1. ¿Mbaʼépa ojapo vaʼekue Jehová, Adán ha Eva opeka riremi? (Génesis 3:15).

 ADÁN ha Eva opeka riremi, Jehová omeʼẽ vaʼekue esperánsa umi ifamiliarépe peteĩ profesía iñimportantetereíva rupive. Ha upéva jatopa hína Génesis 3:15-pe (elee).

2. ¿Mbaʼérepa iñimportantete pe profesía oĩva Génesis 3:15-pe?

² Upe profesía jatopa hína pe primer lívro de la Bíbliape. Péro enterove lívro oĩva la Bíbliape ningo oreko algúna koneksión ko profesíandi. Umi páhina orekóva umi lívro oñeuniháicha oñondive, upéicha avei umi mbaʼe heʼíva Génesis 3:15 ouni oñondive kompletoite umi lívro oĩva la Bíbliape, pórke oñeʼẽ peteĩ mensáherente. Upéva heʼise Ñandejára omboúta hague peteĩ Salvadór ohundítava Satanáspe ha enterove umi isegidorkuéra iñañaitévape. b ¡Ajépa tuichaite vendisión upéva enterove umi ohayhúvape g̃uarã Jehovápe!

3. ¿Mbaʼépa jahecháta ko artíkulope?

³ Ko artíkulope ñañeʼẽta Génesis 3:15 rehe ha ñakontestáta koʼã pregúnta: ¿Máva mávarepa oñeñeʼẽ hína pype? ¿Mbaʼéichapa oñekumplíma ko profesía? ¿Ha mbaʼéichapa ñanevenefisia hína péva koʼág̃a?

4. ¿Mávapa hína ‘pe mbói’, ha mbaʼéichapa jaikuaa upéva?

⁴ Génesis 3:14, 15-pe ningo oñeñeʼẽ hína peteĩ ‘mbói’ rehe, pe ‘mbói familiarére’, peteĩ “kuña”, ha pe ‘kuña familiarére’.  La Biblia ñanepytyvõ jaikuaa hag̃ua mávapa hína umíva. c Jahechamína koʼág̃a mávapa hína ‘pe mbói’. Peteĩ mbói ningo ndaikatumoʼãi kuri ontende la Jehová heʼíva pe hardín de Edénpe. Upévare la Jehová okondenáva haʼémante vaʼerã peteĩ ikatúva ontende la Jehová heʼíva. ¿Péro mávapa rakaʼe? Apocalipsis 12:9 omyesakã porã ñandéve mávapa pe mbói. Upépe hesakã porãiterei oñeñeʼẽha Satanás el Diáblore heʼívo “pe mbói ypykue”. ¿Péro máva mávapa hína pe mbói familiare?

5. ¿Máva mávapa hína pe mbói familiare?

⁵ La Biblia ningo sapyʼánte oipuru pe palávra familiare oñeʼẽ hag̃ua umi osegívare ótro ehémplo, ha upévare ikatu voi ojeʼe hesekuéra haʼeha ifamiliare. Upéicharõ, pe mbói familiare haʼe hína umi ánhel ha umi persóna naiñeʼẽrendúiva. Haʼekuéra osegi Satanás ehémplo ha oñemoĩ mbarete Jehová ha ipuévlo kóntrape. Umíva apytépe oĩ hína umi ánhel oheja vaʼekue iñasignasión yvágape yma Noé tiémpope, ha avei umi persóna iñañáva oñekomportáva hína itúa Satanás el Diábloicha (Gén. 6:1, 2; Juan 8:44; 1 Juan 5:19; Jud. 6).

6. ¿Mbaʼérepa ikatu jaʼe “pe kuña” oñeñeʼẽvare pe profesíape ndahaʼéi hague Eva?

⁶ Koʼág̃a tekotevẽ avei jaikuaami mávapa hína “pe kuña”. Ndaikatúi jaʼe haʼe hague Eva. ¿Mbaʼérepa? Jahechamína. Pe profesía heʼi pe kuña familiare ‘ombochipetaha’ pe mbói akã. Jahecháma haguéicha pe mbói haʼe hína Satanás, pe ánhel iñañaitéva, ha ndahaʼéi peteĩ persóna iñimperféktova la orekótava pe kapasida ombochipe hag̃ua chugui la iñakã. Upévare jaikuaase mbaʼéichapa Satanáspe oñehundíta.

