1. ¿Mbaʼépa ñandéve ñanembovyʼa, heʼiháicha 3 Juan 3, 4?

APÓSTOL Juan ningo oipytyvõ vaʼekue heta persónape oiko hag̃ua pe añetegua rapére. Epensamíntena mbaʼeichaitépa ovyʼáne rakaʼe oikuaárõ guare haʼekuéra osegiha oservi fiélmente Jehovápe. Haʼekuéra ombohovái vaʼekue heta provléma, ha Juan ombaʼapo jejopy omombarete hag̃ua koʼã kristiáno ifiélva jerovia, pórke chupe g̃uarã koʼãva haʼe vaʼekue itaʼýraicha. Ñande javyʼaiterei avei jahechávo ñane família térã umi ñaipytyvõ vaʼekue oiko hag̃ua pe añetegua rapére, oñemeʼẽha Jehovápe ha osegiha oservi chupe (elee 3 Juan 3, 4).

2. ¿Maʼerãpa Juan oskrivi vaʼekue umi kárta?

² Áño 98-pe Juan oiméne oiko rakaʼe Éfesope, térã ag̃ui upégui. Haʼe oiméne ova rakaʼe upépe osẽ rire pe ísla Pátmosgui, oĩ haguépe préso. Upe tiémporupi, espíritu sánto rupive Jehová oskrivika chupe mbohapy kárta. Umi kárta omokyreʼỹ vaʼerã kuri umi kristiáno ifiélvape osegi hag̃ua ojerovia Jesús rehe, ha osegi hag̃ua oiko pe añetegua rapére.

3. ¿Mbaʼe porandúpa ñambohováita ko artíkulope?

³ Upe tiémpope ningo Juan añoiténtema osegi vaʼekue oikove umi apostolkuéra apytégui. Haʼe oñekevranta vaʼekue umi mboʼehára japu oafekta vaíma haguére umi kongregasiónpe (1 Juan 2:18, 19, 26). * Umi apóstata heʼi vaʼekue oikuaaha Ñandejárape, péro naiñeʼẽrendúi Jehová mandamientokuérape. Ko artíkulope jahecháta umi konsého Juan omeʼẽ vaʼekue ha ñambohováita mbohapy porandu: ¿Mbaʼépa heʼise jaikoha pe añetegua rapére? ¿Mbaʼépa ikatu ñandejoko anive hag̃ua jajapo upéva? ¿Ha mbaʼéichapa ikatu ñañopytyvõ jasegi hag̃ua jaiko pe añetegua rapére?

4. Heʼiháicha 1 Juan 2:3-6 ha 2 Juan 4, 6, ¿mbaʼépa tekotevẽ jajapo jaiko hag̃ua pe añetegua rapére?

⁴ Jaiko hag̃ua pe añetegua rapére tekotevẽ jaikuaa pe añetegua oĩva la Bíbliape, ha avei tekotevẽ ‘ñakumpli Jehová mandamientokuéra’ (elee 1 Juan 2:3-6; 2 Juan 4, 6). Jesús iñeʼẽrendu vaʼekue Jehovápe, ha oheja ñandéve pe ehémplo iporãvéva. Upévare ñaneñeʼẽrendu hag̃ua Jehovápe iñimportanteterei jajapo opa ikatúva jasegi hag̃ua Jesús ehémplo (Juan 8:29; 1 Ped. 2:21).

5. ¿Mbaʼe rehepa ñaĩ vaʼerã segúro?

