Che anase vaʼekue áño 1935-pe peteĩ lugár héravape Darlaston oĩva Inglatérrape. Ha upépe oĩ heta fávrika, ha upe lugárpe ojagarrapa voi pe tatatĩ hũ. Che tuakuéra oñepyrũ vaʼekue ostudia testígo de Jehovándi che arekórõ guare 4 áño. Chemitãrusúpe aime vaʼekue konvensído atopa hague la verda, upévare 1952-pe ajevautisa arekórõ guare 16 áño.

Upe tiémporupi avei añepyrũ ambaʼapo peteĩ fávrika tuichávape, upépe rojapo umi erramiénta manuál ha avei umi piésa oguerekóva umi motór. Upépe haʼekuéra chemboʼe ikatu hag̃uáicha aguereko peteĩ puésto iñimportánteva upe emprésape. Ha chéve chegustaiterei kuri la che traváho.

Che ambohovái vaʼekue peteĩ situasión ijetuʼúva peteĩ superintendénte de sirkuíto cheinvitárõ guare adirihi hag̃ua pe estúdio de lívro che kongregasiónpe voi Wíllenhallpe. Péro che ningo adesidi vaʼerã kuri peteĩ mbaʼe ijetuʼúva pórke aha rreunionhápe mokõi kongregasiónpe. Éntre semána aha pe kongregasión opytávape ag̃ui che travahohágui Brómsgrovepe amo 32 kilómetrorupi che rógagui. Ha fin de semanakue aha jave che tuakuéra rógape aha pe kongregasión Wíllenhallpe.

Che ningo aapojaseterei kuri Jehová organisasiónpe ha upévare aasepta pe superintendénte invitasión. Upéva heʼiséramo jepe ahejataha pe traváho ahayhuetéva. Aheja rupi Jehová chegia porã, omeʼẽ chéve hetave oportunida aservi hag̃ua chupe ha nañarrepentiriete ajapo haguére upéicha.

Aapoja aja pe kongregasión Bromsgrove aikuaa peteĩ ermána iporãitereíva hérava Anne. Ore romenda áño 1957-pe, ha roservi oñondive heta asignasión iporãitereívape, por ehémplo de prekursór rregulár, prekursór espesiál, superintendénte de sirkuíto, ha Betélpe. Hetaiterei mbaʼe porãma ningo ahasa Anne ndive aikove aja pukukue.

Áño 1966-pe rovyʼaiterei roñeinvita haguére roho hag̃ua pe Eskuéla de Galaádpe kláse 42. Ha roñeasigna roservi hag̃ua Maláuipe, ko paíspe ojekuaa haʼeha el korasón de África pórke upépe umi hénte hory ha imbaʼeporãiterei. Ore ningo noroimoʼãiete kuri ndoropytamoʼãi hague upépe heta tiémpore.

Ore rog̃uahẽ Maláuipe el 1 de febrero de 1967. Pe primer méspe rohasa hetaiterei tiémpo roaprende hag̃ua iñidiomakuéra. Upe riremínte añepyrũ aservi de superintendénte de distríto. Roguereko vaʼekue peteĩ veíkulo todoterréno, ha roimoʼã kuri ikatutaha roho pype oimehápe ha rokrusa umi rrío jepe. Ropensáramo jepe rojapotaha entéro koʼã mbaʼe, ndahaʼéi kuri upéicha, pórke ikatúnte kuri rohasa umi y ipererĩvehápente. Sapyʼánte ropyta jepi umi óga itécho kapiʼívape, ha pe técho ári romoĩmante kárpa ani hag̃ua oikepa oréve la y okyetereiha tiémpope. Ha rohasáramo jepe koʼã mbaʼe, rovyʼaiterei la ore asignasiónpe.

Abrílpe, añemeʼẽ enkuénta oĩta hague provléma upe paíspe. Upe rire ahendu rrádiope oñeʼẽrõ doktór Hastings Banda, haʼéva pe presidénte Malauipegua. Haʼe heʼi testígo de Jehová ndopagaiha umi impuésto ha okreaha hína provléma pe goviérnope. Péro japu kuri koʼã akusasión. Ore ningo roikuaa porã pe goviérnope ndogustainteha ñande testígo de Jehová nañañentremetéi haguére polítikape ha koʼýte ndajajoguaséi haguére pe tarhéta orekóva pe partído polítiko oĩva Maláuipe.