7. Heʼiháicha Apocalipsis 12:1, 2, 5, 10-pe, ¿mávapa hína pe kuña oñeñeʼẽha Génesis 3:15-pe?

 ⁷ Pe último lívro oĩva la Bíbliape omombeʼu ñandéve mávapa pe kuña oñeñeʼẽha Génesis 3:15-pe (elee Apocalipsis 12:1, 2, 5, 10). Kóva ningo ndahaʼéi vaʼekue peteĩ kuña oĩva ko yvy ape ári. Ko kuña oreko ipy guýpe pe jasy ha iñakãre oreko peteĩ koróna ojejapóva 12 estréllagui. Ha la imemby ndahaʼéi avei oimehaichagua: Upéva hína pe Ñandejára Rréino. Ko Rréino ningo oĩ yvágape, upévare ko kuña haʼémante vaʼerã avei yvagapegua. Haʼe orrepresenta hína Jehová organisasión, pe párte oĩva yvágape, ha upévape oĩ umi ánhel ifiélva (Gál. 4:26).

8. ¿Mávapa hína pe kuña familiare iñimportantevéva, ha arakaʼépa oiko rakaʼe chugui upéva? (Génesis 22:15-18).

⁸ La Biblia ñanepytyvõ avei jaikuaa hag̃ua mávapa pe kuña familiare iñimportantevéva. Ko familiare haʼe vaʼerã kuri Abrahán familiare (elee Génesis 22:15-18). Ha pe profesía heʼi haguéicha, Jesús haʼe vaʼekue Abrahán familiare (Luc. 3:23, 34). Péro ko familiare ipoderosove vaʼerã kuri peteĩ umánogui, pórke haʼe ombochipe vaʼerã Satanás el Diablo akã ha ohundi chupe. Upévare Jesús orekórõ guare 30 áñorupi, chupe oñeunhi vaʼekue espíritu sánto rupive. Upéicharõ Jesúspe oñeunhírõ guare, oiko chugui pe kuña familiare iñimportantevéva (Gál. 3:16). Upéi Jesús omano ha orresusita rire, Ñandejára ‘omeʼẽ chupe autorida ha ombotuicha chupe’ ha ‘omoĩ voi ipoguýpe entéro mbaʼe oĩva yvágape ha ko yvy ape ári’. Omeʼẽ avei chupe pe autorida “ohundi hag̃ua pe Diablo rembiapokue” (Heb. 2:7; Mat. 28:18; 1 Juan 3:8).

9, 10. a) ¿Máva mávapa oĩ avei pe kuña familiare apytépe, ha arakaʼe guivépa? b) ¿Mbaʼépa avei jahecháta koʼág̃a?

⁹ Péro ndahaʼemoʼãi kuri Jesús añónte haʼétava pe kuña familiare. Apóstol Pablo heʼi vaʼekue umi unhído haʼévape judío ha umi ótra nasionguápe: “Peẽ haʼéramo Cristo disípulo, upéicharõ peẽ hína Abrahán familiare, ha ikatu pehupyty pe erénsia oñepromete vaʼekue Abrahánpe” (Gál. 3:28, 29). Jehová ounhívo umi kristiánope espíritu sánto rupive, oĩma avei hikuái pe kuña familiare apytépe. Upéicharõ pe kuña familiarépe oĩ hína Jesucristo ha umi 144.000 ogovernátava hendive (Apoc. 14:1). Ha enterove koʼãva ningo oñehaʼã opensa, ojapo ha oiko pe Itúa Jehováicha.

¹⁰ Koʼág̃a ñande jaikuaáma máva mávarepa oñeñeʼẽ hína Génesis 3:15-pe. Upévare mbykymi jahecháta avei mbaʼépa Jehová ojapóma okumpli hag̃ua ko profesía, ha mbaʼéichapa upéva ñanevenefisia hína koʼág̃arupi.

11. ¿Mbaʼéichapa pe kuña familiarépe ojesuʼúta kuri “ipytápe”?

¹¹ Heʼiháicha pe profesía oĩva Génesis 3:15-pe, pe mbói oisuʼu vaʼerã kuri pe kuña familiarépe “ipytápe”. Upéva oñekumpli vaʼekue Satanás ojevalérõ guare umi judío ha rrománore ojuka hag̃ua Ñandejára Raʼýpe (Luc. 23:13, 20-24). Jaikuaa ningo peteĩ persóna orekóva peteĩ erída ipytápe ndaikatuiha oguata peteĩ tiémpore, upéicha avei Jesús ndaikatúi vaʼekue ojapo mbaʼeve omano ha oĩrõ guare pe sepultúrape haimete 3 díarupi (Mat. 16:21).