⁵ Jasegi hag̃ua jaiko pe añetegua rapére ñaĩ vaʼerã segúro Jehová siémpre heʼiha pe añetegua, ha entéro mbaʼe heʼíva Iñeʼẽ la Biblia haʼeha pe añetegua. Avei ñaĩ vaʼerã segúro Jesús haʼeha pe Mesías oñepromete vaʼekue. Koʼág̃arupi, heta hénte ndogueroviapái Jesúspe ojeporavo hague haʼe hag̃ua pe Rréi Ñandejára Rréinope. Juan oavisa vaʼekue oĩ hague “heta oporombotavýva” ikatúva ogueraha vai umi noĩrivape preparádo odefende hag̃ua la Biblia heʼíva Jehová ha Jesús rehe (2 Juan 7-11). Juan oskrivi vaʼekue: “¿Máva piko pe ijapúva? ¿Ndahaʼéi piko upe onegáva Jesús haʼeha pe Cristo?” (1 Juan 2:22). Ani hag̃ua ñanembotavy hikuái, jastudiámante vaʼerã la Biblia. Upéicharõ añoite ikatúta jaikuaa Jehová ha Jesúspe (Juan 17:3). Ha upéichamante ñaiméta segúro pe jagueroviáva haʼeha pe añetegua.

6. ¿Mbaʼépa ikatu ojoko umi kristianokuéra imitãvape anive hag̃ua oiko pe añetegua rapére?

⁶ Entéro kristiáno ñañatende vaʼerã ani hag̃ua ñanembotavy umi filosofía térã umi idéa oñemboʼéva ko múndope (1 Juan 2:26). Koʼýte ningo umi kristiáno imitãva oñatende vaʼerã ani hag̃ua hoʼa ko ñuhãme. Alexia, * peteĩ ermána francesa orekóva 25 áño heʼi: “Chemitãvérõ guare chemboduda vaʼekue umi mbaʼe omboʼéva ko múndo, por ehémplo pe evolusión ha umi filosofía, ha sapyʼánte añepyrũma aguerovia lénto umíva. Péro upéi añemoĩ apensa naiporãmoʼãiha amboykénteramo la Biblia omboʼéva, ha aguerovia opa mbaʼe che profesorkuéra heʼíva”. Alexia ostudia pe lívro La vida... ¿cómo se presentó aquí? ¿Por evolución, o por creación?, ha unas kuánta semána haguépe ndodudavéima la Biblia omboʼévagui. Haʼe heʼi: “Chete voi akomprova la Biblia heʼíva haʼeha pe añetegua, ha ahechakuaa ajapóramo upépe heʼíva aikotaha vyʼápe ha trankílo porã”.

7. ¿Mbaʼépa ñañatende vaʼerã ani hag̃ua jajapo, ha mbaʼérepa?

 ⁷ Enterove kristiáno, tahaʼe imitãva térã ijedáva, ñañatende vaʼerã ani jaiko jaservi guaʼu Jehovápe ha avei jajapo ivaíva. Juan omyesakã porã vaʼekue ñande ndaikatuiha jaiko pe añetegua rapére ha ñanderekovai avei jaikóvo (1 Juan 1:6). Ñande jaipotáramo Ñandejára ñandeguerohory, koʼág̃ama voi ha amo gotyove, tekotevẽ ñañekomporta siémpre oñemañambarõguáicha ñanderehe. Péro umi hénte ndohecháiramo jepe umi mbaʼe ñande jajapóva ñemiháme, Jehová si ohechapaite entéro mbaʼe jajapóva (Heb. 4:13).

8. ¿Mbaʼépa ñande jarrechasaite vaʼerã?

⁸ Ñande jarrechasaite vaʼerã mbaʼéichapa ko múndo ohecha pe pekádo. Apóstol Juan oskrivi vaʼekue: “Ñande jaʼéramo: ‘Ndajarekói ningo pekádo’, upéicharõ ñande ñañembotavy ñandejupe voi” (1 Juan 1:8). Juan tiémpope, umi apóstata heʼi vaʼekue peteĩ persóna ikatuha trankílamente opeka ha osegi oreko Ñandejárape iñamígoramo. Koʼág̃arupi umi hénte oikóva ñande jerére opensa avei upéicha. Heta oĩ heʼíva ojeroviaha Ñandejárare, péro ndoaseptái la Jehová heʼíva pe pekádore. Ha koʼýte ndogustái chupekuéra Jehová heʼíva umi rrelasión sexuál rehe. Umi mbaʼe Jehová heʼívare pekadoha, haʼekuéra heʼi peteĩ persóna gustonteha, térã ikatunteha odesidi oiko upéicha.

