Jehová ningo oipota umi omendáva ovyʼa ha oreko peteĩ amista imbaretéva oñondive pára siémpre (Mat. 19:4-6). Oiméramo ñande ñamendase hína, ¿mbaʼéichapa ikatu jatopa ñane ména térã ñane rembirekorã? Jehová haʼe rupi ñande Apohare, oikuaa mbaʼépa jajapo vaʼerã ikatu hag̃uáicha javyʼa ñane matrimóniope. Upévare jasegíramo umi konsého haʼe omeʼẽva, katuete javyʼáta. Jahechamína unos kuánto umíva.

Primero, jahechakuaa vaʼerã ko mbaʼe ñandejehe: “Yvypóra korasõ itraisionerove oimeraẽ mbaʼégui ha ojedesespera rupi ikatu ojapo oimeraẽ mbaʼe” (Jer. 17:9). Mokõi persóna ojegustáva oñepyrũ jave ojokuaave, ikatu hína pyaʼeterei okakuaa umi mbaʼe oñandúva ojuehe, ou iñakã vai ha péicha jave ijetuʼúma chupekuéra odesidi porã hag̃ua umi mbaʼe ojapótava. Umi ojesegíva umi mbaʼe oñandúvarente omenda hag̃ua, pyʼỹinte osẽ vai (Prov. 28:26). Upévare naiporãmoʼãi mokõi persóna voieterei heʼíramo ojupe umi mbaʼe oñandúva, térã oprometéma heta mbaʼe ojokuaa porã mboyve.

Proverbios 22:3 heʼi: “Pe iñentendídova ohechakuaa pe pelígro ha ojere chugui, péro umi ivýrova katu derechoite oho upépe, ha upéi osufri odesidi vai haguére”. ¿Mbaʼérepa ikatu ipeligróso umi páhina térã aplikasión oipurúva umi hénte ojejuhu hag̃ua? Ñambyasýramo jepe, oĩ ojotopa vaʼekue umi extráñondi koʼã páhina térã aplikasión rupive, oñemoĩ de nóvio ha upe rire heta ohasa asy ohechakuaávo pe persóna ombotavy hague chupe. Avei umi hénte iñintensión vaíva okrea umi kuénta fálsa ombotavy hag̃ua umi ivýrovape, ha oipeʼa hag̃ua chuguikuéra ipláta. Ha sapyʼánte umi ojapóva koʼã mbaʼe heʼi guaʼu ijehe Testigoha.

Jahechamína avei ótro pelígro. Oĩ umi páhina térã aplikasión oipurúva umi fórmula matemátika okalkula hag̃ua guaʼu mbaʼeichagua persónapa opyta porãvéta oñondive. Péro ndaipóri pruéva ohechaukáva koʼã mbaʼe ofunsionaha. Nañanearandumoʼãi ningo jahejáramo umi komputadóra odesidi ñande vése umi mbaʼe iñimportantevéva, por ehémplo mávarepa ñamendáta. Umi prográma de komputadóra ningo yvypóra rembiapokuénte, upévare ndaikatúi ñakompara umíva umi konsého porãite oĩvare la Bíbliape (Prov. 1:7; 3:5-7).

Proverbios 14:15-pe jatopa ótro konsého. Upépe heʼi: “Pe ivýrova oguerovia ojeʼéva guive chupe,  pe iñarandúva katu opensa porã ojapo mboyve álgo”. Jadesidi mboyve ñamendátapa peteĩ persónare, tekotevẽ jaikuaa porã raẽ chupe. Péro hasýta jajapo hag̃ua upéva umi páhina térã aplikasión rupive. Ikatu hína jahecha umi informasión omoĩva pe persóna iperfílpe ha pyʼỹinte ñamensahea hendive, upéicharõ jepe ¿ikatúpa jaʼe añetehápe jaikuaa porãha chupe? Oĩ umi opensáva otopáma hague imborayhu jára, péro upéi tuichaiterei oñedesepsiona oikuaávo chupe en persóna.

