Anase vaʼekue 1954-pe Estados Unídospe, peteĩ siuda héravape Saint Paul (Minnesota). Che tuakuéra ndaiplátai ni naimboriahúi vaʼekue, ha ore katóliko vaʼekue. Ore roime éntre 5 ermáno, ha che hína pe segundoha. Chemitãʼípe aha vaʼekue peteĩ eskuéla katólikape, ha mísa jave aipytyvõ pe paʼípe. Upéicharõ jepe ndaikuaaguasúi vaʼekue mbaʼeve la Bíbliagui. Che aguerovia vaʼekue Ñandejára oexistiha ha ojapo hague entéro mbaʼe, péro ndajeroviái pe Iglésia Katólika chepytyvõtaha aadora hag̃ua chupe.

Che astudia vaʼekue avogadorã pe fakulta de derécho William Mítchellpe. Ha pe primer áñope umi testígo de Jehová og̃uahẽ che rógape. Che ningo ajaojohéi hína kuri upe javete, upévare pe matrimónio heʼi ou jeytanteha upe rire. Ha ou jeýrõ guare, che aporandu chupekuéra mokõi mbaʼe: “¿Mbaʼére piko umi iñañáva oiko porãve umi ivuénovagui?”, ha “¿Mbaʼépa jajapo vaʼerã javyʼa hag̃ua?”. Che ajagarra chuguikuéra pe lívro La verdad que lleva a vida eterna ha pe Traducción del Nuevo Mundo de las Santas Escrituras, ijape vérde asýva. Avei ropyta rostudiataha  oñondive la Biblia. Upéva ningo tuichaiterei cheresapeʼa. Amombaʼeterei ningo aaprendérõ guare Ñandejára Rréino haʼeha pe goviérno ñaikotevẽtéva ogovernátava ko yvy. Che ahechakuaa yvyporakuéra goviérno ndoikoieteha, ha ikáusare ko múndope ojeiko asy, oĩ inhustísia ha hetaiterei mbaʼe vai.

Che añemeʼẽ Jehovápe oñepyrũvo pe áño 1982, ha upéi ajevautisa upe áñope voi pe asambléa de distríto héravape “Verdad del Reino”, ojejapo vaʼekue peteĩ lugár tuichaitereívape siuda de Saint Páulpe. Una semána haguépe aha jey upe lugárpe arrendi hag̃ua pe exámen ajerresivi hag̃ua de avogádo. Ha oñepyrũvo octubre aikuaa ahasa hague pe exámen ha ikatutamaha ambaʼapo de avogádo.

Pe asambléa “Verdad del Réinope” ajotopa Mike Richardson ndive, oservíva Betel de Bróoklynpe, ha omombeʼu chéve pe sentrál mundiálpe oñepyrũ jey hague pe Departaménto de Legáles. Upérõ chemanduʼa umi mbaʼe heʼi vaʼekuére pe eunúko etíope Hechos 8:36-pe, ha añeporandu: “¿Mbaʼéiko chejoko aha hag̃ua ambaʼapo pe Departaménto de Legálespe?”. Upémarõ ajapo che solisitu aha hag̃ua ambaʼapo Betélpe.

Che tuakuérape ndogustaiete vaʼekue oiko haguére chehegui testígo de Jehová. Che túa oporandu chéve pe traváho ajapótava Betélpepa chepytyvõta che profesiónpe, ha che haʼe chupe ambaʼapotaha de voluntário ha oñemeʼẽtaha chéve 75 dólar káda mes. Upéva ningo la orresivi vaʼekue umi betelita mensuálmente.

Che añekontratáma vaʼekue ambaʼapo hag̃ua peteĩ trivunálpe, upévare ndaikatúi vaʼekue aha ensegída ambaʼapo Betélpe. Añepyrũ aservi Betel de Bróoklynpe 1984-pe, ha añeasigna ambaʼapo hag̃ua Departaménto de Legálespe. Umi mbaʼe aaprende vaʼekue pe Trivunálpe ideprovechoitereíta kuri chéve umi mbaʼe oútavape g̃uarã upe rire.