9. ¿Mbaʼéichapa ou porãta umi imitãvape ojapóramo la Biblia heʼíva?

⁹ Koʼýte umi kristiáno imitãvape oiméne ijetuʼueterei osegi hag̃ua ohecha hendápe porã umi rrelasión sexuál, pórke ikompañerokuéra de traváho térã kolehiopegua, oñehaʼã okonvense chupekuéra opensa hag̃ua haʼekuéraicha. Upéva oiko vaʼekue peteĩ ermáno héravare Aleksander. Haʼe heʼi: “Koléhiope umi mitãkuña chepersegi vaʼekue areko hag̃ua hendivekuéra rrelasión sexuál. Péro arrechasa rupi chupekuéra, heʼi cherehe che haʼéne hag̃ua peteĩ omosexuál”. Oiméramo nde rehasa avei peichagua situasión, nemanduʼa vaʼerã oĩ porãtaha rejapóramo  la Biblia heʼíva. Rejapóramo upéicha, reñeñandu porãta, neresãita, reprotehéta umi mbaʼe reñandúva, ha esegíta ereko Jehovápe ne amígoramo. Amáske reaguanta ha ndereʼái umi ñuhãme, ifasilvétama ndéve rejapo iporãva. Nemanduʼa vaʼerã avei oĩ vaiha ko múndo ohecha lája umi rrelasión sexuál, ha ouha Satanásgui. Upévare, ndereaseptái jave repensa ko múndope oñepensaháicha, ‘ndepuʼaka hína Satanás rehe’ (1 Juan 2:14).

10. ¿Mbaʼéichapa 1 Juan 1:9 ñanepytyvõ jaservi hag̃ua Jehovápe konsiénsia potĩ reheve?

¹⁰ Ñande ñarrekonose Jehová orekoha derécho heʼívo mbaʼe mbaʼépa hína pekádo, ha ñañehaʼãmbaite ani hag̃ua jajapo umichagua mbaʼe vai. Péro japeka jave, ñañemboʼe Jehovápe ha ñamombeʼu chupe mbaʼépepa jafalla raʼe (elee 1 Juan 1:9). Ha oimérõ japeka vai raʼe, jajerure vaʼerã umi ansiánope tañanepytyvõ, pórke Jehová onombra vaʼekue chupekuéra oñangareko hag̃ua ñanderehe (Sant. 5:14-16). Péro ndovaléi ningo jasegi ñañeñandu kulpávle umi mbaʼe vai jajapo vaʼekuére yma, pórke ñande Túa ñanderayhuetéva omeʼẽ vaʼekue Itaʼýra sakrifísioramo, ñanderreskata ha operdona hag̃ua ñandéve ñande pekadokuéra. Jehová heʼíramo operdonataha umi pekadór oñarrepentívape, haʼe añetehápe ojapo upéva. Upévare mbaʼeve ndaikatúi ñandejoko jaservi hag̃ua Jehovápe konsiénsia potĩ reheve (1 Juan 2:1, 2, 12; 3:19, 20).

11. ¿Mbaʼéichapa ikatu jajeprotehe ani hag̃ua omokangy ñande jerovia umi japu oñemboʼéva?

¹¹ Ñande jarrechasaite vaʼerã umi apóstata omboʼéva. Oñepyrũ guive pe kongregasión kristiána, pe Diablo ojevale umi oporombotavývare omboduda hag̃ua Ñandejára siervokuéra ifiélvape. Upévare tekotevẽ ñadiferensiakuaa mbaʼépa siérto ha mbaʼépa japu. * Ñane enemigokuéra ikatu oipuru Internet ha umi rred sosiál, omokangy hag̃ua ñande jerovia Jehováre, ha anive hag̃ua jahayhu ñane ermanokuérape.  Aníkena núnka jaguerovia umi japu, umíva ningo ou Satanásgui (1 Juan 4:1, 6; Apoc. 12:9).