Peteĩ salmísta heʼi vaʼekue: “Umi ijapúva ni mbaʼevéicharõ ndahaʼéi che amígo, ha ndajeheʼái umi hovamokõivare” (Sal. 26:4). Heta persóna ojepokuaa ijapu okompleta jave iperfíl umi páhina térã aplikasión ojepurúvape ojejuhu hag̃ua, ha péicha oñemointeresanteve. Haʼekuéra ikatu hína oñomi umi idefektokuéra, térã ndojepillaguasúi umíva omensahea jave ótrondi. Ha oiméramo peteĩ persóna heʼi ijehe Testigoha, iñimportánte ñapensa koʼã mbaʼére: “¿Añetehápe piko haʼe peteĩ ermána térã ermáno vautisádo? ¿Ijerovia mbaretépa haʼe ha oreko peteĩ amista iporãva Jehovándi? ¿Ojerrespetápa chupe ikongregasiónpe, térãpa haʼe peteĩ ehémplo vai térã katu peorve, ‘júnta vai’?” (1 Cor. 15:33; 2 Tim. 2:20, 21). ¿Oĩpa lívre omenda hag̃ua ohechaukaháicha la Biblia? Ikatu hag̃uáicha ñambohovái koʼã porandu, tekotevẽta ñañemongeta raẽ peteĩ Testígo oikuaa porãvandi upe persónape (Prov. 15:22). Ha jaikuaa ndojehasamoʼãiha voi peteĩ Jehová siérvo ifiélva akãrupi omenda ‘peteĩ ndoservírivare Ñandejárape’ (2 Cor. 6:14; 1 Cor. 7:39).

Jahechaháicha, ipeligróso hína umi páhina térã aplikasión oipurúva la hénte ojejuhu hag̃ua. Upéicharõ, ¿oĩpa ótra fórma isegurovéva jatopa hag̃ua ñane ména térã ñane rembirekorã? Ndojeproivíri jave ñañembyaty, ñande testígo de Jehová ikatu jajotopa ótrondi térã jaikuaa hetave ermánope umi rreunionhápe, asambleahápe térã umi fiestítape.

Péro ndaikatúi jave ojejapo koʼãichagua rreunión, por ehémplo pe pandémia de COVID-19 aja, ñande jajapo umi rreunión virtuál. Ha oiméramo ñande soltéro térã soltéra, umi rreuniónpe jareko oportunida jaikuaa porãve hag̃ua umi ótro solterokuérape. Umi rreunionhápe ningo ikatu jahecha ojapo jave ipartekuéra ha ñahendu mbaʼeichaitépa ojerovia hikuái ikomentário rupive (1 Tim. 6:11, 12). Ikatu avei ñañemongeta umi sála ojejapóvape opa rire umi rreunión virtuál. Oĩ avei Testígo ojapóva umi fiestíta virtuál, ha péicha jave ikatu jahecha mbaʼéichapa oñekomporta oĩ jave hénte atýpe pe persóna ñandegustáva, ha upéva ñanepytyvõta jaikuaa hag̃ua mbaʼeichagua persónapa añetehápe haʼe (1 Ped. 3:4). Ha tiémpo rire, jaikuaa porãvévo jahávo chupe, ikatúta jaikuaa jarekópa la mísma méta, jajogueraha porãtapa ha ikatútapa ñamenda.

Peteĩ soltéro térã soltéra osegíramo umi konsého bíblico odesidíta jave mávarepa omendáta, orekove posivilida ovyʼávo imatrimóniope. Ha ohecháta oñekumpliha hese la heʼíva Proverbios 18:22: “Pe ojuhúva peteĩ tembireko ivuénava [térã ména ivuénova], ojuhu hína peteĩ tesóro. Jehová oguerohory chupe”.