Jesús ningo omboʼe vaʼekue la héntepe oiko hag̃ua pyʼaguapýpe oñondive. Péro peteĩ vuéltape, haʼe heʼi ijapostolkuérape: “Ani pepensa che aju hague agueru hag̃ua pyʼaguapy ko yvy ape ári. Che ndajúi agueru hag̃ua pyʼaguapy, síno división. Che aju umi hénte oiko vai hag̃ua, taʼýra opuʼãta itúare, ha isýre opuʼãta imembykuña, ha nuéra opuʼãta isuégra rehe” (Mat. 10:34, 35). ¿Mbaʼépa la heʼise vaʼekue Jesús?

Jesús nomopuʼãséi vaʼekue umi familiakuérape ojuehe, péro haʼe oikuaa vaʼekue umi mbaʼe omboʼéva odividitaha umi famíliape. Upévare umi oikoséva Jesús disípuloramo ha ojevautisaséva, tekotevẽ ontende ikatuha oĩ umi ihentekuéra ndogustáivape la haʼe odesidíva. Sapyʼánte ikatu voi iména térã hembireko térã ótro ihentekuéra oñemoĩ hese, ha upévare ikatu ijetuʼu chupe osegi hag̃ua okumpli umi mbaʼe Jesús omboʼe vaʼekue.

La Biblia omokyreʼỹ kristianokuérape ‘oiko hag̃ua pyʼaguapýpe hapichakuérandi’ (Rom. 12:18). Péro ikatu oĩ umi família ojedividíva Jesús omboʼéva káusare. Péva oiko jepi peteĩ famíliape oĩramo oaprendéva umi mbaʼe Jesús omboʼe vaʼekue ha ótro katu orrechasa térã oñemoĩ voi hese. Upéicharõ, pe persóna rogayguágui voi oiko ‘iñenemígo’ pórke haʼe oaprende hína Jehovágui (Mat. 10:36).

Cristo disípulo orekóva umi hogaygua ótra rrelihiongua, sapyʼánte odesidi vaʼerã ombovyʼátapa Jehová ha Jesúspe térãpa ombovyʼáta umi hogayguápe. Por ehémplo umi ihentekuéra ndahaʼéiva Testígo ikatu ojopy chupe ofesteha hag̃ua umi arete irrelihionpegua. Upéicha jave haʼekuéra odesidi vaʼerã mávandipa opyta porãse. Jesús heʼi vaʼekue: “Pe ohayhuvéva itúa térã isýpe chéve rangue, nomereséi oiko che disípuloramo” (Mat. 10:37). Jaikuaa ningo Jesús ndeʼiséi hague la ñamerese hag̃ua jaiko idisípuloramo ndajahayhuvéima vaʼerãha ñande tuakuérape. Péro ñanemboʼe jadesidi hag̃ua mbaʼépa la iñimportanteve vaʼerã ñandéve ñande rekovépe. Umi ñande rogaygua oñemoĩramo jepe ñane kóntrape jaadora haguére Jehovápe, ñande jasegi jahayhu chupekuéra, péro jaikuaa porã jahayhuve vaʼerãha Jehovápe.

Jaikuaa ningo ijetuʼuetereiha umi ñande rogaygua oñemoĩramo ñane kóntrape. Upéicharõ jepe ñanemanduʼa vaʼerã la Jesús heʼi vaʼekuére: “Pe persóna ndoaseptáiva koʼã sufrimiénto ha nachemoirũséiva, péva nomereséi oiko che disípuloramo” (Mat. 10:38). Upéva heʼise, oĩramo peteĩ kristiáno hogaygua oñemoĩva hese, oasepta umi sufrimiénto haʼe haguére Cristo disípulo. Péro pe kristiáno ikondúkta porã rupi oreko la esperánsa umi hogaygua okambiataha la opensa lája ha oikuaasevetaha la Biblia omboʼévagui (1 Ped. 3:1, 2).