12. ¿Arakaʼe ha mbaʼéichapa oñembochipéta pe mbói akã?

¹² Pe profesía oĩva Génesis 3:15-pe ohechauka Jesús ndaikatúi hague osegi pe sepultúrape. ¿Mbaʼérepa? Pórke heʼiháicha pe profesía, pe kuña familiare ombochipe vaʼerã pe mbói akã. Upéva heʼise Jesús orresusita vaʼerãha. Ha upeichaite oiko vaʼekue, 3 día  omano haguépe Jesús orresusita ha oñemeʼẽ chupe yvágape peteĩ vída ndaikatumoʼãiva oñehundi. Ha Ñandejára ningo orekóma hína pe tiémpo Jesús ohundietetahápe Satanáspe (Heb. 2:14). Jesucristo ha umi ogovernátava hendive ohundíta Ñandejára enemigokuérape, umi haʼévape pe mbói familiare (Apoc. 17:14; 20:4, 10). d

13. ¿Mbaʼéichapa ñanevenefisia oñekumpli haguére ko profesía?

¹³ Oiméramo nde haʼe Ñandejára siérvo, ko profesía oñekumpli haguére nevenefisia hína ndéve. Jesús ningo ou vaʼekue peteĩ yvypóraicha ko yvy ape ári. Haʼe ohechauka porãiterei vaʼekue mbaʼeichaguápa Itúa (Juan 14:9). Upévare ñaaprendévo Jesúsgui jaikuaa ha jahayhu avei Ñandejára Jehovápe. Avei ñanevenefisia umi mbaʼe Jesús omboʼéva, ha mbaʼéichapa haʼe odirihi pe kongregasión koʼág̃arupi. Haʼe ñanemboʼéma avei mbaʼéichapa jaiko vaʼerã ikatu hag̃uáicha ñaime porã Jehová renondépe. Ha Jesús omano haguére térã ojesuʼu haguére chupe ipytápe, enterovépe ikatu ñanevenefisia. ¿Mbaʼérepa jaʼe upéva? Haʼe orresusita rire, opresenta Jehovápe pe huguy repykue ‘ñanemopotĩva opaichagua pekádogui’ (1 Juan 1:7).

14. ¿Mbaʼéichapa jaikuaa pe profesía oñemeʼẽ vaʼekue Edénpe noñekumplipái hague upepete voi? Emyesakã.

¹⁴ Umi mbaʼe Jehová heʼi vaʼekue Edénpe, ohechauka ohasa vaʼerãha peteĩ tiémpo oñekumplipa hag̃ua pe profesía. Un tiémpo haguépemante ikatúta kuri pe kuña oreko ifamiliare, Satanás ombyaty isegidorkuéra ha avei oiko chuguikuéra oñoenemígo, térã ndochaʼéi ojuehe koʼã mokõi grúpo. Ñandéve ningo ñanevenefisia jaikuaávo ko profesíagui, pórke ñandeavisa ko múndo oĩva Satanás poguýpe ndaijaʼemoʼãiha umi oadorávare Jehovápe. Tiémpo rire Jesús oavisa vaʼekue avei idisipulokuérape peichataha (Mar. 13:13; Juan 17:14). Ha upeichaite oiko, ñande ningo jahecháma mbaʼéichapa oñekumpli ohóvo ko profesía, ha koʼytevéntema umi 100 áño ohasa vaʼekuépe.

15. ¿Mbaʼérepa ko múndo ndaijaʼeiete pe kuña familiarére, péro mbaʼérepa ñande ndajakyhyjéi Satanásgui?

