónpe, ha 3) jaipurúvo umi rred sosiál.

3. ¿Mbaʼérepa oreko jepi provléma umi omendáva, ha mbaʼéichapa opensa algúno osolusionataha umíva?

³ Jehová ningo oipota pe ména ha tembireko ovyʼa oñondive, péro mokõivéva iñimperfékto rupi sapyʼánte ojoavyʼimíta hikuái. Apóstol Pablo oskrivi vaʼekue voi umi omendáva orekotaha jepi provléma (1 Cor. 7:28). Oĩ umi oikóva oñorairõhárente voi, ha upévare opensa hikuái nomendái vaʼerãha voi kuri ojuehe. Ha oiméramo ováma raʼe hesekuéra ko múndo opensa lája, oimoʼãta ojedivorsiáramo añoite osolusionataha hikuái iprovlemakuéra. Opensáta hikuái ijehénte ha ikuentaveha ojedivorsia oiko hag̃ua vyʼápe.

4. ¿Mbaʼépa ndovaléi ñapensa térã jajapo?

⁴ Nañapensái vaʼerã ñane matrimónio osẽ vaíma hague. Jaikuaa la Biblia opermitiha pe divórsio peteĩva hekovaíramo añoite (Mat. 5:32). Upévare ñaneprovléma jave ñane matrimóniope, ndovaléi ñandeorgullóso ha ñapensa: “Haʼe ningo nopenái voi cherehe”. “Haʼe ndacherayhúi hína che amereseháicha”. “Chéverõ g̃uarã avyʼavéta ótra persónandi”. Ñapensáramo péicha, ñapensa hína ñandejehénte, ha nañapensái hína ñane ména térã ñane rembirekóre. Ko múndope umi iñarandúva heʼi ñandéve jajapónte hag̃ua ñane korasõ oipotáva, ha umi mbaʼe ñandévente ñanembovyʼátava, tekotevẽtaramo jepe jajedivorsia upearã. Péro Ñandejára heʼi ñandéve: “Ani pejepyʼapy umi mbaʼe peẽme okonvenívarente, síno pejepyʼapy vaʼerã avei umi ótrore” (Filip. 2:4). Jehová oipota ñanerakateʼỹ ha ñañehaʼã ñane matrimóniore, ha ndoipotái jajedivorsia (Mat. 19:6). Jehová oipota ñapensa primero hese, ha upéi ae ñandejehe.

5. Heʼiháicha Efesios 5:33, ¿mbaʼéichapa ojotrata vaʼerã umi ména ha tembireko?

⁵ Pe ména ha tembireko ojoayhu ha ojorrespeta vaʼerã (elee Efesios 5:33). La Biblia  ñanemokyreʼỹ ñameʼẽ hag̃ua, ñandéve oñemeʼẽ rangue (Hech. 20:35). ¿Mbaʼe kualidápa oipytyvõta umi omendávape ojoayhu ha ojorrespeta hag̃ua? Iñumílde vaʼerã hikuái. Pe ména ha tembireko iñumíldeva ‘ndojapomoʼãi umi mbaʼe chupénte ideprovéchotava, síno pe ou porãtava pe ótra persónape’ (1 Cor. 10:24).

6. ¿Mbaʼépa ñaaprende heʼi vaʼekuégui Steven ha Stephanie?

⁶ Iñumílde rupi, heta matrimónio oservíva Jehovápe ovyʼave oñondive. Por ehémplo, peteĩ ména hérava Steven heʼi: “Ñambaʼapo vaʼerã oñondive peteĩ ekípoicha, koʼýte jareko jave provléma. Ñapensa rangue: ‘¿Mbaʼépa okonvenive chéve?’, iporãve ñapensa: ‘¿Mbaʼépa iporãve oréve g̃uarã?’”. Ha hembireko Stephanie opensa avei upéicha. Haʼe heʼi: “Avave ningo ndoikoséi peteĩ persóna manterei oiko vaívandi”. Ha heʼive: “Ore rojoavy jave roñehaʼã rohecha mbaʼépa omoñepyrũ raʼe upe provléma. Upéi roñemboʼe, roinvestiga ha roñeʼẽ mbaʼéichapa ikatu rosolusiona pe provléma. Roñehaʼã roataka pe provléma, ha ndahaʼéi ojupe”. Ména ha tembireko ningo ovyʼavéta nopensáiramo haʼe iñimportanteveha hembiayhúgui.