Noviembre de 1983-pe ojejogua vaʼekue pe Teátro Stanley oĩva Jersey Cítype (Nueva Jersey). Umi ermáno ojerure permíso ombopyahu hag̃ua umi párte eléktrika ha plomería. Umi ermáno ohórõ guare umi autoridakuéra rendápe, omombeʼu chupekuéra oipuruseha hikuái pe Teátro Stanley ojapo hag̃ua upépe umi asambléa. Péro upépe oñepyrũ peteĩ provléma. Pe léi oĩva pe siudápe heʼi umi lugár rrelihióso noĩri vaʼerãha pe séntrope, síno umi varrioháre. Péro pe Teátro Stanley oĩ vaʼekue pe sentroitépe, oĩháme atyraite negósio. Upévare umi autoridakuéra nomeʼẽséi la permíso. Umi ermáno ojerure ojehecha jey hag̃ua pe desisión, péro oñenega chuguikuéra.

 Pe primera semána aimérõ guare Betélpe, Jehová organisasión opresenta upe káso pe trivunálpe. Ambaʼapo ramoite rupi 2 áño peteĩ trivunál oĩvape Saint Paul, Minnesótape, aikuaa porã vaʼekue koʼãichagua káso. Peteĩva umi ñande avogádo heʼi pe Teátro Stanley ojepurúma hague ojejapo hag̃ua heta evénto tuicháva, por ehémplo ojehecha hag̃ua pelíkula térã ojejapo hag̃ua konsiérto de rock. ¿Mbaʼére piko upéicharõ oĩ vaíta ojejapóramo upépe peteĩ rreunión rrelihiósa? Upémarõ pe trivunál upepegua orrevisa pe káso, ha odesidi Jersey City ndorrespetái hague pe liverta rrelihiósa jarekóva. Pe trivunál oguenohẽ peteĩ órden umi autoridakuérape omeʼẽ hag̃ua pe permíso oñekotevẽva. Añepyrũ ahecha mbaʼéichapa Jehová ovendesi iñorganisasiónpe oipurúvo hikuái pe párte legál ojapo porãve hag̃ua hembiapo. Avyʼaiterei ikatu haguére aipytyvõ upearã.

Umi ermáno omoñepyrũ peteĩ projékto tuichaitereíva ombopyahu hag̃ua pe Teátro Stanley, upéi oñehenóiva Salón de Asambléa de Jersey City. Ni un áño ndohasái oñepyrũ hague upe projékto, ha el 8 de septiembre de 1985 ojejapóma upépe pe Graduasión de Galaad kláse 79. Avyʼaiterei ningo ikatu haguére roipytyvõ Jehovápe umi ótro avogádondi ojehupyty hag̃ua koʼã mbaʼe. Chembovyʼaiteve ningo pe traváho ajapo vaʼekuégui aju mboyve Betélpe. Upérõ che ni naimoʼãi vaʼekue Jehová ojevaléta hague cherehe añatende hag̃ua hetave káso peichaguáre.

Áño 1980 rupi, umi doktór ha ospitalkuéra pyʼỹinte ndorrespetái vaʼekue peteĩ Testígo okakuaapámava nomoĩkaséiramo tuguy. Umi hués opensa vaʼekue koʼýte umi kuña hyeguasúva ndorekoiha derécho heʼívo nomoĩkaseiha tuguy. Haʼekuéra heʼi peteĩ sy nomoĩkáiramo tuguy ikatuha omano, ha pe mitã okakuaataha isyʼỹre.

Pe 29 de diciembre de 1988, ermána Denise Nicoleau hetaiterei operde tuguy imembypa rire. Pe iñemoglovína ndohupytyvéima ni 5.0 ha haʼetévaicha omanótava. Upévare pe doktór oipota haʼe oasepta oñemoĩ chupe tuguy, péro ermána Nicoleau ndoaseptái upéva. Al día sigiénte pe ospitál ojerure autorisasión peteĩ huéspe oñemoĩ hag̃ua chupe tuguy. Pe hués nomeʼẽi oportunida ermána Nicoleau ni iménape oexplika hag̃ua mbaʼépa opensa hikuái, ni ndoikuaaukái chupekuéra omeʼẽ hague permíso pe ospitálpe oñemoĩ hag̃ua chupe tuguy.

