1. ¿Mbaʼe rehepa ñaime segúro ko tiémpope, ha mbaʼérepa jaʼe upéva?

 REHECHÁVO umi mbaʼe oikóva koʼág̃arupi, ¿ijetuʼúpa ndéve reguerovia hag̃ua oñemehorataha la situasión? Umi família ningo ndojoayhuvéi. Heta hénte iviolénto, opensa ijehénte ha iñaña. Ha heta persónape ijetuʼu okonfia hag̃ua umi orekóvare autorida. Péro entéro koʼã mbaʼe ikatu omeʼẽ ñandéve peteĩ esperánsa. ¿Mbaʼérepa jaʼe upéva? Pórke oiko lája koʼág̃a umi hénte okumpli hína peteĩ profesía bíblica oñeʼẽva ‘umi ára paháre’ (2 Tim. 3:1-5). Ndaipóri ningo ikatúva onega oñekumpli porãitereiha entéro koʼã profesía jatopáva la Bíbliape, ha upéva ohechauka porãiterei ñandéve Jesús oñepyrũmaha ogoverna Ñandejára Rréinope. Péro kóva ningo haʼe peteĩvante umi profesía oñeʼẽva pe Rréinore. Upévare omombaretetereíta ñande jerovia ñaanalisáramo umi ótra profesía oñekumpli ramovéva umi áño ohasa vaʼekuépe.

2. ¿Mbaʼépa jahecháta ko artíkulope, ha mbaʼérepa? (Ehecha pe taʼanga oĩva ko rrevísta apére).

² Ko artíkulope jahecháta: 1) Peteĩ profesía ñanepytyvõva ñantende hag̃ua arakaʼépa oñepyrũ ogoverna pe Rréino. 2) Umi profesía ohechaukáva ñandéve Jesús ogovernamaha yvágape Ñandejára Rréinope. Ha 3) umi profesía ohechaukáva mbaʼéichapa oñehundíta Ñandejára enemigokuéra.  Jahecháta avei mbaʼéichapa koʼã profesía opyta porã oñondive umi piésa de rrompekavésaicha. Upéva ñanepytyvõta jaikuaa hag̃ua mbaʼe pártepepa ñaime koʼã ára pahápe ha mbaʼe profesíapa ofalta gueteri oñekumpli.

3. ¿Mbaʼépa oasegura ñandéve pe profesía oĩva Daniel 7:13, 14-pe?

³ Pe profesía jatopáva Daniel 7:13, 14-pe ohechauka porãiterei ñandéve Jesús haʼetaha peteĩ Rréi ndaijojaháiva Ñandejára Rréinope. Umi hénte opa tetãygua vyʼápe ‘oservíta chupe’ ha haʼe ogovernáta pára siémpre. Ótra profesía jatopáva lívro de Daniélpe ohechauka Jesús oñepyrũtaha ogoverna Ñandejára Rréinope ohasa rire umi 7 tiémpo. ¿Ikatúpa ñande jaikuaa arakaʼetépa oiko rakaʼe upéva?

4. ¿Mbaʼéichapa Daniel 4:10-17 ñanepytyvõ jaikuaa hag̃ua arakaʼépa oiko Jesúsgui Rréi? (Ehecha pe nóta).

⁴ (Elee Daniel 4:10-17, nóta). Umi “7 tiémpo” orrepresenta peteĩ tiémpo ipukúva 2.520 áño. Koʼã “7 tiémpo” oñepyrũ áño 607-pe a.C., umi babilonio ohundírõ guare Jerusalén, ha oipeʼa pe rréi israelita ogovernáva. Koʼã “7 tiémpo” opa áño 1914-pe oñemoĩrõ guare Jesúspe Rréiramo, ha haʼe hína “pe orekóva derécho” ogoverna hag̃ua Ñandejára Rréinope (Ezeq. 21:25-27). b

5. ¿Mbaʼéichapa ñanevenefisia jaikuaávo pe profesía oñeʼẽva umi ‘7 tiémpore’?

⁵ ¿Mbaʼéichapa ñanevenefisia ko profesía? Jaikuaávo pe profesía oñeʼẽva ‘umi 7 tiémpore’ oasegura ñandéve Jehová katuete okumpliha umi mbaʼe oprometéva itiempoitépe. Omoĩ haguéicha peteĩ tiémpo oiko hag̃ua Jesúsgui pe Rréi Irréinope, péicha avei Jehová oñenkargáta ikatu hag̃uáicha oñekumpli umi ótra profesía ha avei itiempoitépe. Umíva katuete oñekumplíta, “ni mbaʼevéicharõ ndotardamoʼãi” (Hab. 2:3).