12. ¿Mbaʼérepa ñamombarete vaʼerã ñande jerovia umi mbaʼe jagueroviáva rehe?

¹² Ndajaipotáiramo Satanás ipuʼaka ñanderehe, tekotevẽta ñamombareteve ñande jerovia Jesús rehe ha mbaʼéichapa Ñandejára ojevale hese okumpli hag̃ua hembipota. Tekotevẽ avei jajerovia ‘pe esklávo de konfiánsa ha iñarandúvare’, ha jajerovia Jehová ojevaleha hesekuéra añoite odirihi hag̃ua iñorganisasión (Mat. 24:45-47). Ñamombarete hag̃ua ñande jerovia, jastudia vaʼerã la Biblia kontinuadoite, péicha ñande jerovia ojoguáta peteĩ yvyramáta hapo pypukúvape. Pablo heʼi vaʼekue avei upéicha oskrivírõ guare umi colosénsepe: “Peẽ pejeroviáma haguére ñande Ruvicha Cristo Jesús rehe, pesegíkena peiko haʼe oiko haguéicha. Ha peaprende haguéicha, pende jerovia Crístore penemombarete ha penepytyvõ vaʼerã pejepytaso mbarete hag̃ua peteĩ yvyramáta hapo pypukúvaicha” (Col. 2:6, 7). Ñañehaʼãmbaitéramo ñamombarete ñande jerovia, Satanás ha umi oapojáva chupe, ni mbaʼevéicharõ ndaikatumoʼãi ñandejoko anive hag̃ua jaiko pe añetegua rapére (2 Juan 8, 9).

13. ¿Mbaʼépa ñande ñahaʼarõnte vaʼerã voi?

¹³ Ñande ñahaʼarõnte vaʼerã voi ko múndo ndaijaʼéi ñanderehe (1 Juan 3:13). Juan ñanemomanduʼa ‘ko múndo kompletoite oĩha pe aña poguýpe’ (1 Juan 5:19). Amás día hiʼag̃uive ko múndo oñehundi hag̃ua, upévare Satanás orrenegaitereive oikóvo (Apoc. 12:12). Haʼe ningo ndahaʼéi ojevalénteva pe tekovaíre, térã umi apóstatare ñanemoñuhã hag̃ua. Haʼe oipuru avei umi persekusión imbaretetereíva ñandeataka hag̃ua derechoite. Satanás oikuaa saʼipaitemaha pe tiémpo hembýva chupe, ha ojapo hína opa ikatúva ojoko hag̃ua pe predikasión ha ohundi hag̃ua ñande jerovia. Upévare nañanesorprendéi ojeproivi haguére ñane rembiapo unos kuánto paíspe, tahaʼe en párte térã kompletoite voi. Upéicharõ jepe, ñane ermanokuéra oĩva umi paíspe oaguanta hína upe situasión. Haʼekuéra ohechauka porã tahaʼe haʼéva umi atáke Satanás opoíva ñane kóntrape, ñande ikatuha jasegi ñandefiél Jehovápe.

14. ¿Mbaʼépa ikatu jajapo ñaipytyvõ hag̃ua ñane ermáno ha ermanakuérape osegi hag̃ua oiko pe añetegua rapére?

¹⁴ Ñaipytyvõ hag̃ua ñane ermanokuérape osegi hag̃ua oiko pe añetegua rapére, tekotevẽta jaiporiahuvereko chupekuéra (1 Juan 3:10, 11, 16-18). Tekotevẽta jajoayhu iporã jave la situasión ha avei oĩ jave provléma. Por ehémplo, ¿oĩpa peteĩ ermáno ihénte manóva ha oikotevẽva konsuélo, térã ñaipytyvõ chupe ótro hendáicha? ¿Jaikuaápa oĩ hague ermáno operdepaite vaʼekue ikosakuéra peteĩ torménta ivaietereívape, ha tekotevẽta ñaipytyvõ chupekuéra omopuʼã jey hag̃ua pe Salón del Reino, térã hogakuéra? Umi mbaʼe jaʼéva rupive ñande jahechauka mbaʼeichaite pevépa jahayhu ha jaiporiahuvereko ñane ermanokuérape, péro iñimportanteveha jahechauka upéva umi mbaʼe jajapóva rupive.