7. ¿Mbaʼépa ojapo vaʼerã peteĩ ermáno oñemeʼẽramo chupe peteĩ priviléhio Jehová organisasiónpe?

⁷ Ñandéve g̃uarã peteĩ priviléhio ñameʼẽ Jehovápe pe iporãvéva (Sal. 27:4; 84:10). Jaguerohoryeterei ningo peteĩ ermáno ojaposéramo hetave mbaʼe Jehová organisasiónpe. La Biblia heʼi voi: “Peteĩ kuimbaʼe oñehaʼãmbaitéramo oservi ansiánoramo, ojapose hína peteĩ mbaʼe iporãva” (1 Tim. 3:1). Péro haʼe orresivi vove peteĩ asignasión nopensái vaʼerã koʼág̃a iñimportanteveha (Luc. 17:7-10). Upéva rangue haʼe oñehaʼã oservi ótrope umíldemente (2 Cor. 12:15).

8. ¿Mbaʼépa ñaaprende Diótrefes, Uzías ha Absalón ehémplogui?

⁸ La Biblia oñeʼẽ umi ehémplo vai oheja vaʼekuére umi persóna opensáva ijehe iñimportantetereiha. Diótrefes oñemombaʼeguasu vaʼekue ha oipota pe primer lugár kongregasiónpe (3 Juan 9). Uzías ijorgullóso vaʼekue ha ojaposemoʼã peteĩ mbaʼe Jehová noasignáiva chupe ojapo hag̃ua (2 Crón. 26:16-21). Absalón oipota vaʼekue oiko chugui rréi. Upévare oñehaʼã ojehayhuka la héntepe ikatu hag̃uáicha oapoja chupe (2 Sam. 15:2-6). Koʼã mbaʼe oñemombeʼúva la Bíbliape ohechauka ñandéve Jehová ndoguerohoryiha umi persóna oñembotuichasévape (Prov. 25:27). Mbeguekatúpe pe oñemombaʼeguasúva ha oipotáva umi ótro oguerohory chupe, opa vaíta katuete (Prov. 16:18).

9. ¿Mbaʼe ehémplopa Jesús oheja vaʼekue ñandéve?

⁹ Jesús ndojoguái vaʼekue koʼã kuimbaʼe ijorgullosoitévape. La Biblia heʼi voi Jesús rehe: “Haʼe ningo haʼéramo jepe Ñandejáraicha, núnka nopensái vaʼekue oipeʼávo chugui ilugár oñembojojávo hese” (Filip. 2:6). Jesús nopensái ijehe iñimportantetereiha, jepe Jehová añoite ipoderosove chugui. Haʼe heʼi vaʼekue idisipulokuérape: “Pe ohechaukáva iñumildeha pende apytépe, upéva hína la iñimportantevéva” (Luc. 9:48). Ajépa peteĩ vendisión jaservi umi prekursorkuérandi, siérvo ministeriál, ansiáno ha superintendénte de sirkuíto iñumíldevandi Jesús iñumílde haguéicha. Ñande ñaneumílderamo koʼýte jahayhuvéta ñande rapichakuérape, ha Jesús heʼi vaʼekue upéva ohechaukataha ñande haʼeha kristiáno tee (Juan 13:35).

10. ¿Mbaʼépa jajapo vaʼerã ñapensáramo umi ansianokuéra noñatendeporãiha umi provléma oĩvare kongregasiónpe?

¹⁰ ¿Mbaʼépa jajapo vaʼerã oĩramo provléma kongregasiónpe, ha ñapensa umi ansianokuéra noñatendeporãiha hína upe situasiónre? Jajeplagea  rangue ikatu jahechauka ñaneumildeha jaapojávo umi ansianokuérape (Heb. 13:17). Upearã ikatu ñañeporandu: “¿Añetehápe piko tuichaiterei hína umi provléma? Ha tekotevẽramo oñesolusiona, ¿koʼág̃apa hína pe moménto ojejapo hag̃ua upéva? ¿Che piko areko hína pe rresponsavilida asolusionávo umíva? ¿Añehaʼã piko hína oĩve hag̃ua unida kongregasiónpe, térãpa añemoimportantesénte hína?”.