6. a) ¿Mbaʼéichapa ikatu jaikuaa Jesús oñepyrũma hague ogoverna yvágape? b) ¿Mbaʼéichapa oasegurave ñandéve upéva pe profesía jatopáva Apocalipsis 6:2-8-pe?

⁶ Omohuʼã mbotaitévo Jesús pe hembiapo ko yvy ape ári, heʼi kuri unas kuánta kósa oikótava koʼã ára pahápe. Umíva ñanepytyvõta jaikuaa hag̃ua haʼe oñepyrũma hague ogoverna yvágape. Umíva apytépe Jesús omombeʼu kuri ñane tiémpope oĩtaha gérra, ñembyahýi ha yvyryrýi “ape ha pépe”. Avei heʼi kuri oĩtaha opaichagua mbaʼasy ha upéva jahecha porãiterei mbaʼéichapa oñekumpli pe pandémia COVID-19 aja. Koʼã mbaʼépe la Biblia ohenói ‘umi señál’ ohechaukáva jaikomaha umi ára pahápe (Mat. 24:3, 7; Luc. 21:7, 10, 11). Mas de 60 áño Jesús omano ha oho jey rire yvágape, oasegurave kuri oñekumplitaha katuete koʼã profesía apóstol Juánpe (elee Apocalipsis 6:2-8). Entéro koʼã mbaʼe oñepyrũ oñekumpli Jesús oñepyrũrõ guare ogoverna yvágape 1914-pe.

7. ¿Mbaʼérepa oiko hetaite mbaʼe vai ko yvy ape ári Jesúsgui oiko rire Rréi?

⁷ ¿Mbaʼérepa oiko hetaite mbaʼe vai oiko rire Jesúsgui Rréi? Apocalipsis 6:2-pe jatopa la rrespuésta. Upépe omombeʼu Jesús oñepyrũmíre ogoverna osẽ hague oñorairõ. ¿Máva kóntrapepa? Satanás ha idemoniokuéra kóntrape. La Biblia omombeʼu Apocalipsis kapítulo 12-pe, Satanás ha idemoniokuéra operde hague upe ñorairõ ha oñemombo hague chupe ko yvy ape ári. Satanás ipochyeterei  operde haguére pe ñorairõ ha upévare ojapo heta mbaʼe vai ko yvy ape ári (Apoc. 12:7-12).

8. ¿Mbaʼéichapa ñanevenefisia jahechávo oñekumpliha umi profesía oñeʼẽva pe Rréinore?

⁸ ¿Mbaʼéichapa ñanevenefisia koʼã profesía? Jahecháma haguéicha ajeʼi, umi mbaʼe oikóva ko múndope ha umi hénte oñekomporta lája ohechauka porãiterei ñandéve Jesús ogovernamaha. Upévare ñande ñandepochy rangue jahechávo oĩha hetaiterei persóna opensáva ijehénte ha iñañaitereíva, ñanemanduʼa koʼã mbaʼe okumpliha hína umi profesía bíblica, ha Ñandejára Rréino ogovernamaha (Sal. 37:1). Upévare ñahaʼarõkuaa la situasión ivaive amáske hiʼag̃uive ohóvo Armagedón (Mar. 13:8; 2 Tim. 3:13). Ajépa jaagradesete ñande Ru ñanderayhuetévape oikuaauka haguére ñandéve mbaʼérepa oiko hetaite mbaʼe vai ko múndope.

9. ¿Mbaʼéichapa pe profesía oĩva Daniel 2:28, 31-35 ohechauka mávapa pe poténsia mundiál, ha arakaʼépa oñepyrũ vaʼekue?

⁹ (Elee Daniel 2:28, 31-35). Koʼág̃a ñande jahecha avei hína oñekumpliha ko profesía. Umi mbaʼe Nabucodonosor ohecha vaʼekue iképe ohechauka umi mbaʼe oikótava “umi ára pahápe”, Jesús ogoverna rire yvágape. Jesús enemigokuéra apytépe oĩta pe última poténsia mundiál heʼi haguéicha voi la Biblia, pe orrepresentáva pe “py ojejapóva iérro ha ñaiʼũgui”. Ko poténsia mundiál ogovernáma hína koʼág̃a. Péva oñepyrũ kuri pe primera gérra mundiál aja, Gran Bretaña ha Estados Unidos, haʼéva pe poténsia Angloamericana oñomoirũrõ guare ombaʼapo hag̃ua oñondive. Pe estátua Nabucodonosor ohecha vaʼekue iképe ohechauka mokõi mbaʼépe jepe idiferentetaha  ko poténsia mundiál umi ótro goviérno oĩ vaʼekuégui upe mboyve.