Upéi viernes 30 de diciembre, umi doktór oĩva upe ospitálpe omoĩ tuguy ermána Nicoleáupe, jepe iména ha ótro iparientekuéra noĩriete kuri de akuérdo. Upe kaʼarúpe unos kuánto iparientekuéra ha algúno ansiánope ojegueraha préso. Chupekuéra ojeakusa oñemoĩ haguére pe ermána Nicoleau rupa jerére, ani hag̃ua oñemoĩ chupe tuguy. Pe sábado pyhareve 31 de diciembre, pe siuda de Nueva York ha Long Íslandpe osẽ umi notísiape ojegueraha hague chupekuéra préso.

 Lunes pyhareve che añemongeta peteĩ hués ombaʼapóvandi peteĩ trivunál tuichavévape, haʼe héra Milton Mollen. Che amombeʼu chupe mbaʼépa la káso. Amyesakã porã chupe pe ótro hués ofirma hague pe autorisasión oñemoĩ hag̃ua tuguy pe ermánape, oñemongetaʼỹre hendivekuéra. Hués Mollen ojerure chéve aha hag̃ua iñofisínape upe kaʼarúpe, roñemongeta hag̃ua umi mbaʼe oiko vaʼekuére ha umi léi ikatúvare ojepuru upe kásope, ha che superintendénte Philip Brumley oho chendive hués Mollen ofisínape. Pe hués oinvita avei pe ospitál avogádope oñerreuni hag̃ua orendive. Haku la yvy kuri upe roñemongetárõ guare. Upéi ermáno Brumley oskrivi chéve ikuadérnore: “Eñekalmamiéna”. Ou porã kuri chéve upe konsého, pórke che añepyrũma kuri cheruguy raku añehaʼãvo ahechauka pe ospitál avogádo ojavyha.

Roñemongeta rire una órarupi, hués Mollen heʼi al día sigiénte oñatendetaha primeroite upe kásore. Rosẽnguévo iñofisínagui, hués Mollen heʼi pe ospitál avogádope: “Ijetuʼúta nendive koʼẽrõ”. Upéva heʼise ijetuʼutaha pe avogádope ohechauka hag̃ua pe ospitál oreko hague derécho mbaretépe omoĩvo tuguy ermána Nicoleáupe. Che añandu kuri Jehová ohechaukaha oréve ikatuha rogana upe káso. Ahecharamoiterei mbaʼéichapa Jehová ojevale orerehe ojapo hag̃ua haʼe oipotáva.

Pe pyharépe ore rombaʼapo tárde peve roprepara hag̃ua umi mbaʼe roʼétava al día sigiénte. Pe trivunál ningo opyta ag̃uieténte Betel de Bróoklyngui, upévare rohónte yvýrupi unos kuánto rombaʼapóva Departaménto de Legálespe. Umi 4 hués ohendu rire la roʼéva, odesidi hikuái noñemeʼẽi vaʼerãha kuri pe autorisasión oñemoĩ hag̃ua tuguy. Pe trivunál osẽ ermána Nicoleau favórpe, ha heʼi oĩha umi derécho umáno kóntrape oñefirma peteĩ autorisasión oñehenduʼỹre pe pasiénte opensáva.

Upe riremínte pe trivunál tuichavéva oĩva Nueva Yórkpe, heʼi ermána Nicoleau orekoha derécho orresivívo tratamiénto ojepuruʼỹre tuguy. Umi 4 káso tuguy rehegua oñegana vaʼekuégui umi trivunál tuichavévape Estados Unídospe, upéva haʼe vaʼekue pe primer káso che areko vaʼekue pe priviléhio ambaʼapóvo (ehecha pe rrekuádro “ Umi káso oñegana vaʼekue umi trivunál tuichavévape”). Avei ambaʼapo vaʼekue umi ótro avogádondi Betélpe ojehecha hag̃ua koʼãichagua káso: Ojedesidíta jave mávandipa opytáta peteĩ  mitã, divórsio ha umi léi heʼíva mbaʼéichapa ojepuru vaʼerã pe yvy ha umi ogakuéra.