Septiémbrepe rolee diáriope pe presidénte oakusaha ñane ermanokuérape okreaha provléma pe país tuichakuére. Ha pe presidénte ojapo peteĩ rreunión heʼihápe koʼẽrõitéma ojeproivitaha umi testígo de Jehovágui hembiapo. Ha upéva oiko el 20 de octubre de 1967. Upe riremínte oúma umi polisía ha umi ombaʼapóva migrasiónpe omboty hag̃ua Betel ha omosẽ hag̃ua umi misionérope upe paísgui.

Rohasa rire 3 día kárselpe roñemosẽ ha ropyta Mauríciope, oĩva Gran Bretaña poguýpe. Upéicharamo jepe, pe goviérno Mauriciopegua nopermitíri oréve ropyta misionéroramo. Upémarõ roñeasigna  Rodésiape, haʼéva koʼág̃a Zimbabue. Rog̃uahẽ rire upépe, rojotopa peteĩ ofisiál de migrasión ijarheletereívandi. Haʼe ndoipotái ore ropyta upe paíspe, ha heʼi oréve: “Peẽ ningo peñemosẽ Maláuigui ha noñepermitíri peẽme pepyta Mauríciope, ha pejuse koʼápe okonveníguinte peẽme”. Upépe Anne oñepyrũ hasẽ. Haʼete voi avave ndaorepotáiva. Upe moméntope ahase jeýntema voi che paíspe Inglatérrape. Upe rire umi migrasionpegua opermiti oréve ropyta Betélpe upe pyharépe, sólamente roñepresentátarõ al día sigiénte umi autorida renondépe. Ore ningo orekaneʼõitereíma ha rohejánte entéro mbaʼe Jehová pópe. Al ótro día, pe kaʼarúpe roimoʼãʼỹetére rorresivi pe permíso ropyta hag̃ua visitánteicha Zimbábuepe. Núnka ndacheresaraimoʼãi mbaʼeichaitépa añeñandu upe moméntope, ha avei rohecha mbaʼeichaitépa Jehová oregia porã.

Betel de Zimbábuepe añeasigna ambaʼapo hag̃ua Departaménto de Servísiope añatende hag̃ua Malaui ha Mozambique rehe. Umi ermanokuéra oĩva Maláuipe ningo ojepersegi vaieterei vaʼekue. Ha pe asignasión arekóvape atradusi vaʼerã avei umi infórme ombou vaʼekue umi superintendénte de sirkuíto Malauipegua. Peteĩ kaʼarúpe ambaʼapo aja tárde peve, alee hína umi infórme ha ahechávo mbaʼeichaitépa umi ñane ermanokuéra ohasa asyeterei ojepersegi rupi chupekuéra, ambyasyeterei. a Ahechávo haʼekuéra mbaʼeichaitépa ijerovia mbarete, upéva chemokyreʼỹ avei chéve ikatu hag̃uáicha che jerovia mbarete ha chefiél Jehovápe (2 Cor. 6:4, 5).

Ore rojapo ikatúva guive umi ermanokuéra oĩva gueteri Maláuipe térã ojerrefuhia vaʼekue Mozambíquepe ikatu hag̃uáicha oreko umi puvlikasión bíblica. Pe ekípo de traduksión chichewapegua, haʼéva pe idióma oñeñeʼẽvéva Maláuipe ova peteĩ ermáno gránhape oĩva Zimbábuepe. Upe ermáno ikalidaiterei vaʼekue ha ojapo voi chupekuéra la hogarã ha peteĩ ofisína. Upépe haʼekuéra osegi ojapo pe traváho iñimportantetéva otradusívo umi puvlikasionkuéra.

Ore rohecha umi superintendénte de sirkuíto Malauipegua oho hag̃ua pe asambléa de distríto ojejapóva idióma chichéwape káda áño Zimbábuepe. Ha haʼekuéra oĩ vove pe asambléape oñemeʼẽ chupekuéra umi ivoského de diskúrso. Ha oho rire hikuái Maláuipe, oñehaʼãmbaite okomparti umi mbaʼe oaprende vaʼekue umi ermanokuérandi. Peteĩ áño ou haguépe hikuái, ikatu kuri roorganisa pe Eskuéla del Ministério del Rréino romokyreʼỹ hag̃ua umi superintendénte ipyʼaguasuetévape.