11. Heʼiháicha Efesios 4:2, 3, ¿mbaʼéichapa ou porãta kongregasiónpe ñaneumílderamo?

¹¹ Jehovápe g̃uarã iñimportanteve ñaneumílde ñandevaleterei rangue. Ha haʼe omombaʼeve ñaiméramo en unida, jajapo rangue hetaiterei mbaʼe. Upévare jajapókena opa ikatúva ñaneumílde hag̃ua jaservívo Jehovápe. Jajapóramo upéicha ñaipytyvõta oĩ hag̃ua unida kongregasiónpe (elee Efesios 4:2, 3). Japredikákena ikatumiháicha entéro. Jahechákena mbaʼéichapa ikatu ñanembaʼeporã ñande rapichakuérandi ha péicha jaservi chupekuéra. Ñainvitákena ermanokuérape ñande rógape, umíva apytépe umi ndorekóivape rresponsavilida kongregasiónpe (Mat. 6:1-4; Luc. 14:12-14). Jasegíramo ñaneumílde ha ñambaʼapo kongregasiónpe, umi ermáno ohechakuaáta ñandevaleha, péro iñimportanteveha ohechakuaáta hikuái ñaneumildeha.

12. ¿La Biblia piko ñanemokyreʼỹ jareko hag̃ua amígo? Emyesakã.

¹² Jehová oipota javyʼa ñane amigokuérandi ha ñane famíliandi (Sal. 133:1). Jesús oreko vaʼekue heta amígo (Juan 15:15). La Biblia omombeʼu mbaʼéichapa ñanevenefisia jarekóramo umi amígo añetetéva (Prov. 17:17; 18:24).  Ha heʼi avei ñandéve naiporãiha ñañemohaʼeño (Prov. 18:1). Heta oĩ opensáva umi rred sosiál rupive ikatuha jareko heta amígo, ha péicha nañaimemoʼãiha ñaneaño. Péro tekotevẽ ñañatende porã jaipuru jave umi rred sosiál.

13. ¿Mbaʼérepa sapyʼánte umi oipurúva rred sosiál oñeñandu haʼeño ha oñedeprimi?

¹³ Umi investigasión ojejapóvape ojehechakuaa umi persóna oipurúva heta tiémpo ohecha hag̃ua umi komentário ha fóto ojehupíva umi rred sosiálpe, amo ipahápe ikatuha oñeñandu haʼeño ha oñedeprimi. ¿Mbaʼérepa? Ikatu hína pórke umi hénte pyʼỹinte ohupi umi fóto ohechaukáva umi mbaʼe iñimportánteva ohasáva hekovépe, ohechauka umi fóto iporãvévante osẽháme haʼekuéra, iñamigokuéra, ha umi lugár porã porã oho haguépe hikuái. Peteĩ persóna ohecháva koʼã fóto ikatu oñekompara ha opensa hekovépe ndohasaiha voi mbaʼeve iñinteresánteva ha ijavurridoha. Peteĩ ermána orekóva 19 áño heʼi: “Añepyrũ cheenvidiósa ahechávo mbaʼéichapa umi ótro ovyʼa fin de semanakue, ha che katu che rógape aime rei ha ndavyʼái hína”.

14. ¿Mbaʼéichapa 1 Pedro 3:8 heʼíva ñanepytyvõ jaipuru porã hag̃ua umi rred sosiál?

¹⁴ Ikatu ningo jaipuru porã umi rred sosiál, por ehémplo, ñañekomunika hag̃ua ñane hentekuéra ha ñane amigokuérandi. Péro, ¿jahechámavapa oĩha umi hénte omoĩva ikomentário, ifóto ha vidéo umi rred sosiálpe, oipotágui ótro ohecharamo chupekuéra? Haʼetévaicha haʼekuéra oikóva ollamasénte voi la atensión. Oĩ voi umi ijarhél ha ijurutieʼỹva okomenta jave ifóto térã umi ótro ohupi vaʼekue. Péro umi ojapóva upéicha naiñumíldei ha noñemoĩri hapichakuéra lugárpe, kristianokuérape oñemokyreʼỹháicha ojapo hag̃ua (elee 1 Pedro 3:8).