Aikuaárõ guare che rembirekorã Dáwnpe, haʼe divorsiáda vaʼekue ha omongakuaa hína kuri mbohapy mitã. Haʼe ombaʼapo oñemantene hag̃ua hikuái, ha ojapo iprekursorádo. Haʼe ohasáma kuri heta mbaʼe ijetuʼúva ha ahecharamoiterei mbaʼéichapa haʼe ojedesidi oservi Jehovápe. Áño 1992-pe, roho pe asambléa de distríto “Portadores de Lúzpe”, pe siuda de Nueva Yórkpe, ha haʼe chupe ikatúnepa rojokuaa porãve. Upéi un áño haguépe romenda. Che rembireko ningo siémpre omotenonde Jehovápe ha horyeterei, chéve g̃uarã haʼe peteĩ rregálo oúva Jehovágui. Dawn añetehápe imbaʼeporãiterei chendive roikove aja pukukue oñondive (Prov. 31:12).

Romendárõ guare, umi mitã oreko vaʼekue 11, 13 ha 16 áño. Añangareko porãségui hesekuéra peteĩ túa teéicha, añepyrũ alee ha ajapo entéro mbaʼe atopáva ñane puvlikasionkuérape oñeʼẽva umi tuanga rehe. Rohasa kuri heta mbaʼe ijetuʼúva umi áño ohasa vaʼekuépe, péro avyʼaiterei umi mitã ohechakuaa haguére ahayhuha chupekuéra itúa teéicha ha iñamígo de konfiánsaicha. Siémpre rorresivi porã ógape ore família amigokuérape, ha igustoiterei oréve roreko ore jerére umi mitãrusu ha mitãkuña ikyreʼỹ ha ovyʼakuaaitéva.

Áño 2013-pe, Dawn ha che rova Wiscónsinpe roñangareko hag̃ua ore tuakuéra ijedámavare, ha ni naimoʼãi vaʼekue ikatutaha asegi ambaʼapo Betélpe g̃uarã. Añeinvita asegi hag̃ua aipytyvõ ñane organisasiónpe heta káso legálpe.

Septiembre de 2018-pe, ahechakuaa pyʼỹieterei chehuʼuha añeʼẽ mboyve. Ore doktór oñatendéva jepi orerehe, ndoikuaái kuri mbaʼérepa ojehu jepi chéve upéva. Upéi ótro doktór heʼi chéve aha hag̃ua peteĩ neurólogo rendápe. Enero de 2019-pe, pe neurólogo heʼi amalisia arekoha peteĩ mbaʼasy iñextráñova che akãme, ha tiémpo rire oafektataha ohóvo che rete kompletoite. Upe mbaʼasy héra parálisis supranuclear progresiva (PSP).

Tres día upe rire haʼa apatina jave sóvre iélo ha amopẽ che pyapy a la derechapegua. Che ningo chemitã guive chegustáva la patináhe, ha legálmente apatinakuaaiterei vaʼekue. Upévare ahechakuaa ndachepuʼakaporãveimaha che retére. Chesorprende voi pyaʼeterei oempeora haguére che mbaʼasy. Amás día ijetuʼuve chéve añeʼẽ, akuʼe ha amokõ hag̃ua jepe umi mbaʼe haʼúva.

Tuichaiterei priviléhio ningo chéve g̃uarã ikatu haguére aipuru che profesión avogádoramo, aipytyvõ hag̃ua Jehová organisasiónpe. Ha avyʼaiterei ikatu haguére askrivi heta artíkulo osẽva umi rrevísta oleévape umi doktór, avogádo ha hués. Avei aha añeʼẽ umi seminário médikope opárupi ko múndope, adefende hag̃ua pe derécho orekóva Jehová puévlo oiporavo hag̃ua umi tratamiénto ha siruhía ojepuruʼỹháme tuguy. Upéicharõ jepe asegi haʼe chejupe upe heʼíva Lucas 17:10: ‘Che ningo esklavomínte, namereséi avave cheguerohory. Pe ajapo vaʼekue ajapónte vaʼerã voi kuri’.