10. a) ¿Mbaʼépa ikatu jahecha pe poténsia mundiál Gran Bretaña ha Estados Unidos rehe heʼi haguéicha Daniel profesía? b) ¿Mbaʼe pelígroguipa ñañatende vaʼerã? (Ehecha pe rrekuádro “ Eñatendékena mbaʼépa orrepresenta pe ñaiʼũ”).

¹⁰ Primero, umi poténsia mundiál ohecha vaʼekue Nabucodonosor iképe ko última poténsia mboyve, ojepuru kuri umi metál imbaretéva oñerrepresenta hag̃ua, por ehémplo óro ha pláta. Péro Gran Bretaña ha Estados Unídospe katu oñerrepresenta ojeheʼaha iérro ha ñaiʼũre. Ko ñaiʼũ orrepresenta ‘umi héntepe’ térã umi ndahaʼéivape governánte (Dan. 2:43). Upéva jahecha porãiterei koʼág̃arupi oiko jave umi eleksión, umi hénte ojapo jave umi manifestasión tuicháva ojerurehápe hikuái umi derécho oguerekóva ha umi protésta jahecháva ape ha pépe. Koʼã mbaʼe omokangy ko poténsia mundiálpe ha umi igovernantekuéra ndaikatúi ojapo umi mbaʼe ojaposéva.

11. ¿Mbaʼéichapa omombarete ñande jerovia jaikuaávo koʼág̃a ogovernaha hína pe última poténsia mundiál?

¹¹ Segundo, Gran Bretaña ha Estados Unidos haʼe pe última poténsia mundiál oĩtava heʼi haguéicha la Biblia, ha pe estátua py orrepresenta hína chupe. Ko última poténsia mundiál rire ndaiporimoʼãvéima ótro goviérno opuʼãtava upe rire. Upéva rangue, oñehundietéta chupe Armagedónpe entéro umi ótro goviérnondi (Apoc. 16:13, 14, 16; 19:19, 20). c

12. ¿Mbaʼéichapa pe profesía de Daniel omeʼẽve ñandéve konsuélo ha esperánsa?

¹² ¿Mbaʼéichapa ñanevenefisia ko profesía? Pe profesía de Daniel omeʼẽve ñandéve pruéva ohechaukáva jaikomaha pe ára pahápe. Ojapóma mas de 2.500 áño, peteĩ profesíape Daniel heʼi hague Babilonia rire opuʼã jeytaha 4 poténsia mundiál. Ha koʼãva oreko vaʼekue la podér tahaʼe operhudika térã oipytyvõ hag̃ua Ñandejára puévlope. Daniel profesía ohechauka avei koʼã poténsia mundiál apytégui Gran Bretaña ha Estados Unidos haʼetaha pe última poténsia oĩtava. Ko profesía omeʼẽ ñandéve konsuélo ha esperánsa koʼẽrõitéma Ñandejára Rréino ohundipaitetaha umi goviérno umáno ha ogovernataha ko yvy tuichakuére (Dan. 2:44).

13. ¿Mbaʼépa orrepresenta ‘pe rréi ochoha’ ha ‘umi 10 rréi’ jatopáva Apocalipsis 17:9-12-pe, ha mbaʼéichapa oñekumpli ko profesía?

¹³ (Elee Apocalipsis 17:9-12). Umi mbaʼe vai oiko vaʼekue pe primera gérra mundiál káusare okumpli avei peteĩ profesía oĩva la Bíbliape ha oñeʼẽva umi ára paháre. Umi governantekuéra opensa omoĩvo pyʼaguapy ko yvy ape ári. Upévare pe enero de 1920 haʼekuéra omoĩ kuri pe Liga de Naciones, upe rire upéva oñekambia pe Naciones Unídasre pe octubre de 1945. Ko organisasiónpe oñehenói ‘pe rréi ochoha’. Kóva ndahaʼéi peteĩ poténsia mundiál umi ótroicha. Upéva rangue, ipodér odepende umi goviernokuérare. Ha la Biblia ohenói koʼã goviérnope ‘umi 10 rréi’.

14, 15. a) ¿Mbaʼépa heʼi ñandéve Apocalipsis 17:3-5 ‘Babilonia Guasúre’? b) ¿Mbaʼépa oiko hína koʼág̃arupi umi oapojávagui umi rrelihión fálsape?