Febrero de 1975-pe rojapo vaʼekue peteĩ viáhe rovisita hag̃ua umi ermáno oho vaʼekuépe Maláuigui ojerrefuhia hag̃ua Mozambíquepe. Ha rohechakuaa koʼã ermáno ojapoha ikatúva guive osegi hag̃ua pe gía omeʼẽva Jehová organisasión, umíva apytépe oreko hag̃ua pe kuérpo de ansiáno. Umi ansiáno pyahu ohecha ojapo hag̃ua heta aktivida. Por ehémplo, ojapo hikuái diskúrso, olee pe téxto káda diagua ha ohesaʼỹijo pe Ñemañaha, ha ndahaʼéi upéva añónte, avei oreko hag̃ua hikuái umi aty guasu. Haʼekuéra oorganisa pe kámpo de rrefuhiádo umi asambleahapeguáicha, haʼekuéra oreko umi departaménto de limpiésa, de segurida ha avei umi ermanokuéra ikatu hag̃uáicha oreko tembiʼu. Koʼã ermanokuéra ijerovia mbaretéva ningo ikatu ojapo heta mbaʼe Jehová ovendesi rupi chupekuéra, ha avisita rire chupekuéra apyta chekyreʼỹeterei.

Pe áño 1970-pe, pe sukursál Zambiapegua oñepyrũ oñatende Maláuire. Upéicharõ jepe, che asegi apensa umi ermanokuéra ijerovia mbaretévare oĩva Maláuipe, ha pyʼỹinte añemboʼe hesekuéra ojapoháicha avei heta ermáno. Che aime rupi Zimbabue komite de sukursálpe, heta vése añerreuni umi rrepresentánte oúvandi pe sentrál mundiálgui, avei umi ermanokuéra oñenkargávandi Malaui, Sudáfrica ha Zámbiare. Ha siémpre roñemongeta mbaʼépa ikatu rojapove umi ermanokuéra Malauipeguáre.

Ohasávo pe tiémpo, pe persekusión oñepyrũ ivevyive. Ha umi ermáno ojerrefuhia vaʼekue ótro  paíspe, oho jey hetãme Maláuipe. Ha umi opyta vaʼekue Maláuipe ohechakuaa mbaʼéichapa mbeguekatúpe opa ohóvo pe persekusión roguereko vaʼekue. Ha umi país oĩva ag̃ui opermiti testígo de Jehovápe opredika, oñerreuni ha mbeguekatúpe oipeʼa umi mbaʼe oproivi vaʼekue. Ha Mozambique ojapo avei upéicha 1991-pe. Péro ore roñeporandu: “¿Arakaʼe peve piko umi ermáno oĩva Maláuipe ojepersegíta?”.

Pe situasión polítika Malauipegua mbeguekatúpe oñepyrũ okambia ha áño 1993-pe, pe goviérno oipeʼa umi proivisión oreko vaʼekue testígo de Jehová. Upe riremínte peteĩ ermáno haʼéva misionéro oporandu chéve: “¿Peẽ piko peho jeýta Maláuipe?”. Ha che arekóma 59 áño ha haʼe chupe: “Chetujaitereíma ningo aha jey hag̃ua”. Ha upe diaitépe voi rorresivi peteĩ kárta oúva pe Kuérpo Governántegui oreinvitahápe roho jey hag̃ua Maláuipe.

Ore rohayhueterei vaʼekue ore asignasión Zimbábuepe, upévare péva haʼe vaʼekue peteĩ desisión ijetuʼuetereíva oréve g̃uarã. Ore rovyʼaiterei vaʼekue upépe ha roguereko heta amígo. Pe Kuérpo Governánte imbaʼeporãiterei orendive heʼi rupi oréve ikatuha ropyta Zimbábuepe oregustáramo. Ifasilvéta kuri oréve orénte rodesidi mbaʼe tapérupipa rohóta ha ropyta Zimbábuepe. Pyʼỹinte chemanduʼa mbaʼéichapa Abrahán ha Sara oheja pe hóga porãite ohayhuetéva hikuái osegi hag̃ua Jehová gía ijedáramo jepe hikuái (Gén. 12:1-5).

Ore rodesidi rosegitaha Jehová organisasión gía ha roho jey Maláuipe pe 1 de febrero de 1995, kavalete 28 áño haguépe roime rire upépe. Upe riremínte oñeforma peteĩ komite de sukursál, ha upépe oĩ mokõi ermáno ha che, ha ensegída ore rembiapo hetáma roorganisávo umi aktivida jaguerekóva ñande testígo de Jehová.

Peteĩ vendisión tuichaitereíva ningo jahecha mbaʼeichaitépa Jehová ovendesi pe traváho ojejapo vaʼekue. Áño 1993-pe oĩ kuri amo 30.000 puvlikadór rupi, upéi 1998-pe oĩ mas de 42.000, pyaʼeterei ningo hetave umi puvlikadorkuéra. b Oĩ rupi hetaiterei puvlikadór pyahu, pe Kuérpo Governánte oaprova ojejapo hag̃ua peteĩ sukursál pyahu ikatu hag̃uáicha oñeñatende umi ermanokuérare. Upearã ojejogua 12 ektárea yvy Lilongüépe, ha che añeasigna ambaʼapo hag̃ua pe komite de konstruksiónpe.