¹⁵ Jesúspe oñemoĩ riremi Rréiramo Ñandejára Rréinope áño 1914-pe, Satanáspe ojeity yvágagui. Ha haʼe koʼág̃a opyta ko yvy ape ári, ndaikatuvéi oho ótro ládo ha ohaʼarõ hína oñehundi chupe (Apoc. 12:9, 12). Péro upe tiémpo guive haʼe ndahaʼéi opytánteva ohaʼarõ. Haʼe ipochy ha oataka voi Ñandejára puévlope (Apoc. 12:13, 17). Péicha Satanás múndo koʼytevéntema ndaijaʼéi Ñandejára puévlore koʼág̃arupi. Péro ñande ndajarekói mbaʼérepa jakyhyje hag̃ua Satanás ha isegidorkuéragui. Upéva rangue jajerovia apóstol Pablo heʼi vaʼekuére: “Ñandejára oĩramo ñanendive, ¿máva piko oñemoĩta ñanderehe?” (Rom. 8:31). Ñande ningo jajerovia voi Jehováre ñande pyʼaite guive, pórke jahecháma mbaʼéichapa pe profesía oĩva Génesis 3:15-pe oñekumplíma hína ohóvo.

16-18. ¿Mbaʼéichapa oipytyvõma Ursula, Curtis ha Jéssicape ontende porãve rupi Génesis 3:15?

¹⁶ Pe promésa jatopáva Génesis 3:15-pe ñanepytyvõ ñambohovái hag̃ua oimehaichagua situasión ijetuʼúva ñande rekovépe. Peteĩ ermáno hérava Curtis, oservíva de misionéro Guámpe, heʼi: “Sapyʼánte ningo oiko cherehe álgo ha upévare ijetuʼu chéve chefiél hag̃ua Jehovápe. Péro ajepyʼamongetávo pe profesía oĩvare Génesis 3:15-pe chepytyvõ asegi hag̃ua ajerovia che Ru yvagapeguáre”.  Cúrtispe hiʼãitereíma og̃uahẽ pe día Jehová oipeʼaitetaha entéro mbaʼe ñanembohasa asýva.

¹⁷ Peteĩ ermána hérava Ursula ha oikóva Baviérape heʼi ontende porã rupi Génesis 3:15-pe heʼíva okonvense hague chupe la Biblia ouha Ñandejáragui. Haʼe ohechakuaa mbaʼéichapa umi ótra profesía oñeʼẽ avei ko profesíare, ha haʼe ohecharamoiterei voi upéva. Ursula heʼi avei: “Ahayhuetereivéntema Jehovápe aikuaárõ guare haʼe ojapo hague álgo omeʼẽ hag̃ua ñandéve esperánsa”.

¹⁸ Jessica, peteĩ ermána Micronesiagua heʼi: “Koʼág̃a peve chemanduʼa mbaʼéichapa añeñandu vaʼekue aikuaa ypýrõ guare Jehovápe. Pe profesía oĩva Génesis 3:15-pe oñekumplíma hína raʼe. Upéva chepytyvõ ahechakuaa hag̃ua umi mbaʼe ñanembohasa asýva ndahaʼeiha la Jehová oipota vaʼekue ñandéve g̃uarã. Ko profesía omombarete avei che jerovia de ke jaservíramo Jehovápe jaiko porãvetaha koʼág̃ama voi ha amo gotyove avei”.

19. ¿Mbaʼérepa ikatu ñaime segúro katuete oñekumplipataha pe párte ofaltáva gueteri oĩva pe profesíape?

¹⁹ Jahecháma haguéicha Génesis 3:15 oñekumpli hína koʼág̃a. Jaikuaa porãma mávapa pe kuña familiare ha mávapa pe mbói familiare. Jesús ningo haʼe pe kuña familiare iñimportantevéva, haʼe ojerrekuperáma pe ojesuʼu hague chupe ipytápe, ha koʼág̃a oikóma chugui peteĩ Rréi ipoderósova ha ikatuʼỹva omano. Koʼág̃a Jehová haimetéma oiporavopa enterove umi ogovernátavape Itaʼýrandi yvágape, umíva haʼe hína pe párte sekundária oĩva pe kuña familiare apytépe. Ha oñekumplíma rupi pe primera párte oĩva ko profesíape, ñande ikatu jajerovia ñande pyʼaite guive oñekumplitaha pe ótra párte ofaltáva gueteri. Katuete ningo oñembochipéta pe mbói akã. Añetehápe Ñandejára siervokuéra ovyʼaitereíta ág̃a Satanáspe oñehundi vove. Péro upe tiémpo og̃uahẽ mboyve, aníkena ñañentrega. Jajeroviákena Ñandejára Jehováre. Pe kuña familiare rupive haʼe oguerúta hetaiterei vendisión ‘entéro nasiónpe’ (Gén. 22:18).