15. Heʼiháicha 1 Juan 4:7, 8, ¿mbaʼépa avei tekotevẽ jajapo?

¹⁵ Ñande jasegi ñande Ru yvagapegua ehémplo jahechauka jave ojupe jajoayhuha (elee 1 Juan 4:7, 8). Ñañoperdona jave jajapo hína peteĩ mbaʼe iñimportantetereíva jahechauka hag̃ua jajoayhuha. Por ehémplo, oiméramo algúno ñanembopochy raʼe, jahechauka japorohayhuha ñaperdonávo chupe, ha ñañembyesaráivo upe ojapo vaʼekuégui (Col. 3:13). Jahechamína mbaʼépa oiko peteĩ ermáno héravare Aldo. Haʼe ipochy vaʼekue ohendúrõ guare peteĩ ermáno orrespetáva oñeʼẽ vaírõ guare umi hénte orekováre ikultúra. Aldo heʼi: “Pyʼỹinte  añemboʼe kuri Jehovápe tachepytyvõmi ani hag̃ua apyta chepyʼaro ko ermánore”. Péro Aldo ndahaʼéi upévante la ojapóva. Haʼe odesidi ojerure pe ermánope osẽ hag̃ua oñondive opredika. Opredika aja hikuái oñondive, Aldo omombeʼu pe ermánope mbaʼeichaitépa omoñeñandu vai kuri chupe pe heʼi vaʼekue. Aldo heʼive: “Upe ermáno oikuaárõ guare mbaʼeichaitépa chemoñeñandu vai kuri, ojerure chéve diskúlpa, ha pe heʼi lájare ahechakuaa mbaʼeichaitépa ombyasy upe heʼi vaʼekue. Upéi ore ropyta jey oñoamigoitéramo, ha oreresarái upe provlémagui”.

16, 17. ¿Mbaʼépa jajedesidi vaʼerã jajapo?

¹⁶ Apóstol Juan ningo ohayhueterei vaʼekue iñermanokuérape ha oipota ijerovia mbarete hikuái. Umi konsého haʼe omeʼẽ vaʼekue umi mbohapy kárta oskrivi vaʼekuépe, ohechauka porã mbaʼeichaitépa haʼe ohayhu ha ojepyʼapy hesekuéra. Javyʼaiterei ningo jaikuaávo umi kuña ha kuimbaʼe ogovernátava Jesús ndive yvágape, oporohayhu ha ojepyʼapyha avei ótrore Juan ojapo haguéicha (1 Juan 2:27).

¹⁷ Hiʼãite ningo siémpre ñanemanduʼa umi konsého jahecha vaʼekuére ko artíkulope. Jajedesidíkena jaikotaha pe añetegua rapére ñaneñeʼẽrendúvo Jehovápe opa mbaʼe jajapóvape. Jastudiákena la Biblia ha jajerovia upépe heʼívare. Ñamombaretékena ñande jerovia Jesús rehe, jarrechasákena umi filosofía ha idéa oñemboʼéva ko múndope, ha avei umi apóstata omboʼéva. Aníkena arakaʼeve jaservi guaʼu Jehovápe ha avei jajapo jaikóvo mbaʼe vai, ha aníkena ñahendu umi oñehaʼãvape ojapoka ñandéve ivaíva. Jaikókena siémpre Ñandejára mandamientokuéra iporãitéva heʼiháicha. Ñamombarete hína ñane ermanokuérape ñaperdonávo umi ñanembopochývape ha ñaipytyvõvo umi oikotevẽvape. Ha péicha ñambohováiramo jepe heta mbaʼe ijetuʼúva, jasegíta jaiko pe añetegua rapére.