Ermáno Guy Pierce oĩva pe Kuérpo Governántepe ojapo pe diskúrso de dedikasión mayo  de 2001-pe. Oĩ kuri mas de 2.000 ermáno upepegua, ha la majoría ojapóma mas de 40 áño ojevautisa hague. Koʼã ermáno ningo ohasa vaʼekue hetaiterei mbaʼe ijetuʼúva pe persekusión káusare. Haʼekuéra imboriahuetereíramo jepe, tuichaiterei la ijerovia ha oreko peteĩ amista iporãitereíva Jehovándi. Haʼekuéra ningo ovyʼaiterei kuri ikatúta haguére koʼág̃a ovisita pe Betel pyahu. Ohohápente hikuái pe Betel ryepýpe ohendu umi purahéi oñeʼẽva pe Rréinore, ojepurahéiva al estílo africano. Avyʼaiterei ningo, núnka ndahasaporãiva la peichaite peve. Ahechakuaa mbaʼeichaitépa Jehová ovendesi umi ohasa vaʼekuépe hetaiterei pruéva ijetuʼúva.

Ojejapopa rire pe sukursál, avyʼaiterei arresivívo umi asignasión aha hag̃ua umi Salón del Reino dedikasionrã. Umi kongregasión oĩvape Maláuipe ohupyty avei pe prográma oñemopuʼã hag̃ua pyaʼe umi Salón del Reino oĩhápe umi ermanokuéra imboriahúva. Upe mboyve ningo oĩ kuri umi kongregasión oñerreuníva umi lugár ojejapo vaʼekuépe eukalípto mátagui. Haʼekuéra oipuru kapiʼi la itechorã ha umi vánko ipukúva oguapy hag̃ua. Koʼág̃a umi ermanokuéra kyreʼỹme ojapo ladríllo ikatu hag̃uáicha ojapo umi lugár iporãva ha ipyahúva oñerreuni hag̃ua hikuái. Péro koʼág̃a peve ogustave chupekuéra umi vánko umi Salón del Réinope, pórke haʼetévaicha chupekuéra siémpre ikatúva ijave ótra persóna mas upépe oguapy hag̃ua.

Avyʼaiterei avei ahechávo mbaʼéichapa Jehová oipytyvõ isiervokuérape ijerovia mbarete hag̃ua. Ahecharamoiterei ningo umi ermanokuéra africano imitãvape, pórke haʼekuéra ojeofrese oipytyvõ hag̃ua ha pyaʼeterei oaprende umi mbaʼe Jehová organisasión omboʼéva chupekuéra ha ojapóma voi umi traváho. Upéicha rupi haʼekuéra ikatúma oñenkarga hetave mbaʼére Betélpe ha kongregasionkuérape. Umi kongregasiónpe omombareteterei avei umi superintendénte de sirkuíto lokál oñenombra ramóva, heta umíva apytégui omendáva vaʼekue. La majoría umi hénte ha iparientekuéra ohaʼarõ koʼã matrimónio oreko mitã. Upéicharõ jepe, haʼekuéra odesidi ndorekomoʼãiha koʼag̃aite ikatu hag̃uáicha ojapo heta mbaʼe Jehovápe g̃uarã.

Roime rire 52 áño Áfricape, che añepyrũ cherasykatu. Upémarõ pe Kuérpo Governánte oaprova pe komite de sukursál orrekomenda vaʼekue ikatu hag̃uáicha rova Gran Bretáñape. Rombyasy kuri rohejáta haguére pe asignasión rohayhuetéva, péro pe família Betel Gran Bretañapegua oñangareko porãiterei orerehe oreeda riréma.

Che aime konvensído adesidi porãiterei hague ahejávo Jehovápe chegia tape porãre. Che ajeroviárire chejehénte kién sáve mbaʼépa oiko vaʼerãmoʼã chehegui kuri. Jehová ningo oikuaa entéro mbaʼe aikotevẽva ikatu hag̃uáicha ‘chegia aha hag̃ua pe tape porãre’ (Prov. 3:5, 6). Chemitãrõ guare ahecharamoiterei vaʼekue umi mbaʼe aaprendéva pe fávrika tuichaite ambaʼapo haguépe. Jehová organisasión ningo omeʼẽ chéve hetaitereive mbaʼe porã. Chembovyʼaiterei adesidi haguére aservi Jehovápe ha asegi rupi ajapo upéva.