¹⁴ (Elee Apocalipsis 17:3-5). Apóstol Juan peteĩ visión rupive ohecha peteĩ kuña rekovai, haʼéva hína pe “Babilonia Guasu” orrepresentáva entéro umi rrelihión fálsape. ¿Mbaʼéichapa oñekumpli pe visión ohecha vaʼekue Juan? Hetaiterei tiémporema umi rrelihión japu ombaʼapo ha oapoja umi goviérno oĩvape ko yvy ape ári. Péro koʼẽrõitéma Jehová “omoĩta iñakãmekuéra peteĩ plan  ojapo hag̃ua haʼe oipotáva”. ¿Mbaʼépa oikóta upe rire? ‘Umi 10 rréi’ térã umi goviérno oatakáta umi rrelihión fálsape ha ohundietéta chupekuéra (Apoc. 17:1, 2, 16, 17).

¹⁵ ¿Mbaʼéichapa ikatu jaikuaa pe Babilonia Guasu oñehundi potaitemaha? Jaikuaa hag̃ua upéva ikatu ñapensa pe Babilonia yma guarére, hese ojere vaʼekue pe Rrío Éufrates ha upéva oprotehe chupe. La Biblia okompara voi ‘ýre’ umi hénte oapojávape Babilonia Guasúpe (Apoc. 17:15). Pe lívro de Apocalipsis heʼi avei pe y ‘hypataha’, upéva heʼise umi oapojáva umi rrelihión fálsape saʼivetaha ohóvo (Apoc. 16:12). Koʼág̃arupi jahecha porã oñekumpliha ko profesía, pórke hetaiterei hénte oheja pe irrelihión ha oheka ajúda ótro hendápe ikatu hag̃uáicha osolusiona umi iprovlemakuéra.

16. ¿Mbaʼéichapa ñanevenefisia jaikuaávo koʼág̃a oĩha pe Naciones Unidas ha oñehundi potaitemaha Babilonia Guasu?

¹⁶ ¿Mbaʼéichapa ñanevenefisia koʼã profesía? Koʼág̃a oĩ rupi pe Naciones Unidas ha jahecha rupi mbaʼéichapa umi hénte saʼive oapoja ohóvo umi rrelihión fálsape, ojekuaa porãiterei ñaimemaha umi ára pahápe. Hypáramo  jepe pe y orekóva Babilonia Guasu, chupe oñehundíta hína ótro hendáicha. Jahecháma haguéicha, Jehová omoĩta ‘umi 10 rréi’ akãme térã umi goviernokuéra oapojáva pe Naciones Unídaspe, “peteĩ plan ojapo hag̃ua haʼe oipotáva”. Péicha umi rrelihión fálsa derrepentete oñehundíta ha upéva katuete osorprendéta umi héntepe (Apoc. 18:8-10). d Upéva oiko vove tuichaiterei oafektáta ko múndope, péro Ñandejára puévlo orekóta mokõi mbaʼe ombovyʼátava chupekuéra: Ko Ñandejára enemígo oñehundietéta pára siémpre ha hiʼag̃uimbaitéma jajesalva hag̃ua ko múndo añágui (Luc. 21:28).

17, 18. a) ¿Mbaʼéichapa ikatu jasegi ñamombarete ñande jerovia? b) ¿Mbaʼépa jahecháta pe artíkulo oúvape?

¹⁷ Pe profesía de Daniel heʼi voi vaʼekue ‘umi enseñánsa verdadéra heta hetavetaha’. Ha upéva ningo ñande jahecha siertoiteha koʼág̃a. Ñande ñantende umi profesía oñekumplíva hína ko ñane tiémpope (Dan. 12:4, 9, 10). Jahechávo mbaʼéichapa koʼã profesía oñekumpli porãiterei, ñanepytyvõ jajeroviave hag̃ua Jehováre ha Iñeʼẽre (Is. 46:10; 55:11). Upévare eñehaʼãmbaitékena emombarete nde jerovia restudia porãvo la Biblia ha reipytyvõvo ótrope ikatu hag̃uáicha oguereko peteĩ amista iporãva Jehovándi. Jehová oñangarekóta umi ojeroviávare hese ipyʼaite guive ha ‘oipytyvõta chupekuéra oiko hag̃ua pyʼaguapýpe’ (Is. 26:3).

¹⁸ Pe ótro artíkulope jahecháta umi profesía oñeʼẽva umi kongregasión kristiána oĩvare ko ára pahápe. Koʼã profesía ñaanalisátava ohechauka porãitereíta avei jaikomaha umi ára pahápe. Jahecháta hetave pruéva ohechaukáva Jesús ogovernamaha ha ogiaha hína isegidorkuéra iñeʼẽrendúvape.