15. ¿Mbaʼéichapa la Biblia ñanepytyvõ ani hag̃ua ñañemoimportantese?

¹⁵ Jaipurúramo umi rred sosiál, iporãta ñañeporandu: “¿Ótropa opensáta chejejapoha ohechávo umi komentário, fóto térã vidéo ahupíva? ¿Cheenvidiátapa umi ohecháva umi mbaʼe ahupíva?”. La Biblia heʼi: “Umi mbaʼe vai ojaposéva ñande rete imperfékto ha umi mbaʼe ñanderesatiráva ha jaiko jajechaukase umi mbaʼe jarekóvare, umi mbaʼe ndoúi pe Túagui,  síno ou pe múndogui” (1 Juan 2:16). Peteĩ Biblia otradusi hag̃ua pe fráse “jaiko jajechaukase umi mbaʼe jarekóvare” heʼi “jaiko ñañemoimportantese”. Ñande kristianokuéra ningo ndajaikoséi voi ñañemoimportánte, ha ndajaipotái umi ótro ñanemombaʼeguasu. Ñande jasegi ko konsého oĩva la Bíbliape ha heʼíva: “Aníkena jaiko ñakompeti ótrondi ni ñaneenvidióso, péicha nañañembotuichamoʼãi” (Gál. 5:26). Ñande ñaneumílderamo ndajajoguasemoʼãi umi hénte ko mundopeguápe ijorgullóso ha oipotávape umi ótro opensa hese iñimportantetereiha.

16. ¿Mbaʼérepa ndovaléi ñandeorgullóso?

¹⁶ Tekotevẽ ningo ñañehaʼã ñaneumílde, pórke umi oñemombaʼeguasúva ‘ohasáma hína la rrája’ (Rom. 12:3). Umi ijorgullósova ningo oiko vaise ha oñembotuichase. Haʼekuéra opensáva ha ojapóva pyʼỹinte olastima chupekuéra voi ha avei umi ótrope. Haʼekuéra nokambiáiramo opensa lája, Satanás omohesatũta chupekuéra ha omoingéta iñakãmekuéra umi mbaʼe naiporãiva (2 Cor. 4:4; 11:3). Péro peteĩ persóna iñumíldeva ndohasái la rrája. Haʼe opensa hekópe porãnte ijehe ohechakuaágui heta mbaʼépe umi ótro tuichaveha chugui (Filip. 2:3). Ha haʼe oikuaa ‘Ñandejára oñemoĩha umi ijorgullósovare, péro imbaʼeporãiterei umi iñumíldevandi’ (1 Ped. 5:5). Umi opensa porãva ijehe ha ndohasáiva la rrája ndorekoséi Jehovápe iñenemígoramo.

17. ¿Mbaʼépa jajapo vaʼerã jasegi hag̃ua ñaneumílde?

¹⁷ Jasegi hag̃ua ñaneumílde, jasegi vaʼerã ko konsého oĩva la Bíbliape: “Peipeʼaite vaʼerã pendejehegui peteĩ aóicha pene kondúkta yma guare, ha umi mbaʼe pejapo vaʼekue yma, ha pemonde pendejehe peteĩ aóicha pe kondúkta pyahu”. Upearã ñañehaʼãmbaite vaʼerã. Tekotevẽ jastudia Jesús rekovekue ha jajapo ikatúva guive jasegi hag̃ua iñehémplo (Col. 3:9, 10; 1 Ped. 2:21). Jajapóramo upéicha jahupytýta hetaiterei mbaʼe porã. Ñañehaʼãramo ñaneumílde, javyʼavéta ñande rogapýpe, ñaipytyvõta oĩ hag̃ua unida kongregasiónpe ha ndajaipuruvaimoʼãi umi rred sosiál. Ha iñimportanteveha katu Jehová ñanevendesíta ha ñandeguerohorýta.